Read Navajo LEVITICUS 22 Bible Online

LEVITICUS 22 - Navajo bible

LEVITICUS 22

¹Áádóó Bóhólníihii éí Mózes ííłní,

²Éran áádóó biye'ké bich'į' handziihgo kóbidiní, Ízrel dine'é éí deidísingo dílzinii shaa nídeidii'aahígíí doo ha'át'éegoda ádayósin da doo, áádóó shízhi' dílzinii t'ááká doo dílzinii ádayóle' lágo, jó, shí Bóhólníihii nishłį́.

³Kóbidiní, Nihits'ą́ą́dóó náás ahoołchíiłii t'áá ánółtso nihitahdóó dílzingo aa náhidit'aahii biniyé yah ajííyáago éí Ízrel dine'é Bóhólníihii yaa nídeidii'aahgo deidísinígi át'éego éí t'ahdii doo ho'didééhgóó yah ajííyáago honishłóní bits'ą́ąjį' hodi'yoolyééł; jó, shí Bóhólníihii nishłį́.

⁴Éran bits'ą́ą́dóó yichíiłii t'áá háiida łóód ats'íís yiyáanii naałdzidii bee bąąh dahaz'ą́ągo, doodaii' naałniih bits'íís bits'ą́ą́dóó háálį́įgo éí dílzingo shaa náhidit'aahii doo ła' yidooyį́įł da; ho'díídee'go índa. Ła' ats'íís daaztsáanii bee t'óó baa'ih silį́į'ii, doodaii' diné ła' bíígąsh háána'ii bíhizhdéé'náa'go,

⁵doodaii' t'áá ha'át'íhída nidaa'na'ii ła' daaztsą́ągo bíhizhdéé'náa'go t'áá haa dayit'éego doo ho'didééh áhoolaagóó, doodaii' diné doo bi'didéehii bíhizhdéé'náa'go éí t'áá ha'át'éegoda doo bi'didééhgóó

⁶éí ákódaat'éii ła' bíhizhdiyii'náhígíí i'íí'ą́ąjį' doo ho'didéeh da doo; dílzingo shaa náhidit'aahígíí doo ła' yidooyį́įł da; t'áá hazhó'ó naabeehgo t'éiyá.

⁷I'íí'ą́ągo índa ho'didoodah, áádóó bik'ijį' índa dílzingo shaa náhidit'aahígíí yidooyį́į́ł; jó, éí bich'iyą' át'é.

⁸T'áá bíni'dii daaztsánígíí, doodaii' naaldlooshii nibiisdládígíí t'ááká yóyą́ą'go yee ádólchxǫǫh lágo, jó, shí éí Bóhólníihii nishłį́.

⁹Éí bąą shibik'eh hoogáałii bik'eh ádajooníił doo, áko ádił da'dzisiihígíí doo bee hodahodiit'i'go dajíkáah da doo áádóó doo dazdísinígíí biniinaa t'óó jidínóonééł; jó, shí Bóhólníihii nishłį́įgo dazhdiyingo áhwíínísin.

¹⁰Diné t'áá azlį́'ígíí éí dílzingo shaa náhidit'aahígíí doo ła' yidooyį́įł da; t'óó átsééd yił bighango, doodaii' adeenáago bá naalnishii dílzingo shaa náhidit'aahígíí doo ła' yidooyį́įł da.

¹¹Nidi náá'iiłniihii t'áá bí bibéeso yee naalte' nayiis'nii'go áádóó bighangi yizhchíinii éí dílzingo shaa náhidit'aahígíí yidooyį́į́ł.

¹²Náá'iiłniihii bitsi' éí diné t'áá azlį́'ígíí yił ahaa yít'áazhgo éí dílzingo shaa nídeidii'aahígíí ła' nááyiisnii'ii doo ła' yidooyį́įł da.

¹³Nidi náá'iiłniihii bitsi' bąąh áhásdįįdgo, doodaii' bahastiin yóó'abidíí'ą́ągo índa ba'áłchíní ádingo éí t'áá ániid nijigháádą́ą́' ájít'é yę́ęgi át'éego hazhé'é bighangi nídzídzáago éí hazhé'é bich'iyą' jiyą́ą doo, nidi diné t'áá azlį́'ígíí éí doo yidooyį́įł da.

¹⁴Índa diné ła' dílzingo shaa náhidit'aahígíí doo bił bééhózingóó yiyííyą́ą'go bą́ą́h ílínígíí éí ashdla'go ałts'áádzoígíí t'ááłá'í haadzogo bínéizdoozohgo náá'iiłniihii bich'į' nizhdoolééł.

¹⁵Áko Ízrel dine'é éí dílzingo Bóhólníihii yaa nídeidii'aahígíí t'ááká doo dílzingóó ádayólééh lágo, jó, éí Bóhólníihii yich'į' náádayiiłniih.

