Read Navajo LEVITICUS 27 Bible Online

LEVITICUS 27 - Navajo bible

LEVITICUS 27

¹Áádóó Bóhólníihii éí Mózes yich'į' haadzíi'go ííłní,

²Ízrel dine'é bich'į' handziihgo kóbidiní, Diné ła' t'áá bí ádá ádee hadidoodzihgo Bóhólníihii yaa ádidoot'áałgo éí bą́ą́h aníłį́įgo bee hosíníł'ánígíí bik'ehgo ni'doolééł.

³Bą́ą́h aníłínígíí éí diné naadiin béédááhaidóó hastą́diin béédááhaijį' béésh łigaii shékel wolyéii ashdladiin éí hodiyingo haz'ą́ą́ góne' shékel choo'íinii bíighahgo nidahizhdoolééł,

⁴áádóó asdzánígo éí bą́ą́h aníłínígíí bik'ehgo tádiin shékel wolyéii bíighahgo niidoolééł.

⁵Áádóó tsíłkéí bich'į'go ashdla'dóó naadiinjį' béédááhaígíí éí naadiin shékel bą́ą́h aníłį́į doo, índa ch'ikę́ę́h bich'į'go éí neeznáá shékel bą́ą́h aníłį́į doo.

⁶T'ááłá'í bee nídeezidóó ashdla' binááhaijį' ashkii bich'į'go éí béésh łigaii ashdla' shékel wolyéii bą́ą́h aníłį́į doo; at'ééd bich'į'go éí táá' shékel bą́ą́h aníłį́į doo.

⁷Hastą́diindóó dego binááhaigo diné bich'į'go éí ashdla'áadah shékel bą́ą́h aníłį́į doo; asdzánígo éí neeznáá shékel bą́ą́h aníłį́į doo.

⁸Nidi hahojoobá'ígo bą́ą́h aníłínígíí bi'osh'neel'ą́ągo éí náá'iiłniihii baazhdoogáałgo hą́ą́h ílį́į́ góne' há niididoo'ááł; éí bízhneel'ánígíí bik'ehgo bee ádee hadzoodzíi'ii nizh'doolééł.

⁹Áádóó naaldlooshii t'áá ałtso éí Bóhólníihii yich'į' náádayiiłniihii éí ła' háiida Bóhólníihii yaa neidii'aahígíí t'áá ałtso dílzin doo.

¹⁰Áko díí bitsásk'ehjį' doo ła' anízhdoołteeł da; yá'át'éehii áádóó doo yá'át'éehii doo bił ałgháázhdooltéeł da, índa doo yá'át'éehii áádóó yá'át'éehii doo bił ałgháázhdooltéeł da, ákódziidzaago naaldlooshii ałgháá'jíltį́įgo éí t'áá áłah dílzin dooleeł.

¹¹Áádóó naaldlooshii doo daadáanii éí doo Bóhólníihii bich'į' nááhidoonihii át'éhígíí éí náá'iiłniihii baazdoolóós,

¹²áko náá'iiłniihii éí naaldlooshii yá'ádaat'éehii, doodaii' doo yá'ádaat'éehii bą́ą́h ílį́ yee hadoodzihgo bik'ehgo bą́ą́h ílį́į doo.

¹³Nidi diné éí, Díí t'áá ha'át'éegoda náhideesh'nih, nízingo éí ashdla' aháádzooígíí t'ááłá'í yínéidoozohgo naaldlooshii bą́ą́h aníłį́ bik'ehgo yił ninéidoodlééł.

¹⁴Diné ła' bikin Bóhólníihii yá t'áá sahdii dílzingo niidee'aahgo éí yá'át'éehgo, doodaii' doo yá'át'ééhgóó, éí náá'iiłniihii yee hadoodzihgo yą́ą́h íłínígíí bik'é nizh'doolééł.

¹⁵Nidi bikin t'áá sahdii dílzingo niidiní'ánígíí éí, Náhideeshnih, nízingo éí ashdla' aháádzooígíí t'ááłá'í yínéidoozohgo kin bą́ą́h aníłį́ bik'ehgo yił ninéidoodlééł, áko t'áá bíí' nídoodleeł.

¹⁶Áko diné ła' bikéyahgi dá'ák'eh łahjį' Bóhólníihii yá ats'éidee'aahgo ákwii álástsii' haa néelt'e'go anéíjihígíí bik'ehgo bą́ą́h aníłį́į doo; tsits'aa' hómer wolyéii bii' tł'oh naadą́ą́' bidee'í bináá' hadeezbingo éí béésh łigaii shékel wolyéii ashdladiin bą́ą́h aníłį́į doo.

¹⁷Áádóó baa hózhǫ́ǫgo yihah nááhaidóó bidá'ák'eh dílzingo niidee'aahgo bą́ą́h aníłínígíí t'áá éí bik'ehgo bą́ą́h ílį́į doo.

¹⁸Nidi baa hózhǫ́ǫgo yihah wolyéhígíí ałtso yíhaidóó bik'ijį' díkwíida nááhaigo bidá'ák'eh éí Bóhólníihii yá dílzingo niidiní'áanii baa hózhǫ́ǫgo yihah baa náhodoolzhishjį' nídoohah yidziihígíí yíídóołtah; éí bik'ehgo bidá'ák'eh bą́ą́h aníłį́įgi náá'iiłniihii bíniik'ehgo bą́ą́h ílínígíí há yéididoo'nił.

