Read Navajo JEREMIAH 10 Bible Online

JEREMIAH 10 - Navajo bible

JEREMIAH 10

¹Ízrel dine'é nohłíinii, Bóhólníihii saad yee nihich'į' yáłti'ígíí dadoohts'į́į́h.

²Ał'ąą dine'é yee ádaat'éii t'áadoo bídahooł'aahí. Wót'áahdi łahgo áńdahoo'níłígíí t'áadoo bik'ee nitsináhkahí; jó, éí ał'ąą dine'é yik'ee nitsinákah, ní Bóhólníihii.

³Háálá éí dadine'é bi'é'él'į' t'áadoo biniyéhí da; diné naalnishii tsintahdi tsénił yee tsin ła' k'íítsxił.

⁴Béésh łigaii índa óola yee nideich'ąąh; doo hidoolnáał da biniyé bee atsidí yee yił ada'ałkał.

⁵Dá'ák'ehgi ya'díníilzhin íí'á nahalingo doo yádaałti'ii ałtso nideich'ąhgo k'éhézdon adaaz'áa łeh. Doo nidaakaígíí biniinaa ts'ídá nidaajaahgo t'éiyá. Doo yá'át'éehii yaa nidadookahgo doo yídaneel'ą́ą da índa yá'át'éehii yaa nidadookahgo ałdó' doo yídaneel'ą́ą da; éí bąą t'áadoo béédaałdzidí.

⁶Bóhólníihii nílíinii, t'áadoo ła' nigi át'ée da. Ayóó ánít'é, áádóó nízhi' ayóó át'éii ayóó ábóodziil.

⁷Ał'ąą dine'é Aláahgo Binanit'a'í nílíinii, háísh doo nidósin da doo? Jó, ákódajit'į́į doo nít'éé', háálá ał'ąą dine'é bitahdóó diné dahóyáanii t'áá ałtso índa bee ídahólníihgo bił nahaz'ą́ą́góó t'áá ałtso éí bitahdóó t'áadoo ła' nigi át'éhí da.

⁸Nidi t'áá óozyį́į́ nít'éé' doo nitsídaakees da nidahalin áádóó doo ádahalyą́ą da. Be'elyaii éí tsin t'éiyá át'éego bee na'nitinii t'áadoo biniyéhí da.

⁹Béésh łigaii náneesne'go áłt'ą́ą́'í ádaalyaii éí Társhish haz'ánídę́ę́' nináhaashjaa' áádóó óola éí Yúfaz hoolyéédę́ę́' nináhaashjaa'; éí béésh łigaii deitsidii binaanishgo ádaat'é, áádóó óola yee nidaalnishii binaanishgo ádaat'é. E'elyaii dabi'éé' éí yá nahalingo dootł'izh áádóó tsídídééh nahalingo łichí'ígíí, áko éí t'áá ałtso diné da'iichįįhii binaanish ádaat'é.

¹⁰Nidi Bóhólníihii éí t'áá aaníí Diyin God nilį́; Diyin God hináanii nilį́įgo hool'áágóó Aláahgo Naat'áanii nilį́. T'óó báhádzidgo yee atí'éł'íinii yidiiłnáahgo nahasdzáán hidi'nááh, áko doo bił hazhǫǫhígíí yik'ee ał'ąą dine'é doo yich'į' hada'ólníi da.

¹¹Áko kóbididííniił, Diyin dabidi'níinii éí yót'ááh hiníláii índa nahasdzáán t'áadoo ádayiilaii azhą́ éí nidi nahasdzáán bikáá'dóó ádadoodįįł, áádóó díí yót'ááh hiníláii biyaadóó ádazhdoodįįł.

¹²Diyin God éí bibee adziil yee nahasdzáán áyiilaa. Bibee hódzą' yee nahasdzáán bohoníłdzilgo dah yiz'ą́. Hazhó'ó ts'ídá yá'át'éehgo yaa nitsízkéezgo yót'ááh hiníláii dah yiskaad.

¹³Haadzihgo wót'áahdi t'óó ahayóí tó yileeh; nahasdzáán nidahonees'ą́ą́dę́ę́' siil dego dah nída'diijołgo ánáyiil'įįh. Nahałtingo atsiniltł'ish t'áá bił anídahata'go ánáyiil'įįh. Binaalye'é bitahdę́ę́' níyolgo ánáyiil'įįh.

¹⁴Diné t'ááłá'í nítínígo doo ádahalyą́ą́góó doo bił éédahózin da. Da'atsidii t'ááłá'í nítínígo habe'elyaii yee binda'adlo'go áádóó doo nídadidzihígíí biniinaa habe'elyaii bik'ee t'óó haa yádahóósįįd.

¹⁵Na'adlo' t'éiyá ádaat'éego binda'azhnishgo t'áadoo nídanidlíní da. Éí baa hwiiníst'įįdgo ádoodįįł.

¹⁶Jéíkab dine'é biDiyin God éí díí ádaat'éhígi doo éigi át'ée da, áko bí éí t'áá ałtsoní áyiilaii nilį́. Áádóó Ízrel dine'é éí bíí' nilį́; t'áá ałtsoní bee Bóhólníihii wolyé.

¹⁷Nihik'i dahadishjée'go kéédahoht'ínígíí, éí ni'dóó nihiyéél náádahohchííd.

¹⁸Háálá Bóhólníihii kóní, Hwii' kéyahgi diné kéédahat'íinii k'ad lą́ą bee ch'ízhdeeshtł'į́įł ni, áko yaa ákodadínóozįįł biniyé nitsinákahgo ádeeshłííł.

¹⁹Níshgaígíí biniinaa doo hojooba' ájíníi da! Dinishniihígíí bik'ee atínídinishdleeh, áádóó ádííniid, T'áá aaníí, díí bik'ee yínííł nishłį́, nidi ts'ídá bich'į' ha'ííníshníi doo.

²⁰Shiníbaal atélyaago bitł'óól t'áá ałtso dahaazdláád. Sha'áłchíní shits'á haaskaigo doo kǫ́ǫ́ shinaagóó nidaakai da. Shiníbaal t'áadoo shá nináyó'áłí da, áádóó ch'é'étiingi dáádadiníbaalígíí t'áadoo shá néidółbaałí da.

²¹Háálá diné aa ádahalyáanii doo nitsídaakees da daazlį́į́', áádóó Bóhólníihii doo hádaat'į́į da. Éí bąą t'áadoo náás deeskai da, áádóó yaa ádahalyáanii t'áá ałtso taoskai.

²²Júdah kéyahgi kin hadaas'áii naa adeidiyoołkałgo áádóó ákwii mą'ii ba'áán ádahodoolíiłgo ge' náhookǫsdi kéyahdę́ę́' ayóó íits'a'go nihich'į' oonéełgo hodiits'a'.

²³Bóhólníihii nílíinii, shił bééhózingo diné yik'ehgo hináa dooleełígíí doo bii' hólǫ́ǫ da. Diné biyoołááł dooleełii bii' ádin.

²⁴Bóhólníihii nílíinii, doo haada yit'éégóó k'éhézdon nináshídlóós, doo áshidííłdįįł daígíí biniyé t'óó báhádzidgo nibee atí'él'íinii bee éí dooda.

²⁵Ał'ąą dine'é doo néédahósinii índa dahooghangóó nízhi' doo yee danózhíigo nídanookąąhii nił haazhchihgo bee atí'díílíiłii bee atínílééh, háálá Jéíkab dayííyą́ą́' áádóó dayoolghal áádóó ádahasdįįd índa kééhat'į́į́ nít'éé' yę́ęgi doo siláhígóó ádahoolaa.