Read Navajo LEVITICUS 12 Bible Online

LEVITICUS 12 - Navajo bible

LEVITICUS 12

¹Áádóó Bóhólníihii éí Mózes ííłní,

²Ízrel dine'é bich'į' handziihgo kóbidiní, Asdzání ła' izh'niiltsąądgo ashkii jishchį́įgo tsosts'id yiską́ąjį' doo ho'didéeh da doo; ąądii níjídleehígi át'éego doo ho'didéeh da doo.

³Áádóó tseebíí yiską́ągo éí ashkii bąąh náhidínóolgish.

⁴Áko dił bits'ąą ho'didéehgo tádiindóó ba'aan táá' yidoołkááł; ha'át'íhída dadílzinii éí doo bíhizhdidoo'náał da, doodaii' níbaal bii' hodílzin góne' doo yah azhdoogáał da; ałtso ho'díídee'go índa.

⁵Nidi at'ééd jishchį́įgo éí t'áá ąądii níjídleehígi át'éego naakidi damį́įgo azlį́į'jį' doo ho'didéeh da doo, áko dił bits'ąą ho'didéehgo hastą́diindóó ba'aan hastą́ą́h yidoołkááł.

⁶Áko ho'didéehgo yoołkáłígíí bíighah azlį́į'go éí ashkii, doodaii' at'ééd jishchínígíí bá dibé yázhí ła' binááhaígíí didlidgo nááhániihii át'éego áádóó hasbídí łigaii yázhí, doodaii' hasbídí éí ádił ni'iidzííhjí nááhániihii át'éego níbaal bii' dahozdísinii bich'éédą́ą'gi náá'iiłniihii yeidoonił.

⁷Éí Bóhólníihii binááł há k'ééhodoodǫǫł biniyé há néidiyoołnih, áko ąądii jílínígíí bits'ąą ho'díídee' dooleeł. Díí éí ashkii, doodaii' at'ééd nidayiiłchíihii bá bee haz'áanii át'é.

⁸Dibé yázhí hwee ádingo éí hasbídí naakigo, doodaii' hasbídí łigaii yázhí naakigo, ła' didlidgo nááhániihii át'éego áádóó ła'ígíí éí ádił ni'iidzííhjí nááhániihii át'éego yidoojih, áko náá'iiłniihii éí há k'ééhodoodǫǫłgo há néidiyoołnih, áko ho'didéeh doo.