Read Navajo LEVITICUS 13 Bible Online

LEVITICUS 13 - Navajo bible

LEVITICUS 13

¹Áko Bóhólníihii éí Mózes áádóó Éran yich'į' haadzíi'go ííłní,

²Diné ła' bikágí bikáa'gi bąąh hadzííyáago, doodaii' łóód bąąh dah yists'idgo, doodaii' łóód bąąh dah yiigaiigo éí bikágí bikáa'gi łóód ats'íís yiyáanii naałdzidii silį́į'go náá'iiłniihii Éran, doodaii' biye'ké nááda'iiłniihii ła' bich'į' bił dazhdookah.

³Áko hats'íís bąąh łódígíí éí náá'iiłniihii háidínóoł'įįł, áko hakágí bąąh łódígi hatáshtł'oh yiigaiigo índa wóyahgo łóodgo éí naałniih łóód ats'íís yiyáanii naałdzidii át'é, áko náá'iiłniihii hazhó'ó honééł'į́į'go, Doo ni'didéeh da lá, hodidooniił.

⁴Nidi hakágí bąąh éí łóód yéego dah yiigaiigo índa doo wóyahgo łóódgóó áádóó ákwii hatáshtł'oh t'áadoo yiigaiigóó éí naałniih hodoolna'ígíí t'áá sahdii tsosts'id yiską́ąjį' náá'iiłniihii hadádi'doołkał.

⁵Áko tsosts'id yiską́ągo náá'iiłniihii nááhodínóoł'įįł; jó, naałniihígíí t'áadoo łahgo ádzaa dago áádóó t'áadoo k'ee'ąą deeshzhiizh dago éí t' áá sahdii tsosts'id náánéiską́ąjį' náá'iiłniihii hadánáádi'doołkał.

⁶Áádóó tsosts'id náánéiską́ągo náá'iiłniihii nááhodínóoł'įįł; éí naałniihígíí t'óó yiijį́į'go hakágí bąąh t'áadoo k'ee'ąą deeshzhiizhgóó éí náá'iiłniihii, Doo ánít'éhí da, hodidooniił, nidi łóód bisgą' t'éiyá silį́į'go ha'éé' jidoogisgo ho'didéeh doo.

⁷Nidi ho'didééh bééhodoozįįł biniyé náá'iiłniihii honééł'į́į́'dóó bik'ijį' halóód nááltseígíí hakágí bii'góó náádees'nii' ládą́ą́' éí náá'iiłniihii nááhodínóoł'įįł.

⁸Áko náá'iiłniihii éí yiyiiłtsą́ągo łóód nááltseígíí hakágí bii'góó náás dees'nii' lágo, Doo ni'didéeh da lá, hodidooniił; jó, éí łóód ats'íís yiyáanii naałdzidii át'é.

⁹Ákohgo diné ła' łóód ats'íís yiyáanii naałdzidii bidoolna'go éí náá'iiłniihii yich'į' hoł dadookah,

¹⁰áádóó náá'iiłniihii hodínóoł'įįłgo hakágí bikáa'gi bąąh hadzííyáhígíí yiigaiigo áádóó ákwii hatáshtł'oh yiigaiigo índa hąąh hadzííyáhígi łóodgo

¹¹éí ałk'idą́ą́' łóód ats'íís yiyáanii hodoolna' yę́ę át'é, áko náá'iiłniihii éí, Doo ni'didéeh da lá, hodidooniił, áko doo t'áá sahdii hadádi'doołkał da, háálá doo ho'díídee' da.

¹²Nidi łóód ats'íís yiyáanii naałdzidii hąąh hazlį́į'go áádóó t'áá át'é łóód ats'íís yiyáanii naałdzidii t'áá hatsiit'áádóó hakétł'áahjį' haa diiłnii'go náá'iiłniihii éí t'áá át'é łigaigo yiyiiłtsą́ągo

¹³náá'iiłniihii éí łóód ats'íís yiyáanii naałdzidii hakáá'góó t'áá át'é hazlį́'ígíí yinééł'į́į'go éí naałniih hodoolna'ígíí, Doo ánít'éhí da, hodidooniił; jó, t'áá át'é łigaii silį́į́' lá, áko ho'didéeh doo.

¹⁴Nidi hakáá'góó łóód silį́į'go éí doo ho'didoodah da.

¹⁵Áko náá'iiłniihii éí halódígóó há yidínóoł'įįłgo, Doo ni'didéeh da lá, hodidooniił, háálá díí łóód t'óó baa'ih; łóód ats'íís yiyáanii naałdzidii át'é.

