Read Navajo LEVITICUS 25 Bible Online

LEVITICUS 25 - Navajo bible

LEVITICUS 25

¹Áko Dził Sáínaidi Bóhólníihii kóníigo Mózes yich'į' haadzíí',

²Ízrel dine'é bich'į' handziihgo kóbidiní, Kéyah nihaa dinish'aahígíí biih woonáago índa Bóhólníihii bich'į'go dá'ák'eh hanínályįh doo.

³Hastą́ą́h nínáhahjį' k'ééda'dohdléeh doo, áádóó hastą́ą́h nínáhahjį' nihich'il na'atł'o'ii nídahohgish doo, índa nídant'į́įhii áłah áńdaał'įįh doo.

⁴Nidi tsosts'id náhááh góne' dá'ák'eh hanínályįh doo; éí Bóhólníihii bá háá'áyį́į́h át'é. T'ááká k'ida'doohłééł lágo, t'ááká nihich'il na'atł'o'ii bílátah dahoohgéésh lágo.

⁵Áádóó t'áá bíni'dii hadaneesánígíí éí doo dadoohish da; ch'il na'atł'o'ii doo bílátah heeshgizhii doo bąąh nída'íínóhbeeh da doo; jó, dá'ák'eh hanályį́įhgo náháhígíí át'é.

⁶Áko dá'ák'eh hanályį́įhgo yihahígíí biyi' ch'iyáán nihá hólǫ́ǫ doo; nihá nidaal'a'í bá, asdzání nidaal'a'í bá áádóó adeenáago nihá nidaal'a'í bá índa dé'éyóní nihitahgóó t'óó átsééd kéédahat'íinii bá ch'iyáán hólǫ́ǫ doo.

⁷Áádóó danihilį́į́' bá índa naaldlooshii nihikéyah bikáá'góó nidaakaígíí bá; éí nídaneest'ą́ągo bee ída'azįįdígíí dabich'iyą' doo.

⁸Áko tsosts'id náhááh góne' kéyah hanínályįhígíí éí t'áá ákót'éego tsosts'idi ákónádzaago dízdiindóó ba'aan náhást'éí nááhai doo.

⁹Ákohgo deenásts'aa' bidee' bee í'dílzoołí didoolts'į́įłgo baa hózhǫ́ǫgo yihah wolyéhígíí hahoolzhiizhgo tsosts'id nídízííd binih neeznáá jį́į́ góne' éí á k'ééhoodǫǫłgo náá'iiniih yoołkááł át'éego kéyah t'áá át'é bii'góó deenásts'aa' bidee' bee í'dílzoołí didoolts'į́į́ł.

¹⁰Áádóó ashdladiin náháhígíí dadíínóhsin, índa kéyahgóó kéédahat'íinii t'áá át'éé nít'éé' áhonídlee' bee bił dahołne'; díí danihich'į'go hózhǫ́ǫ́jí náhááh át'é, áko diné t'ááłá'í nítínígo bidáda'ak'eh yich'į' nihéédahidookah áádóó bik'éí yich'į' nihéédahidookah.

¹¹Éí ashdladiin yihahígíí bii' nihił nidahoozhǫǫh doo; doo k'idadi'doohłéeł da áádóó doo da'doohish da; t'áá bíni'dii hadaneesánígíí doo dadoohish da índa nihich'il na'atł'o'ii doo bílátah da'iishgizhii doo bąąh da' íídóohbeeł da.

¹²Háálá baa hózhǫ́ǫgo yihah, áko éí nihá hodiyingo baa nitsídaahkees doo; dá'ák'ehdóó daneest'ánígíí daahsą́ą doo.

¹³Áko díí baa hózhǫ́ǫgo yihahígíí bii' diné łá'í nízínígo bidá'ák'eh yich'į' anáhidookah.

¹⁴Áádóó bił kééhót'íinii bich'į' kéyah nahíłniihgo, doodaii' baa nahíłniihgo t'áadoo ałch'į' ałde áhwíínóhsiní.

¹⁵Baa hózhǫ́ǫgo yihahígíí bíighah ná'ádleehdóó bik'ijį' nináháháhígíí bik'ehgo bił kééhót'íinii kéyah baa nahíłniih doo, índa nináháháhígíí bik'ehgo néidínóołt'į́łígíí nich'į' nayiiłniih doo.

¹⁶T'óó ahayóí nínáhahígíí bik'ehgo lą'í bą́ą́h aníłį́į doo áádóó a'ohgo nínáhahgo a'ohgo bą́ą́h aníłį́į doo, háálá nídadoohahígíí biyi' nídadínóot'į́łígíí bik'ehgo nich'į' nayiiłniih doo.

¹⁷T'áadoo ałch'į' ałde áhwíínóhsiní, nidi nihiDiyin God dadíínóhsin; jó, shí Bóhólníihii nihiDiyin God nishłį́.

¹⁸Éí bąą bee nihoyí'áanii bik'eh ádanoht'ée doo áádóó bee nihodiish'aahii bik'eh dahonoł'į́į doo, áko kéyah bikáá' hasihgo kéédahoht'į́į doo.

