Read Navajo LEVITICUS 8 Bible Online

LEVITICUS 8 - Navajo bible

LEVITICUS 8

¹Áádóó Bóhólníihii éí Mózes ííłní,

²Éran áádóó biye'ké nídidíí'ishgo, éé' áádóó ak'ah ak'i yahiidzíidgo bee alzį́įhii nídiinííł, índa dóola yázhí ádił ni'iidzííhjí nááhániihii át'éego áádóó deenásts'aa' naakigo nídidíí'ish, índa díík'ǫsh t'áágééd bááh ályaii ts' iizis bee dííkááł,

³áádóó níbaal bii' dahozdísinii bich'éédą́ą'jį' Ízrel dine'é t'áá át'é áłah ádíílííł.

⁴Áko Mózes éí Bóhólníihii hach'į' yee haadzí'ígíí bi'jiilaago níbaal bii' dahozdísinii bich'éédą́ą'jį' Ízrel dine'é áłah ájiilaa.

⁵Mózes éí áłah ílínígíí yich'į' haadzíi'go ání, Díí ádoolníiłgo Bóhólníihii yee haadzíí'.

⁶Áádóó Mózes éí Éran áádóó biye'ké jiní'eezhgo nidabijiisbį́į́'.

⁷Áko Mózes éí ayaadi éé' nineezígíí Éran biih jííłtį́įgo sis bee áká bijiszas áádóó éé' agod ta'jį' nineel'ánígíí biih náájííłtį́; éí bikáa'gi íífad wolyéii éí ajéíts'iin bąąh nináltsosígíí yąąh niiníłtsoozgo íífad biniyé sis naashch'ąą'go yistł'ónígíí yee ye'aztł'ǫ́.

⁸Áádóó ayidgi dah siłtsoozígíí yąąh niiníłtsoozgo éí bii' góne' Yúrim áádóó Thámmim wolyéhígíí ałdó' niinínil.

⁹Áko atsiinázt'i'ígíí bitsiinídzíst'i'go bikáa'gi átáa'gi óola diyingo dah nátį́hígíí bítáa'gi bíjístł'ǫ́; Bóhólníihii éí Mózes yich'į' yee haadzí'ígíí yi'iilaa.

¹⁰Áádóó Mózes éí ak'ah ak'i yahiidzíidgo bee alzį́įhii néidiiką́ągo níbaal bii' hodílzinii áádóó bii' góne' naaznilii t'áá át'é yiyíísį́į'go dílzingo áyiilaa.

¹¹Éí ak'ah bee tsosts'idi bikáá' náá'iiniihí bik'ídzístah índa bikáá' náá'iiniihí áádóó biłeets'aa' bił chodao'ínígíí t'áá át'é ak'ah bee dadzíísį́į́'; bii' tá'ádígisí áádóó bá si'ánígíí t'áá bił dílzingo ájiilaa.

¹²Ákohgo Éran éí ak'ah ak'i yahiidzídígíí bitsiit'áajį' yadziiziidgo jíísį́į́'; diyingo ats'ázhníłtį́.

¹³Áádóó Mózes éí Éran biye'ké nízhdii'eezhgo ayaadi éé' nineezígíí biih jiiłteehgo sis bee áká dabidzisas, áádóó ch'ah bitsiinídadzist'i'; Bóhólníihii éí Mózes yich'į' yee haadzí'ígíí yi'iilaa.

¹⁴Áádóó dóola yázhí ádił ni'iidzííhjí nááhániihii át'éego yinílóóz, áko Éran áádóó biye'ké éí dóola yázhí ádił ni'iidzííhjí nááhániihii át'éego yitsiit'áagi dah dadees'nii'.

¹⁵Áko Mózes éí dóola yázhí yiyiisxį́įgo bidiłígíí néidiiką́ągo bikáá' náá'iiniihí bidee' dadeez'áhígíí yąąh áyiilaago dílzingo áyiilaa áádóó yidziihígíí éí bikáá' náá'iiniihí bitsį́įjį' yayiiziidgo bee k'é náhodoodleeł biniyé dílzingo ats'áidiní'ą́.

¹⁶Áádóó Mózes éí atsą́ siláí ak'ah daabąąhígíí t'áá át'é áádóó azid bíighahgi ak'ahígíí índa atsą́ áshk'azhí bąąh ak'ahígíí t'áá bił néidiinilgo bikáá' náá'iiniihí yikáa'jį' yiidííłid.

¹⁷Nidi dóola yázhí bikágí áádóó bitsį' índa bichaan éí níbaal haal'á bits'áhwiiní'ą́ądi yidííłid; Bóhólníihii éí Mózes yich'į' yee haadzí'ígíí yi'iilaa.

¹⁸Áádóó deenásts'aa' didlidgo nááhidoonih biniyé yinílóóz, áádóó Éran índa biye'ké éí deenásts'aa' bitsiit'áagi dah dadees'nii'.

¹⁹Mózes éí deenásts'aa' yiyiisxį́įgo bidiłígíí éí bikáá' náá'iiniihí bikáa'gi t'áá át'é yik'íistah.

²⁰Áko deenásts'aa' niyiishgizh, áádóó bitsii' áádóó neheeshgizhígíí índa ak'ahígíí yidííłid.

