Read Navajo LEVITICUS 3 Bible Online

LEVITICUS 3 - Navajo bible

LEVITICUS 3

¹Áádóó nááhizhdoołnihii éí hózhǫ́ǫ́jí nááhániihii nááhizhdoołnihígíí éí béégashii bitahdóó béégashii át'éego éí biką'ii, doodaii' bi'áadii hadaałt'éii ła' nízdidoolóosgo Bóhólníihii binááł nááhizhdoołnih.

²Áko nááhizhdoołnihígíí bitsiit'áagi dashdidoolnih áádóó níbaal bii' dahozdísinii bich'éédą́ą'gi jidiyoołhééł. Áádóó nááda'iiłniihii Éran biye'ké éí diłígíí bikáá' náá'iiniihí t'áá ałtsodę́ę́' yik'ínídeiłka' doo.

³Áádóó náádi'yoołnihgo néidiyoołnihígíí éí hózhǫ́ǫ́jí nááhániihii ła' Bóhólníihii bich'į' didlidgo nááyiiłniih doo; éí ak'ah łání áádóó atsą́ siláí ak'ah daabąąhígíí t'áá át'é

⁴áádóó bitsą́ áshk'azhí t'áá áłah áádóó bik'ah t'áá bąąhgo, éí atságah bidiit'i'ígíí, índa azid bíighahgi ak'ahígíí éí atsą́ áshk'azhí t'áá bił hazhdooniłgo t'áá bił náájiiłniih doo.

⁵Áko Éran biye'ké éí bikáá' náá'iiniihí bikáa'gi chizh diltłi'ígíí yikáá' ninádei'niłgo nídeidiłi' doo, áko didlidgo nááhidoonihii éí Bóhólníihii bich'į' łikání halchingo nááhániihii át'ée doo.

⁶Náájidi'yoołnihgo nááhidoonihii éí hózhǫ́ǫ́jí nááhániihii Bóhólníihii bich'į' nááhizhdoołnihígíí éí dibé nanilkaadii biką'ii, doodaii' bi'áadii hadaałt'éii ła' nízdidoolóosgo nááhizhdoołnih.

⁷Néidiyoołnihii éí dibé yázhí néidiyoołnihgo Bóhólníihii binááł nááyiiłniih doo.

⁸Áko náájiiłniihígíí bitsiit'áagi dashdidoolnih áádóó níbaal bii' dahozdísinii bich'éédą́ą'gi jidiyoołhééł, áádóó Éran biye'ké éí diłígíí bikáá' náá'iiniihí t'áá ałtsodę́ę́' yik'ínídeiłka' doo.

⁹Áádóó náádi'yoołnihgo néidiyoołnihígíí éí hózhǫ́ǫ́jí nááhániihii ła' Bóhólníihii bich'į' didlidgo nááyiiłniih doo; dibé yázhí neesk'ahii: éí bitsee' neesk'ahígíí áádóó ak'ah łání índa bitsą́ siláí ak'ah daabąąhígíí t'áá át'é

¹⁰áádóó bitsą́ áshk'azhí t'áá áłah áádóó bik'ah t'áá bąąhgo, éí atságah bidiit'i'ígíí índa azid bíighahgi ak'ahígíí éí atsą́ áshk'azhí t'áá bił hazhdoonił.

¹¹Áko náá'iiłniihii éí bikáá' náá'iiniihí bikáa'jį' néidiłi' doo; éí Bóhólníihii bich'į' ch'iyáán didlidgo nááhániihii át'ée doo.

¹²Néidiyoołnihii éí tł'ízí néidiyoołnihgo éí Bóhólníihii binááł nááyiiłniih doo.

¹³Áko náájiiłniihígíí bitsiit'áagi dashdidoolnih áádóó níbaal bii' dahozdísinii bich'éédą́ą'gi jidiyoołhééł, áádóó Éran biye'ké éí diłígíí bikáá' náá'iiniihí t'áá ałtsodę́ę́' yik'ínídeiłka' doo.

¹⁴Áádóó náádi'yoołnihgo néidiyoołnihígíí ła' Bóhólníihii bich'į' didlidgo nááyiiłniih doo; ak'ah łání áádóó bitsą́ siláí ak'ah daabąąhígíí t'áá át'é

¹⁵áádóó bitsą́ áshk'azhí t'áá áłah áádóó bik'ah t'áá bąąhgo, éí atságah bidiit'i'ígíí áádóó azid bíighahgi ak'ahígíí índa atsą́ áshk'azhí t'áá bił hazhdooniłgo t'áá bił náájiiłniih doo.

¹⁶Áko náá'iiłniihii éí bikáá' náá'iiniihí bikáa'jį' néidiłi' doo; éí ch'iyáán didlidgo łikání halchinii nááhániihii át'ée doo; ak'ah t'áá át'é Bóhólníihii bí.

¹⁷Díí hool'áágóó yee nihoní'áanii éí náás da'ahíínółchííhgóó t'áá danihiníghanígi bik'eh ádanoht'ée doo; éí ak'ah, doodaii' dił t'áadoo daahsání.