¹⁹Ákohgo kéyah bikáá' aneest'ą' hááhinoot'į́įł doo, áko hwiih danohłį́įgo hasihgo kéédahoht'į́į doo.

²⁰Áádóó kódadidoohniiłgo, Tsosts'id náhááh góne' ha'át'íishą' deiidą́ą dooleeł? Jó, doo k'ééda'didiilyéeł da lá, doodaii' nídaneest'áanii doo dadiigish da lá.

²¹Ákohgo bee hahasdziihii shibee ak'ihojidlíii át'éego hastą́ą́h náhááh góne' nídadí'nóołt'į́įłgo táá' nááhai bíighahjį' nídaneest'áanii nihee hólǫ́ǫ doo.

²²Tseebíí náhááh góne' k'idadi'doohłééł, nidi náhást'éí nááhaijį' éí nídanoołt'ánígíí t'ahdii daohsą́ą doo.

²³Kéyah doo nahaniihgóó ahóyéel'áa doo; jó, kéyah éí shí; nihí éí dé'éyóní danohłį́įgo t'óó átsééd shił kéédahoht'į́.

²⁴Áádóó kéyah nihíí' danilíinii t'áá át'é éí bik'é niná'iilyéego bee nahosooł'ą́ą doo.

²⁵Nihik'is ła' bahojoobá'í silį́į'go bikéyah ła' baa nahaaznii'go bik'éí ła' éí kéyah t'ą́ą́' ninéidiyoołnih yiniyé níyáago éí hak'éí baa nahaaznii'ígíí t'ą́ą́' náhizhdoołnih.

²⁶Nidi bik'éí ádingo t'áadoo bá kéyah ninéiyółniihígóó áádóó t'áá bí ninéidiyoołnihgo yíneel'ą́ą́ ládą́ą́'

²⁷kéyah baa nahaaznii' yę́ędóó nináháhááh yidziihígíí wólta'go nínádant'į́įhii bą́ą́h ílíinii bik'ehgo éí baa na'iisnii'ígíí yich'į' ninéidoodlééł, ákohgo bikéyah bíí' nídoodleeł.

²⁸Nidi yik'é niná'doodléełgi yi'oh neel'ą́ągo diné baa na'iisnii'ígíí t'áá yótą' doo, áko baa hózhǫ́ǫgo yihahígíí hahoolzhiizhgo bikéyah bíí' nídoodleełgo yich'į' nídoodááł.

²⁹Diné ła'da kin haal'á biná'ástł'in góne' kin bii' dahooghanígíí ła' baa nahaaznii'go éí haa nahaaznii' yę́ędóó nááhaijį' t'ą́ą́' nááhizhdoołnihgo há haz'ą́; t'ááłá'í nááhaijį' bik'é ninázh'doodléełgo bee há haz'ą́.

³⁰Nidi ts'ídá t'ááłá'í nááhaijį' t'áadoo bik'é niná'jídláágóogo éí kin haal'á binaa ahéé'ítł'in góne' diné bich'į' kin nidziis'nii'ígíí t'áá bí doo, áádóó ba'áłchíní náás ahoolchíiłii ałdó' hool'áágóó bíí' dooleeł, áko baa hózhǫ́ǫgo yihah wolyéhígíí baa halzhishgo doo aa náhidit'aah da doo.

³¹Nidi kin haal'á binaa ahéé'ítł'in bits'áhwiiní'ą́ądi kin dah naazhjaa'ígíí éí t'áá hakédaayah bił aheełt'éego baa nitsáhákees doo; éí bik'é niná'iilyéego bee haz'ą́; baa hózhǫ́ǫgo yihah wolyéhígíí baa náhwiilzhíishgo haa nídahidit'aah doo.

³²Ákondi Líívai dine'é bikin hadaas'áagi éí daakinígíí kin hadaas'áago daabíhígíí yik'é nináda'iidléego hool'áágóó bá bee haz'ą́.

³³Diné ła' éí Líívai dine'é kin yaa nayiis'nii'go kin haal'áádóó bikin baa nahaaznii'ígíí éí baa hózhǫ́ǫgo yihah wolyéhígíí baa hoolzhiizhgo baa nídidoot'ááł, háálá Líívai dine'é bikin hadaas'áhídóó daakinígíí éí Ízrel dine'é bitahgi Líívai dine'é náás ahoolchíiłii daabí.

³⁴Nidi dabikin hadaas'áágóó dahootsooígíí éí doo baa nidahaniih da, háálá éí hool'áágóó t'áá daabí dooleeł.

³⁵Áko nihik'is ła' bahojoobá'í silį́į'go éí nihitahgi ch'ééh ák'idildzíiłgo bíká adoohjah; éí ayóní, doodaii' t'óó átsééd nihił kééhat'ínígíí t'áá bik'i nidaałdzilígi át'éego nihił bighan doo.

³⁶Ínáóltą'í t'áadoo bídeínóhkeedí, doodaii' binahjį' t'áadoo béeso ádaał'íní, nidi nihiDiyin God dadíínóhsin, áko nihik'is t'áá nihił bighan doo.

