Read Navajo LEVITICUS 6 Bible Online

LEVITICUS 6 - Navajo bible

LEVITICUS 6

¹Áádóó Bóhólníihii éí Mózes ííłní,

²Ła' ádił adzisiihgo áádóó doo ákǫ́ǫ́ ájíít'įįdígíí bee Bóhólníihii bik'ijį' dzizlį́į'go éí bił kééhojit'íinii bich'į' na'adlo' nijiiłdeełgo hąąh ni'ílyáhígíí, doodaii' ádee hazdoodzí'ígíí, doodaii' t'áá na'níle'dii bighá jídláhígíí, doodaii' t'áadoo le'é biniinaa bił kééhojit'íinii bąąh neijiiłhaał nít'é'ígíí béé'áhozhdilyáahgo,

³doodaii' yóó'eeldéelii nízhdiiláago biniinaa hayooch'íidgo t'áá ádzaagóó ádee hazdiidziihgo díí doo ákǫ́ǫ́ át'éii t'áá ałtso háiida áyoolíiłgo éí yee ádił ni'iilzíhígíigi át'éego ádił adzisiihgo

⁴kózhdoonííł; jó, ádił adzisiihgo bee ádihozhdiilt'i'go t'áá na'níle'dii agha'yídláhígíí, doodaii' ina'adlo' bee shójoost'e'ígíí, doodaii' hąąh ni'níláhígíí, doodaii' yóó'eeldéelii nízhdiiláhígíí béé'áhozhdilyáahgo éí ákódziidzaaígíí bąą ninázh'doodlééł.

⁵Doodaii' t'áá ha'át'íhída bąą t'áá ádzaagóó ádee hazdoodzí'ígíí éí doo t'óó bíighahígo ninázh'doodléeł da, nidi bą́ą́h ílínígíí ashdla'go aháádzooígíí t'ááłá'í bínéizdoozohgo ninázh'doodlééł, áko doo ákǫ́ǫ́ ájíít'įįdjí nááhániihii át'éego nááhániih bijį́į́ góne' éí bíí' ílíinii baa nízh'doo'nił.

⁶Áko doo ákǫ́ǫ́ ájíít'įįdjí nááhániihii Bóhólníihii bich'į' nááhizhdoołnihii jidoolóós; éí dibé bitahdę́ę́' deenásts'aa' hadaałt'éii doo ákǫ́ǫ́ ájíít'įįdjí nááhániihii át'éego náá'iiłniihii baazdoolóós.

⁷Áádóó náá'iiłniihii éí há bee k'ééhodoodǫǫłii Bóhólníihii binááł há néidiyoołnihgo t'áá ha'át'íhída baa nijiyáago bee doo ákǫ́ǫ́ ájíít'įįdígíí t'áá át'é há yóó'anídidoot'ááł.

⁸Áko Bóhólníihii éí Mózes ííłní,

⁹Éran áádóó biye'ké bi'níłníihgo ábidiní, Díí didlidgo nááhániihjí bee haz'áanii át'é: didlidgo nááhániihii wolyé, háálá tł'éé' bíighah bikáá' náá'iiniihí bikáa'gi dook'ą́ąłgo náhool'įįh doo; bikáá' náá'iiniihí bikáa'gi kǫ'ígíí éí t'áá diltłi'go óolzin doo.

¹⁰Áádóó náá'iiłniihii éé' agod ta'jį' nineel'ánígíí áádóó tł'aaji'éé' na'at'ą́hí łigaii dits'idgo bee ályaii yee háádiit'į́įhgo didlidgo nááhaaznii' yę́ę biłeeshch'iih hááyiikáahgo bikáá' náá'iiniihí bíighahgi ninéíkáah doo.

¹¹Áko bi'éé' háiidiyii'níiłgo éé' náánáła' yiih náhádáahgo łeeshch'iih éí níbaal haal' á bits'áhwiiní'ą́ądi yá'áhoot'éehjį' yááyiikáah doo.

¹²Áádóó bikáá' náá'iiniihí bikáa'gi kǫ' t'áá diltłi'go óolzin doo; éí doo dínóoltsis da; náá'iiłniihii éí t'áá ákwíí jį́ abínígo bikáá' náá'iiniihí bikáa'gi chizh t'áá diltłi'go áyósin doo, áádóó bikáa'gi didlidgo nááhániihii ninéi'niłgo hasht'ééyiil'įįh doo, índa bikáa'jį' ak'ah hózhǫ́ǫ́jí nááhániihii át'éego néidiłi' doo.

¹³Bikáá' náá'iiniihí bikáa'gi kǫ' t'áá áłahjį' diltłi'go óolzin doo; ts'ídá doo dínóoltsis da.

¹⁴Díí ak'áán nááhániihjí bee haz'áanii át'é: Éran biye'ké éí Bóhólníihii binááł bikáá' náá'iiniihí bidááhdóó náádayiiłniih doo.

