Read Navajo LEVITICUS 23 Bible Online

LEVITICUS 23 - Navajo bible

LEVITICUS 23

¹Áádóó Bóhólníihii éí Mózes yich'į' haadzíi'go ííłní,

²Ízrel dine'é bich'į' handziihgo kóbidiní, Bóhólníihii bich'į' hodílzingo áłah ná'ádleeh baa náhwiilzhíishgo nídeit'aahígíí baa ch'éédahoht'áah doo; díí hodílzingo áłah ná'ádleeh bee náhoosh'aahii át'é.

³T'áá hastą́ą́h jínígo t'éí ninádaałnish doo, nidi tsosts'id jį́į́ góne' háá'áyį́į́h jį́ át'éego dahodíínóhsingo áłah náhdleeh doo; éí bijį́ ts'ídá doo na'anish da doo; díí éí t'áá danihiníghangóó t'áá ałtso Bóhólníihii biháá'áyį́į́h jį́ át'ée doo.

⁴Díí Bóhólníihii bich'į' hodílzingo áłah ná'ádleeh baa náhwiilzhíishgo nídeit'aahígíí éí baa nídahwiilzhish góne' baa ch'éédahoht'áah doo.

⁵Átsé nídízííd binih dį́į́ts'áadahgóó yoołkáałgo i'íí'ą́ągo Bóhólníihii bi'atis'adeesdzáii bee bééhániihii hahalzhíísh.

⁶Áádóó t'áá éí yiziłígíí binih ashdla'áadah yoołkáałgo díík'ǫsh t'áágééd bááh ályaii bee Bóhólníihii bich'į' hodílzingo áłah ná'ádleeh néit'aah doo; tsosts'id jį́ díík'ǫsh t'áágééd bááh ályaii nídaahdį́įh doo.

⁷Hahóóyá bijį́ nihił dahodiyingo áłah náhdleeh doo; éí bijį́ doo nidoołnish da.

⁸Nidi tsosts'id jį́ Bóhólníihii bich'į' didlidgo nááhániihii náádahołniih doo; tsosts'id yiską́ą́ góne' hodílzingo áłah náhdleehgo ákóne' doo nidoołnish da.

⁹Áádóó Bóhólníihii éí Mózes yich'į' haadzíi'go ííłní,

¹⁰Ízrel dine'é bich'į' handziihgo kóbidiní, Kéyah nihaa dinish'aahígíí biih woonáago da'ohizhgo áłtsé neest'áanii éí ła' be'astł'ǫ́ǫgo náá'iiłniihii baa nídaołjoł doo.

¹¹Áádóó tł'oh naadą́ą́' be'astł'ónígíí Bóhólníihii yich'į' náásee yił nídi'dilnih doo; nihidínóozįįł biniyé háá'áyį́į́h jį́ biiłkáhí náá'iiłniihii éí náásee yił nídi'dilnih doo.

¹²Áádóó t'áá éí bijį́ tł'oh naadą́ą́' be'astł'ónígíí náásee bił nídadołnihgo dibé yázhí biką'ii ła' binááhaaí hadaałt'éii didlidgo nááhániihii át'éego Bóhólníihii bich'į' náádahołniih doo.

¹³Índa ómer bee í'neel'ąąhí bee ak'áán dibahí naakidi haaką́ągo éí ak'ah bił ałtahgo náádahołniih doo; éí didlidgo łikání halchingo Bóhólníihii bich' į' nááhániihii át'é, áádóó yanáadzi'go nááhániihii éí wáin t'ááłáhídi yikááł bíighahgo náádahołniih doo.

¹⁴Tł'oh naadą́ą́' átsé daneest'ánígíí bááh ályaago, doodaii' sit'éego, doodaii' t'áadoo sit'éhí t'ááká daohsą́ą́' lágo, nihiDiyin God átsé bich'į' náádahoołnii'go índa t'áá éí bijį́ dadoohsį́į́ł; bee nihoní'áanii ahóyéel'áágóó náás da'ahíínółchííhgóó t'áá danihiníghangóó t'áá ałtso nihá át'ée doo.

¹⁵Háá'áyį́į́h jį́ biiłkáhí tł'oh naadą́ą́' t'ááłá'í ałch'į' be'astł'ǫ́ǫgo náádadoołjołgo náásee bił nídi'dilnihígíí náádahoołnii'go éí bijį́į́dóó tsosts'idi háá'áyį́į́h jį́ ni'iileehgo deínółta' doo.

¹⁶Áádóó tsosts'idi háá'áyį́į́h jį́ azlį́į́'dóó biiłkáhíjį' ashdladiin jį́ azlį́į'go deínółta' doo, áko náádadi'yoołnihgo náánáła' ak'áán nááhániihii éí Bóhólníihii bich'į' náádahołniih doo.

