Read Navajo LEVITICUS 26 Bible Online

LEVITICUS 26 - Navajo bible

LEVITICUS 26

¹Eda'alyaii, doodaii' naashk'aazhgo eda'alyaii t'áadoo ádá ádaoł'íní, doodaii' eda'alyaii adadoohtsihda, doodaii' nihikéyahgi bich'į' yaa áńdaoht'įįh doo biniyé tsé bee e'elyaii doo adadoohtsih da; jó, shí Bóhólníihii nihiDiyin God nishłį́.

²Shiháá'áyį́į́h ná'oodleełgo dahodíínóhsin, áádóó shiníbaal bii' hodílzinii dadíínóhsin; jó, shí Bóhólníihii nishłį́.

³Bee nihoyé'áanii bik'eh dasidoohkaigo áádóó shibik'eh ó'oo'níiłii bik'eh ádanoht'éego áádóó bida'íínóhsingo

⁴nahałtin baa náhwiilzhíishgo níłtsą́ nihaa hidish'aah doo, áko kéyah bikáá'góó nída'nit'į́įh doo, áádóó tsin bineest'ą' bąąh nídahoodleeł doo.

⁵Da'ohizhgo ch'il na'atł'o'ii deínóhbéejį' anáhálzhish doo, áádóó ch'il na'atł'o'ii wóbéhígíí k'éédílyéehjį' anáhálzhish doo, áádóó ch'iyáán bee áda'azįįdgo daohsą́ą doo, índa nihikéyahgi hasih nidahoh'áago kéédahoht'į́į doo.

⁶Áádóó kéyahgi hodéesyéelgo ádeeshłííł, áko nídanohjahgo doo nídaołdzidgóó ánihideeshłííł; naaldlooshii dahashkéii kéyahdóó hadínéeshkał, doodaii' nihikéyahgi doo diltłish ahindajiilyée da doo.

⁷Índa nihi'ana'í nihaa ch'ídahajeehgo nihilą́ąjį' diltłish bee bił nidadziilghaał doo.

⁸Ashdla' nołt'éego neeznádiingo nihaa nídadidoojah; neeznádiin nołt'éego neeznáadi míilgo nihik'ee nidanichée doo áádóó nihi'ana'í nihilą́ąjį' diltłish bee bił nidadziilghaał doo.

⁹Áádóó nihił nishłį́į doo, áádóó niha'áłchíní nídahoodleełgo k'ee'ąą nooht'į́įłgo ánihideeshłííł, índa bohoníłdzilgo nihił ahadi'nisht'ą́ągo ádeeshłííł.

¹⁰Áko ałk'idą́ą́' nooh dashoołchínígíí daohsą́ą doo, áádóó ániidígíí bá hwiidoo'aał biniyé nooh dashoołchínígíí ch'ídahidoohjih.

¹¹Áádóó shiníbaal bii' hodílzinii nihitahgi nideesh'ááł, áádóó doo nihá deeshnih da doo.

¹²Áko nihitaasháa doo; nihiDiyin God nishłį́į doo, áádóó nihí shidine'é danohłį́į doo.

¹³Shí Bóhólníihii nihiDiyin God nishłíinii Ííjip dine'é bikéyahdę́ę́' ch'éénihiní'eezh; doo t'áá binaalte' danohłį́į da; jó, nihiyéél dabitł'óól hénizhgo k'ídasoodongo dayínóhkáahgo ánihiishłaa.

¹⁴Nidi doo dashíínółts'ą́ą́'góogo áádóó shibik'eh ó'oo'níiłii t'áá át'é doo bik'eh dahonoł'į́į́góogo

¹⁵índa bee nihoyé'áanii ts'ídá dasoo'įįdgo, doodaii' bee nihodiish'aahii ts'ídá t'óó bá dasidoołnihgo, áko shibik'eh ó'oo'níiłii t'áá át'é doo bik'eh dahonoł'į́į da doo, nidi shibee aha'deet'áanii t'óó dahohtíih doo.

¹⁶Shí ałdó' kónihideeshłííł: t'óó báhádzidii áádóó ni'iiłganii índa naałniih nihináá' ts'ídá doo da'ooh'į́į da ánihidoolííł áádóó yínííł biih dínóohdah, índa ch'ééh k'ééda'dohdléehgo nihi'ana'í nihaa nahodikai doo.

¹⁷Áádóó nihik'ijį' nishłį́įgo nihi'ana'í binááł nidanihi'ditseedgo danihijoołáii nihindant'áa doo, índa t'áadoo nidanihiniłchéhígóó nidanochée doo.

