Read Navajo LEVITICUS 20 Bible Online

LEVITICUS 20 - Navajo bible

LEVITICUS 20

¹Áádóó Bóhólníihii éí Mózes yich'į' haadzíi'go ííłní,

²Ízrel dine'é anáábididíí'niił, Ízrel dine'é bitahdóó ła', doodaii' dé'éyóní éí Ízrel dine'é bitahgi t'óó átsééd kéédahat'ínígíí t'áá háiida ba'áłchíní ła' Mólek diyin bidi'níinii yich'į' nááyiisnii'go éí t'áá aaníí bidi'yoolyééł; kéyahdóó tsé yee hoł nidazdoołniił.

³Áko éí dinéhígíí hak'ijį' deeshłeełgo hadine'é bits'ą́ąjį' hodiyeeshxééł, háálá ha'áłchíní ła' Mólek diyin bidi'níinii bich'į' náájiisnii'go shihodiyingo haz'ánígíí jííłchxǫ' áádóó shízhi' diyinígíí doo dílzingóó ájiilaa.

⁴Áko kéyahgi kéédahojit'ínígíí éí Mólek diyin bidi'níinii yich'į' diné ba'áłchíní ła' nááyiisnii'ígíí t'áadoo baa nídajist'įįdgóó índa t'áadoo dajiisxį́į́góó

⁵éí dinéhígíí ba'áłchíní t'áá bił bik'ijį' nishłį́įgo áádóó t'áá ałtso hakék'eh dookaigo Mólek diyin bidi'níinii bik'ehgo ajił baa jideeskaígíí hadine'é bits'ą́ąjį' nidahodeestsxił.

⁶Áádóó diné t'áá háiida ch'į́įdii yádabiiłti'ii índa da'diłgąshii bikéé' dashdiiyáago ajił baa nijigháhígíí hak'ijį' nishłį́į doo, índa hadine'é bits'ą́ąjį' hodiyeeshxééł.

⁷Éí bąą t'áá nihí diyingo áda'dołnééh, áko dadinohyin doo, háálá shí Bóhólníihii nihiDiyin God nishłį́.

⁸Áádóó bee nihoyé'áanii bik'eh dahonoł'į́įgo bida'oł'į́į doo; shí Bóhólníihii nishłíinii dadinohyingo ánihíínísin.

⁹Háálá t'áá háiida éí hazhé'é, doodaii' hamá dadzódziihígíí ts'ídá hodi'yoolyééł; hazhé'é, doodaii' hamá dzíídzí'ígíí bąą hadił t'áá hó hak'éidoot'ih.

¹⁰Diné éí diné náánáła' be'asdzą́ągo t'áá éí bił kééhojit'íinii be'asdzą́ą́ nilį́įgo bił ahizhdoolyáago éí diné áádóó bił ahizhdoolyáhígíí t'áá bił nidahoditseed doo.

¹¹Áádóó diné ła' bizhé'é be'asdzą́ą́ yił neezhtéezhgo éí hazhé'é t'áá łichí'ígo ájiilaago át'é; éí t'áá ájíłah ts'ídá nahodi'dootsxił ni; hadił t'áá hó hak'éidoot'ih.

¹²Diné ła' bizháá'áád yił neezhtéezhgo éí t'áá ájíłah ts'ídá nahodi'dootsxił ni; t'áadoo é'él'į́įgi ádziidzaaígíí bąą hadił t'áá hó hak'éidoot'ih.

¹³Diné ła' éí t'áá diné nilį́įgo yił neezhtéezhgo asdzání bił aneezhtézhígíigi át'éego éí t'áá ájíłah doo haldinígi ádziidzaago át'é; éí ts'ídá nahodi'dootsxiłgi hadił t'áá hó hak'éidoot'ih.

¹⁴Diné ła' éí asdzání áádóó bimá t'áá bił hwe'asdzą́ą́ ájiilaago éí doo yá'áshónígi áhóót'įįdii át'é; éí t'áá hwíighah adahodidoolk'ą́ą́ł; hó áádóó asdzání t'áá áłah bił akóhodi'doolnííł, áko nihitahgi doo yá'áshóonii doo hólǫ́ǫ da doo.