¹⁷Áko ómer bee í'neel'ąąhí bee ak'áán dibahí naakidi haaką́ągo éí t'áá nihighandi díík'ǫsh bił bááh ályaaígíí náásee bił nídi'dilnihii naakigo éí Bóhólníihii bich'į' náádahołniih doo; éí átsé neest'áanii Bóhólníihii bíhígíí át'é.

¹⁸Áádóó náádadi'yoołnihgo bááh náádahołniihígíí bił dibé yázhí tsosts'idgo ła' béédááhaaí dabiką'ígíí hadaałt'éii áádóó dóola yázhí t'ááłá'ígo índa deenásts'aa' naakigo éí Bóhólníihii bich'į' didlidgo nááhániihii ádaat'éego ak'áán nááhániihii áádóó yanáadzi'go nááhániihii óóltą'go didlidgo nááhániihii Bóhólníihii bich'į' łikání halchinii át'éego náádahołniih doo.

¹⁹Ákohgo índa náádahidoołnihii tł'ízíchǫǫh t'ááłá'ígo ádił ni'iidzííhjí nááhániihii át'éego áádóó deenásts'aa' ła' binááhaaí naakigo nááhidoonihii hózhǫ́ǫ́jí nááhániihii át'éego náádahołniih doo.

²⁰Áko náá'iiłniihii éí náásee bił nídi'dilnihgo náádahaniihii átsé neest'áanii bits'ą́ą́dóó bááh ályaii Bóhólníihii bich'į' náásee yił nídi'dilnihii át'éego dibé yázhí naakigo bóóltą'go nááyiiłniih doo; éí Bóhólníihii bich'į' dílzinii át'éego náá'iiłniihii bá át'ée doo.

²¹Áádóó t'áá éí bijį́ bee háá'ádzih doo, áko nihich'į'go dílzingo áłah ná'ádleehígíí át'ée doo, áádóó éí bijį́ doo nidoołnish da; díí bee nihoní'áanii ahóyéel'áágóó t'áá danihiníghangóó t'áá ánół tso nihá át'éego náás da'ahíínółchíih doo.

²²Ákohgo nihikéyahgi da'ohizhgo dá'ák'eh nídaastł'ahgóó t'áadoo ałtso daohizhí, doodaii' nidahineezdee'ígíí t'áadoo nínáádahohdlahí; bíni' éí badahojoobá'ígíí índa dé'éyóní danilíinii nihitahgóó kéédahat'íinii bá áá dahohsįįh; jó, shí Bóhólníihii nihiDiyin God nishłį́.

²³Áádóó Bóhólníihii éí Mózes yich'į' haadzíi'go ííłní,

²⁴Ízrel dine'é bich'į' handziihgo kóbidiní, Tsosts'id nídízííd binih ła'a jį́į́ góne' háá'áyį́į́h jį́ deidooł'aałgo bee ééhániihii át'éego dilní didoots'į́įłgo hodílzingo áłah doohłeeł.

²⁵Ákóne' doo nidoołnish da, nidi náádahidoołnihii Bóhólníihii bich'į' didlidgo náádahołniih doo.

²⁶Áádóó Bóhólníihii éí Mózes yich'į' haadzíi'go ííłní,

²⁷Áádóó ałdó' díí tsosts'id nídízííd binih neeznáá jį́į́ góne' éí á k'ééhodoodǫǫłgo yoołkáłígíí át'é; éí hodílzingo áłah náhdleehígíí nihá át'ée doo, ákóne' doo adą́ą́góó nihii' naazíinii dahodísingo sohodizin áńdaał'įįh doo, áko náádahidoołnihii Bóhólníihii bich'į' didlidgo náádahołniih doo.

²⁸T'áá éí bijį́ ts'ídá doo nidoołnish da, háálá á k'ééhoodǫǫłii yoołkáłígíí át'éego Bóhólníihii nihiDiyin God binááł nihá k'ééhodoodǫǫł.

²⁹T'áá éí bijį́ t'áá háiida doo adą́ą́góó hodílzingo sohodizin doo áńjiil'įįhígíí éí hodine'é bits'ą́ąjį' hodi'yoolyééł.

³⁰Áádóó t'áá éí bijį́ t'áá háiida nijishnishígíí t'áá éí hodine'é bits'ą́ą́' áhodeeshdįįł.

³¹T'áá ha'át'éegoda doo nidoołnish da; díí bee nihoní'áanii ahóyéel'áágóó náás da'ahíínółchííhgóó t'áá danihiníghanígi t'áá ánółtso nihá át'ée doo.