²¹Áádóó atsą́ siláí índa ajáád tánéízgiz, áko Mózes éí deenásts'aa' t'áá át'é bikáá' náá'iiniihí yikáa'jį' yidííłid; éí didlidgo nááhániihii łikání halchinii át'éego Bóhólníihii bich'į' didlidgo nááhaaznii'; Bóhólníihii éí Mózes yich'į' yee haadzí'ígíí yi'iilaa.

²²Áádóó deenásts'aa' ła'ígíí diyingo hats'ąą hasti'go há nááhániihii nínéidiilóóz; éí bitsiit'áagi Éran áádóó biye'ké dah dadees'nii'.

²³Mózes éí deenásts'aa' yiyiisxį́įgo diłígíí ła' néidiiką́ągo éí yee Éran bijaa' nish'náájí yaa ninít'i'ígi dah yiyiiłchii' áádóó bílátsoh nish'náájí índa bikétsoh nish'náájí bílátahgi dah yiyiiłchii'.

²⁴Áádóó Mózes éí Éran biye'ké hágo yidííniidgo diłígíí ła' néidiiką́ągo éí yee dabijaa' nish'náájí yaa nidaazt'i'gi áádóó dabílátsoh nish'náájí índa dabikétsoh nish'náájí dah dayiiłchii', índa dił yidziihígíí bikáá' náá'iiniihí bikáa'gi t'áá át'é yik'íístah.

²⁵Deenásts'aa' bik'ah áádóó bitsee' neesk'ahígíí áádóó bitsą́ siláí bąąh ak'ahígíí t'áá át'é áádóó azid bíighahgi ak'ahígíí áádóó bitsą́ áshk'azhí bąąh ak'ahígíí t'áá biłgo índa bijáád nish'náájíígíí ałdó' néidiinil.

²⁶Índa díík'ǫsh t'áágééd bááh ádaalyaii Bóhólníihii binááł ts'iizis bee sikánígíí bii'dę́ę́' bááh áádóó łees'áán ak'ah bił ályaii índa bááh dá'áka'í t'áá daała'ígo néidiinilgo ak'ah áádóó ajáád nish'náájíígíí yikáa'gi dah yiznil.

²⁷Áko éí t'áá ałtso Éran índa biye'ké yílák'ee yíínilgo Bóhólníihii binááł náásee bił nídi'dilnihgo nááhániihii át'éego náásee yił dadideesnii'.

²⁸Áádóó Mózes éí dahálák'eedóó néidiinilgo bikáá' náá'iiniihí yikáa'jį' yiidiłidgo didlidgo nááhániihii át'éego nááyiisnii', áko éí diyingo bits'ąą hasti'go Bóhólníihii bich'į' há nááhániihii łikání dahalchinii didlidgo nááhaaznii'ii ádaat'é.

²⁹Áko Mózes éí ajéíts'iinígíí néidii'ą́ągo Bóhólníihii binááł náásee yił nídi'dilnihgo nááhániihii át'éego náásee yił nídi'dilnih nít'éé'; diyingo hats'ąą hasti'go há deenásts'aa' nááhániihii bijéíts'iinígíí éí Mózes bí; Bóhólníihii éí Mózes áyidííniidígíí yi'iilaa.

³⁰Áádóó Mózes éí ak'ah ak'i yahiidzíidii áádóó diłígíí bikáá' náá'iiniihí yik'íístahii t'áá bíí'ohígíí néidiiką́ągo Éran áádóó biye'ké índa dabi'éé' t'áá yił yik'íístahgo Éran áádóó bi'éé' áádóó biye'ké índa dabi'éé' dadílzingo ájiilaa.

³¹Áko Mózes éí Éran áádóó biye'ké ííłní, Níbaal bii' dahozdísinii bich'éédą́ą'gi atsį'ígíí dadoołbishgo diyingo bits'ąą hasti'go nihá nááhániihii ts'iizis bee bááh sikánígíí biłgo dadoohsį́į́ł; t'áá bee haasdzí'ígi át'éego ádíshní, Éran áádóó biye'ké deidooyį́į́ł.

³²Éí atsį' áádóó bááh ła' t'áá ch'ínííłna'go éí dadidoohłił.

³³Tsosts'id yiską́ąjį' níbaal bii' dahozdísinii bii'dóó doo ch'ídoohkah da; diyingo bits'ąą hasti'ii bíighah yiską́ągo índa ch'ídoohkah, áko tsosts'id jį́ diyingo nihits'ąą hasti'go ánihizhdoolííł.

³⁴Díí jį́ ída'iilyaaígi át'éego Bóhólníihii yee haadzí'ígíí bik'ehgo bee nihá k'ééhodoodǫǫłii náádahiilnii'.

³⁵Éí bąą níbaal bii' dahozdísinii bich'éédą́ą'gi shá bíighah áádóó tł'éé' bíighah nahísóotą́ągo tsosts'id yidoołkááł, áko Bóhólníihii bik'eh ádanoht'éego doo dínóohnéeł da; jó, shí ákót'éego bee shich'į' ha'oodzíí'.

³⁶Áko Éran áádóó biye'ké éí Mózes binahjį' Bóhólníihii hach'į' yee haadzíi'ii t'áá ałtso bida'jiilaa.