Read Navajo ISAIAH 66 Bible Online

ISAIAH 66 - Navajo bible

ISAIAH 66

¹Bóhólníihii kóní, Yádiłhił éí shibik'i dah asdáhí bikáá'dóó nahash'áii át'é, áádóó nahasdzáán éí shibik'i dah adées'eezí át'é; háadish kin shá ádaohłééh? Índa háadish éí shihóoghahgo hanáshyį́įh doo?

²Háálá éí t'áá ałtso ádeishłaa, áádóó éí t'áá ałtso dahazlį́į́', ní Bóhólníihii, nidi díí diné ayáhígo át'éii índa bąąhági át'éii biniinaa ádąąh bíni'ii shizaad yits'ąą yisti'ii bich'į' ídéesh'įįł.

³Béégashii dziisxíinii éí diné dziisxínígíí bił aheełt'é; dibé yázhí náádziisnii'ii éí łééchąą'í bik'os k'ízhníti'ígíí bił aheełt'é; ch'iyáán náájiiłniihígíí éí bisóodi bidił náájiiłniihígíí bił aheełt'é, índa t'áá háiida tsin bijeeh dilidgo łikání halchinii nááhániihii náájiiłniihígíí éí e'elyaii bich'į' nahojiłá nahalin. T'áá aaníí, t'áá bí deinízinígíí bik'ehgo nideideez'ą́, áádóó t'óó baa'ihii yaa naakaígíí bił dahóshǫ́.

⁴Shí ałdó' doo áháyą́ą́góó ádajíít'įįdii t'áá éí hak'ijį' ninádeesh'ááł áádóó béédadzildzidii hak'ijį' kónídeeshdlííł, háálá hach'į' ádííniidgo t'áadoo ła' shich'į' énáhoosin da, índa haasdzíi'go t'áadoo da'diizts'ą́ą' da, nidi shinááł doo yá'áshóonii yaa naaskai áádóó doo baa shił hózhóonii nideideez'ą́.

⁵Nihí Bóhólníihii bizaad bits'ąą dasoohti'ii, t'áá éí dadoohts'į́į́h; nihik'isóó danihijoołháago shízhi' biniinaa ch'ídanihiistł'íidii ádadííniid, Bíni'dii Bóhólníihii baa ha'niih le', áko nihich'į' ííshją́ą́ í'diilyaago nihił dahózhǫ́ǫ doo. Nidi hó t'éí yádazdínóozįįł.

⁶Bóhólníihii bi'ana'í k'éidoodlíiłii biinéé' diits'a'; kin bii' sohodizin si'ą́ą́dóó iinéé' diits'a'; kin haal'áádóó hahóó'áago iinéé' hahosiilts'įįh.

⁷T'áadoo awéé' bídii'néhí ashchį́ índa t'ah doo bił honiigááhgóó ashkii yishchį́.

⁸Háísh ákót'éego ha'át'íhída yaa hodiizts'ą́ą́'? Háísh ha'át'íhída ákódaat'éii yiyiiłtsą́? Dine'é bikéyah daats'í t'áá ła'a jį́ hodooleeł? Éí doodaii', dine'é daats'í t'áá łahjį' t'áá hooshch'į' hodooleeł? Jó, Záíyan awéé' bídii'na'go t'áá áko ba'áłchíní hazlį́į́'.

⁹Bóhólníihii ání, Da' adoochíiłgo íishłaagoósh doo adoochííłgóó ánáádeeshdlííł? NiDiyin God ání, Shí ni'iichíihgo áshłéhígíí da' shíísh doo achíígóó ałdó' ádeeshłííł?

¹⁰Jerúsalem kin haal'á ayóó'ádeínóh'níinii t'áá ánółtso, baa nihił dahózhǫ́ǫgo bił nihił nidahoozhǫǫh; baa yínííł nidaahkaígíí t'áá ánółtso t'áá íiyisí baa nihił nidahoozhǫǫh,

¹¹áko bibe' daołt'o'go hada'íídóołniił áádóó hwiih dadoohłeełígíí biniyé dahodoołt'oł; t'áá íiyisí baa bił hózhónígíí baa nihił dahózhǫ́ǫgo bibe' hadahidoołt'oł.

¹²Háálá Bóhólníihii kóní, Tooh nílį́ nahalingo ach'į' hózhóonii éí há bighą́ą́h nídideestsih áádóó ał'ąą dine'é yee ayóó ádaat'éii tó wó'ą́ą́lį́ nahalingo bá bighą́ą́h nídadi'deestsih, jó' akon, áko índa da'ołt'o' doo, booshk'iizh yee nanihijaah doo áádóó bitsosk'idgi dah nanihijaah doo.

