Read Navajo LEVITICUS 11 Bible Online

LEVITICUS 11 - Navajo bible

LEVITICUS 11

¹Áádóó Bóhólníihii éí Mózes índa Éran ánéidoo'niid,

²Ízrel dine'é kóbidohní, Ni' bikáá'góó naaldlooshii t'áá ałtso díí kódaat'éhígíí t'éí daohsą́ą dooleeł:

³naaldlooshii dabikéshgaan dahałgizhígíí áádóó doo bita' nida'azbaalii índa nída'at'aałígíí éí daohsą́ą doo.

⁴Ákondi díí éí doo yidą́ą da doo: éí ná'át'aał nidi bikéshgaan doo hałgizh daígíí; ghą́ą́'ask'idii ná'át'aał nidi bikéshgaan doo hałgizh da; éí nihił t'óó badaa'ih.

⁵Áádóó dlǫ́'iigi át'éhígíí éí ná'át'aał nidi bikéshgaan doo hałgizh da; éí nihił t'óó baa'ih.

⁶Índa gah éí ná'át'aał nidi bikéshgaan doo hałgizh da; éí nihił t'óó baa'ih.

⁷Bisóodi éí bikéshgaan hałgizh áádóó doo bita' nideezbaal da, nidi doo ná'át'aał da; éí nihił t'óó baa'ih.

⁸Éí bitsį' doo doodį́įł da; daaztsą́ągo bits'íís doo bídahididoohnáał da; éí nihidoołchxǫǫł.

⁹Díí táyi' nidaaldeehii t'áá át'é kódaat'éhígíí t'éí daohsą́ą doo: tó bii'góó áádóó tónteel bii'góó índa tooh bii'góó bit'a' dahólǫ́ǫgo yee nida'ałkǫ́ǫ'ii áádóó bikágí dadich'íizhii éí daohsą́ą doo.

¹⁰Áádóó tónteel bii'góó índa tooh bii'góó táyi' dahólóonii t'áá ałtso doo bit'a' yee nida'ałkǫ́ǫ' ii áádóó bikágí doo dich'ízhígíí éí t'áá ákónáádaat'éii táyi' dahináanii éí baa'ih danohsin doo.

¹¹Áko éí t'óó baa'ih danohsingo bitsį'ígíí doo daohsą́ą da doo, nidi dabits'íís daaztsą́ągo t'óó baa'ih danohsin doo.

¹²T'áá ha'át'íhída táyi' dahólóonii bit'a' ádinii áádóó bikágí doo dich'ízhígíí éí baa'ih danohsin doo.

¹³Áádóó díí éí t'óó baa'ih danohsin doo; nidaat'a'ígíí doo daadáanii éí baa'ihii ádaat'é: atsá áádóó jeeshóó' índa dzílí

¹⁴áádóó atsá ał'ąą ádaat'éii índa giní,

¹⁵gáagii t'áá ałtso t'áá ał'ąą ádaat'éii,

¹⁶ná'áshjaa' áádóó hooz áádóó biizhii índa giní ał'ąą ádaat'éii

¹⁷áádóó ná'áshjaa' yázhí áádóó toohjį' noołnahii índa ná'áshjaatsoh,

¹⁸ná'áshjaa' łigaígíí áádóó naal'eełí bidaanézí índa atseiłtsoii.

¹⁹Tsídii bijáád danineezígíí áádóó tsídii bik'os nineezígíí ał'ąą ádaat'éii áádóó hóopo wolyéii índa jaa'abaní.

²⁰Ch'osh bit'a' dahólǫ́ǫgo bijáád daadį́'ígíí t'áá ałtso éí t'óó baa'ih danohsin doo.

²¹Ákondi díí éí daohsą́ą doo: éí ch'osh bit'a' dahólóonii áádóó ni'góó nidaakaii índa bijáád dahólǫ́ǫgo ni'góó nidahacha'ii.

²²Díí éí daohsą́ą doo: nahachagitsoh binídaałt'éii áádóó nahachagitsoh bitsiits'iin dilkǫǫhígíí binídaałt'éii áádóó nahák'ízii binídaałt'éii índa nahachagii binídaałt'éii daohsą́ą doo.

²³Nidi náádaała' ch'osh bit'a' dahólǫ́ǫgo bijáád daadį́'ígíí t'áá ałtso t'óó baa'ih danohsin doo.

²⁴Áko díí bee doo nihida'didoodah da: t'áá háiida díí ła' daaztsą́ągo bits'íís bíhizhdéé'ná'ígíí i'íí'ą́ąjį' doo ho'didoodah da.

²⁵T'áá háiida díí daaztsą́ągo bits'íís nidzistínígíí éí ha'éé' jidoogis, áko i'íí'ą́ąjį' doo ho'didoodah da.

²⁶Áádóó naaldlooshii bikéshgaan dahałgizhii nidi doo bita'nideezbaalii áádóó doo nída'at'aałii éí nihił t'óó badaa'ih; t'ááłá'í jinítínígo éí bídahizhdiyii'náhígíí bee doo hoda'didoodah da.

²⁷Naaldlooshii ał'ąą ádaat'éii bijáád daadį́'ígíí bíláshgaan dahólǫ́ǫgo éí nihił t'óó badaa'ih; t'áá háiida éí bits'íís bíhizhdéé'ná'ígíí i'íí'ą́ąjį' doo ho'didoodah da.

