Read Navajo LEVITICUS 15 Bible Online

LEVITICUS 15 - Navajo bible

LEVITICUS 15

¹Áko Bóhólníihii éí Mózes áádóó Éran yich'į' haadzíi'go ííłní,

²Ízrel dine'é bich'į' haohdziihgo kóbidohní, Diné éí naałniih bits'íís bits'ą́ą́dóó háálį́įgo, jó, bąąh háálínígíí yee doo bi'didéeh da doo.

³Díí bąąh háálį́ silį́'ígíí doo bi'didéeh da doo, éí bąąh háálį́įgo, doodaii' doo bąąh háálį́į da silį́į' nidi éí doo bi'didéeh da doo.

⁴Áko tsásk'eh t'áá yikáá' nánítéhígíí t'óó baa'ih neheleeh doo, índa t'áá yik'i nánídaahígíí t'óó baa'ih neheleeh doo.

⁵Áádóó t'áá háiida éí bitsásk'eh bíhizhdéé'náa'go ha'éé' jidoogis áádóó nizhdoobeeł, áko i'íí'ą́ąjį' doo ho'didéeh da doo.

⁶T'áá háiida díí diné bąąh háálínígíí t'áá ha'át'íhída yikáá' neezdáhígíí bikáa'jį' jineezdáago éí ha'éé' jidoogis, índa nizhdoobeełgo i'íí'ą́ąjį' doo ho'didéeh da doo.

⁷Áádóó diné bąąh háálínígíí t'áá háiida éí bíhizhdéé'náa'go éí ha'éé' jidoogis índa nizhdoobeełgo i'íí'ą́ąjį' doo ho'didéeh da doo.

⁸Áko diné bąąh háálínígíí éí diné bi'díídee'ii yik'ídeezhée'go éí bi'éé' yidoogis áádóó nidoobeełgo i'íí'ą́ąjį' doo ho'didéeh da doo.

⁹Áádóó diné bąąh háálínígíí éí t'áá ha'át'íhída bik'i dah ná'niłí yik'i dah neezdáago éí t'óó baa'ih dooleeł.

¹⁰Áko t'áá ha'át'íhída biyaa sinil nít'éé' yę́ę t'áá háiida bíhizhdéé'náa'go éí i'íí'ą́ąjį' doo ho'didéeh da doo, áko éí tázhdííjaa'ígíí ha'éé' jidoogis áádóó nizhdoobeełgo i'íí'ą́ąjį' doo ho'didéeh da doo.

¹¹Áádóó diné bąąh háálínígíí t'áadoo bíla' tánéígisí t'áá háiida yideelchidgo éí diné bi'éé' yidoogis áádóó nidoobeełgo i'íí'ą́ąjį' doo ho'didéeh da doo.

¹²Índa diné bąąh háálínígíí hashtł'ish łeets' aa' yíhidéé'ná'ígíí doolts'ił áádóó tsin bee ásaa' ádaalyaaígíí t'áá ałtso bąąh nidadool'oł.

¹³Áko éí diné bąąh háálínígíí hadaałt'é násdlį́į'go bi'didéehgo tsosts'id yidoołkááł áádóó bi'éé' yidoogis índa tó nílínígíí yii' nidoobeeł, áko bi'didéeh doo.

¹⁴Áádóó tseebíí yiską́ągo hasbídí naakigo, doodaii' hasbídí łigaii yázhí naakigo Bóhólníihii binááł níbaal bii' dahozdísinii bich'éédą́ą'gi náá'iiłniihii yeidoonił.

¹⁵Áko náá'iiłniihii éí náádi'yoołnihgo t'ááłá'ígo ádił ni'iidzííhjí nááhániihii át'éego áádóó ła'ígíí éí didlidgo nááhániihii át'éego há néidiyoołnih. Kót'éego náá'iiłniihii éí Bóhólníihii binááł diné bąąh háálį́į́ nít'é'ígíí yá k'ééhodoołdǫǫł.

¹⁶Diné ła'da hwíígąsh hááłts'ą'go t'áá dzizį́į́ nít'éé' tá'ázhdidoogis, áko i'íí'ą́ąjį' doo ho'didéeh da doo.

¹⁷Éé'da índa akágída bik'ijį' hwíígąsh háána'ígíí táázhdoogis, áko i'íí'ą́ąjį' t'óó badaa'ih doo.