¹⁶Doodaii' łódígíí łahgo ánáánádzaago łigaii silį́į'go náá'iiłniihii bich'į' náázhdoodááł.

¹⁷Áko náá'iiłniihii honééł'į́į'go, éí naałniihígíí yiigaiigo yiyiiłtsą́ągo naałniih hodoolna' yę́ę, Doo ánít'éhí da, hodidooniił, áko ho'didéeh doo.

¹⁸Áádóó ałdó' hats'íís yishch'ozh nít'ée'go yá'át'ééh násdlį́į'go éí t'óó sid nídzoodzíi' dooleeł;

¹⁹éí jishch'ozhígi łigaigo hąąh hááyáago, doodaii' dinilgaigo, doodaii' dah yiichii'go náá'iiłniihii há yidínóoł'įįł.

²⁰Áádóó náá'iiłniihii éí yiníł'į́įgo, jó, łóód haní'íígháázh lá áádóó hatáshtł'oh ákwii dah yiigaiigo náá'iiłniihii, Doo ni'didéeh da lá, hodidoonii ł; jishch'ozhígíí bii'dóó łóód ats'íís yiyáanii naałdzidii hááłnii'ígíí át'é.

²¹Nidi náá'iiłniihii éí yiníł'į́įgo, jó, atáshtł'oh ákwii doo ła' łigaigóó áádóó łóód doo haní'íígháázhgóogo nidi t'áá bíyó dinilzhingo éí náá'iiłniihii tsosts'id yiską́ąjį' t'áá sahdii hadádi'doołkał.

²²Áádóó hakáá'góó k'ee'ąą deeshzhiizhgo éí náá'iiłniihii, Doo ni'didéeh da lá, hodidooniił; éí naałniih át'é.

²³Nidi dah yiigaii yę́ę doo k'ee'ąą deeshzhiizhgóogo éí yishch'ozhígíí sid dooleeł, áko náá'iiłniihii, Doo ánít'éhí da, hodidooniił.

²⁴Doodaii' t'áá ha'át'éegida ázhdoodlidgo áádóó ázhdoodlidígi dah yiichii'go łóód silį́į'go, doodaii' dah yiigaiigo

²⁵éí náá'iiłniihii há yidínóoł'įįł, áko ákwii hatáshtł'oh yiigaiígíí yiníł'į́įgo t'áadoo bahat'aadí łóód haní'íígháazhgo éí ázhdoodlidígíí bits'ą́ą́dóó łóód ats'íís yiyáanii naałdzidii silį́'ígíí át'é; éí bąą náá'iiłniihii, Doo ni'didéeh da lá, hodidooniił; éí łóód ats'íís yiyáanii naałdzidii naałniih át'é.

²⁶Nidi náá'iiłniihii éí yiníł'į́įgo, éí łódígi hatáshtł'oh doo ła' yiigaiigóogo áádóó doo haní'íígháázhgóogo, nidi t'áá bíyó dinilzhingo, áko náá'iiłniihii éí tsosts'id yiską́ąjį' t'áá sahdii hadádi'doołkał.

²⁷Áádóó tsosts'id yiską́ągo náá'iiłniihii nááhodínóoł'įįł, áko hakáá'góó k'ee'ąą deeshzhiizh lágo éí náá'iiłniihii, Doo ni'didéeh da lá, hodidooniił; éí łóód ats'íís yiyáanii naałdzidii naałniih át'é.

²⁸Nidi dah yiigaii yę́ę doo k'ee'ąą deeshzhiizhgóogo, nidi dinilzhingo éí ázhdoodlidígi hadzííyáhígíí át'é; náá'iiłniihii éí, Doo ánít'éhí da, hodidooniił; jó, ázhdoodlidgo hadzííyáhígi t'óó sid dooleeł.

²⁹Áádóó diné ła', doodaii' asdzání ła' bitsiits'iin bikáa'gi, doodaii' bidághaatahgi naałniih hazlį́į'go,

³⁰éí náá'iiłniihii há yidínóoł'įįł; jó, yiníł'į́įgo t'áadoo bahat'aadí łóód haní'íígháazhgo áádóó ákwii tsiighá t'áá díkwíí łitsogo hadaazt'i'go, áko náá'iiłniihii, Doo ni'didéeh da lá, hodidooniił; éí łóód ats'íís yiyáanii naałdzidii hatsiits'iin bik'i, doodaii' hadághaatahgóó niníkę́ę́z lá.