³⁷Áádóó ínáóltą'í t'áágééd béeso baa nída'ohnił, áádóó ch'iyáán baa dahohníiłgo bee t'áadoo nááda'áyółbįįhí.

³⁸Jó, shí éí Bóhólníihii nihiDiyin God nishłį́; éí Ííjip kéyahdę́ę́' ch'éénihiní'eezhii nishłį́ áádóó nihiDiyin God nishłį́į doo biniyé Kéínan kéyah nihaa dinish'aah.

³⁹Áádóó nihik'is nihíighahgóó kééhat'íinii bahojoobá'í silį́į'go nihich'į' na'ádiis'nii'go doo naalte' nilį́įgo nihá naal'a' da doo.

⁴⁰Nidi adeenáago nihá naal'a' doo áádóó t'óó átsééd kééhat'íinii nahalingo nihił bighan doo, áádóó baa hózhǫ́ǫgo yihah wolyéhígíí baa hoolzhiizhjį' nihá naal'a' doo.

⁴¹Áko índa nihits'ą́ą́dóó ba'áłchíní yił bik'éí yich'į' dah nídidookah áádóó bizhé'é danilį́į́ nít'éé' yę́ę bikéyahjį' nídookah.

⁴²Háálá shá nidaal'a'í danilį́; éí Ííjip kéyahdę́ę́' ch'ééní'eezh; éí bąą doo naalte' biniyé nidahaniih da doo.

⁴³T'áadoo t'áá na'níle'dii bindanoht'áhí, nidi nihiDiyin God dadíínóhsin doo.

⁴⁴Diné áádóó asdzání nihinaalte' danilį́į doogo éí ał'ąą dine'é nihinaagóó kéédahat'ínígíí bitahdę́ę́' diné áádóó asdzání nihinaalte' danilį́į doo biniyé nidahidoołnihgo bee haz'ą́.

⁴⁵Áádóó ałdó' dé'éyóní t'óó átsééd nihitahgóó kéédahat'ínígíí bada'áłchíní índa banááda'áłchíní nihikéyahgi nidahaazhchį́įgo nihił kéédahat'ínígíí bitahdę́ę́' nidahołniihgo danihí doo.

⁴⁶Áko nihikéé' ádahasdįįdgo nihada'áłchíní daabíí' dadooleełgo bá ádadoohłííł; éí hool'áágóó bindaalte' doo, nidi nihik'isóó Ízrel dine'é danilíinii éí doo t'áá na'níle'dii bił ahindanoht'áa da doo.

⁴⁷Dé'éyóní t'óó átsééd nihitahgi kééhat'íinii nihinahjį' at'į́ silį́į'go áádóó nihik'is éí yíighahgóó kééhat'į́įgo bahojoobá'í silį́į'go éí dé'éyóní, doodaii' ba'áłchínída ła' yich'į' na'ádiis'nii'go

⁴⁸na'ádiis'nii'dóó bik'ijį' hak'é niná'doolyéełgo bee haz'ą́; hak'isóó ła' hak'é niná'doodlééł.

⁴⁹Hadá'í, doodaii' hadá'í biye'da hak'é niná'doodlééł, doodaii' áhą́dígo hak'éí éí bada'áłchínída ła' t'áá hak'é niná'doodlééł, doodaii' t'áá hó bízhneel'ą́ągo ák'é ninázh'doodlééł.

⁵⁰Áádóó haash yit'éego háá'ádizhdooltéełgi bich'į' na'ázdiis'nii'ii bił baa yázhdoołtih; éí na'ázdiis'nii' yę́ędóó baa hózhǫ́ǫgo yihah wolyéhígíí baa níhaijį' éí nináháháahgo ák'é ninádziisya'ígíí bik'ehgo há yídóołtahgo ahíidoodzoh, áádóó adeenáago naalnishii bich'į' nahalyéii bik'ehgo hak'é niná'doolyééł.

⁵¹Lą'í nááhaidi baa hózhǫ́ǫgo yihah wolyéhígíí baa hodoolzhishgo béeso hak'é naalyáhígíí bik'ehgo t'áá hó łahjį' ák'é ninázh'doodlééł.

⁵²Áádóó baa hózhǫ́ǫgo yihah wolyéhígíí t'ah t'áá díkwíí nídoohah hadziihgo éí nááhai yidziihígíí bik'ehgo t'áá hó ák'é ninázh'doodlééł.

⁵³Nináháháahgo adeenáago ła' há naalnishígi át'éego há naalnish doo; ninááł doo t'áá na'níle'dii binazhnit'áa da doo.

⁵⁴Áko díí nínáháháhígíí biyi' doo nabi'diiznii'góogo baa hózhǫ́ǫgo yihah wolyéii baa hoolzhiizhgo bí áádóó ba'áłchíní bił t'óó béé'doolnih.

⁵⁵Háálá Ízrel dine'é éí shá naal'a'í danilį́; éí shá naal'a'í danilį́įgo Ííjip kéyahdę́ę́' ch'ééní'eezh; jó, shí Bóhólníihii nihiDiyin God nishłį́.