Read Navajo LEVITICUS 19 Bible Online

LEVITICUS 19 - Navajo bible

LEVITICUS 19

¹Áko Bóhólníihii éí Mózes yich'į' haadzíi'go ííłní,

²Ízrel dine'é dah yinéłígíí t'áá ałtso bich'į' handziihgo kóbidiní, Dadinohyin doo, jó, shí Bóhólníihii nihiDiyin God ts'ídá dinishyin.

³T'áá ánółtso nihimá índa nihizhé'é nihił danilį́į doo, áádóó shiháá'áyį́į́h jį́ hodiyingo ádeínóhsin doo; jó, shí Bóhólníihii nihiDiyin God nishłį́.

⁴Eda'alyaii ts'ídá t'áadoo bich'į' nidahohłáhí índa ha'át'íhída dadołhį́įhgo bee diyin dabidi'níinii t'áadoo ádá ádaohłe'í; jó, shí Bóhólníihii nihiDiyin God nishłį́.

⁵Áádóó náádadi'yoołnihgo nááhidoonihii hózhǫ́ǫ́jí nááhániihii át'éego Bóhólníihii bich'į' náádahołniihgo t'áá nihí ádeinohsingo náádahołniih doo.

⁶Áko nááhaaznii'ii bitsį' t'áá nááhaaznii' bijį́ áádóó biiskání ałdó' doodį́į́ł, áádóó táá' yiską́ągo ła' t'áá bi'oh nida'iisdą́ą'go éí didoodlił.

⁷Táá' yiską́ągo ła' yidą́ą'go éí t'óó baa'ih silį́į' dooleeł; éí doo dínóodzįįł da.

⁸Éí bąą t'ááłá'í jinítínígo éí jííyą́'ígíí t'áá hó doo ákwii ájíít'įįdígíí ts'ídá bee hohodiit'i' doo, háálá Bóhólníihii bíi'ii diyinígíí jííłchxǫ', áko éí hodine'é bits'ą́ąjį' hodi'yoolyééł.

⁹Áádóó nihikéyahgi da'ohizhgo dá'ák'eh nídaastł'ahgóó t'áadoo ałtso daohizhí; da'ohizhgo nidahineezdee'ígíí t'áadoo nídahohłáhí.

¹⁰Nihich'il na'atł'o'ii bi'oh da'éébį́'ígíí t'áadoo deínóhbéhí; doodaii' bineest'ą'ígíí t'áadoo ałtso nídeínóhbeehí; badahojoobá'ígíí índa dé'éyóní danilíinii bá áádahohsįįh doo; jó, shí Bóhólníihii nihiDiyin God nishłį́.

¹¹Ts'ídá doo adíníí'į́įł da, doodaii' ts'ídá doo na'adlo' nahidííłdił da, doodaii' ts'ídá doo wooch'ííd ałk'ijį' dzis'ą́ą da.

¹²Ts'ídá doo t'áá ádzaagóó shízhi' bee ádee hadidíídzih da, doodaii' nihiDiyin God bízhi' ts'ídá doo t'óó bóhólnííhgóó bee hadíídzih da; jó, shí Bóhólníihii nishłį́.

¹³Bił kééhót'íinii ts'ídá doo bi'dííloh da, doodaii' ts'ídá doo bee adíníí'į́įł da; adeenáago naalnishí yik'é naashnishii t'áadoo bits'ą́ą́' nanijaahgo néílkáhí.

¹⁴Diné bijééhkałii doo bee yídíídzih da, doodaii' doo oo'íinii t'áadoo le'é yik'ą́ą́h didooltałii t'áadoo bidáahjį' ahíníłí, nidi niDiyin God díínísin; jó, shí Bóhólníihii nishłį́.

¹⁵Doo t'áá ákogi át'éii bee t'áadoo á nihodiyí'aahí; diné bahojoobá'íii t'áadoo a'ohgo nił nilíní, doodaii' diné ayóó át'éii t'áadoo a'ohgo nił nilíní, nidi t'áá ákogi át'éego bił kééhót'íinii bá nihodiyí'aah.

¹⁶T'áadoo nidine'é bitahgóó aseezį́ baa nanináhí, doodaii' t'ááká bił kééhót'íinii bidił deezlį́ óólééh lágo baa síníti'. Shí Bóhólníihii nishłį́.

¹⁷T'áadoo nihijéí bee nihik'is bik'ee diníniihí; t'áádóo nídí bił kééhót'íinii didííteh, áko doo dínítehgóó ádił ni'iidzííh bá ninádíítłish.

¹⁸Nidine'é t'áadoo k'éédíł'íní, doodaii' nidine'é t'áadoo bidinilkaalgo bik'ijį' nílíní, nidi bił kééhót'íinii ts'ídá ayóó'ííní'níi doo; t'áá ni ayóó'ádííní'nínígíí bił aheełt'éego, jó, shí Bóhólníihii nishłį́.

¹⁹Bee nihodiyé'áanii bik'eh ádanoht'ée doo. Danilį́į́' t'áá ał'ąą át'éii t'áadoo ałtah nídaajahgo ahá nida'iilchíihgo íínísiní; álástsii' ał'ąą át'éii ałtaa násdziidgo t'áadoo nidá'ák'ehgóó k'éédídléhí; na'at'ą́hí t'áá ał'ąą át'éii bee éé' ályaii t'áadoo biih nánídáhí.

