Read Navajo ISAIAH 9 Bible Online

ISAIAH 9 - Navajo bible

ISAIAH 9

¹Azhą́ ákót'ée nidi, éí yínííł nilį́į́ nít'éé' yę́ę chahałheeł bá ádin doo. Átsé hoolzhiizhígíí biyi' Zébyulan kéyahgi áádóó Náftalai kéyahgi dine'é doo dabidi'nidzingóó áyiilaa, nidi akéédę́ę́' hoolzhishígíí biyi' be'ek'id bich'į'go tooh Jórdan biláahdi Gálilii kéyahgi ał'ąą dine'é kéédahat'ínígi ayóó áhonóolningo íidoolííł.

²Diné éí chahałheeł yii' dayíkááh yę́ę ayóó át'éego adinídíingo dayiiłtsą́; kéyahgóó anoonééł bichaha'ohgi kéédahat'ínígíí ayóó át'éego bił ch'ída'deezdláád.

³Nidine'é ayóó át'éego k'ee'ąą yilzhishgo ádíílííł; bibee ił hózhóonii k'ee'ąą nídoolzhish; agizh yaa bił dahózhónígi át'éego índa diné danilíinii naalye'é ałts'ádadi'nilígi át'éego ninááł bił nidahoozhǫǫh doo.

⁴Háálá azéédéetį́hí bee bich'į' nidaho'diilná yę́ę áádóó biwosgi gish sitánígíí índa tsihał bee bide ádahólzin yę́ę bits'ą́ą́' dahíníti'; éí Mídiyan dine'é abi'dool'įįdígi át'éego áhoodzaa.

⁵Jó, hahóó'áagi siláo dabikénééz índa dabi'éétsoh dił bik'i daashchxii'go bee dahakǫ' doo biniyé át'ée doo.

⁶Háálá awéé' nihá bi'dizhchį́, aye' nihaíltį́; naat'áanii yee hoo'áałii biwos bąąh siláa doo, áádóó bízhi' éí Ayóó'át'éego Kót'é Níinii, Diyin God Ayóó'ábóodziilii, Hool'áágóó aTaa' Nilíinii, Hózhǫ́ǫ́jí Yinant'áii, bidi'níi doo.

⁷David bibikáá'dóó nahat'áii índa bee bóhólníihgo bił haz'áanii éí kodóó índa ahool'áágóó ts'ídá t'áá ó'óle' góne' át'éii áádóó t'áá ákogi át'éii chánahgo áádóó bidziilgo íidoolíiłgo bibee hoot'áałii índída bibee asht'ehodít'éii ts'ídá doo bá nihonít'i'góó k'ee'ąą yilzhish dooleeł. T'áá ałtsoní bee Bóhólníihii t'áá íiyisí bóhoneedlį́įgo díí yi'doolííł.

⁸Bóhólníihii éí Jéíkab yich'į' hane' áyiilaa, áádóó Ízrel dine'é yik'i hoole'.

⁹Áko diné t'áá ałtso bił béédahózin dooleeł; Íífreiyim dine'é áádóó Samériyagi kéédahat'ínígíí éí ádaa deidzódlíigo áádóó bijéí dáátł'isgo ádaaní,

¹⁰Hashtł'ish dááltł'isígíí naa'adahaasdááz, nidi tsé hasht'edaalyaago bee kin ninádadiit'ááł; síkamor tsin naazkaadígíí yaa nidahaasti', nidi deíl'á yę́ęgi gadtsoh anídahidiitsih.

¹¹Éí bąągo Bóhólníihii éí aláahgo naat'áanii Ríízin bits'ą́ą́dóó ana'í danilíinii hak'ijį' danilį́įgo áádóó hweda'ana'í hoł háádahoniłchxa'go íidoolííł;

¹²Síriya dine'é alą́ąjį' áádóó Filístiya dine'é éí akéédę́ę́' hookahgo, áko éí bizéé' ąą át'éego Ízrel dine'é adeidoomał. Azhą́ díí t'áá ałtsojį' kóhoolaa nidi, t'ah hach'į' báháchį'go hak'ijį' k'ídées'nii'.

¹³Diné atíjiilaaígíí t'áadoo hach'į' nináhaaskai da, doodaii' t'áá ałtsoní bee Bóhólníihii t'áadoo háádeineeztą́ą' da.

¹⁴Éí bąągo ła'a jį́įjį' Bóhólníihii éí Ízrel bitsiits'iin áádóó bitsee', índa tsin páam bits'ádaoz'a' áádóó lók'aatsoh nahjį' kwíidoolííł.

¹⁵Aląąjį' sizíinii ił nilíinii éí atsiits'iin nilį́, áádóó halne'ii biyooch'íidgo na'nitinii éí atsee' nilį́.

¹⁶Jó, díí diné bá aląąjį' naazíinii yóó'adabii'éésh, áádóó adabi'diisht'eezhígíí ałtso ábi'disdįįd.

¹⁷Éí bąągo bidinééh danilíinii éí Bóhólníihii doo hąą bił hózhǫ́ǫ da dooleeł, áádóó áłchíní dabizhé'é ádaadinii áádóó asdzání bąąh ádahasdįįdii doo yaa a'áhí dínóozįįł da, háálá t'ááłá'í jinítínígo t'óó ádahozhdil'į́ áádóó doo yá'át'éhígi ádajit'į́ índa t'áá ádzaagóó yádajiłti'. Azhą́ díí t'áá ałtsojį' kóhoolaa nidi, t'ah hach'į' báháchį'go hak'ijį' k'ídées'nii'.

¹⁸Jó, doo yá'ádaashóonii kǫ' nahalingo dook'ą́ął łeh; ch'il ahoshí áádóó ch'il deeníní iidiyiiłk'ą́ą́h; dahodíłch'ilgóó yidahodinilgo łid hahaghááh.

¹⁹T'áá ałtsoní bee Bóhólníihii t'óó báhádzidgo báháchįįhgo atí'éł'íinii bee kéyahgi nahodeezk'ą́ą́'; diné éí chizh nahalingo bee hodook'ą́ął doo; diné yił háá'áázh doo yaa hą́ą́h dínóozįįłí da.

²⁰Ła'da nish'náájígo t'áadoo le'é yąąh dah neeshjį́įdgo, nidi t'óó dichin bidí'nóołhééł, áádóó nishtł'ajígo yee ííyą́ą' nidi, doo hwiih nilį́į da doo; diné t'ááłá'í jinítínígo t'áá hó hagaan nijílghał doo.

²¹Manáseh éí Íífreiyim yik'ijį' nilį́į doo; Íífreiyim éí Manáseh yik'ijį' nilį́į doo, áádóó t'áá ła' bizhi'ee Júdah dine'é yik'ijį' nídidoot'ash. Azhą́ díí t'áá ałtsojį' kóhoolaa nidi, t'ah hach'į' báháchį'go hak'ijį' k'ídées'nii'.