Read Navajo JEREMIAH 11 Bible Online

JEREMIAH 11 - Navajo bible

JEREMIAH 11

¹Bóhólníihii éí Jeremáíyah yich'į' hanáánáádzíi'go kóní,

²Díí bee aha'deet'áanii saad diits'į́įhgo Júdah dine'é áádóó Jerúsalem kin haal'áagi kéédahat'íinii bich'į' bee handziih,

³áádóó ábididííniił, Ízrel dine'é biDiyin God Bóhólníihii nilíinii kóní, Díí bee aha'deet'áanii saad doo bik'eh hojíł'íinii hóyée'go há ha'oodzíí',

⁴Ííjip kéyahdę́ę́' éí béésh bii' déédíljahí bii'dę́ę́' danihizhé'é yę́ę ch'íní'eezh yę́ędą́ą́' bee bich'į' haasdzíi'go ádíshní, Bee nihich'į' hahasdziihígíí t'áá át'é bida'oł'į́įgo bik'eh dahonoł'į́, áko índa shidine'é nohłį́į doo, áádóó nihiDiyin God nishłį́į doo.

⁵Áko díí jį́įdi át'éhígíigi át'éego danihizhé'é yę́ę kéyahgi abe' áádóó tsés'ná bitł'izh bee áda'azįįdígíí nihaa dideesh'ááł, dishníigo bee bich'į' ádee hadeesdzíí'. Áko ádííniid, T'áá ákót'ée le', Bóhólníihii nílíinii.

⁶Áádóó Bóhólníihii áshidííniid, Júdah kéyahgi kin hadaas'áágóó índa Jerúsalem kin haal'áagi kintaa da'aztiingóó díí saad baa nahólne'go kódíní, Díí bee aha'deet'áanii saad deísínółts'ą́ą'go bida'oł'į́.

⁷Shik'eh dahonoł'į́, dishníigo danihizhé'é yę́ę Ííjip kéyahdę́ę́' ch'íní'eezh yę́ędą́ą́' áádóó díí jį́įjį' t'ah abíínídą́ą́' náádiish'nahgo ts'ídá t'áá aaníí ádíshníigo bił hashne'go hoolzhiizh;

⁸ákondi t'áadoo ak'eh dahóół'įįd da índa t'áadoo da'diizts'ą́ą' da, nidi t'ááłá'í nítínígo doo nibída'didzilgóó bijéí biyi'dę́ę́' doo yá'áshǫ' bił ádaat'íinii yik'ehgo deíkai. Éí bąą díí bee aha'deet'ą́ą́jí saad t'áá át'é hak'ijį' bohoolyaago áshłaa, éí saad bida'oł'į́ hodííniid nít'éé' t'áadoo bida'jiilaa da.

⁹Áádóó Bóhólníihii áshidííniid, Júdah dine'é áádóó Jerúsalem kin haal'áagi kéédahat'íinii bitahgóó nidaha'áago bééhoozin.

¹⁰Dabizhé'é yę́ę éí shizaad doo t'áá k'ad deidiizts'ą́ą'ii doo ákwii é'ét'éii yaa nidaaskai yę́ę éí yich'į' t'ą́ą́' anáákaigo diyin dabidi'níinii yich'į' nidahałáá nít'éé'. Ízrel dine'é índa Júdah dine'é dabizhé'é yę́ę bił ahada'dinisht'áanii dayiizti'.

¹¹Éí bąą Bóhólníihii kóní, Shoo, doo yá'át'éhígi ádahodeeshłíiłgo ts'ídá doo bits'ádazhdínóochéeł da. Azhą́ nídashijookąąh nidi, doo hwíínísts'ą́ą' da doo.

¹²Áko índa Júdah kéyahgi kin hadaas'áágóó índa Jerúsalemgi kéédahat'íinii éí diyin dabidi'níinii yich'į' tsin bijeeh dilidgo łikání halchinii náádayiiłniihii yich'į' dadookahgo nídayookąąh doo, nidi hade ádahoodzaago doo yisdáhodoonił da.

¹³Háálá, Júdah nílíinii, t'áá nikin hadaas'á ánéelą́'ígi át'éego t'áá ákónéelą́ą'go nidiyin dabidi'níinii hazlį́į́', áádóó bikáá' náá'iiniihí bikáá'dóó Béíyal bich'į' tsin bijeeh dilidgo łikání halchinii éí Jerúsalemgi kintaa da'aztiinígi ánéelą́ą'go t'óó baa yáhásingo bikáá' náá'iiniihí nidasínínil.

¹⁴Éí bąą díí dine'é t'áadoo bá sodílziní, doo nidi bá ná'iinikąąhgo bá sodidíílzįįł da, háálá bide áhoodzaago nídashookąąh nidi, doo hodideests'į́įł da.

¹⁵Ayóó'ósh'níinii doo yits'ídígi áát'įįdgóósh háí hadi'ní'ą́ągo shighan góne' nináájídáa doo? Bee ádee hahínídzíi'ii índa atsį' nááhániihii éísh atíní'dilnéhígíí ná nahjį' kwíidoolííł? Ákódzaago éí baa nił hózhǫ́ǫ doo.

¹⁶Bóhólníihii kóniłníí nít'éé', Tsin áliv dootł'izhgo sikaadii yá'át'éehii índa bineest'ą' yá'át'éehii nidi ayóó íits'a'go níyolgo yihodíínil, áádóó bits'áoz'a' ałtso adahideezk'ą́ą́'.

¹⁷Ízrel dine'é índa Júdah dine'é éí tsin bijeeh dilidgo łikání halchinii Béíyal yich'į' deidiłidgo doo yá'áshónígi ádáát'įįdgo shá dahashchįįdígíí biniinaa t'áá ałtsoní bee Bóhólníihii k'indííláii doo yá'áshónígi áńdi'doolníłígíí yee haadzíí'.

¹⁸Bóhólníihii shił ééhózin áyiilaago shił bééhoozin; áadi índa yaa nidaakaígíí shich'į' yit'íní íinilaa.

¹⁹Nidi dibé yázhí doo át'íínígíí naatseedjį' eedlóozii nahonishłin nít'éé'. Haa'íyee' tsin sikaadígíí bineest'ą' t'áá bił ádadiildįįł; haa'íyee' dahináanii bitahdóó dadiyiilyééł, áko bízhi' doo bénínááhániih da doo, daaníigo shik'ijį' danilį́įgo shindahazgizígíí doo shił bééhózin da nít'éé'.

²⁰Nidi, t'áá ałtsoní bee Bóhólníihii nílíinii, t'áá ákogi át'éego ánihoyí'aahii, áádóó diné bijéí índa bíni' bééhózingo áyoolíiłii nílíinii, biniyé ásht'íinii naadiní'ánígíí biniinaa haa'íshą' bee k'éé'dínéehii yideestsééł?

²¹Éí bąą Ánathath kin haal'áadi diné kéédahat'íinii nizéédeidoot'įįłgo yíká da'ałkidii, Bóhólníihii bízhi' bee t'áadoo hólne'é, éí doodaii' dandiyiilyééł, daaníinii éí Bóhólníihii kót'éego yaa haadzíí'.

²²Éí bąą t'áá ałtsoní bee Bóhólníihii kóní, Shoo, atíhodeeshłííł. Tsíłkéí diltłish bee nidadootsił; biye'ké índa bitsi'ké éí dichin nidabidoołtsił.

²³Ánathath kin haal'áagi diné kéédahat'íinii doo yá'áshónígi ádahodeeshłíłígíí yihah góne' atíháshłéehgo t'ááłá'í nidi doo ła' jidoodzih da.