Read Navajo JEREMIAH 13 Bible Online

JEREMIAH 13 - Navajo bible

JEREMIAH 13

¹Bóhólníihii kóshidííniid, Nílááh, sis niteelí na'at'ą́hí łigaii dits'idígíí bee ályaii ła' shóiníłt'eeh, áádóó áká nílzis, índa doo taah dííléeł da.

²Áko Bóhólníihii bizaad k'ehgo sis niteelí ła' shóisíłt'e'go ádiníséłt'i'.

³Áádóó naakidi aleeh góne' Bóhólníihii shich'į' hanáánáádzíi'go kóní,

⁴Nídiidáahgo sis niteelí shóisíníłt'e'go ninázt'i'ígíí éí Yufréítiiz tooh nílínígóó dínáahgo áadi tsék'iz góne' nídíł'įįh.

⁵Áko Bóhólníihii t'áá yee shich'į' haadzí'ígi át'éego dah diiyáago Yufréítiiz tooh nílínígíí bíighahdi nídíł'į́į́'.

⁶Áádóó lą'í yiską́ą́dóó bik'ijį' Bóhólníihii áshidííniid, Nídiidáahgo Yufréítiiz tooh nílínígóó dínááh, áadi sis niteelí nídíł'įįh nidishníinii nídidíílééł.

⁷Áádóó Yufréítiiz tooh nílínígóó níyá, áadi sis niteelí nídéł'į́į́' yę́ędóó hanéígeedgo nídiilá. Nít'éé', sis niteelí yę́ę doo chonáánáot'įįh át'éégóó yíchxǫ' lá, jó'akon.

⁸Ákohgo Bóhólníihii shich'į' haadzíi'go ání,

⁹Bóhólníihii kóní, Ákót'éego Júdah dine'é bibee áshohódli' índa Jerúsalem dine'é bibee áshohódli' yíchxǫ'go ádeeshłííł.

¹⁰Díí doo yá'áshóonii dine'é shizaad doo t'áá k'ad deidiizts'ą́ą'ii, doo ádidahól'áágóó yildahii áádóó diyin dabidi'níinii yá nidaal'a'í áádóó yich'į' nidahałáii éí t'áadoo bee chonáádajoot'įįhígóó díí sis yíchxǫ'ígi ádajít'ée doo.

¹¹Diné biníí' gónaa sis niteelí bineestihgo binázt'i'ígi át'éego Ízrel dine'é índa Júdah dine'é shidine'é danilį́įgo éí binahjį' ch'íshidit'áah doo, áádóó shaa ha'niih doo, índa ayóó át'éego bee shaa ha'niih dooleeł biniyé shąąh dah jizhjée'go áhooshłaa, ní Bóhólníihii, nidi doo da'íists'ą́ą' da.

¹²Éí bąą díí saad bee bich'į' hadíídzih, Ízrel dine'é biDiyin God Bóhólníihii kóní, Tó abid t'áá át'é wáin bee hadadidoolbį́į́ł, áádóó ádandidooniiłgo, Tó abid ts'ídá t'áá át'é wáin bee hadadidoolbį́įłgo t'áá aaníí nihił béédahózin.

¹³Áko índa ádahodidííniił, Bóhólníihii kóní, Shoo, díí kéyahgi kéédahojit'ínígíí ts'ídá t'áá ádzíłtso éí aláahgo naat'áanii David bibikáá'dóó nahat'áii yikáá' dah nídahidinoobįįłii áádóó nááda'iiłniihii áádóó áhodoonííł yaa dahalne'ii índa Jerúsalem kin haal'áagi kéédahat'íinii ts'ídá t'áá ałtso bił nidahondoohgo ádeeshłííł.

¹⁴Áádóó azhé'é danilíinii índa aye' danilíinii bił ahínídahodiistsxis doo. Doo hak'édí deeshłeeł da áádóó ła' doo ááhodeesįįł da índa doo haa a'ááh dínéesįįł da, nidi ałtso atíhodeeshłííł, ní Bóhólníihii.