¹⁵Áko náá'iiłniihii éí ak'áán nááhániihii ak'áán áádóó ak'ah ła' índa tsin bijeeh dilidgo łikání halchinii fránkinsens wolyéii t'áá át'é bóóltą'go bílák'ee hadeezbingo hanéíjihgo bikáá' náá'iiniihí yikáa'jį' néidiłi'go łikání halchingo bee ééhániihii át'éego Bóhólníihii bich'į' nááyiiłniih doo.

¹⁶Éran áádóó biye'ké éí yidziihígíí díík'ǫsh t'áágééd bááh ályaii yił hodiyingo haz'ánígi nídeidį́įh doo; éí níbaal bii' dahozdísinii binaa haz'ánígi nídeidį́įh doo.

¹⁷Díík'ǫsh doo bił ál'į́į da doo. Éí didlidgo nááhániihii łahjį' baa diní'ánígíí át'é; ts'ídá aláahgo dílzinii éí ádił ni'iidzííhjí nááhániihii índa doo ákǫ́ǫ́ ájíít'įįdjí nááhániihiigi át'éii át'é.

¹⁸Éran bits'ą́ą́dóó náás ahoolchíiłii bitahdóó ashiikéhígíí t'áá ałtso éí nídeidį́įh dooleeł. Díí hool'áágóó yee nihoní'áanii bik'ehgo éí náás da'ahíínółchííhgóó Bóhólníihii bich'į' didlidgo náádahaniihii bits'ą́ą́dóóígíí nihá át'ée doo; t'áá háiida yihidilchídígíí éí diyin doo.

¹⁹Áádóó Bóhólníihii éí Mózes ííłní,

²⁰Díí nááhániihii Éran áádóó biye'ké náás ahoolchíiłii éí Bóhólníihii yich'į' náádayiiłniihii át'éego aláahgo náá'iiłniihii dooleeł biniyé ak'ah bik'i yaadziidgo bi'dilzį́į́h bijį́į́ góne' náádeidiyoołnih: éí ómer bee í'neel'ąąhí bee t'ááłáhídi ak'áán dibahí haaką́ągo ak'áán nááhániihii át'éego t'áá áłahjį' ałníí'dóó abínígo náádayiiłniih doo índa łahjį' ałníí'dóóígíí éí e'e'áahgo náádayiiłniih doo.

²¹Éí ak'ah biłgo sit'éhígíí dííkááł; éí niheesti'go bááh nááhániihii át'éego Bóhólníihii bich'į' didlidgo łikání halchingo nááhíłniih doo.

²²Áko náá'iiłniihii haye'ké ła' hatsásk'ehgi naal'a' doo biniyé ak'ah bik'i yaadziidgo bi'doolzį́'ígíí díí nááhániihii nááyiiłniih dooleeł; díí hool'áágóó yee nihoní'áanii át'éego Bóhólníihii bich'į' ałtso nídídli' doo.

²³Ak'áán náádahaniihii t'áá ałtso éí náá'iiłniihii bá nááhániihgo ałtso néidiłi' doo; éí doo nídeidį́įh da doo.

²⁴Áádóó Bóhólníihii éí Mózes ííłní,

²⁵Éran áádóó biye'ké bich'į' handziihgo ábidiní, Díí ádił ni'iidzííhjí nááhániihii bee haz'áanii át'é; didlidgo nááhániihii nidaatseedígi t'áá ákwii ádił ni'iidzííhjí nááhániihii éí Bóhólníihii binááł nidaatseed doo; éí ts'ídá aláahgo dílzinii át'é.

²⁶Náá'iiłniihii éí ádił ni'iidzííhjí nááyiisnii'ígíí néídį́įh doo; hodiyingo haz'ánígi éí níbaal bii' dahozdísinii binaa haz'ánígi néídį́įh doo.

²⁷T'áá ha'át'íhída díí atsį' bíhidéé'ná'ígíí dílzin dooleeł, índa bidił ła' éí éé' bik'é náłdasgo éí bik'é náłdasígíí hodiyingo haz'ą́ągi tánínádaahgis doo.

²⁸Nidi hashtł'ish łeets'aa' bee shíníłbéezhgo dííłts'ił; béésh łitsoii ásaa' bee shíníłbéezhgo yéego bąąh díích'ish índa bąąh nidííł'oł.

²⁹Diné náá'iiłniihii danilínígíí t'áá ałtso éí atsį'ígíí nídeidį́įh doo; éí ts'ídá aláahgo dílzinii át'é.

³⁰Áádóó ádił ni'iidzííhjí nááhániihii bidił éí níbaal bii' dahozdísinii biyi' hodiyingo haz'ání góne' bee k'ééhodoodǫǫł biniyé yah anákáahgo éí atsį'ígíí doo nídeidį́įh da doo; t'óó nídeidiłi' doo.