²⁰Asdzání naalte' jílį́įgo diné ła' baa ho'deet'ą́ągo, nidi doo t'ą́ą́' nááho'diiznii'góó t'ah naalte' jílį́įgo t'áá háiida hoł neezhtéezhgo baa náhódóot'įįł. Doo jidínóonéeł da, háálá asdzání t'ah naalte' nilį́.

²¹Áádóó diné éí doo ákǫ́ǫ́ ájíít'įįdjí nááhániihii át'éego Bóhólníihii bich'į' nááhizhdoołnih; níbaal bii' dahozdísinii bich'éédą́ą'jį' deenásts'aa' nizhdoolóós.

²²Náá' iiłniihii éí há bee k'ééhodoodǫǫłii deenásts'aa' doo ákǫ́ǫ́ ájíít'įįdjí nááhániihii át'éego Bóhólníihii binááł nááhizhdoołnihgo ádił adzisiihígíí ájíít'įįdígíí biniyé náájiisnii' doo, áko ádił adzisiihgo ájíít'įįdígíí há yóó'anídidoot'ááł.

²³Áko kéyah biih woonáago ch'iyáán biniyé tsin ał'ąą ádaat'éii k'edasidooláago dabineest'ą'ígíí doo yidáanii át'éego baa nitsídaohkees doo; táá' nááhaijį' t'ááká ła' daohsą́ą́' lágo, ííshją́ą́ ts'ídá doo doodį́įł da.

²⁴Nidi dį́į́' náhááh góne' daneest'ánígíí t'áá át'é dílzingo ats'ádidoot'áałgo bee Bóhólníihii baa ha'niih doo.

²⁵Áádóó ashdla' náhááh góne' daneest'ánígíí éí daohsą́ą doo, áko t'óó ahayóí nihá níná'nít'į́įh doo; jó, shí Bóhólníihii nihiDiyin God nishłį́.

²⁶T'áá ha'át'íhída bidił doo t'áá bił daohsą́ą da doo; álíleego bee ééhózingo bee nahagháii, doodaii' náásgóó bee ééhodoozįįłgo bíká nahagháii t'áadoo chodaoł'íní.

²⁷Nihítł'ahgi nihitsii' doo dadoohshih da; nihidághaa' bibąąhgóó doo dahidooshih da.

²⁸Daneeznáanii bá danihits'íís t'áadoo ahidaohgéshí, doodaii' doo nihik'i da'ashchį́į da doo; jó, shí Bóhólníihii nishłį́.

²⁹T'áadoo nitsi' ałjiłnii bee doo ílį́į́góó áníł'íní; éí doodaii' nihikéyahgi ajił k'ee'ąą doolzhishgo doo yá'áshóonii t'óó ahodooyóí.

³⁰Áádóó shiháá'áyį́į́h jį́ hodílzingo ádeínóhsin, índa shihodiyingo haz'ánígíí dadíínóhsin doo; jó, shí Bóhólníihii nishłį́.

³¹Ch'į́įdii yádabiiłti'ii, doodaii' da'diłgąshii t'áadoo bich'į' choda'ooł'íní, doo nidi bee ádadidoołchxǫǫł da. Shí Bóhólníihii nihiDiyin God nishłį́.

³²Bitsii' deigaii bidááhdóó nídaohdzįįh, áádóó hastóí hadaastihii nihił danilį́, índa nihiDiyin God dadíínóhsin; jó, shí Bóhólníihii nishłį́.

³³Nihikéyahgi dé'éyóní ła' t'óó átsééd nihił kééhat'į́įgo t'áadoo bich'į' nahwiyołnání.

³⁴Nidi dé'éyóní nihitahgi kééhat'ínígíí t'áá nihitahgi bi'dizhchį́įgo baa nitsóhkeesgo éí ayóó'ádeínóh'níi doo; t'áá nihí ayóó'áda'díínóh'nínígíí bił aheełt'éego, háálá nihí ałdó' Ííjip kéyahdi dé'éyóní danohłį́į́ nít'éé'; jó, shí Bóhólníihii nihiDiyin God nishłį́.

³⁵Doo t'áá ákogi át'éii t'áadoo bee nidahodiyoh'aahí; áníłnéezgi t'áadoo bee bínída'nooł'ąąhí; t'áadoo bee dah nídadi'yoołohí; t'áadoo bee ínída'nooł'ąąhí.

³⁶Bee dah ní'diidlohí áádóó bee ínída'neel'ąąhí áádóó íífa wolyéego índa hin wolyéego bee ída'neel'ąąhígíí éí t'áá ákogi át'éego bee ínída'neel'ąąhii nihee dahólǫ́ǫ doo; jó, shí Bóhólníihii nihiDiyin God éí Ííjip kéyahdę́ę́' ch'éénihiní'eezhígíí ásht'į́.

³⁷Éí bąą bee nihodiyé'áanii t'áá át'é áádóó bee nihodiish'aahii t'áá át'é bik'eh dahonoł'į́įgo bida'oł'į́į doo; jó, shí Bóhólníihii nishłį́.