¹⁸Asdzání éí diné ła' bił neezhtéezhgo hwíígąsh háána'go éí t'áá ájíłah nizhdoobeeł, áko i'íí'ą́ąjį' doo ho'didéeh da doo.

¹⁹Áádóó asdzání ła'da dił bighánílį́įgo éí tsosts'id yiską́ąjį' ats'áhodi'doot'ááł, áko t'áá háiida hóhidéé'náa'go éí i'íí'ą́ąjį' doo ho'didéeh da doo.

²⁰Áko ats'áho'deet'ání góne' t'áá bik'izhnitéhígíí índa t'áá bik'i názhnídaahígíí t'óó baa'ih neheleeh doo.

²¹Áádóó t'áá háiida hatsásk'eh yíhidéé'náa'go bi'éé' yidoogis áádóó nidoobeełgo i'íí'ą́ąjį' doo ho'didéeh da doo.

²²T'áá ha'át'íhída bikáá' jineezdá nít'éé' yę́ę t'áá háiida yikáá' neezdáago éí bi'éé' yidoogis áádóó nidoobeeł, áko i'íí'ą́ąjį' doo ho'didéeh da doo.

²³Hadiłígíí hatsásk'eh bąąh silį́į'go, doodaii' t'áá ha'át'íhída bikáá' dzizdáhígíí bąąh dił silį́į'go t'áá háiida éí yíhidéé'náa'go i'íí'ą́ąjį' doo ho'didéeh da doo.

²⁴Diné ła' hoł neezhtéezhgo éí ha'ąądii yénáyáago tsosts'id yiską́ąjį' doo bi'didéeh da doo, áádóó t'áá yikáá' nánítéhígíí t'óó baa'ih neheleeh doo.

²⁵Aszdání ąądii nádleehígíí t'áá bita'gi dił bighánílį́įgo lą'í yiską́ągo, doodaii' ąądii nádleehígíí bilááhgóó ayííłką́ągo éí ąądii jílį́įgo ats'ánáho'diltéhígi át'éego ats'áho'deeltį́į doo, áko doo ho'didéeh da doo.

²⁶Áádóó t'áá dił haghánílį́įgo neiłka' góne' éí t'áá bikáá' jinitéhígíí áádóó t'áá ha'át'íhída bikáá' dzizdá nít'éé' yę́ę t'óó baa'ih neheleeh doo.

²⁷Áko éí t'áá háiida yíhidéé'náa'go doo bi'didéeh da doo; éí bi'éé' yidoogis áádóó nidoobeełgo i'íí'ą́ąjį' doo bi'didéeh da doo.

²⁸Nidi asdzání bidił bighánílínígíí doo át'ée da násdlį́į'go tsosts'id yidoołkáłígíí yiba' át'ée doo; éí bik'ijį' índa bi'didéeh doo.

²⁹Áádóó tseebíí yiską́ągo hasbídí naakigo, doodaii' hasbídí łigaii yázhí naakigo nízhdidooniłgo níbaal bii' dahozdísinii bich'éédą́ą'gi náá'iiłniihii baazhdoonił.

³⁰Áko náá'iiłniihii éí náádi'yoołnihgo t'ááłá'ígo ádił ni'iidzííhjí nááhániihii át'éego áádóó ła'ígíí éí didlidgo nááhániihii át'éego néidiyoołnih; kót'éego náá'iiłniihii éí asdzání bidił bighánílį́įgo doo bi'didééhgóó biniinaa Bóhólníihii binááł yá k'ééhodoołdǫǫł.

³¹Kót'éego Ízrel dine'é doo bida'didéhígíí t'óó bits'ádahidí'aah, áko doo bi'didéhígíí doo yii' dadínóonéeł da; t'áá hazhó'ó shiníbaal bii' hodílzinii hatahgi si'ánígíí dajííłchxǫ' go t'éiyá.

³²Díí bee haz'áanii há át'é: diné ła' hąąh hááłts'ą'go, doodaii' hwíígąsh hąąh háána'ígíí bee jííchxǫ'ii

³³áádóó asdzání t'áá bí bi'ąądii yik'ee doo ákót'éégóó áádóó diné ła' bąąh hááłts'ą'ígíí éí diné há, doodaii' asdzání há índa diné éí asdzání bił jineeztézhígíí doo bi'didééhgóó ájííł'įįdígíí há bee haz'áanii át'é.