Read Navajo ISAIAH 8 Bible Online

ISAIAH 8 - Navajo bible

ISAIAH 8

¹Ákohgo Bóhólníihii áshidííniid, Naaltsoos yisdisii nitsaaígíí nídii'aahgo bik'e'íłchí, Haneetehee naalye'é, naalye'é tsį́į łgo yisná.

²Náá'iiłniihii nilíinii Yuráíyah áádóó Jiiberiikáíyah biye' Zekaráíyah éí shá oo'íinii nilį́į doo biniyé nídiinil.

³She'asdzą́ą́ baa níyá, áádóó i'niiltsąądgo ashkii yishchį́. Áko Bóhólníihii áshidííniid, Meihiir-shéíleil-héísh-baz bee yidíízhiił.

⁴Háálá awéé' éí, Shizhé'é, doodaii', Shimá, níi dooígíí t'ah doo bił bééhoozįįhgóó Asíriya dine'é aláahgo binanit'a'í binááł Damáskas kin haal'áagi da'ílíinii áádóó Samériya kin haal'áagi naalye'é ałtso adeidiyooyééł.

⁵Bóhólníihii ánááshidoo'niidgo ání,

⁶Díí dine'é éí Silówamgi tó hazhó'ógo hadaazlínígíí doo deinízingóó, áádóó Ríízin índa Remaláíyah biye' yaa bił nidahoozhǫǫhgo

⁷éí bąą k'ad jó'akon, Bóhólníihii éí tooh nílínígíí bidziilgo áádóó t'óó ahayóigo hak'ijį' kwíidoolííł; éí Asíriya dine'é aláahgo binanit'a'í áádóó yee ayóó át'éii át'é, áádóó bitooh yílzée'go nílíinii ałtso wó'ądahizdoołhał

⁸índa Júdah kéyahgóó adahizdoołhałgo tó de anool'ąąłgo ak'osgo dínóol'ąął, áko Imányowel nílíinii, nikéyahgi t'áá át'é bit'a' yik'íidoołtih.

⁹Dine'é danohłíinii, t'áá nihí wołí bee ádaaht'į́įgo áádóó kódaníshéhégo ałtso nidahidoołtǫǫł; kéyah nidahonees'ą́ą́dę́ę́' nidaahkaígíí da'íísínółts'ą́ą́': t'áá nihí áká dasoołzaazgo kódaníshéhégo ałtso nidahidoołtǫǫł; t'áá nihí áká dasoołzaazgo kódaníshéhégo ałtso nidahidoołtǫǫł.

¹⁰Ahíidohkahgo baa nídaaht'į́į nidi, t'áadoo nídoodleełí da; yádaałti' nidi, doo bihodoolníił da, háálá Diyin God éí nihił hólǫ́.

¹¹Jó, Bóhólníihii ayóó át'éego bidziilii shich'į' haadzíi'go díí diné ádaat'ínígíí t'áadoo ákót'éego nanináhí, shidííniidgo ání,

¹²Nihiya'iidleeh, daanínígíí ni t'áadoo ákódíníní, nidi yik'ee bił daayé'ígíí t'áadoo bik'ee nił yé'í, doodaii' t'áadoo náníldzidí.

¹³T'áá ałtsoní bee Bóhólníihii t'éí díínísin; bíni'dii t'áá bí t'éí bik'ee nił yéé' índa bíni'dii t'áá bí t'éí bééníldzid.

¹⁴Áko bine' a'niichéehii nilį́į dooleeł, ákondi Ízrel dine'é t' áá áłah bich'į' tsé yiniinaa dahidigeehii índa tsé yiniinaa ádił ayoolzihii át'ée doo. Áádóó Jerúsalemgi kéédahat'ínígíí bich'į' tł'óół naneesdiz áádóó łoh nidoo'nił.

¹⁵T'óó ahayóí dahidigeehgo naa ahindéehgo k'ída'astǫ' doo, áádóó łoh yiih dahaaskaigo yisnááh daazlį́į' doo.

¹⁶Bee ak'e'ashchíinii bee bééhániihii béé'ítł'ó; shídahooł'aahii bitahgóó bee haz'áanii bidádi'níłjeeh.

¹⁷Bóhólníihii nayíníshłíigo éí Jéíkab ba'áłchíní ahoolchíiłii yits'ąą binii' neinił'inii bíká dínísh'į́į' doo.

¹⁸Shoo, t'áá ałtsoní bee Bóhólníihii Dził Záíyan bighą́ą'di kééhat'íinii éí shí áádóó áłchíní sheinínilígíí Ízrel dine'é bitahgi bee éédahózinii áádóó t'óó bik'eda'ayóii daniidlį́.

¹⁹Áko ádanihidííniidgo, Ch'į́įdii yádabiiłti'ii áádóó níłch'i bi'iiníziinii biyi'dóó yádaałti'ii éí tsídii ánínígi át'éego áádóó t'áá ádíyi'ígóó bii' nahodi'ni'ii hádaaht'į́į doo. Da' dine'éésh biDiyin God nideídíłkid dooleeł nít'éé'? Da' dahináanii bá daneeznáanii bich'į' nida'ídíłkidgoósh yá'át'ééh?

²⁰Bee haz'áanii áádóó yee haadzíi'ii baa ákodanohsin; díí saadígíí doo yik'ehgo yádaałti'góogo, adinídíín bii' ádaadingo biniinaa ákódaaní.

²¹Bich'į' nidahwii'náago áádóó dichin danilį́įgo kéyahgóó ch'ééh nidaakai doo. Áádóó ákódzaago dichin bi'niighą́ą'go ádá dahodoolchįįłgo aláahgo binanit'a'í áádóó biDiyin God dayódziih doo índa yót'ááhgóó ch'ééh dadéez'į́į' doo.

²²Áko nahasdzáán yich'į' dadéez'į́į́' áádóó shoo, ach'į' nahwii'ná índa chahałheeł, yínííł bik'e'íyée'ii bee chahałheełgo dayiiłtsą́. Áko éí ayóó át'éego chahałheełígíí biyi' góne' abidí'nóolkał.