Read Navajo LEVITICUS 9 Bible Online

LEVITICUS 9 - Navajo bible

LEVITICUS 9

¹Áádóó tseebíí yiską́ągo Mózes éí Éran áádóó biye'ké índa Ízrel dine'é yá aląąjį' naazíinii hágo yidííniid.

²Ákohgo Éran ííłní, Dóola yázhí éí ádił ni'iidzííhjí nááhániihii át'éego índa deenásts'aa' éí didlidgo nááhániihii át'éego t'áá áłah hadaałt'éii nídii'éeshgo Bóhólníihii binááł nááhidííłnih.

³Áádóó Ízrel dine'é ábidiní, Tł'ízíchǫǫh éí ádił ni'iidzííhjí nááhániihii át'éego áádóó dóola yázhí índa dibé yázhí éí t'áá áłah ła' binááhaí hadaałt'éii didlidgo nááhániihii át'éego nídadidooh'ish.

⁴Áádóó dóola yázhí índa deenásts'aa' éí hózhǫ́ǫ́jí nááhániihii át'éego Bóhólníihii binááł náádahidoołnih, áádóó ak'áán éí ak'ah bił ałtahgo nááhániihii náádahidoołnih; jó, díí jį́ Bóhólníihii nihich'į' yit'íní ídi'doolnííł.

⁵Áko Mózes hach'į' yee haadzí'ígíí bik'ehgo níbaal bii' dahozdísinii bich'éédą́ą'jį' nidajiizh'eezh áádóó Ízrel dine'é t'áá át'é áháníjį' niikaigo Bóhólníihii yinááł naazį́.

⁶Áádóó Mózes ání, Díí éí ádadoohníiłgo Bóhólníihii yee nihá haadzíí', áko Bóhólníihii bee bi'oh adidilyéehii nihich'į' ííshjání dooleeł.

⁷Ákohgo Mózes éí Éran ííłní, Nílááh, bikáá' náá'iiniihí bich'į' ninínááh, áádóó ádił oodzíí'jí nááhidííłnihígíí índa didlidgo nááhidííłnihígíí éí bee k'ééhodííłdǫǫłii ádá nááhidííłnih, áádóó Ízrel dine'é índa nááhidoonihii náádeidiyoołnihígíí éí bee k'ééhodíí łdǫǫłii bá nááhidííłnih; jó, Bóhólníihii ákót'éego yee haadzíí'.

⁸Áko Éran éí bikáá' náá'iiniihí bich'į' nizhníyáago dóola yázhí ádił ni'iidzííhjí nááhániihii t'áá hó ádá nááhizhdoołnihígíí jiisxį́.

⁹Áádóó haye'ké éí diłígíí haa deizką́, áko dił biishdoolnii'go éí dił ła' bikáá' náá'iiniihí bidee' dadeez'áhígíí bąąh ájiilaa, índa dił yidziihígíí éí bikáá' náá'iiniihí bitsį́įjį' yajiiziid.

¹⁰Nidi ak'ah áádóó atsą́ áshk'azhí índa azid bíighahgi ak'ahígíí éí ádił ni'iidzííhjí nááhániihii át'éego bikáá' náá'iiniihí bikáa'jį' jidííłid; Bóhólníihii éí Mózes yich'į' yee haadzí'ígíí bi'jiilaa.

¹¹Áádóó atsį' índa akágí éí níbaal haal'á bits'áhwiiní'ą́ądi jidííłid.

¹²Áádóó didlidgo nááhidoonihígíí yiyiisxį́įgo éí bidiłígíí Éran haye'ké haa deizką́ągo bikáá' náá'iiniihí t'áá ałtsodę́ę́' bik'ídzístah.

¹³Áko didlidgo nááhániihii niheeshgizhígíí áádóó atsii'ígíí t'áá bił haa deiznilgo bikáá' náá'iiniihí bikáa'jį' jidííłid.

¹⁴Áádóó bitsą́ siláí índa ajáád éí táájízgiz áádóó bikáá' náá'iiniihí bikáa'jį' jidił idgo náájiisnii'.

¹⁵Áko Ízrel dine'é bá nááhidoonihígíí nizhnílóóz; éí tł'ízí ádił oodzíí'jí nááhidoonihígíí Ízrel dine'é bá nááhániihii át'éego nízdiidzį́į́z áádóó jiisxį́įgo t'áá átséedi ádił oodzíí'jí náájiisnii'ígi át'éego náájiisnii'.

¹⁶Áádóó didlidgo nááhidoonihígíí nízdiilóozgo bik'ehgo hoogáałii bik'ehgo náájiisnii'.

¹⁷Áko ak'áán nááhidoonihígíí nízhdiiką́ągo hálák'ee hadeezbingo ła' hajííjaa'go bikáá' náá'iiniihí bikáa'jį' abínígo didlidgo nááhániihii bóóltą'go jidííłid.

¹⁸Dóola yázhí índa deenásts'aa' nízhdii'eezhgo nidzistseed; éí nááhidoonihii hózhǫ́ǫ́jí nááhániihii át'éego Ízrel dine'é bá náájiisnii', áko Éran haye'ké éí diłígíí haa deizką́ągo bikáá' náá'iiniihí t'áá ałtsodę́ę́' bik'ídzístah.

¹⁹Dóola yázhí índa deenásts'aa' bik'ahígíí áádóó bitsee' neesk'ahígíí áádóó bitsą́ siláí bąąh ak'ahígíí, bitsą́ áshk'azhí áádóó azid bíighahgi ak'ahígíí

²⁰éí ak'ahígíí ajéíts'iin yikáá' nideiznilgo bikáá' náá'iiniihí bikáa'jį' jidííłid.

²¹Mózes haadzí'ígi át'éego Éran éí ajéíts'iin áádóó ajáád nish'náájíígíí náásee bił nídi'dilnihgo nááhániihii át'éego Bóhólníihii binááł náásee bił jidideesnii'.

²²Áádóó Éran éí diné bich'į' dashdidiilnii'go, Nihik'idahojidlíi le', bizhdííniid, áádóó ádił ni'iidzííhjí nááhániihii áádóó didlidgo nááhániihii índa hózhǫ́ǫ́jí nááhániihii náájiisnii'dę́ę́' hadajííyá.

²³Áko Mózes áádóó Éran éí níbaal bii' dahozdísinii góne' yah ajíí'áázh áádóó áádę́ę́' ch'ééjít'áazhgo, Nihik'idahojidlíi le', diné bizhdííniid, áádóó Bóhólníihii bee bi'oh adidilyéehii diné t'áá át'é bich'į' yit'íní silį́į́'.

²⁴Ákohgo Bóhólníihii bits'ą́ą́dę́ę́' kǫ' bidadíínóodgo bikáá' náá'iiniihí bikáa'jį' didlidgo nááhániihii áádóó ak'ah ałtso adíík'ą́ą́', áko éí diné t'áá ałtso dayiiłtsą́ągo hadadeeshghaazhgo tsé'yaa daneeshjool.