Read Navajo LEVITICUS 7 Bible Online

LEVITICUS 7 - Navajo bible

LEVITICUS 7

¹Díí doo ákǫ́ǫ́ ájíít'įįdjí nááhániihii bee haz'áanii át'é: éí ts'ídá aláahgo dílzinii át'é.

²Didlidgo nááhániihii nidadziłtseedígi éí doo ákǫ́ǫ́ ájíít'įįdjí nááhániihii nidadziłtseed doo, áádóó bidiłígíí éí bikáá' náá'iiniihí bikáa'gi yik'ínídeiłka' doo.

³Áádóó bik'ah t'áá át'é néidiyoołnih; bitsee' neesk'ahígíí índa bitsą́ siláí ak'ah daabąąhígíí,

⁴bitsą́ áshk'azhí t'áá áłah áádóó bik'ah t'áá bąąhgo éí atságah bidiit'i'ígíí índa azid bíighahgi ak'ahígíí éí atsą́ áshk'azhí t'áá bił haidoonił.

⁵Áko náá'iiłniihii éí bikáá' náá'iiniihí yikáa'jį' didlidgo nááhániihii át'éego Bóhólníihii yich'į' néidiyoołnih; éí doo ákǫ́ǫ́ ájíít'įįdjí nááhániihii át'ée doo.

⁶Diné náá'iiłniihii danilínígíí t'áá ałtso éí atsį'ígíí nídeidį́įh doo; hodiyingo haz'ą́ągi nídeidį́įh doo; ts'ídá aláahgo dílzinii át'é.

⁷Ádił ni'iidzííhjí nááhániihiigi át'éii át'éego doo ákǫ́ǫ́ ájíít'įįdjí nááhániihii nááyiiłniih doo. Éí t'áá áłah t'ááłá'í bee haz'áanii bá át'é. Náá'iiłniihii éí bee k'ééhoodǫǫłgo nááyiiłniihígíí éí t'áá bí doo.

⁸Áko náá'iiłniihii éí t'áá háiida bá didlidgo nááyiisnii'ígíí éí nááyiisnii'ígíí bikágí t'áá bí dooleeł.

⁹Áádóó ak'áán náádahaniihii t'áá ałtso éí bááh bighan góne' bááh ályaaígíí áádóó t'áá ałtso ásaa' ditání bee bááh ályaaígíí índa tsee'í bee łees'áán ályaaígíí éí náá'iiłniihii yi'oh náá'iisnii'ígíí t'áá bí dooleeł.

¹⁰Ak'áán náádahaniihii t'áá ałtso ak'ah bił ałtahgo, doodaii' ak'áán t'áá bízhání éí Éran biye'ké t'áá ałtso aheełt'éego daabí doo.

¹¹Díí hózhǫ́ǫ́jí nááhidoonihii bee haz'áanii át'é: éí Bóhólníihii yich'į' nááyiiłniih doo.

¹²Ahééh nízingo náá'iiłniihgo éí ahééh nízingo nááhániihii díí yił néidiyoołnih: díík'ǫsh t'áágééd bááh éí ak'ah bił ałtahgo ályaii áádóó díík'ǫsh t'áágééd bááh dá'áka'í éí ak'ah bąąh ályaii índa ak'áán dibahí ak'ah bił ałtah bee bááh ályaago sit'éii.

¹³Díí bááh éí díík'ǫsh bił bááh ályaii óóltą'go nááhidoonihii ahééh hwiindzingo hózhǫ́ǫ́jí binááhániihii yił néidiyoołnih.

¹⁴Áádóó bááh náádahidoonihii bits'ą́ą́dóó t'áá daałá'ígo Bóhólníihii bich'į' bił dah nídi'diilnihgo nááhániihii náájiił'niih doo; náá'iiłniihii éí hózhǫ́ǫ́jí nááhaaznii'ii bidił ak'íistahígíí díí bááh bił dah nídi'diilnihígíí éí bíí' neheleeh.

¹⁵Atsį' náádahaniihii hózhǫ́ǫ́jí nááhaaznii'ii ahééh nízingo nááyiisnii'ígíí t'áá nááyiisnii' bijį́ doodį́į́ł; hoos'įįdjį' doo ła' t'áá áázdoohsįįł da.

¹⁶Nidi bí nááyiisnii'ígíí éí yee ádee haadzíi'ii át'éego, doodaii' t'áá bí ninéidiní'ą́ągo nááyiisnii'ii át'éego t'áá nááyiisnii' bijį́ doodį́į́ł, áádóó bíí'ohígíí biiskání ałdó' doodį́į́ł.

¹⁷Nidi táá' yiską́ągo atsį' didlidgo nááhaaznii'ii bi'oh nida'iisdą́'ígíí didoodlił.

¹⁸Atsį' náádahidoonihii hózhǫ́ǫ́jí há nááhániihii náájiisnii'ígíí ła' táá' yiską́ąjį' bíí'ohígíí t'áá dajiyą́ągo nááhaaz'nii'ii t'áá bił doo há dínóodzįįł da, doo nidi há bił íídóoltah da; éí doo haldinígi áhoodzaii át'ée doo; ła' jííyą́ą'go bee doo ákwii ájíít'įįdígíí bee hohodiit'i'go nijigháa doo.

¹⁹Áádóó atsį' ha'át'íhída baa'ihii yíhidéé'náa'go éí doo doodį́įł da; éí didoodlił, nidi t'áá ádzíłtso ádąąh dahojildéhígíí t'éí atsį' yá'át'éehii dajiyą́ą doo.

