Read Navajo LEVITICUS 5 Bible Online

LEVITICUS 5 - Navajo bible

LEVITICUS 5

¹Ła' ádił adzisiihgo t'áadoo le'é hazhdeel'į́į'go, doodaii' hoł bééhózingo éí diné binááł baa hodíílnih hodi'níigo ádee ha'didziih jidiizts'ą́ą' nidi, doo baa hojilne'góó bee ádił adzisiihgo éí doo ákwii ájíít'įįdígíí bee hohodiit'i'go nijigháa doo.

²Éí doodaii' ła' t'áá ha'át'íhída yíchxǫ'ii éí naaldlooshii ałchinii, doodaii' alį́į́', doodaii' nidaa'na'ii daaztsą́ągo yíchxǫ'ii t'áadoo baa ákozníziní bíhizhdéé'náa'go hó ałdó' éí bee doo ho'didoodah da áádóó hohodidoot'ih.

³Doodaii' yee yíchxǫ'ii bíhizhdéé'náa'go t'áá ha'át'íhída yee yíchxǫ'ii t'áadoo baa ákozníziní bíhizhdéé'náa'go áádóó bikée'di índa hoł bééhoozingo bee hohodiit'i'go át'ée doo.

⁴Éí doodaii' ła' ádee hazdoodzíi'go doo yá'áshóonii, doodaii' yá'át'éehii ádeeshłííł jinízingo t'áadoo tsíhodeeskézí, ázhdííniidgo t'áadoo baa ákozníziní t'áadoo le'é bee ádee hazdoodzíi'go bikée'di índa hoł bééhoozingo éí ła' bee hohodiit'i' doo.

⁵Ákohgo kózhdoonííł: éí ła' bee ádihozhdiilt'i'go éí bee ádił asésiih jiníigo bee ádaa hozhdoolnih.

⁶Áádóó doo ákǫ́ǫ́ ájíít'įįdjí nááhániihii Bóhólníihii bich'į' náájiiłniihgo éí ádił ni'iidzííh bee ádił ni'jiisíhígíí biniyé dibé bitahdę́ę́' dibé yázhí, doodaii' tł'ízí yázhí bi'áadii nízhdidoołtéełgo ádił ni'iidzííhjí nááhániihii át'éego nááhizhdoołnih; kót'éego náá'iiłniihii éí há bee k'ééhodoodǫǫłii ádił ni'jiisíhígíí biniinaa há néidiyoołnih.

⁷Nidi dibé yázhí jidoołtéełgi bi'oshneel'ą́ągo hasbídí naakigo, doodaii' hasbídí łigaii biyázhí naakigo doo ákǫ́ǫ́ ájíít'įįdígíí biniyé Bóhólníihii bich'į' nááhizhdoołnih; ła' ádił ni'iidzííhjí nááhániihii, ła' éí didlidgo nááhániihii át'ée doo.

⁸Áko náá'iiłniihii baazhdooniłgo éí ádił ni'iidzííhjí nááhániihii áłtsé néidiyoołnih; éí hasbídí bik'os nii'didoogis nidi doo aháidoonił da.

⁹Áádóó ádił ni'iidzííhjí nááhániihii bidiłígíí éí bikáá' náá'iiniihí bąąhjį' yik'íidoołka ł; dił yidziihígíí éí bikáá' náá'iiniihí si'ánígíí bitsį́įjį' yąąh haidoonih; díí ádił ni'iidzííhjí nááhániihii át'ée doo.

¹⁰Naaki góne'ígíí éí bik'ehgo hoogáałii bik'ehgo didlidgo nááhániihii át'éego nááhizhdoołnih, áko náá'iiłniihii éí há bee k'ééhoodǫǫł go nááhániihii ádił ni'iidzííh bee ádił ni'jiisíhígíí biniinaa há néidiyoołnihgo ádił ni'jiisíhígíí há yóó'anídidoot'ááł.

