Read Navajo LEVITICUS 4 Bible Online

LEVITICUS 4 - Navajo bible

LEVITICUS 4

¹Áádóó Bóhólníihii éí Mózes yich'į' haadzíi'go ííłní,

²Ízrel dine'é bich'į' handziihgo kóbidiní, Ła' t'áadoo baa ákozníziní ádił adzisiihgo, éí Bóhólníihii bibik'eh ó'oo'níiłii doo ádoolníił da, nínígíí ájiilaago, éí t'ááłáhígo haz'ą́ dziz'įįdígíí bee ádihozhdiilt'i'go,

³náá'iiłniihii ak'ah bik'i yaadziidgo bi'doolzį́į'ii éí Ízrel dine'é ádił nida'iisíihii bik'ehgo ádił asiihgo, éí ádił ni'iidzííh yee ádił asiihígíí biniinaa dóola yázhí hadaałt'éii néididoolóosgo Bóhólníihii bich'į' ádił ni'iidzííhjí nááhániihii néidiyoołnih.

⁴Áádóó dóola yázhí éí níbaal bii' dahozdísinii bich'éédą́ą'gi Bóhólníihii binááł niidoolóós áádóó dóola yázhí bitsiit'áagi dah didoolnihgo Bóhólníihii binááł yidiyoołhééł.

⁵Áko náá'iiłniihii ak'ah bik'i yaadziidgo bi'doolzį́į'ii éí dóola yázhí bidiłígíí níbaal bii' dahozdísinii si'áníjį' yidookááł.

⁶Áádóó náá'iiłniihii éí diłígíí yiih didoolnihgo Bóhólníihii binááł ts'ídá aláahgo hodiyingo haz'ánígíí bidáádiníbaal bidáahjį' tsosts'idi ałkéé' ni'jį' dił iidoołkał.

⁷Áko náá'iiłniihii éí níbaal bii' dahozdísinii góne' Bóhólníihii binááł tsin bijeeh dilidgo łikání halchinii bikáá' náá'iiniihí bidee' dadeez'áhígíí diłígíí ła' yąąh íidoolííł. Áádóó dóola yázhí bidił yidziihígíí t'áá át'é níbaal bii' dahozdísinii bich'é'étiingi didlidgo nááhániihii biniyé bikáá' náá'iiniihí si'ánígíí bitsį́įjį' yeidooził.

⁸Índa dóola yázhí bik'ah t'áá át'é ádił ni'iidzííhjí nááhániihii át'éego hazhdoonił; ak'ah łání áádóó bitsą́ siláí ak'ah daabąąhígíí t'áá át'é

⁹áádóó bitsą́ áshk'azhí t'áá áłah áádóó ak'ah t'áá bąąhgo, éí atságah bidiit'i'ígíí, índa azid bíighahgi ak'ahígíí éí atsą́ áshk'azhí t'áá bił hazhdoonił.

¹⁰Nááhidoonihii éí hózhǫ́ǫ́jí nááhániihii béégashii bik'ah haa'nilígi át'éego hazhdoonił, áko náá'iiłniihii éí didlidgo nááhániihii néidiyoołnih biniyé bikáá' náá'iiniihí bikáa'jį' yididoołił.

¹¹Bikágí áádóó bitsį' t'áá át'é índa bitsiits'iin áádóó bijáád biłgo bitsą́ siláí índa bichaan t'áá bił;

¹²dóola yázhí t'áá sitį́į́ nít'éé' níbaal haal'á bits'áhwiiní'ą́ądi yá'áhoot'éehjį' ch'ídoojihgo łeeshch'iih nehekaahgi chizh bikáa'gi didoodlił; łeeshch'iih yah hiikaahgi didoodlił.

¹³Ízrel dine'é t'áá yíl'áá nít'éé' t'áadoo ádaa ákodandziní ádił da'asiihgo áádóó aląąjį' naazíinii ahínéikahígíí doo bił béédahózingóó Bóhólníihii bibik'eh ó'oo'níiłii doo ádoolníił da, nínígíí doo yik'eh ádaadzaagóó yee ádidahodiilt'i'go,

¹⁴ádił ni'iidzííh yee ádił da'asiihígíí bił béédahoozingo Ízrel dine'é éí dóola yázhí ádił ni'iidzííhjí nááhániihii níbaal bii' dahozdísinii bich'éédą́ą'gi deidoolóós.

¹⁵Áádóó Ízrel dine'é yiląąjį' naazíinii éí Bóhólníihii binááł dóola yázhí yitsiit'áagi dah dadidoolnihgo Bóhólníihii binááł dóola yázhí deidiyoołhééł.

¹⁶Áko náá'iiłniihii ak'ah bik'i yaadziidgo bi'doolzį́į'ii éí dóola yázhí bidił ła' níbaal bii' dahozdísinii si'áníjį' yidookááł.

¹⁷Áádóó náá'iiłniihii éí diłígíí yiih didoolnihgo Bóhólníihii binááł dáádiníbaalígíí bidáahjį' tsosts'idi ałkéé' ni'jį' dił iidoołkał.

¹⁸Índa níbaal bii' dahozdísinii góne' bikáá' náá'iiniihí Bóhólníihii binááł si'áanii bidee' dadeez'áhígíí diłígíí ła' yąąh íidoolííł áádóó dił yidziihígíí t'áá át'é níbaal bii' dahozdísinii bich'é'étiingi didlidgo nááhániihii biniyé bikáá' náá'iiniihí bitsį́įjį' yeidooził.