²⁰Nidi ła' doo ho'díídee'ii éí atsį' nááhidoonihii hózhǫ́ǫ́jí nááhaaznii'ii Bóhólníihii bíhígíí jííyą́ą'go hodine'é bits'ą́ąjį' hodi'yoolyééł.

²¹Náá'áłdó' ła' t'áá ha'át'íhída baa'ihii bíhizhdéé'náa'go éí diné bííłchxǫ'ii, doodaii' naaldlooshii yíchxǫ'ii, doodaii' ha'át'íhída yíchxǫ'go baa'ihiigi ádaat'éii yénáyáago éí atsį' náádahidoonihii hózhǫ́ǫ́jí nááhaaznii'ii Bóhólníihii bíhígíí jííyą́ą'go hodine'é bits'ą́ąjį' hodi'yoolyééł.

²²Áádóó Bóhólníihii éí Mózes ííłní,

²³Ízrel dine'é bich'į' handziihgo ábidiní, Béégashii, doodaii' dibé, doodaii' tł'ízí bik'ah t'ááká daoyą́ą́' lágo.

²⁴Naaldlooshii t'áá bíni'dii daaztsáanii índa naaldlooshii ałchinii nibiisdláadii bik'ah t'áá ha'át'íhída biniyé chodaoł'į́į doo, nidi ts'ídá t'ááká daoyą́ą́' lágo.

²⁵T'áá háiida naaldlooshii bik'ahígíí jííyą́ą'go, jó, ak'ah náádahaniihii Bóhólníihii yich'į' náádayiiłniih ł eh; éí ak'ah jííyą́'ígíí hodine'é bits'ą́ąjį' hodi'yoolyééł.

²⁶Náá'áłdó' tsídii, doodaii' naaldlooshii dabidiłígíí kéédahoht'į́įgi t'ááká daoyą́ą́' lágo.

²⁷T'áá háiida éí t'áá ha'át'íhída bidił jííyą́ą'go éí hodine'é bits'ą́ąjį' hodi'yoolyééł.

²⁸Áádóó Bóhólníihii éí Mózes ííłní,

²⁹Ízrel dine'é bich'į' handziihgo ábidiní, T'áá háiida éí náádahaniihii hózhǫ́ǫ́jí nááhániihii át'éego Bóhólníihii bich'į' náájiiłniihgo éí nááhániihii ła' Bóhólníihii baazhdidoo'áałgo hózhǫ́ǫ́jí nááhániihii át'éego náájiiłniih doo.

³⁰Bóhólníihii bich'į' didlidgo náájiiłniihígíí t'áá hó níjíjih doo; ak'ah éí ajéíts'iin bił níjíjih doo; áko náásee bił nídi'dilnihgo nááhániihii Bóhólníihii binááł náájiiłniih doo.

³¹Áko náá'iiłniihii éí ak'ahígíí bikáá' náá'iiniihí yikáa'jį' néidiłi' doo, nidi ajéíts'iinígíí éí Éran áádóó biye'ké daabí doo.

³²Ajáád nish'náájíígíí éí náá'iiłniihii baa nánítį́į́h; éí bił dah nídi'diilnihgo nááhidoonihii hózhǫ́ǫ́jí nááhániihii át'ée doo.

³³Éran biye'ké ła' náádi'yoołnihgo éí hózhǫ́ǫ́jí nááhániihii bidił áádóó bik'ah nááyiiłniihgo éí ajáád nish'náájíígíí t'áá bí doo.

³⁴Jó, ajéíts'iin náásee bił nídi'dilnihígíí áádóó ajáád bił dah nídi'diilnihígíí éí hózhǫ́ǫ́jí nááhániihii łahdóó át'éego Ízrel dine'é bits'ą́ą́' náádiish'niłgo, náá'iiłniihii Éran áádóó biye'ké baa nídísh'áahgo éí bee nihoní'ą́ągo ahóyéel'áágóó Ízrel dine'é bitahgi ákót'ée doo.

³⁵Éran áádóó biye'ké ak'ah hak'i yadaadziidgo daho'doolzį́į'ii baa hidit'aahígi át'éego Bóhólníihii bich'į' didlidgo náádahaniihii bits'ą́ą́dóóígíí nááyiisnii'ígíí bijį́į́dą́ą́' Bóhólníihii bá nidajil'a'go náá'iiłniihii dajílį́į doo.

³⁶Éí Bóhólníihii yee haadzíi'ii bik'ehgo Ízrel dine'é baa deideez'ą́ągo ak'ah yee hóósį́į'go nihonínil bijį́į́dą́ą́' yee nihoní'ą́ągo ahóyéel'áágóó náás ahijoolchíił doo.

³⁷Éí lá bee haz'áanii át'é ni: didlidgo nááhániihii, ak'áán nááhániihii, ádił ni'iidzííhjí nááhániihii, doo ákǫ́ǫ́ ájíít'įįdjí nááhániihii, diyingo bits'ąą hasti'go nááhániihii, áádóó nááhidoonihii hózhǫ́ǫ́jí nááhániihii ádaat'é.

³⁸Díí kót'éego Dził Sáínaigi Bóhólníihii éí Mózes yich'į' yee haadzíí'; t'áá éí bijį́ Ízrel dine'é bich'į' hadzoodzíi'go Sáínai honoojíigi Bóhólníihii yich'į' nááda'iiłniih doo.