Read Navajo LEVITICUS 17 Bible Online

LEVITICUS 17 - Navajo bible

LEVITICUS 17

¹Áádóó Bóhólníihii éí Mózes yich'į' haadzíi'go ííłní,

²Éran áádóó biye'ké áádóó Ízrel dine'é t'áá ałtso bił hólne', Bóhólníihii díí yee haadzíi'go kóní,

³Ízrel dine'é bitahdóó ła'da éí béégashii, doodaii' dibé yázhí, doodaii' tł'ízída níbaal haal'áagi, doodaii' níbaal haal'á bits'áhwiiní'ą́ądi yiyiisxį́įgo,

⁴áko níbaal bii' dahozdísinii bich'é'étiingi náádi'yoołnihgo Bóhólníihii yich'į' néidiyoołnihii Bóhólníihii biníbaal bii' hodílzinii bich'éédą́ą'gi t'áadoo niyílósí; éí naaldlooshii bidił bits'ánílį́įgo áyiilaaígíí yee ádihodiilt'i' doo, áko bidine'é bits'ą́ąjį' bidi'yoolyééł.

⁵Díí biniyé Ízrel dine'é éí náádeidiyoołnihii halgaidi náádahiilniih doo danízin nidi; éí Bóhólníihii bich'į' níbaal bii' dahozdísinii bich'é'étiinjį' náá'iiłniihii baa dajii'éeshgo bee haz'ą́; éí náádayiiłniihii hózhǫ́ǫ́jí nááhániihii át'éego Bóhólníihii yich'į' náádayiiłniih doo.

⁶Áádóó náá'iiłniihii éí Bóhólníihii bibikáá' náá'iiniihí níbaal bii' dahozdísinii bich'é'étiingi si'ánígíí dił yik'ínéíłtah doo, áádóó ak'ahígíí yiidiłidgo Bóhólníihii bich'į' łikání halchin doo.

⁷T'ááká níłch'i bida'iiníziinii yich'į' nínááda'iiłniih le' lágo, jó, éí bił tł'éé' da'íldééh. Díí éí yee nihoní'áanii ahóyéel'áágóó bá át'éego náás da'ahílchíih doo.

⁸Áádóó kóbididííniił, Ízrel dine'é bitahdóó dinéhígíí ła', doodaii' dé'éyóní nihitahgi t'óó átsééd kéédahat'ínígíí ła' náádi'yoołnihgo didlidgo nááhániihii, doodaii' nááhidoonihii

⁹éí níbaal bii' dahozdísinii bich'é'étiingi náádi'yoołnihgo Bóhólníihii bich'į' néidiyoołnihii t'áadoo niyílósí nááyiisnii'go éí bidine'é bits'ą́ąjį' bidi'yoolyééł.

¹⁰Ízrel dine'é bitahdóó dinéhígíí ła', doodaii' dé'éyóní nihitahgi t'óó átsééd kéédahat'íinii ła' t'áá ha'át'íhída bidił yiyííyą́ą'go éí dił jííyą́ą'ii hak'ijį' nishłį́į doo; éí hodine'é bits'ą́ąjį' hodiyeeshxééł.

¹¹Háálá ats'íís éí dił yee hiná, áádóó éí nihaa diní'ą́ągo bikáá' náá'iiniihí bikáa'gi bee nihá k'ééhodoodǫǫł, háálá diłígíí bee iináago bee á k'ééhoodǫǫłii át'é.

¹²Éí bąą Ízrel dine'é ábidishní, Nihí doo ła' dił doohsį́įł da, doodaii' dé'éyóní nihitahgi t'óó átsééd kéédahat'íinii doo ła' dił yidooyį́įł da.

¹³Ízrel dine'é bitahdóó ła'da, doodaii' dé'éyóní nihitahgi t'óó átsééd kéédahat'íinii ła'da naalzheehgo naaldlooshii, doodaii' nidaat'a'ii daadánígíí ła' shóyoost'e'go łeeshtahjį' yizéididoogishgo bidiłígíí yik'i hwiidoogoł.

¹⁴Háálá ats'íís ádaat'éii t'áá ałtso dił yee dahiná; diłígíí t'éiyá be'iina' ádaat'éego yee dahiná; éí bąą Ízrel dine'é ábidishní, T'áá ha'át'íhída dabits'íís bidił doo dadoohsį́įł da, háálá ats'íís t'áá ałtso dił yee dahiná; t'áá háiida éí dił jííyą́ą'go hodine'é bits'ą́ąjį' hodi'yoolyééł.

¹⁵Áádóó t'ááłá'í jinítínígo naaldlooshii t'áá bíni'dii daaztsáanii, doodaii' naaldlooshii dahashkéii iisxį́įgo yiyiisxínígíí bitsį' jííyą́ą'go éí Ízrel dine'é jílíinii, doodaii' dé'éyóní jílíinii ákójiidzaago ha'éé' jidoogis áádóó nizhdoobeełgo i'íí'ą́ąjį' t'ah doo ho'didéeh da doo, ákódzaago índa ho'díídee' doo.

¹⁶Nidi t'áadoo ha'éé' dzizgisgóó índa t'áadoo nidzizbį́į́'góó éí t'áá hó doo ákwii ájíít'įįdígíí bee ádihozhdiilt'i'go nijigháa doo.