¹⁹Ak'ahígíí t'áá át'é yits'éidooniłgo bikáá' náá'iiniihí yikáa'jį' yididoołił.

²⁰Ádił ni'iidzííhjí nááhániihii éí dóola yázhí nááyiisnii' yę́ęgi át'éego náá'iiłniihii ákó'doolííł; kót'éego náá'iiłniihii éí há bee k'ééhodoodǫǫłii há nááyiisnii'go ádił nida'dziisí'ígíí há yóó'anídidoot'ááł.

²¹Áádóó níbaal haal'á bits'áhwiiní'ą́ą́góó iidoojihgo áłtséédą́ą́' dóola yázhí yiidííłid yę́ęgi át'éego yiididoołił; díí ádił ni'iidzííhjí nááhániihii át'éego Ízrel dine'é bá át'ée doo.

²²Naat'áanii ła' ádił adzisiihgo t'áadoo ádaa ákoznidziní Bóhólníihii haDiyin God bibik'eh ó'oo'níiłii doo ádoolníił da, nínígíí doo bik'eh ádziidzaagóó bee ádihozhdiilt'i'go

²³ádił ni'iidzííh bee ádił adzisiihígíí hoł bééhoozingo éí nááhizhdoołnihii tł'ízíchǫǫh hadaałt'éii jidoolóós.

²⁴Áádóó tł'ízíchǫǫh bitsiit'áagi dashdidoolnihgo didlidgo náádahaniihii nidaatseedígi Bóhólníihii binááł jidiyoołhééł; éí ádił ni'iidzííhjí nááhániihii át'ée doo.

²⁵Áko náá'iiłniihii éí ádił ni'iidzííhjí nááhániihii bidił yiih didoolnihgo didlidgo nááhániihii biniyé bikáá' náá'iiniihí bidee' dadeez'áhígíí yąąh íidoolííł áádóó dił yidziihígíí éí didlidgo nááhániihii biniyé bikáá' náá'iiniihí si'ánígíí bitsį́įjį' yeidooził.

²⁶Áádóó ak'ahígíí t'áá át'é bikáá' náá'iiniihí yikáa'jį' yididoołił; nááhidoonihii éí hózhǫ́ǫ́jí nááhániihii bik'ah didlidígi át'éego yiididoołił; kót'éego náá'iiłniihii éí há bee k'ééhodoodǫǫł ii há nááyiisnii'go ádił ni'dziisíi'ii há yóó'anídidoot'ááł.

²⁷Índa diné t'áá azlį́'ígíí ła' t'áadoo ádaa ákoznidziní ádił adzisiihgo Bóhólníihii bibik'eh ó'oo'níiłii doo ádoolníił da, nínígíí doo bik'eh ádziidzaagóó bee ádihozhdiilt'i'go

²⁸ádił ni'iidzííh bee ádił adzisiihígíí hoł bééhoozingo, éí nááhizhdoołnihii tł'ízí bi'áadii hadaałt'éii ádił ni'iidzííh bee ádił adzisiihígíí biniinaa jidoołtééł.

²⁹Áádóó éí ádił ni'iidzííhjí nááhániihii bitsiit'áagi dashdidoolnihgo ádił ni'iidzííhjí nááhániihii didlidgo náá'iiniihígi jidiyoołhééł.

³⁰Índa náá'iiłniihii éí nááhániihii bidił yiih didoolnihgo didlidgo nááhániihii biniyé bikáá' náá'iiniihí bidee' dadeez'áhígíí yąąh íidoolííł, áádóó dił yidziihígíí bikáá' náá'iiniihí biyaajį' yeidooził.

³¹Áádóó ak'ahígíí t'áá át'é nááhidoonihii éí hózhǫ́ǫ́jí nááhániihii bik'ah bits'á'nilígi át'éego yits'éidoonił; náá'iiłniihii éí bikáá' náá'iiniihí yikáa'jį' ak'ahígíí yididoołiłgo Bóhólníihii bich'į' łikání halchin doo; kót'éego náá'iiłniihii éí há bee k'ééhodoodǫǫłii há nááyiisnii'go ádił ni'dziisí'ígíí há yóó'anídidoot'ááł.

³²Ádił ni'iidzííhjí nááhániihii biniyé dibé yázhí jiníłtį́įgo éí dibé yázhí bi'áadii hadaałt'éii jidoołtééł.

³³Áko ádił ni'iidzííhjí nááhániihii bitsiit'áagi dashdidoolnihgo ádi ł ni'iidzííhjí nááhániihii át'éego didlidgo nááhániihii naatseedígi jidiyoołhééł.

³⁴Áádóó náá'iiłniihii éí ádił ni'iidzííhjí nááhániihii bidił yiih didoolnihgo didlidgo nááhániihii biniyé bikáá' náá'iiniihí bidee' dadeez'áhígíí yąąh íidoolííł, áádóó dił yidziihígíí t'áá át'é bikáá' náá'iiniihí bitsį́įjį' yeidooził.

³⁵Áádóó ak'ahígíí t'áá át'é dibé yázhí bik'ah nááhidoonihii éí hózhǫ́ǫ́jí nááhániihii bik'ah bits'á'nilígi át'éego yits'éidoonił, áko náá'iiłniihii éí bikáá' náá'iiniihí yikáa'jį' Bóhólníihii bich'į' didlidgo náádahaniihii bik'ehgo yididoołił; kót'éego náá'iiłniihii éí há bee k'ééhodoodǫǫłii há nááyiisnii'go ádił ni'dziisíi'ii há yóó'anídidoot'ááł.