Read Navajo LEVITICUS 14 Bible Online

LEVITICUS 14 - Navajo bible

LEVITICUS 14

¹Áko Bóhólníihii éí Mózes yich'į' haadzíi'go ííłní,

²Díí éí łóód ats'íís yiyáanii naałdzidii bee bąąh dahaz'áanii bi'didééh bijį́ bee haz'áanii choo'íinii át'é; jó, náá'iiłniihii yaa dabidoolóós.

³Ákohgo náá'iiłniihii éí níbaal haal'á bits'áhwiiní'ą́ąjį' baa doogáałgo bidínóoł'įįł; jó, naałniih łóód ats'íís yiyáanii naałdzidii bee hąąh dahoo'a'ígíí náádzíi'go

⁴náá'iiłniihii éí bi'didééh ábi'dilnéhígíí yá ádidooniił, Tsídii yidánígíí t'áá hináago naakigo bá nídooh'nííł índa dilk'is áádóó na'at'ą́hí łichxí'ígíí índa ch'il hísap wolyéhígíí ałdó' nídooh'nííł.

⁵Áko náá'iiłniihii ánáádidoo'niiłgo éí tsídii t'ááłá'ígo tó nílínídę́ę́' tóhígíí hashtł'ish łeets'aa' bee siką́ągo bik'ijį' sołhé,

⁶áádóó tsídii hinánígíí éí néididoołtéełgo dilk'is áádóó na'at'ą́hí łichxí'ígíí índa ch'il hísap wolyéhígíí éí tsídii hinánígíí biłgo tó nílínídę́ę́' tóhígíí bik'ijį' seesyínígíí bidił yił yiih didoolchi ł,

⁷áádóó łóód ats'íís yiyáanii naałdzidii bidoolna'go bi'didééh ábi'dilnéhígíí tsosts'idi yik'ínéidoołtahgo índa, Doo ánít'éhí da, hodidooniił, áádóó tsídii hinánígíí éí halgaigóó yéididoochił.

⁸Áádóó éí bi'didééh ábi'dilnéhígíí éí bi'éé' yidoogis áádóó t'áá bí ałtso ádá nídoolzhih índa nidoobeeł, áko bi'didoodah, áádóó bik'ijį' níbaal haal'áajį' nídoodááł, nidi biníbaaldóó t'áá tł'óo'di tsosts'id biidoołkááł.

⁹Áádóó tsosts'id yiską́ągo t'áá bí ałtso ádá náá'doolzhih áádóó bidághaa' áádóó binát'éézh índa bitáshtł'oh t'áá át'é yidooshih; bi'éé' ałdó' yidoogis áádóó nidoobeeł, áko bi'didéeh doo.

¹⁰Áádóó tseebíí yiską́ągo dibé yázhí biką'ígíí naakigo hadaałt'éii néididoojih índa dibé yázhí ła' binááhaí bi'ádígíí t'ááłá'ígo hadaałt'éii néididoołtééł, áádóó ak'áán nááhániihii éí ómer bee í'neel'ąąhí bee táadi ak'áán dibahí haaką́ągo ak'ah bił ałtahgo índa bąąh ha'íízhahí bii' ak'ah hadeezbingo néididookááł.

¹¹Áko náá'iiłniihii éí diné bi'didééh ííléehgo éí bi'didééh ábidi'doolníłígíí yá néidiyoołnihii t'áá bił Bóhólníihii binááł níbaal bii' dahozdísinii bich'éédą́ą'jį' yił nidoo'ash.

¹²Áádóó náá'iiłniihii éí dibé yázhí biką'ígíí t'ááłá'ígo néididoołtéełgo doo ákǫ́ǫ́ ájíít'įįdjí nááhániihii át'éego néidiyoołnih áádóó ak'ah yíkánígíí ałdó' náásee bił nídi'dilnihgo nááhániihii át'éego Bóhólníihii yinááł néidiyoołnih.

