Read Navajo JEREMIAH 12 Bible Online

JEREMIAH 12 - Navajo bible

JEREMIAH 12

¹Bóhólníihii nílíinii, ts'ídá t'áá ákogi ánít'éego doo haada yit'éii bee nich'į' hadeesdzihgo agha'dideesht'ááł. Ha'át'íí lá biniyé diné doo yá'ádaashóonii yaa naakaígíí bee bada'iideeł? Ha'át'íí lá biniyé t'óó baa yáhásinígi ádaat'éii yaa nidaakaígíí t'áá ałtso bił dahózhǫ́?

²K'idahodíínílá áádóó behétł'óól dahazlį́į́'. Dadínéesą́ áádóó bineest'ą' nídahoodleeł. Naa yádaałti' nidi, doo deeghánídi bits'ąą honílǫ́.

³Nidi, Bóhólníihii nílíinii, ni éí shééhonísin. Shiiniłtsą́, ná hinishnánígíí nabínínítą́ą́'. Dibé nidadootsiłii bits'ázhnínil nahalingo bits'ánínííł, áádóó ła'a jį́ nidadootsiłígíí biniyé hasht'edahólééh.

⁴Haa lá nízáágóó kéyahígíí nidínéesdzáago nanise' daniiłna' doo? Diné doo yá'ádaashóonii ákwii kéédahat'ínígíí biniinaa naaldlooshii índa tsídii daneezná, háálá, Anihídeidoołkáałjį' ahoolzhiizhgo doo yizdoołtséeł da, daaní.

⁵Diné bił ałgháádíkahgo bąąh nííníyáago ákoshą' haa yit'éego łį́į́' bił ałghadidííkah? Kéyah yá'áhoot'éehgi nídígohgo ákoshą' Jórdan tooh bibąąhgóó hodíłch'ilgi haa nit'į́į doo?

⁶Azhą́ nik'isóó danilíinii índa nizhé'é bighandóó nidaakaígíí t'áá éí nidi, ninádandeez'ą́. T'áá aaníí, éí nikéé' dadilwosh nít'éé'; nizhónígo nich'į' yádaałti' nidi, t'áadoo yinídlání.

⁷Sha'áłchíní yóó'adíí'ą́; shíi'ii bits'áníyá; shii' sizíinii hánígo ayóó'ádayó'nínígíí bida'ana'í baa diní'ą́.

⁸Shíi'ii éí hodíłch'ildi náshdóítsoh bitsiijį' ditł'ooígíí atíshidoolíiłgo shiniyé ánínígíí nahalin. Éí bąą bik'ee dínih.

⁹Shíí' nilínígíí éí tsídii łikizhígíí nahalin. Náánáła' tsídii binaagóó nidaat'a'ígíí éí bik'ee dadiniih. Naaldlooshii t'áá ałtso dzígaidę́ę́' áłah áníléehgo da'doolghał.

¹⁰T'óó ahayóí diné aa ádahalyáanii shich'il na'atł'o'ii yíl'áii atídayiilaa; shíhígíí ałtso yik'i naaskai; shikéyahgi doo siláhígóó t'óó honoojí ádahoolaa.

¹¹Doo siláhígóó ádahoolaa. Doo siláhígóó bąą shich'į' yínííł nilį́įgo yicha. Ádił nida'iisíi'ii doo bąąh bíni'ígíí biniinaa kéyah t'áá náhwiist'ą́ą́ nít'éé' doo siláhígóó áhoolyaa.

¹²Honoojítahgi wódahgo nahaz'ánígóó nida'iiłchǫǫhii nidahaazná. Ákwii kéyah t'áá náhwiist'ą́ą́ nít'éé' Bóhólníihii bidiltłish bee ni'dootsił. Doo ła'da bił hodéesyéel da doo.

¹³Tł'oh naadą́ą́' k'idazdeezláa nidi, hosh t'éí dajííyizh. Nijíkai lá nidi, t'áadoo há bilááh násdlį́į' da. Bik'ee íyé'ígi át'éego Bóhólníihii báhóóchįįdígíí biniinaa dajííyizhii baa yádanohsin doo.

¹⁴Diné doo yá'ádaashǫ́ǫ́góó bił kééhasht'íinii t'áá ałtso Bóhólníihii hak'ijį' nilį́įgo kóní, Shidine'é Ízrel daabí áshłaa yę́ę bizhdeelnii'ii, shoo, éí hakéyah bikáá'dóó náhodideeshjihgo hatahdóó Júdah dine'é nahjį' háádeesh'nił.

¹⁵Hatahdóó hanáásh'nildóó bik'ijį' baa a'ááh nánísdzin doo, áádóó diné t'ááłá'í nítínígo daabíi'ii índa bikéyah baa náhideesh'ish.

¹⁶T'áá Béíyal bízhi' yee ádee hadahididziihgo bíndabizneestą́'ígi át'éego t'áá ákót'éego Bóhólníihii hiná, dajiníigo bee ádee hadahizdidziihgo bídahojiił'ą́ą'go, áko lá índa shidine'é bitahgi hadziilgo ádahodi'doolníił ni.

¹⁷Nidi doo ak'eh dahół'į́į́góó éí dine'é náhodideeshjihgo ałtso áhodeeshdįįł, ní Bóhólníihii.