¹⁹Áko hadá'ák'eh dílzingo nidizhní'áanii éí, Náhideeshnih, jinízingo éí ashdla' aháádzooígíí t'ááłá'í bínéizdoozohgo dá'ák'eh bą́ą́h aníłį́ bik'ehgo yił ninéidoodlééł, índa t'áá bíí' nídoodleeł.

²⁰Dá'ák'eh doo náhideesh'nih da, nízingo, doodaii' t'áá íídą́ą́' diné náánáła' yich'į' nayiis'nii'go éí doo nááhidoonihgóó nideet'ą́ą doo.

²¹Nidi dá'ák'ehígíí éí baa hózhǫ́ǫgo yihah wolyéii baa hoolzhiizhgo Bóhólníihii bich'į'go dílzin doo, áko dílzingo nideet'ánígi át'éego náá'iiłniihii bíí' dooleeł.

²²Áádóó diné ła' éí Bóhólníihii bá kéyah nayiis'nii'go dílzingo niidiní'ą́ą́ ládą́ą́' éí doo t'áá bí bikéyahígíí ła' ííł'į́į́góó,

²³áko náá'iiłniihii éí bą́ą́h aníłínígíí bik'ehgo baa hózhǫ́ǫgo yihah wolyéii baa hodoolzhishígíí há yídóołtahgo bą́ą́h aníłínígíí bik'ehgo éí bijį́ bik'é nizh'doolééł; éí Bóhólníihii bich'į' dílzingo naalyáii át'ée doo.

²⁴Áko baa hózhǫ́ǫgo yihah wolyéii binih diné éí dá'ák'eh baa nahaaznii'ígíí baa nídidoot'ááł; t'áá hó hakéyah yę́ę hóó' násdlį́į' doo.

²⁵Áádóó bą́ą́h da'níłínígíí t'áá ałtso éí hodiyingo haz'ą́ą́ góne' shékel wolyéii choo'ínígíí bik'ehgo bą́ą́h aníłį́į doo. Éí shékel naadiin gíírah wolyéii bíighahgo dah hidiidloh.

²⁶Nidi alį́į́' átsé nidahachíhígíí, éí Bóhólníihii bí neheleehígíí éí diné ła' doo dílzingo niididoo'áał da; béégashii, doodaii' dibéda, díí Bóhólníihii bíí'.

²⁷Nidi alį́į́' doo daadáanii át'éego éí bą́ą́h aníłínígíí bik'ehgo ninéidiyoołnih; éí ashdla' aháádzooígíí t'ááłá'í yínéidoozohgo yił ninéidoodlééł, doodaii' doo nináyiis'nii'góogo éí bą́ą́h aníłínígíí bik'ehgo nahidoonih.

²⁸Ákondi diné jílíinii hwee hólóonii t'áá ałtso bits'ą́ą́dóóígíí éí diné, doodaii' alį́į́', doodaii' t'áá hó hakéyah ts'ídá dílzingo Bóhólníihii baa nídizhdiní'áanii éí doo haa nahidoonih da, doodaii' doo nínááhizhdoołnih da; t'áá ałtso ts'ídá dílzingo nideet'áanii éí Bóhólníihii bich'į'go aláahgo dadílzin.

²⁹Ts'ídá dílzingo nideet'áanii, éí diné ts'ídá dílzingo niidiní'ánígíí éí doo nááhidoonih da, nidi t'áádóo nídí ádooldįįł.

³⁰Kéyah bits'ą́ą́dóó nídahoodleełii neeznáá daníjaa'ígíí éí t'ááłá'ígo shijaa' Bóhólníihii baa náhidit'aahígíí t'áá át'é, éí kéyah bits'ą́ą́dóó nídaneest'áanii, doodaii' tsin bineest'ą' ádaat'éii, éí Bóhólníihii bíí' át'é, áko Bóhólníihii bich'į'go dadílzin.

³¹Diné ła' éí t'áá ha'át'íhída neeznáá daníjaa'ígíí éí t'ááłá'ígo shijaa' Bóhólníihii yaa néidii'aahígíí éí, Nááhideesh'nih, nízingo éí ashdla' aháádzooígíí t'ááłá'í yínéidoozohgo Bóhólníihii yaa néidii'aahii bą́ą́h ílínígíí ninéidoodlééł.

³²Áádóó béégashii, doodaii' dibéda éí gish bee dayéélta'ii t'áá ałtso éí neeznáá daníjaa'go t'ááłá'í nízínígíí éí Bóhólníihii bich'į'go dadílzin doo.

³³Ła' la' yá'ádaat'ééh lá, doodaii' ła' la' doo yá'ádaat'éeh da lá, doo dínóozįįł da, doodaii' doo ła' bił ałgháázhdooltéeł da; ła' bił ałgháá'jíltį́įgo éí bił ałgháá'jíltínígíí t'áá bił t'áá áłah dílzin doo; éí doo nááhizhdoołnih da.

³⁴Díí bik'eh ó' oo'níiłii ádaat'éego Bóhólníihii éí Mózes yich'į' yee haadzíi'go Ízrel dine'é bá Dził Sáínaidi kóhodoo'niid.