¹¹Nidi hasbídí naakigo, doodaii' hasbídí łigaii biyázhí naakigo jidoojihgi bi'oshneel'ą́ągo ádił ni'jiisíhígíí éí ómer bee í'neel'ąąhí t'ááłáhídi ak'áán dibahí haaką́ągo náhizhdoołnihgo ádił ni'iidzííhjí nááhániihii át'éego jidookááł; ak'ah doo bik'i yeizdooził da, doo nidi tsin bijeeh łikání halchinii fránkinsens wolyéii bik'i yeizdoojih da, háálá ádił ni'iidzííhjí nááhániihii át'é.

¹²Áádóó náá'iiłniihii baazhdookáałgo bílák'ee ak'áán hadeezbingo haidoojihgo éí bee ééhániihii át'éego bikáá' náá'iiniihí yikáa'jį' Bóhólníihii bich'į' didlidgo nááhániihii yididoołił; éí ádił ni'iidzííhjí nááhániihii át'é.

¹³Kót'éego náá' iiłniihii éí há bee k'ééhoodǫǫłgo nááhániihii ádił ni'iidzííh ła' bee ádił ni'jiisíhígíí biniinaa há néidiyoołnih, áko ádił ni'jiisíhígíí há yóó'anídidoot'ááł, áádóó ak'áán yidziihígíí éí náá'iiłniihii bí doo; ak'áán nááhániihígi át'éego bí doo.

¹⁴Áádóó Bóhólníihii éí Mózes ííłní,

¹⁵Ła' doo ákǫ́ǫ́ ájíít'įįdgóogo áádóó dílzingo Bóhólníihii baa náhidit'aahígíí t'áadoo baa ákozníziní bił ádił adzisiihgo éí dibé bitahdę́ę́' deenásts'aa' hadaałt'éii éí shékel wolyéii hodiyingo haz'ą́ą́ góne' choo'íinii bik'ehgo doo ákǫ́ǫ́ ájíít'įįdígíí biniyé nááhidoonihii jidoolóós.

¹⁶Áko dílzingo Bóhólníihii baa náhidit'aahígíí bee doo ákǫ́ǫ́ ájíít'įįdígíí bik'é ninázh'doodlééł biniyé bą́ą́h ílínígíí ashdla'go aháádzooígíí t'ááłá'í bínéidoozohgo náá'iiłniihii bich'į' ninázh'doodlééł, áko náá'iiłniihii éí há bee k'ééhoodǫǫłgo doo ákǫ́ǫ́ ájíít'įįdjí nááhániihii deenásts'aa' há néidiyoołnih áádóó doo ákǫ́ǫ́ ájíít'įįdígíí há yóó'anídidoot'ááł.

¹⁷Áádóó ła' ádił adzisiihgo éí ájíít'įįdígíí doo ádoolníił da nít'ée'go Bóhólníihii bibik'eh ó'oo'níiłii doo yee has'ą́ą da nít'ée'go ájíít'įįdgo azhą́ t'áadoo baa ákozniizį́į' da nidi, t'áá éí bee hohodiit'i' áádóó doo ákwii ájíít'įįdígíí bee hohodiit'i'go nijigháa doo.

¹⁸Áko deenásts'aa' hadaałt'éii dibé bitahdę́ę́' nídidíílóosgo bą́ą́h aníłínígíí bik'ehgo doo ákǫ́ǫ́ ájíít'įįdjí nááhániihii át'éego náá'iiłniihii bich'į' kózhdoolííł, áko náá'iiłniihii éí há bee k'énáhoodǫǫłgo nááhániihii t'áadoo baa ákozníziní doo ákǫ́ǫ́ ájíít'įįdígíí biniyé há néidiyoołnihgo há yóó'anídidoot'ááł.

¹⁹Díí éí doo ákǫ́ǫ́ áhóót'įįdjí nááhániihii át'é; t'áádóo nídí doo ákǫ́ǫ́ ájíít'įįdígíí bee Bóhólníihii bik'ijį' dzizlį́į́' nít'éé'.