¹³T'áá hamá hahwi'iyoosniidígi át'éego hanihi'diyeeshnih, áádóó Jerúsalemgi hadanihi'diyoolnih.

¹⁴Áádóó díí daołtsą́ągo nihijéí bił nidahoozhǫǫh doo áádóó nihits'in ch'il dit'ódí nahalingo danéeséeh doo áádóó Bóhólníihii bá nidaal'a'í yich'į' ádééhólzin doo índa bi'ana'í yich'į' báháchį'go bił béédahodoozįįł.

¹⁵Háálá Bóhólníihii éí nááts'ó'oołdísii nahalingo kǫ' áádóó bitsindaabąąs bijáád naakiígíí yee doogááł, jó'akon, áko yéego báháchį'ígíí áádóó baa hashke' éí kǫ' dah nídíno'ígíí nahalingo atíhodoolííł.

¹⁶Háálá bits'íís dahólóonii t'áá ałtso Bóhólníihii éí kǫ' áádóó diltłish yee yaa nídóot'įįł, áko Bóhólníihii yiyííghą́ą'ii t'áadoo bee néelą́'í da dooleeł.

¹⁷Dá'ák'eh ałníí'góó bikéézh'dookah biniyé diyingo áda'dilnéehgo ádąąh da'aldéehii, éí bisóodi bitsį' áádóó doo daadáanii índa na'ats'ǫǫsí deildeełgo éí t'áá łahjį' ázhdoodįįł, ní Bóhólníihii.

¹⁸Háálá ádajooníiłii áádóó hantsíkees shił bééhózin; ał'ąą dine'é áádóó bizaad ał'ąą ádaat'éii t'áá ałtso áłah áhodeeshłíłígíí baa hodoolzhish, áko nihizhdookahgo bee ayóó ánísht'éii deizdoołtsééł.

¹⁹Áádóó hatahgi bee ééhózinii ádeeshłííł índa yisdádahaaskaígíí ał'ąą dine'é bitahgóó dahodeesh'aał: Társhish áádóó Pul índa Lud kédaayahgóó éí ałtį́į́' nídeidiłts'ǫ'ii áádóó Túbal kéyahgóó índída Jéívan kéyahgóó áádóó doo deeghánídi kéyah táyi'dę́ę́' hadaaz'áágóó kéédahat'íinii bee shaa ha'niihii t'ah doo deidiits'į́įh daígíí índa ayóó ánísht'éii t'ah doo dayiiłtséeh daígíí bitahgóó dahodeesh'aał, áádóó ał'ąą dine'é bitahgóó ayóó ánísht'éii yaa dahalne' doo.

²⁰Ákohgo Ízrel dine'é éí náádeidiyoołnihii łeets'aa' chin bąąh ádinii yee Bóhólníihii bikin bii' sohodizin si'ą́ąjį' da'íkaahígi át'éego Jerúsalemdi shidził diyinii si' ą́ąjį' ał'ąą dine'é t'áá ałtso bitahdóó łį́į́' bee índa tsindaabąąs bijáád naakiígíí bee áádóó diné bee nidaajahígíí bee áádóó dzaanééz bee índa naaldlooshii dadilwo'ii bee nihik'isóó danilíinii Bóhólníihii bich'į' nááhániihgo nideidiyoo'ish, ní Bóhólníihii.

²¹Éí bitahdóó nááda'iiłniihii áádóó Líívai dine'é danilį́į dooleeł biniyé ałdó' ła' nídideeshnił, ní Bóhólníihii.

²²Áko yádiłhił ániidíii índa nahasdzáán ániidíii ádeeshłíłígíí shidáahgi hólǫ́ǫ dooleełígi át'éego na'áłchíní áádóó nízhi' t'áá hólǫ́ǫ doo, ní Bóhólníihii.

²³Áádóó t'áá dah yiitą́ą́dóó dah náánéiitą́ąjį' índa t'áá háá'áyį́į́h jį́ ná'oodleeł bik'eh ał'ąą dine'é t'áá ałtso shidáahjį' áłah náádleełgo shich'į' nidahałáa doo, ní Bóhólníihii.

²⁴Áádóó dah didookahgo ła' bee haz'áanii dayiizti'ii éí bits'íís daneeznánígíí deiníł'į́į doo; jó, baa da'ashch'oshígíí doo dadínóonéeł da áádóó dadéek'ą́ąhii doo dadínóotsis da índa bits'íís daniłchongo diné t'áá ałtso doo hat'áahjį' na'aldeeh da doo.