²⁸Áko t'áá háiida díí daaztsą́ągo bits'íís nidzistį́įgo éí ha'éé' jidoogis áádóó i'íí'ą́ąjį' doo ho'didoodah da; éí naaldlooshii nihił t'óó badaa'ih.

²⁹Díí ałdó' nihił t'óó badaa'ih doo: ni'góó nidaajeehii éí dlǫ́'ii áádóó na'ats'ǫǫsí índa ch'ééh digháahii binídaałt'éii.

³⁰Índa tsék'ih na'azólii áádóó na'ashǫ́'iiłbáhí łahgo aní'doolníiłii, na'ashǫ́'iiłbáhítsoh, na'ashǫ́'iiłbáhí łitsoii, na'ashǫ́'ii dootł'izhii táyi' dahólóonii.

³¹Díí ni'góó nidaajeehii t'áá ałtso ła' dabitahdóó éí nihił t'óó badaa'ih doo; t'áá háiida díí ła' daaztsą́ągo bíhizhdéé'náa'go éí i'íí'ą́ąjį' doo ho'didoodah da.

³²Áko éí ła' daaztsą́ągo bits'ísígíí t'áá ha'át'íhída choo'íinii éí tsin, doodaii' na'at'ą́hí, doodaii' akágí, doodaii' tł'oh azis bee ádaalyaii yik'ijį' náátłizhgo éí t'óó baa'ih doo, áko éí taah doo'nił, áádóó i'íí'ą́ąjį' t'óó baa'ih doo; kót'éego bi'didéeh doo.

³³Hashtł'ish ásaa' ła' yiih yítłizhgo t'áá ha'át'íhída biyi'ígíí éí t'óó baa'ih doo, áko t'óó doołts'ił.

³⁴Éí ásaa' bii' tóhígíí éí ch'iyáán doodį́łígíí t'áá ałtso bik'ésdáazgo t'óó baa'ih doo, áádóó doodlį́įłii t'áá ałtso éí ásaa' bee sikánígíí t'óó baa'ih doo.

³⁵T'áá ałtsoní bik'ijį' bits'ísígíí náátłizhgo éí t'óó baa'ih doo; kǫ' bá ha'astł'ingi bikáá' abézhígíí, doodaii' ásaa' ditání taidootsxił, háálá t'óó baa'ih; éí nihił t'óó baa'ih doo.

³⁶Ákondi tó háálį́įgo índa tó bá az'ą́ągo ákwii lą'í tógo éí doo t'óó baa'ih da, nidi ats'íís daaztsáanii bíhidéé'náa'ii éí t'óó baa'ih doo.

³⁷Índa bits'ísígíí éí k'eelyéí k'ididoolyéłígíí ła' bíhidéé'náa'go éí doo t'óó baa'ih silį́į' da.

³⁸Nidi tó bee k'eelyéí nástłée'go éí ats'ísígíí bíhidéé'náa'go éí nihił t'óó baa'ih doo.

³⁹Áádóó naaldlooshii dadoołghałígíí ła' t'áá bíni'dii daaztsą́ągo t'áá háiida éí daaztsánígíí bíhizhdéé'náa'go i'íí'ą́ąjį' doo ho'didoodah da.

⁴⁰Áádóó t'áá háiida éí t'áá bíni'dii daaztsáanii bitsį' ła' jííyą́ą'go éí ha'éé' jidoogis, áko i'íí'ą́ąjį' doo ho'didoodah da, áádóó ał dó' t'áá háiida éí daaztsáanii nijistínígíí ha'éé' jidoogisgo i'íí'ą́ąjį' doo ho'didoodah da.

⁴¹Áko ni'góó nidaajeehii t'áá ałtso baa'ihii ádaat'é; éí doo yidą́ą da.

⁴²T'áá ha'át'íhída bibid yee nidaa'na'ii áádóó bijáád dį́į'go yee nidaajeehii, doodaii' t'áá ha'átíhída bijáád t'óó adahayóigo łeeshtahgóó nidaajeehii éí doo yidą́ą da; jó, éí baa'ihii ádaat'é.

⁴³Díí ni'góó nidaa'na'ii ła' bee t'ááká baa'ihgo áda'doołnééh lágo, doodaii' t'ááká éí bee doo bi'didéehii áda'doołnééh lágo, jó, éí nihidoołchxǫǫł.

⁴⁴Háálá shí Bóhólníihii nihiDiyin God nishłį́; éí bąą diyingo ádadi'doołnííł, áádóó dadinohyin doo; jó, shí dinishyin; t'ááká t'áá ha'át'íhída ni'góó nidaa'na'ii ła' bee ádadoołchxǫǫh lágo.

⁴⁵Háálá shí Bóhólníihii nishłį́įgo nihiDiyin God nishłį́į doo biniyé Ííjip kéyahdę́ę́' ch'éénihiní'eezh; éí bąą dadinohyin doo; jó, shí dinishyin.

⁴⁶Díí naaldlooshii áádóó nidaat'a'ii índa táyi'góó dahináanii t'áá ałtso, áádóó ni'góó nidaa'na'ii t'áá ałtso biniyé bee haz'áanii át'é.

⁴⁷Áko díí ał'ąą át'éii át'éhígíí baa nitsókees: badaa'ihígíí áádóó doo badaa'ihígíí índa naaldlooshii daadánígíí áádóó doo daadánígíí.