³¹Nidi náá'iiłniihii éí łóód hak'i niníkę́zígíí yiníł'į́įgo doo t'áá íiyisí haní'íígháázhgóogo áádóó tsiighá doo ła' łizhingóó náá'iiłniihii éí t'áá sahdii tsosts'id yiską́ąjį' hadádi'doołkał.

³²Áádóó tsosts'id yiską́ągo náá'iiłniihii éí halóód hak'i niníkę́zígíí há néidínóoł'įįł; jó, łóód t'áadoo k'ee'ąą deeshzhiizhgóó áádóó tsiighá doo ła' łitsogóó índa doo haní'íígháázhgóogo

³³há adoolzhih, nidi halóód hak'i niníkę́zígi doo doolzhih da, áádóó náá'iiłniihii éí halóód hólónígíí t'áá sahdii tsosts'id yiską́ąjį' hadánáádi'doołkał.

³⁴Ákohgo tsosts'id yiską́ągo náá'iiłniihii éí halóód hak'i niníkę́zígíí há néidínóoł'įįł; jó'akon, doo k'ee'ąą deeshzhiizhgóogo, doodaii' doo haní'íígháázhgóogo éí náá'iiłniihii, Doo ánít'éhí da, hodidooniił, áko ha'éé' jidoogisgo ho'didéeh doo.

³⁵Nidi, Ałtso ni'díídee' lá, ho'doo'niidóó bik'ijį' halóód nááltsei yę́ę t'óó tsé'édinda anáánádzaago

³⁶náá'iiłniihii éí nááhodínóoł'įįł; éí łódígíí t'óó tsé'édinda ádzaa lá, ákondi hatsii' yiitsoígíí doo háidídóo'įįł da, háálá doo ho'díídee' da.

³⁷Nidi łóód hak'i niníkę́zígíí t'áadoo haa dahoolaagóogo éí tsiighá łizhingo yiníł'į́įgo éí łóód hąąh ásdįįd lá, áko ho'díídee'go náá'iiłniihii, Doo ánít'éhí da, hodidooniił.

³⁸Diné, doodaii' asdzání ła' bikágí yistł'ingo ákwii dinilgai silį́į'go

³⁹éí náá'iiłniihii há yidínóoł'įįł, áko éí hakágí yistł'inígi doo yéego dinilgaigóó, t'óó ąąh ha'ííjé'ígíí át'é, áko éí ho'didééh át'é.

⁴⁰Diné ła' hatsiits'iin ałtso béét'óodgo bitsii' ádinii jílį́; jó, t'óó ho'didééh át'é.

⁴¹Áádóó diné ła' hatsiit'áád i'íít'óodgo tsiit'ádii jílį́; jó, t'óó ho'didééh át'é.

⁴²Nidi ła'da hatsiits'iin béét'óodgo, doodaii' hatsiit'áád i'íít'óodgo éí dinilchíi'go binídzísgaigo bąąh hááyáhígíí éí łóód ats'íís yiyáanii naałdzidii hatsiits'iin dilkǫǫhígíí bidoolna', doodaii' hatsiit'áád i'íít'ódígi bidoolna'go át'é.

⁴³Ákohgo náá'iiłniihii há yidínóoł'įįłgo, jó, hatsiits'iin béét'ódígi, doodaii' hatsiit'áád i'íít'ódígi bąąh hadzííyáhígíí dinilchíi'go binídzísgaigo éí łóód ats'íís yiyáanii naałdzidii ąąh dahoyooł'aałígi át'éii át'é.

⁴⁴Éí łóód ats'íís yiyáanii naałdzidii bee bąąh dah hoo'a'ii dzizlį́į́'; éí doo ho'didéeh da, áko náá'iiłniihii éí, Ts'ídá doo ni'didoodah da lá, hodidooniił; naałniih éí hatsiits'iin bąąh hólǫ́.

⁴⁵Áádóó łóód bee bąąh dah haz'áanii éí bi'éé' bik'i neheesdǫ́ǫz doo áádóó bitsiits'iin nidi doo bik'é'ésti' da doo, índa bidaa' bik'é'ésti'go, Doo shi'díídee' da, doo shi'díídee' da, níigo háádílwosh doo.

⁴⁶Éí yidiiską́ą́góó naałniih bee bąąh dahaz'ą́ągo baa'ihii jílį́į dooleeł; doo bi'díídee'ii jílį́; t'áá sahdii haghan doo; níbaal haal'á bits'áhwiiní'ą́ądi haghan doo.