¹³Áko dibé yázhí yidiyoołhéłígíí éí ádił ni'iidzííhjí nááhániihii áádóó didlidgo nááhániihii naatseedígi éí hodiyingo haz'ánígi yidiyoołhééł; jó, ádił ni'iidzííhjí nááhániihii éí náá'iiłniihii bíí' át'éego doo ákǫ́ǫ́ ájíít'įįdjí nááhániihii ałdó' bí; éí ts'ídá aláahgo dílzinii át'é.

¹⁴Áádóó náá'iiłniihii éí doo ákǫ́ǫ́ ájíít'įįdjí nááhániihii bidił ła' néididookáałgo éí diłígíí yee bi'didéehii bijaa' nish'náájí yaa ninít'i'ígi áádóó bílátsoh nish'náájí índa bikétsoh nish'náájí dah deidoołchih.

¹⁵Áko náá'iiłniihii éí ak'ah yíkánígíí ła' binishtł'ají bílák'eejį' yeidooziłgo

¹⁶náá'iiłniihii t'áá bí bíla' nish'náájí yee nishtł'ajį' bílák'eejį' ak'ah yiih nídílchi'go Bóhólníihii binááł tsosts'idi iidoołtah.

¹⁷Áádóó łahjį' ak'ah hálák'ee siziidígíí éí diné bi'didéhígíí bijaa' nish'náájí yaa ninít'i'gi áádóó bílátsoh nish'náájí índa bikétsoh nish'náájí éí doo ákǫ́ǫ́ ájíít'įįdjí nááhániihii bidił yee dah dayiiłchii' yę́ęgóó ak'ah yąąh íidoolííł.

¹⁸Áko náá'iiłniihii bílák'eegi ak'ah yidziihígíí éí diné bi'didéhígíí bitsiit'áagi yąąh íidoolííł, áádóó Bóhólníihii binááł éí diné bá k'ééhozhdoołdǫǫł.

¹⁹Áádóó náá'iiłniihii éí náádi'yoołnihgo ádił ni'iidzííhjí nááhániihii diné bííłchxǫ'ii bits'ą́ą́dóó bi'didéhígíí yee yá k'ééhodoołdǫǫł, áádóó bik'ijį' didlidgo nááhániihii yidiyoołhééł.

²⁰Áko náá'iiłniihii éí didlidgo nááhániihii áádóó ak'áán nááhániihii bikáá' náá'iiniihí yikáa'jį' néidiyoołnih; kót'éego náá'iiłniihii éí há k'ééhodoołdǫǫł índa ho'didéeh doo.

²¹T'áá hahojoobá'ígo nááhizhdoołnihígíí bi'oshneel'ą́ągo éí dibé yázhí t'ááłá'ígo jidoołtééł; doo ákǫ́ǫ́ ájíít'įįdjí nááhániihii át'éego náásee bił nídi'dilnihgo nááhizhdoołnih, áko há k'ééhodoodǫǫł, áádóó ómer bee í'neel'ąąhí bee ak'áán dibahí t'ááłáhídi haaką́ągo éí ak'ah bił ałtahgo áádóó bąąh ha'íízhahí bii' ak'ah hadeezbingo nááhizhdoołnih.

²²Áádóó hasbídí naakigo, doodaii' hasbídí łigaii yázhí naakigo t'áá shójoost'e'ígíí t'ááłá'ígo éí ádił ni'iidzííhjí nááhizhdoołnih índa ła'ígíí didlidgo nááhizhdoołnih.

²³Áádóó éí tseebíí yiską́ągo náá'iiłniihii baazhdoojihgo ho'didéhígíí biniyé níbaal bii' dahozdísinii bich'éédą́ą'jį' Bóhólníihii binááł nááhidoonih.

²⁴Áádóó náá'iiłniihii éí dibé yázhí doo ákǫ́ǫ́ ájíít'įįdjí nááhániihii áádóó ak'ah yíkánígíí nááyiiłniihgo Bóhólníihii binááł náásee bił nídi'dilnihgo néidiyoołnih.

²⁵Áko dibé yázhí doo ákǫ́ǫ́ ájíít'įįdjí nááhániihii yidiyoołhééł áádóó náá'iiłniihii éí doo ákǫ́ǫ́ ájíít'įįdjí nááhániihii bidił ła' néididookááł; éí bi'didéehgo ábi'dilnéhígíí bijaa' nish'náájí yaa ninít'i'ígi áádóó bílátsoh nish'náájí índa bikétsoh nish'náájí dah deidiyoołchih.