³²Áko díí háá'áyį́į́h jį́ nihá át'ée doo, áádóó doo adą́ą́góó nihii' naazíinii dahodísingo sohodizin áńdaał'įįh doo; t'áá éí yiziłígíí binih náhást'éí jį́į́ góne' i'íí'ą́ą́dóó anáá'oot'ą́ąjį' nihiháá' áyį́į́h jį́ baa dahonohsą́ą doo.

³³Áádóó Bóhólníihii éí Mózes yich'į' haadzíi'go ííłní,

³⁴Ízrel dine'é bich'į' handziihgo kóbidiní, Tsosts'id nídízííd binih ashdla'áadah jį́į́ góne' éí chaha'oh ándaoł'įįhgo tsosts'id yiską́ąjį' hodílzingo áłah ná'ádleehgo Bóhólníihii bich'į' ninádahohłaah doo.

³⁵Hahóóyá bijį́ dahodíínóhsingo áłah náhdleeh doo; éí bijį́ doo nidoołnish da.

³⁶Tsosts'id jį́ náádadi'yoołnihgo Bóhólníihii bich'į' didlidgo nááhániihii náádahołniih doo. Áádóó tseebíí yiską́ągo dahodíínóhsingo áłah náhdleehgo náádadi'yoołnihii Bóhólníihii bich'į' didlidgo nááhániihii náádahołniih doo; éí hodílzingo áłah náhdleeh doo; éí bijį́ doo nidoołnish da.

³⁷Díí Bóhólníihii bich'į' hodílzingo áłah ná'ádleeh baa náhwiilzhíishgo nídeit'aahígíí éí hodílzingo áłah náhdleehgo baa ch'éédahoht'áah doo, áko náádadi'yoołnihgo Bóhólníihii bich'į' didlidgo nááhániihii náádahołniih doo; éí didlidgo nááhániihii áádóó ak'áán nááhániihii áádóó nááhidoonihii índa yanáadzi'go nááhániihii t'áá ałtsoní náádayiiłniihígíí ła'a jį́ bá náhoot'aah doo.

³⁸Bóhólníihii biháá'áyį́į́h jį́į́ góne' náádahaniihii áádóó aa nooláhígíí áádóó bee ádee haohdzíi'ii t'áá át'é índa t'áá nihí ádeinohsingo náádahołniihii t'áá át'é Bóhólníihii baa nídahidoh'aahígíí ádaat'éego ínáádaóltą'go Bóhólníihii bich'į' náádahołniih doo.

³⁹Tsosts'id nídízííd binih ashdla'áadah jį́į́ góne' ałdó' nihikéyahgi nídaneest'ánígíí áłah ádaohłaago tsosts'id jį́ Bóhólníihii bich'į' hodílzingo áłah ná'ádleeh nídaoł'aah doo. Hahóóyá bijį́ háá'áyį́į́h jį́ át'ée doo índa tseebíí jį́į́ góne' ałdó' háá'áyį́į́h jį́ át'ée doo.

⁴⁰Áko hahóóyá bijį́ tsin naazkaad dabi'iil danizhóníii éí tsin naazkaadii páam wolyéhígíí bi'iil áádóó tsin dadíłch'ilii bi'iil índa tó nílį́į́dę́ę́' k'ai' ałdó' nidahidoołjołgo bee chaha'oh ádadoohłííł, áko Bóhólníihii nihiDiyin God binááł nihił dahózhǫ́ǫgo tsosts'id yidoołkááł.

⁴¹Díí Bóhólníihii bich'į' dahodíínóhsingo áłah náhdleeh nídaoł'aah dooígíí tsosts'id néíłkáahjį' nínáhahgo ákóndaoł'įįh doo; nihá bee nihoní'áanii át'éego ahóyéel'áágóó náás da'ahíínółchíih doo; tsosts'id nídízííd binih baa nináhkah doo.

⁴²Chaha'oh bii' danihighango tsosts'id yidoołkááł; Ízrel dine'é danilį́įgo nidahaazhchíinii t'áá ałtso chaha'oh yii' dabighan doo.

⁴³Ákohgo nihits'ą́ą́dóó náás da'ahílchíihii bił béédahózin dooígíí éí Ízrel dine'é danilį́įgo chaha'oh yii' dabighango áshłaaígíí Ííjip kéyahdę́ę́' ch'ééní'eezh. Jó, shí Bóhólniihii nihiDiyin God nishłį́.

⁴⁴Áko Mózes éí Ízrel dine'é bił hojoolne'go Bóhólníihii bich'į' hodílzingo éí áłah ná'ádleeh nídajiił'aah dooleeł lá.