¹⁸Áko azhą́ díí t'áá át'é kónihi'diilyaa nidi t'ahdii doo dashíínółts'ą́ą́'góogo t'óó kónihideeshłííł; tsosts'idi ahą́ą́h nániiláago ádił nida'ayohsí'ígíí biniinaa atínáánihideeshdlííł.

¹⁹Áádóó nihidziil bee ádaa dadzíínóhdlíhígíí yaa ádeeshłííł, áádóó wódahdi yádiłhił éí béésh nitł'iziigi át'éego índa nahasdzáán éí béésh łitsoiigi át'éego ádeeshłííł.

²⁰T'áadoo biniyéhígóó nidaołdzil doo, háálá nihikéyah doo bikáá' na'nit'ą' da doo, doodaii' tsin bineest'ą' doo bąąh nídahadleeh da doo.

²¹Áádóó shik'ijį' danohłį́įgo t'éí deínóhkáahgo índa doo dashidoohts'a'góogo ádił nida'ayohsí'ígíí bik'ehgo tsosts'idi ahą́ą́h nániiláago naałniih bee nihich'į' hodiyeeshnááł.

²²Naaldlooshii dahashkéii ałdó' nihich'į' bi'deesh'nihgo éí niha'áłchíní nihee deini'įįhgo atídeile' doo, áádóó nihilį́į́' ádeidoołdįįł, áádóó t'áá díkónółt'éhígo ádanihidoolííł índa niheda'atiingóó doo nidaagháhí da doo.

²³Áádóó díí bee doo shee łahgo ínída'dołnééhgóogo, nidi t'óó shik'ijį' danoh łį́įgo deínóhkáahgo

²⁴shí ałdó' nihik'ijį' nishłį́į doo, áádóó nida'ayoohsí'ígíí biniinaa t'ah yówehgo tsosts'idi ahą́ą́h nániiláago atínáánihideeshdlííł.

²⁵Áádóó diltłish bił nihi'ana'í nihik'ijį' bi'deesh'nih; éí nihił aha'dinisht'áanii doo bik'eh ádanoht' éégóó t'óó k'éénihidideeshdlííł áádóó nihikin hadaas'áagi áłah nídaahdleehgóó nihitahgóó naałniih bee nihich'į' hodiyeesh'nááł, índa nihi'ana'í bílák'ee nihidi'doot'ááł.

²⁶Áko nihich'iyą' łahjį' nihits'ą́ą́' ni'kóshłaago, asdzání neeznált'éego bááh bighan t'ááłá'ígíí biyi' nihá bááh áńdayiil'įįh doo, áádóó ahádahaasti'go dah hidiidlohígíí bik'ehgo nihitaa nídeijih doo, áádóó éí nídaohdį́įhgo doo bee hwiih daohłe' át'ée da doo.

²⁷Áko azhą́ díí t'áá át'é kónihi'diilyaa nidi, doo dashíínółts'ą́ą́'góogo t'óó shik' ijį' danohłį́įgo deínóhkáahgo

²⁸shí ałdó' t'óó kónihideeshłííł; nihik'ijį' nishłį́įgo t'óó báhádzidgo sháháchį' doo; nida'iyoohsí'ígíí biniinaa tsosts'idi ahą́ą́h nániiláago t'áá shí atínihideeshłííł.

²⁹Áádóó nihiye'ké bitsį' índa nihitsi'ké bitsį' nídaołgha ł doo.

³⁰Índa ninádahałaah doo biniyé wódah nahaz'ą́ągo ádaohłaaígíí nihideeshchxǫǫłgo e'elyaii danihíhígíí dadideeséigo bikáa'jį' danihits'íís ahideeshtł'ił, áko doo nihinisin da doo.

³¹Áádóó nihikin hadaas'áhígíí t'áá ádzaaí ádeeshłííł, índa nihihodiyingo nahaz'áanii nihideeshchxǫǫłgo t'áadoo dabiniyéhí da doo, áko łikání halchingo náádahołniihii doo deeshchį́įł da.

³²Áko kéyahgi ałtso nihodiyeeshchxǫǫł; ákwii nihi'ana'í nidahanéhígíí éí yik'ee t'óó bił adahayói doo.

³³Áádóó ał'ąą dine'é bitahgóó tanihidínéeshkał, índa nihich'į' diltłish bił hanáshdił doo áádóó nihikéyah ałtso nidahwiizhchxǫ' doo, índa nihikin hadaas'áhígíí t'áá ádzaaí dadooleeł.