¹⁵Da'íísółts'ą́ą́', nihijaa' dadóoł'á áádóó t'áadoo ádaa dahoh'niihí, háálá Bóhólníihii haadzíí'.

¹⁶Bóhólníihii nihiDiyin God t'ah doo chahałheeł áhálééhdą́ą́' índa dziłghą́ą́'góó chahałheełdi t'ah doo dadohgeehdą́ą́', áádóó adinídíín há dasídóo'į́į'go adinídínígíí t'ah doo anoonééł bichaha'oh yileehdą́ą́', t'ah doo t'áá íiyisí bee chahałheełgo áhálééhdą́ą́' baa dahohniih.

¹⁷Nidi doo dadoohts'į́į́hgóogo nihi'áshodahódli'ígíí biniinaa shii' sizíinii nidahont'ingóó yicha doo, áádóó Bóhólníihii bidibé naakaii bidisnáago yóó'abidoojaa'ígíí biniinaa shinák'eeshto' t'áá íiyisí náálį́įgo yishcha doo.

¹⁸Aláahgo naat'áanii índa bimá asdzą́ą́ naat'ááh nilíinii ábidiní, Nihinaat'á ch'ah nahjį' nihits'ą́ą́' kólyaa biniinaa ádaa hojiinołbá'í, í'dółnééh áádóó noohkeeh.

¹⁹Shádi'áahjigo kin hadaas'áii bidáda'deeskaal. Doo ła'da ąą áńdeidoodlíił da. Júdah dine'é t'áá ałtso bidisná; ts'ídá t'áá yíl'áá nít'éé' bidisná.

²⁰Náhookǫsjigo anighaałgo nich'į' yinéełii níníł'į́. Dibé shijée'go naa deet'áanii éí nidibé ayóó ádanóolninii éíshą' háájí?

²¹Danik'is danilíinii nidanínítą́ą'ii nindant'áa doogo nii'nilgo ha'át'íí diníi doo? Asdzání éí awéé' bídii'na' nahalingo ts'ídá nił honeezgai doo?

²²T'áá niyi'ídi, Ha'át'íí lá biniyé kóshi'dil'į́? diníigo ayóó át'éego doo ákǫ́ǫ́ íínít'įįdígíí biniinaa ni'éé' nik'i naaldláadgo nikee' t'áágééd iyííts'ih.

²³Iithiyópiyadę́ę́' diné daats'í bikágí łahgo át'éego íidoolíiłgo yíneel'ą́, índa náshdóíłkiizh daats'í doo łikizhgóó ídi'doolníiłgo yíneel'ą́? Ákódzaago éí ni ałdó' doo yá'át'éehii baa nanináago bíníníldinii ni daats'í ałdó' yá'át'éehgo yínáał doo.

²⁴Éí bąą honoojíídę́ę́' níyolgo azhool ałtso bił yóó'iiyołígi át'éego tahodínéeshkał.

²⁵Shaa yisínínah áádóó wooch'ííd t'éiyá baa dzíínílíhígíí biniinaa kóníłtsogo lą́ą bee atí'él'íinii shits'ą́ą́dóó nik'i hwiidooleeł ni.

²⁶Bee naa yáhodoosįįłígíí biniyé ni'éé' ninii' bilááhgóó de ádeeshłííł.

²⁷Dawók'ą́ą́góó k'ídahoneezláágóó bee doo níldinii índa adilyé bee tsi'nisíníyáii áádóó łį́į́' ání nahalingo ádínínígíí t'óó baa yáhásinígi át'éego íł jił yę́ę yiiłtsą́, áko Jerúsalem yinílyéii, doo hojooba' ájíníi da! Hahgoshą' índa doo yá'át'éehii nąąh ádingo ánándi'doolnííł?