¹⁶Áko dílzingo shaa nídeidii'aahígíí doo dazdísingóó dajííyą́ą'go doo ákwii át'éii bee Ízrel dine'é bidahodiit'i'go deíkáahgo ádazhdoolííł; jó, shí Bóhólníihii nishłį́įgo dazhdiyingo áhwíínísin.

¹⁷Áádóó Bóhólníihii éí Mózes ííłní,

¹⁸Éran áádóó biye'ké índa Ízrel dine'é t'áá ałtso bich'į' handziihgo kóbidiní, Ízrel dine'é bitahdóó ła', doodaii' dé'éyóní éí Ízrel kéyahgi kéédahat'íinii ła' náádi'yoołnihgo éí yee ádee haadzíi'ii t'áá át'é índa t'áá bí íinízingo nááyiiłniihii t'áá át'é éí Bóhólníihii bich'į' didlidgo nááhániihii náádayiiłnihgo

¹⁹t'áá nihí ádeinohsingo dóola, doodaii' deenásts'aa', doodaii' tł'ízíchǫǫh hadaałt'éii náádahołniih doo.

²⁰Nidi bąąh dahaz'ánígíí doo ła' náádahidoołnih da; éí Bóhólníihii doo nihá yidínóozįįł da.

²¹Áádóó t'áá háiida náádi'yoołnihgo nááhidoonihii hózhǫ́ǫ́jí nááhániihii át'éego Bóhólníihii bich'į' néidiyoołnihgo yee ádee haadzíi'ii, doodaii' t'áá bí íinízingo nááyiiłniihii éí béégashii, doodaii' dibé hadaałt'éii t'áá noodzį́'ígi át'éii nááyiiłniih doo; doo tídiilyaii t'éí nááhániih doo.

²²Alį́į́' doo oo'į́į́góó, doodaii' bits'in k'é'éltǫ'go, doodaii' bąąh dahaz'áanii, doodaii' łóód, doodaii' dishch'id bąąh hólóonii, doodaii' bikáá'góó sidgo kódaat'éhígíí doo Bóhólníihii bich'į' nááhidoołnih da, doodaii' éí bikáá' náá'iiniihí bikáa'jį' doo didlidgo nááhániihii Bóhólníihii bich'į' nááhidoołnih da.

²³Dóola yázhí, doodaii' dibé yázhída éí bits'íís t'áá ha'át'éhígida alááh, doodaii' a'oh níísánígíí éí náádi'yííłnihgo t'áá ni íinínízingo nááhániihii t'éí nááhíłniih doo, nidi ádee háínídzíí'jí nááhániihii át'éego éí doo ná dínóodzįįł da.

²⁴Alį́į́' bicho' ayęęzhii yishtłishii, doodaii' yishjizhii, doodaii' sits'ilii, doodaii' haa'nilii éí doo Bóhólníihii bich'į' náádahidoołnih da, doodaii' ákót'éhígíí nihikéyahgi doo náádahidoołnih da.

²⁵Doodaii' dé'éyóní bits'ą́ą́dóó díí ha'át'íhída ła' nihiDiyin God bibááh át'é; doo óolzinii éí doo náádahidoołnih da, háálá éí yíchxǫ'go áádóó bąąh dahaz'ą́ągo át'é; éí doo nihá dínóodzįįł da.

²⁶Áádóó Bóhólníihii éí Mózes ííłní,

²⁷Dóola yázhí, doodaii' dibé yázhí, doodaii' tł'ízí yázhí yichíihgo bimá t'áá yił naa'aashgo tsosts'id yidoołkááł, áko tseebíí yiską́ą́dóó bik'ijį' índa éí Bóhólníihii bich'į' didlidgo nááhániihii át'éego dínóodzįįł.

²⁸Áádóó béégashii, doodaii' dibétsa'ii biyázhí t'áá bił doo t'áá ła'óo jį́ nidadoołtsił da.

²⁹Índa náádi'yííłnihgo nááhidoonihii bee ahééh hwiindzingo nááhániihii Bóhólníihii bich'į' náádahołniihgo éí t'áá nihí ádeinohsingo náádahołniih doo.

³⁰T'áá éí bijį́ ałtso dadoohsį́į́ł; biiskání doo ła' t'áá yidziih da doo; jó, shí Bóhólníihii nishłį́.

³¹Éí bąą shibik'eh ó'oo'níiłii bik'eh dahonoł'į́įgo bida'oł'į́į doo; jó, shí Bóhólníihii nishłį́.

³²Doodaii' shízhi' dílzinii t'ááká doo dílzinii ádaohłe' lágo, nidi Ízrel dine'é bitahgóó dashizdósin doo; jó, shí Bóhólníihii diyingo ats'ánihidiní'áanii nishłį́.

³³Shí t'éiyá nihiDiyin God nishłį́į doo biniyé Ííjip kéyahdę́ę́' dah nihidii'eezh; jó, shí Bóhólníihii nishłį́.