Read Navajo LEVITICUS 18 Bible Online

LEVITICUS 18 - Navajo bible

LEVITICUS 18

¹Áko Bóhólníihii éí Mózes yich'į' haadzíi'go ííłní,

²Ízrel dine'é bich'į' handziihgo kóbidiní, Shí Bóhólníihii nihiDiyin God nishłį́.

³Ííjip kéyah hoolyéedi kéédahoht'į́į́ nít'éé' yę́ęgi Ííjip dine'é ádaat'ínígíí t'áadoo bik'ehgo ádaaht'íní; Kéínan kéyah biih nihideesh'ishídi dadine'é ádaat'ínígíí ałdó' t'áadoo bik'ehgo ádaaht'íní, doodaii' bibik'eh hoogáałii t'áadoo bik'ehgo deínóhkáhí.

⁴Bee nihodiish'aahii bik'eh ádanoht'é, índa shibik'eh hoogáałii bik'ehgo deínóhkááh. Shí Bóhólníihii nihiDiyin God nishłį́.

⁵Éí bąą bee nihodiyé'áanii áádóó bee nihodiish'aahii bik'ehgo ádanoht'é; éí diné yik'eh ááníiłgo yee hiná. Shí Bóhólníihii nishłį́.

⁶Nihí ła'da áhánígo nihik'éí nilíinii doo t'áá łichí'ígo bik'idi'dííłtsos da biniyé baa dooháał da, háálá shí Bóhólníihii nishłį́.

⁷Nizhé'é doo t'áá łichí'ígo bik'idi'dííłtsos da, doodaii' nimá doo t'áá łichí'ígo ádíílíił da; éí nimá nilį́; ts'ídá doo t'áá łichí'ígo ádíílíił da.

⁸Nizhé'é be'asdzą́ą́ doo t'áá łichí'ígo ádíílíił da, háálá nizhé'é t'áá łichí'ígo íinilaago át'é.

⁹Nizhé'é bitsi'go, doodaii' nimá bich'é'égo éí t'áá hooghandi bi'dizhchį́įgo, doodaii' háadida bi'dizhchį́įgo éí nilah nilį́įgo doo t'áá łichí'ígo ádíílíił da.

¹⁰Niye' bitsi', doodaii' nitsi' bich'é'é éí doo t'áá łichí'ígo ádíílíił da, háálá t'áá jilchí'ígo éí t'áá ni łiníchí'ígo í'diinilyaago át'é.

¹¹Nizhé'é be'asdzą́ą́ bich'é'é doo t'áá łichí'ígo ádíílíił da; éí nizhé'é bá yizhchį́įgo nilah nilį́; t'ááká t'áá łichí'ígo áwóólééh lágo.

¹²Nizhé'é bilah doo t'áá łichí'ígo ádíílíił da; éí nizhé'é áhánígo bik'éí nilį́.

¹³Nimá bideezhí doo t'áá łichí'ígo ádíílíił da, háálá éí nimá áhánígo bik'éí nilį́.

¹⁴Nizhé'é bik'is doo t'áá łichí'ígo ádíílíił da; be'asdzą́ą́ doo baa nídíít'įįł da; éí nimá yázhí nilį́.

¹⁵Nizháá'áád doo t'áá łichí'ígo ádíílíił da; éí niye' be'asdzą́ą́ nilį́; éí t'ááká t'áá łichí'ígo áwóólééh lágo.

¹⁶Nik'is be'asdzą́ą́ doo t'áá łichí'ígo ádíílíił da; éí nik'is t'áá łichí'ígo íinilaago át'é.

¹⁷Asdzání ła' bich'é'é biłgo doo t'áá łichí'ígo ádíílíił da, doodaii' biyáázh bitsi', doodaii' éí bich'é'ígíí náábich'é'égo t'áá bił doo t'áá łichí'ígo ádíílíił da, háálá éí áhánígo dabik'éí danilį́, ákónít'į́įgo doo yá'áshxónígi ííníł'įįd doo.

¹⁸Ne'asdzą́ą́ yił háá'áázh niniinaa doo yił ahoolch'į́įd da doo biniyé doo t'áá łichí'ígo ádíílíił da; ła'ígíí t'ah hináago doo bił ahíidííłtsoł da.

¹⁹Asdzání ła' t'ááká baatįįh wóóya'go t'áá łichí'ígo áwóólééh lágo, jó, éí ąądii silį́į'go t'ah doo bi'didééhgóó át'é.

²⁰Bił kééhót'íinii ła' be'asdzą́ą́ doo bił díníítish da, áko doo ádidíílchxǫǫł da.

²¹Niha'áłchíní dadidoodliłgo Mólek diyin bidi'níinii t'áadoo bich'į' ninádahidoh'aahí, doodaii' nihiDiyin God bízhi' doo dílzingóó doo ádadoohłíił da. Shí Bóhólníihii nishłį́.

²²T'áá asdzání bił ashtézhígi át'éego náánáła' diné doo bił díníítish da; éí doo haldinígi áhát'íinii át'é.

²³Doodaii' t'ááká naaldlooshii ła' bił nóóteeshgo ádóólchxǫǫh lágo, doodaii' t'ááká asdzání ła' naaldlooshii t'óó yá sizį́įgo bá óyeh lágo, jó, éí doo ál'į́į da.

²⁴Díí kódahooníłígíí doo ła' bee ádidoołchxǫǫł da; jó, díí t'áá ałtso éí ał'ąą dine'é yee ádadoolchxǫ'go danihits'ą́ąjį' ch'íhinishkaad.

²⁵Áko díí kéyahgóó bee dahóóchxǫ'; éí bąą ákwii doo ákwii át'éii ádajiilaaígíí hak'i náhwiidleehgo bee haa nídéesht' įįł, áko ákwii kéédahojit'ínígíí hakéyah hwénálkwigo haz'ą́.

²⁶Éí bąą bee nihodiyé'áanii índa bee nihodiish'aahii bik'ehgo ádanoht'ée doo, áádóó éí doo haldinígi ádahat'íinii t'ááká t'áá bik'eh dayínóhkááh yíila'; nihidine'é, doodaii' dé'éyóní nihitahgi t' óó átsééd kéédahat'íinii ła' t'ááká t'áá yik'eh ádaat'į́ yíila'.

²⁷(Jó, t'áá nihítséedi kéyahgi diné kéédahat'į́į́ nít'é'ígíí díí doo haldinii t'áá ałtso yaa nidaaskai, áko éí bee kéyahgóó dahóóchxǫ'.)

²⁸Áko kéyah doo nihídidoołkoh da biniyé kót'éego doo dadoołchxǫǫł da; shą́ą́' ał'ąą dine'é ákódaat'į́įgo nihilą́ąjį' kéyah bídeeskwi ni'.

²⁹Háálá t'áá háiida díí doo haldinígi ádzaii éí bidine'é bits'ą́ąjį' bidi'yoolyééł.

³⁰Éí bąą shibik'eh hoogáałii bida'oł'į́, áko díí bibee é'él'į' doo yildinii doo ła' bik'eh ádoohníił da; jó, t'áá nihilą́ąjį' yaa nidaaskai, áko éí doo ła' bee ádadidoołchxǫǫł da. Shí Bóhólníihii nihiDiyin God nishłį́.