⁴⁷Áádóó ałdó' éé' ła' éí aghaa' bee ályaii, doodaii' na'at'ą́hí łigaii dits'idgo bee ályaii naałniih łóód ats'íís yiyáanii naałdzidii bąąh hazlį́į'go,

⁴⁸na'at'ą́hí łigaii dits'idgo bee ályaii, doodaii' aghaa' bee nanoolzhee' ályaii, doodaii' beistł'ónígíí łóód bąąh hazlį́į'go, doodaii' akágída, doodaii' t'áá ha'át'íhída akágí bee ályaii łóód bąąh hazlį́į'go,

⁴⁹tátł'id nahalingo adiiłtł'íishii índa iiłchíihii éí éé', doodaii' akágí, doodaii' binanoolzhee'ígíí, doodaii' beistł'ónígíí naałniih bąąh hazlį́į'go índa t'áá ha'át'íhída akágí bee ályaii bąąh yiiltsą́ągo éí naałniih łóód ats'íís yiyáanii naałdzidii át'é; éí náá'iiłniihii yidínóoł'įįł.

⁵⁰Áádóó náá'iiłniihii éí éé' naałniih bąąhígíí yidínóoł'įįłgo tsosts'id yiską́ąjį' t'áá sahdii yidádi'doołkał.

⁵¹Áko tsosts'id yiską́ągo néinééł'į́į'go binanoolzhee'ígíí, doodaii' beistł'ónígíí bąąhgo, doodaii' akágí t'áá ha'át'íhída biniyé akágí bee ályaii éí naałniih bąąh k'ee'ąą deeshzhiizhgo éí łóód ats'íís yiyáanii naałdzidii át'é; jó, éí t'óó baa'ih.

⁵²Éí bąą éí é'ígíí iididoołk'ą́ą́ł; binanoolzhee'ígíí, doodaii' beistł'ónígíí bąąhgo, doodaii' aghaa' bee ályaii, doodaii' na'at'ą́hí łigaii dits'idgo bee ályaii, doodaii' t'áá ha'át'íhída akágí bee ályaii éí iididoolk'ą́ą́ł, háálá łóód ats'íís yiyáanii naałdzidii át'é.

⁵³Nidi náá'iiłniihii éí néinééł'į́į'go t'áadoo naałniih bąąh k'ee'ąą deeshzhiizhgóogo éí binanoolzhee'ígíí, doodaii' beistł'ónígíí bąąhgo é'ígíí, doodaii' t'áá ha'át'íhída akágí bee ályaii bąąhgo,

⁵⁴ákohgo náá'iiłniihii éí, Łóód bąąhígíí daohgis, hodidooniił, áádóó tsosts'id yiską́ąjį' yidánáádi'doołka ł.

⁵⁵Áádóó náá'iiłniihii éí łóód bąąhígíí tánásgizdóó bik'ijį' néidínóoł'įįł, áádóó shoo, łódígíí t'áadoo łahgo anádzaagóogo, azhą́ doo k'ee'ąą deeshzhiizh da nidi; éí t'óó baa'ih; éí adidííłk'ą́ą́ł; jó, éí biyi'di, doodaii' bikáá'dę́ę́' łóód ats'íís yiyáanii naałdzidii bąąh hazlį́į'ii át'é.

⁵⁶Ákondi náá'iiłniihii éí nááyinééł'į́į'go naałniih bąąh tánásgizdóó bik'ijį' doo wózhǫ́ bąąhgóogo éí éé' binanoolzhee'ígíí, doodaii' beistł'ónígíí, doodaii' akágí bąąhdóó nahjį' kwíidoolííł.

⁵⁷Nidi éé' binanoolzhee'ígíí, doodaii' beistł'ónígíí, doodaii' akágí bee ályaii t'ah t'áá bąąhgo éí naałniih k'ee'ąą deeshzhiizhígíí át'é, áko éí naałniih bąąhgo t'óó adidííłk'ą́ą́ł.

⁵⁸Áko éé' binanoolzhee'ígíí, doodaii' beistł'ónígíí, doodaii' akágí bee ályaii bąąhgo éí sínígisgo naałniihígíí bąąh k'éé'níídee'go náádíígis, áko bi'didéeh doo.

⁵⁹Díí éí naałniih łóód ats'íís yiyáanii naałdzidii bee haz'áanii át'é; éé' éí aghaa', doodaii' na'at'ą́hí łigaii dits'idgo bee ályaii binanoolzhee', doodaii' beistł'ónígíí bąąh hazlį́į'go, doodaii' akágí bee ályaii bąąh hazlį́į'go éí bi'didééh, doodaii' doo bi'didéeh da, hodidoo'niił.