²⁶Áádóó náá'iiłniihii éí nishtł'ají bílák'eejį' ak'ah ła' yeidooziłgo

²⁷náá'iiłniihii bíla' nish'náájí yee nishtł'ajį' bílák'eejį' ak'ah yiih nídílchi'go Bóhólníihii binááł tsosts'idi iidoołtah.

²⁸Áádóó náá'iiłniihii éí ak'ah bílák'ee siziidígíí ła' diné bi'didéhígíí bijaa' nish'náájí yaa ninít'i'ígi áádóó bílátsoh nish'náájí índa bikétsoh nish'náájí éí doo ákǫ́ǫ́ ájíít'įįdjí nááhániihii bidił yee dah dayiiłchii' yę́ęgóó ak'ah yąąh íidoolííł.

²⁹Ákohgo náá'iiłniihii bílák'eegi ak'ah yidziihígíí éí diné bi'didéhígíí bitsiit'áagi yąąh íidoolííł, áko Bóhólníihii binááł há k'ééhodoodǫǫł.

³⁰Áádóó hasbídí, doodaii' hasbídí łigaii yázhí t'áá shójoost'e'ígíí ła' nááhizhdoołnih.

³¹T'áá shójoost'e'ígíí éí ła' ádił ni'iidzííhjí nááhániihii át'éego áádóó ła'ígíí éí didlidgo nááhániihii át'éego ak'áán nááhániihii biłgo nááhizhdoołnih, áko náá'iiłniihii éí diné ho'didéhígíí Bóhólníihii binááł há k'ééhodoołdǫǫł.

³²Díí éí kót'éego naałniih łóód ats'íís yiyáanii naałdzidii hodoolna'ii há bee haz'áanii át'é; éí ho'didééh biniyé nááhizhdoołnihígíí t'áá bi'oshneel'áanii há át'é.

³³Áádóó Bóhólníihii éí Mózes índa Éran yich'į' haadzíi'go ííłní,

³⁴Kéyah Kéínan hoolyéego danihíí' dooleełgo nihaa dinish'aahígíí biih woonáago éí kéyah nihíí' dooígíí bikáa'gi kin ła' biyi'gi łóód ats'íís yiyáanii háíłnii'go

³⁵éí haghan ílíinii náá'iiłniihii baazhdoogáałgo kóbizhdidooniił, Kin bii' naałniih hólǫ́ǫgi át'é nisin.

³⁶Náá'iiłniihii naałniih t'ah doo yiníł'į́į́góó, Kin bii' naaznilígíí ałtso ch'ídahohjááh, hodidooniił; kót'éego kin bii' naaznilígíí t'áá ałtso doo t'óó baa'ih dadooleeł da áádóó bik'ijį' índa náá'iiłniihii yah adoogáałgo kin yidínóoł'įįł.

³⁷Áko naałniih yinéeł'į́į'go, jó, naałniihígíí éí kin bá nástł'inígíí biták'izgóó tátł'id nahalinígíí yee yidiiłtł'iizhgo, doodaii' yiyiiłchíi'go binídahasdzą́ągo áádóó t'áadoo bahat'aadí daabąąhgo

³⁸éí náá'iiłniihii kindę́ę́' ch'éédoodáałgo tsosts'id yiską́ąjį' kin déidi'doołkał.

³⁹Áádóó tsosts'id yiską́ągo náá'iiłniihii náádoodáałgo kin néidínóoł'įįł; jó, hont'ahgóó naałniih k'ee'ąą deeshzhiizhgo

⁴⁰náá'iiłniihii éí, Naałniih tsé bąąh hólónígíí nahjį' hadaohnííł, hodidooniił áádóó kin haal'á bits'áhwiiní'ą́ądi doo yá'át'éehii kódaal'į́įjį' yadahooheeh,

⁴¹áádóó, Kin biyi'dę́ę́' bídaohaas, hodidooniił áádóó ítł'inígíí biták'izdę́ę́' łeezh bąąh naagazígíí kin haal'á bits'áhwiiní'ą́ądi doo yá'át'éehii kódaal'į́įjį' yadahooheeh.