¹⁵Áádóó diné ła' naaldlooshii yá'ázyehgo éí diné ts'ídá diyoolyééł, índa naaldlooshii ałdó' diyoolyééł.

¹⁶Áko asdzání ła' naaldlooshii yaa níyáago bá'ázyehgo éí asdzání diyoolyééł, naaldlooshii ałdó'; ts'ídá nahodi'dootsxiłgi hadił t'áá hó hak'éidoot'ih.

¹⁷Índa diné ła' hazhé'é bitsi', doodaii' hamá bich'é'é bił ahizniidzį́į'go áádóó hoł neezhtéezhgo éí doo yá'áshóonii át'é; hadine'é binááł nahodi'dootsxił, háálá halah t'áá łichí'ígo ájiilaa; t'áá hó doo ákwii ájíít'įįdígíí ts'ídá bee hohodiit'i' doo.

¹⁸Diné ła' éí asdzání ąądii nilį́įgo bił jineezhtéezhgo áádóó t'áá łichí'ígo ájiilaago chooyin silį́'ígíí jiiłtsą́ áádóó asdzání t'áá bí íinízingo ákójiilaa, áko t'áá ájíłah hodine'é bits'ą́ąjį' hodi'yoolyééł.

¹⁹Nimá yił háá'áázh, doodaii' nizhé'é bilah doo t'áá łichí'ígo ádíílíił da, háálá éí hánígo hak'éí nilíinii t'áá łichí'ígo ájiilaa, áko t'áá ájíłah doo ákwii ájíít'įįdígíí bee hohodiit'i'go niji'aash doo.

²⁰Diné ła' hadá'í, doodaii' hazhé'é yázhí be'asdzą́ą́ bił jineezhtéezhgo éí hadá'í, doodaii' hazhé'é yázhí t'áá łichí'ígo ájiilaago át'é; ádił adzisiihígíí bee hohodiit'i'go niji'aash doo, índa ha'áłchíní doo hodooleełgóó áhodi'doolníiłgo jidínóonééł.

²¹Diné ła' yił háá'áázh be'asdzą́ą́ bighajíltį́įgo éí doo bee ho'didoodahii ájiilaago át'é; éí yił háá'áázh t'áá łichí'ígo áyiilaago át'é; éí ha'áłchíní doo hodooleeł da.

²²Éí bąą bee nihodiyé'áanii t'áá át'é bik'eh dahonoł'į́į doo índa bee nihodiish'aahii t'áá át'é bida'oł'į́į doo, áko kéyah biih nihideesh'ishígíí doo nihídoołkoh da.

²³Dine'é nihits'ą́ąjį' ch'íhinishkaadígíí éí deíkáhígi át'éego t'áadoo deínóhkáhí, háálá éí díí t'áá át'é yaa nidaakaigo ádayoołííł; éí bąą bik'ee dinish'niih.

²⁴Nidi ánihidííniid, Dabikéyah danihíí' dooleeł, nihaa dideesh'áałgo nihíí' ádadoohłííł; éí kéyah bii' abe' áádóó tsésná bitł'izh bee áda'azįįd; jó, shí Bóhólníihii nihiDiyin God nishłį́; éí ał'ąą dine'é bits'ánihinínilígíí ásht'į́.

²⁵Éí bąą naaldlooshii daadánígíí áádóó doo daadánígíí índa nidaat'a'ii doo daadánígíí áádóó daadánígíí nihił ał'ąą át'éii át'é. Áko naaldlooshii, doodaii' nidaat'a'ii, doodaii' t'áá ha'át'íhída nihokáá'góó nidaa'na'ii t'ááká bee baa'ihii áda'doołnééh lágo, éí nihits'ádiní'ą́ągo doo dadoohsį́į́łgóó ánihiishłaa.

²⁶Áko nihí shich'į'go dadinohyin doo, háálá shí Bóhólníihii ts'ídá dinishyin, ał'ąą dine'é bits'ánihidiní'ą́, áko shíí' dadoohłeeł.

²⁷Diné ła', doodaii' asdzání ła' ch'į́įdii yábiiłti'ii, doodaii' adiłgąshii nilį́įgo éí ts'ídá nidabidi'tseed doo; tsé bee bił nidahizdoolniiłgi bidił t'áá bí bik'éidoot'ih.