³⁴Áko kéyah háá'áyį́į́h yee ná'áldįįhgo bił hóóchxǫ'go hoolzhish doo áádóó nihí éí nihi'ana'í bikéyahdi naałdeehgo kéyah háádoolyįhgo háá'áyį́į́h yee ná'áldįįh doo.

³⁵Haa nízádígi shį́į́ kéyah bił hóóchxǫ'go hanályį́įh doo, háálá bikáá' kéédahoht'į́į́ nít'éé' yę́ędą́ą́' háá'áyį́į́h baa náhwiilzhíishgo t'áadoo hanáályį́į' da.

³⁶Áádóó nihits'ą́ą́dóó ch'éékaigo daadzí'ígíí bida' ana'í bikédaayahgi bił dayée'go biyandahalyizgo ádeeshłííł; tsin bit'ąą' dadiits'a'go yik'ee nídadíníchéeh doo; diltłish yik'ee danéechééh nahalingo nidanichée doo; t'áadoo dabineełchéhí da nidi nidanichéego dahidigeeh doo.

³⁷Áádóó ałk'i dahiniidéehgo t'áadoo dabinéełchéhí da nidi diltłish yik'ee nidanichéhígíigi ádaat'ée doo. Áádóó nihi'ana'í binááł bee adziilii nihee ádaadingo ch'ééh ádaaht'į́į doo.

³⁸Áádóó ał'ąą dine'é bitahgóó ádoohdįįł; nihida'ana'í bikéyah t'óó danihildeeł doo.

³⁹Áko t'áá díkwíí nihits'ą́ą́dóó ch'éékaigo daadzí'ígíí éí doo ákwii ádáát'įįdígíí biniinaa nihida'ana'í bikéyahgi yínííł bidooghą́ą́ł áádóó danihizhé'é yę́ę doo ákwii ádáát'įįdígíí ałdó' biniinaa t'áá bił yínííł bidooghą́ą́ł.

⁴⁰Áádóó doo ákwii ádáát'įįdígíí yee ádaa dahalne'go dabizhé'é yę́ę doo ákwii ádáát'įįdígíí doo ákǫ́ǫ́ áhát'íinii yee doo ákǫ́ǫ́ ádashííł'įįdgóó yee ádaa dahoolne'go áádóó ałdó' shits'ą́ą́jí t'óó shik'ijį' danilínígíí áádóó ałdó' shik'ijį' danilį́įgo deíkááh nít'é'ígíí yee ádaa dahalne'.

⁴¹Shí ałdó' dabik'ijį' nishłį́į́ nít'éé' bida'ana'í bikéyah góne' íí'eezhígíí yaa ákodaniizį́į́'; jó'áko dabijéí doo daalzį́į' da nít'éé' yę́ę a'ohgo ádaat'é ádabi'diilyaago índa doo ákwii ádáát'įįdígíí biniinaa atídabi'diilyaaígíí t'éí bada'ahódlíigo

⁴²t'áá shí bénáshniihii Jéíkab áádóó Áízak índa Éíbraham éí shibee aha'deet'áanii bee bił ahadadi'nisht'áanii bénáshniih doo áádóó dabikéyah bénáshniih doo.

⁴³Kéyahdóó nahjį' hajookaigo kéyah háá'áyį́į́h yee ná'áldįįhígíí bikáá' dahóóchxǫ'go nahaz'ą́ą doo, áko doo ákwii ádáát'įįdígíí biniinaa atídabidi'doolníłígíí bada'ahódlíi doo, háálá bee nihodiish'aahii deiz'įįd áádóó bee nihoyé'áanii t'óó yádadoolnih.

⁴⁴Azhą́ díí t'áá át'é kódajíít'įįd nidi hweda'ana'í bikéyahdi nijildeehgo doo yóó'ahodeeshkał da, doodaii' doo t'áá k'ad hádésh'nihgo ałtso áhoséłdįįd da, áádóó doo t'áá k'ad shibee aha'deet'áanii hoł k'íníti' da, háálá shí Bóhólníihii haDiyin God nishłį́.

⁴⁵Nidi dahazhé'é yę́ę bił ahadadi'nisht'áanii há bénáshniih doo; éí ał'ąą dine'é dabinááł Ííjip kéyahdę́ę́' ch'ééhoní'eezh, ákót'éego t'éiyá haDiyin God nishłį́į doo; jó, shí Bóhólníihii nishłį́.

⁴⁶Díí éí yee nihwiiz'áanii áádóó yee nihodiiz'áanii índa bee haz'áanii Bóhólníihii t'áá bí haidiilaaígíí áádóó éí yee Ízrel dine'é yił aha'deet'ą́ągo Dził Sáínai si'ánígi éí yee Mózes ak'e'ashchį́.