⁴²Áko tsé nahjį' hadeiznilí góne' tsé náánáła' anídeidiyoo'niłgo hashtł'ish náánáła' yee kin biyi'dę́ę́' nídeidoodlish.

⁴³Áádóó kin bii'dóó tsé nahgóó kójiilaago índa bídzííghazgo níjízhdléézh yę́ędóó bik'ijį' éí kin bii' naałniih hanáánááłnii'go

⁴⁴náá'iiłniihii doogáałgo yidínóoł'įįł, áko jó, naałniih kin góne' k'ee'ąą deeshzhiizh lágo éí łóód ats'íís yiyáanii naałdzidii kin góne' hólǫ́; éí t'óó baa'ih.

⁴⁵Áko éí kin táidoo'nił; tsé áádóó tsin neheeshjíí' índa hashtł'ish bee kin náshdlézhígíí t'áá át'é éí kin haal'á bits'áhwiiní'ą́ą́góó doo yá'át'éehii kódaal'į́įjį' yadeidiyooyééł.

⁴⁶Náá'áłdó' t'áá háiida kin dá'deelkaal yę́ędą́ą́' ákóne' yah ajííyáhígíí éí i'íí'ą́ąjį' doo ho'didoodah da.

⁴⁷T'áá háiida éí kin góne' jineeztį́įgo éí ha'éé' jidoogis, áádóó t'áá háiida éí kin góne' ajííyą́ą'go éí ha'éé' jidoogis.

⁴⁸Nidi náá'iiłniihii yah ííyáago yinééł'į́į'go nít'éé'; jó, kin náshdléézhdóó bik'ijį' naałniihígíí kin góne' t'áadoo hanáánááłnii'góogo náá'iiłniihii éí kinígíí, Bi'díídee', didooniił, háálá naałniih bąąh ásdįįd lá.

⁴⁹Áko kin bi'didoodah biniyé tsídii naakigo áádóó dilk'is áádóó na'at'ą́hí łichxí'ígíí índa ch'il hísap wolyéhígíí néididoonił.

⁵⁰Áádóó tsídii t'ááłá'ígo tó nílínídę́ę́' tóhígíí hashtł'ish łeets'aa' bee siką́ągo bik'ijį' yidiyoołhééł.

⁵¹Ákohgo dilk'is áádóó ch'il hísap wolyéhígíí áádóó na'at'ą́hí łichxí'ígíí índa tsídii hinánígíí néididooniłgo éí tsídii seesyínígíí bidił áádóó tó biyi'jį' dił náána'ígíí yiih yił didoolchiłgo kinígíí tsosts'idi yik'íidoołtah.

⁵²Kót'éego kin yidi'doołdah biniyé tsídii bidił tó biłgo áádóó tsídii hinánígíí áádóó dilk'is áádóó ch'il hísap wolyéhígíí índa na'at'ą́hí łichxí'ígíí yee yidiłdéeh doo.

⁵³Nidi tsídii hinánígíí éí kin haal'á bits'áhwiiní'ą́ąjį' halgaigóó yiididoochił; kót'éego kinígíí bá k'ééhodoodǫǫłgo bi'didéeh doo.

⁵⁴Díí bee haz'áanii éí naałniih łóód ats'íís yiyáanii naałdzidii ał'ąą át'éii t'áá ałtso índa łóód ílch'iiłígíí bá át'é,

⁵⁵áádóó łóód ats'íís yiyáanii naałdzidii éé' bąąh naałniihii áádóó kin bąąh naałniihii

⁵⁶áádóó ąąh hadzííyáii áádóó łóód bisgą'ii índa dah yiigaiígíí bá át'é.

⁵⁷Díí bee na'nítin doo: doo bi'didéehii, doodaii' bi'didéehii baa ákohwiindzin; díí éí łóód ats'íís yiyáanii naałdzidii biniyé bee haz'áanii át'é.