Read Navajo JEREMIAH 16 Bible Online

JEREMIAH 16 - Navajo bible

JEREMIAH 16

¹Áádóó ałdó' Bóhólníihii shich'į' haadzíi'go ání,

²Ne'asdzą́ą́ ts'ídá doo nee hodooleeł da, áádóó kwe'é niye'ké índa nitsi'ké ts'ídá doo hodooleeł da.

³Háálá aye'ké índa atsi'ké kwe'é nidahaazhchínígíí áádóó díí kéyahgi amá nida'jiishchínígíí índa azhé'é há nida'iizhchínígíí Bóhólníihii hwee haadzíi'go kóní,

⁴Naałniih na'ałtseedii nidahodoołtsił. Doo haa yínííł hodoosįįł da, índa doo yóó'ádahodi'doolníił da. Chąą'gi át'éego nihokáá'góó nizdeeztąąd doo. Diltłish bee nidaho'didootsił áádóó dichin nidahodoołtsił. Dahats'íís daneeznánígíí éí tsídii wódahdi nidaat'a'ii áádóó naaldlooshii nihokáá'góó naaldeehii dahodooyį́į́ł.

⁵Háálá Bóhólníihii kóní, Nii'oh nánídáahgo baa yínííł sínídá yíila', áádóó baa atínídinídleeh yíila', índa baa chaał nidísiih yíila', háálá shibee ach'į' hózhóonii áádóó ajooba' índa aa a'ááh hasin díí dine'é bits'ą́ą́' nahjį' kóshłaa, ní Bóhólníihii.

⁶Díí kéyahgi ayóó ádaat'éii áádóó a'ohgo ádaat'éii dadínóonééł. Doo yóó'ádahodi'doolníił da índa doo ła' haa tínídindleeh da doo, áádóó doo ła' haa yínííł nilį́įgo ni'ídidoolgish da, doo nidi bitsii' ałtso yidooshih da.

⁷Daneeznáanii yaa atínídadindleehii doo ła'da yił da'dooyį́įłgo hayida'íídóołnih da, índa bizhé'é, doodaii' bimá yaa atínídindleehii éí yee hada'íídóolniiłii bee adlání bee doo ła'da yeidookáałgo yidoodlį́įł da.

⁸Kin bii' áda'azįįdii góne' bitahgi díníídaałgo adííyį́į́ł áádóó adíídlį́į́ł biniyé doo yah adíínáał da.

⁹Jó, Ízrel dine'é biDiyin God t'áá ałtsoní bee Bóhólníihii kóní, Shoo, níyoołkáałdi t'áá níníł'į́įgo díí haz'ą́ą́dóó diné bił nidahoozhǫǫhgo biinéé' hahosiilts'įįhii áádóó diné bił dahózhǫ́ǫgo biinéé' hahosiilts'įįhii áádóó diné da'iiyehii dabiinéé' hadahosiilts'įįhii índa asdzání báda'doogehii dabiinéé' hadahosiilts'įįhii ni' kódadeeshł ííł.

¹⁰K'ad díí dine'é díí saad t'áá át'é bee bił hwíínílne'go, áko ádandidooniił, Ha'át'íishą' biniyé doo yá'áshónígi ánihi'didooníłígíí Bóhólníihii yee nihá haadzíí'? Ha'át'éegishą' doo ákwii ádeiit'įįd da? Bóhólníihii nihiDiyin Godshą' haa yit'éego bich'į' ádił nida'ayeelzíí'?

¹¹Ákohgo ábididííniił, Bóhólníihii ání, Danihizhé'é yę́ę yóó'adashideez'ánígíí biniinaa diyin dabidi'níinii yá nidaas'a', áádóó yich'į' nidahałáá nít'éé', áko yóó'adashideez'ą́ągo shibee haz'áanii t'áadoo yik'eh dahóół'įįd da.

¹²Áádóó nihí danihizhé'é yę́ę t'ah bilááh át'éhígo t'óó tsé'édinda ádaot'įįd; jó, doo dashíínółts'ą́ą' da dooleełígíí biniyé t'ááłá'í nootínígo danihijéí doo yá'áshóonii biyi'dóó doo nihída'didzilgóó deínóhkááh.

¹³Éí bąą díí kéyahdóó náánáła' kéyah doo éédahózingóó anihidínéeshkał. Nihí doo dahooh'į́į da, índa danihizhé'é yę́ę t'áadoo dahoołtsą́ą da, áko ákwii t'áá ákwíí jį́ índa t'áá ákwíí tł'éé' diyin dabidi'níinii bá chodaoh'į́į doo. Áadi doo nihich'ooshníi da doo.

¹⁴Bóhólníihii ání, Éí bąą Bóhólníihii éí Ízrel dine'é Ííjip kéyahdę́ę́' ch'íiní'eezhii hiná, doo nááhá'níi da dooígíí bich'į' yoołkááł, jó'akon.

¹⁵Nidi, Bóhólníihii éí náhookǫs kéyahdę́ę́' Ízrel dine'é ch'íiní'eezhii índa kédaayahgóó Ízrel dine'é tainooskaadę́ę́' nináyiizh'eezhii hiná, ha'níi doo. Áko dabizhé'é yę́ę kéyah baa diní'áníjį' nináhideesh'ish.

¹⁶Bóhólníihii ání, Łóó' hadayiileehii t'óó ahayóí bíká i'ííł'a'; éí hadah hodiyooloh, jó'akon. Áádóó éí bik'ijį' nidaalzheehii t'óó ahayóí bíká i'deesh'aałgo daadziłgóó áádóó deílk'idgóó índa tsé daak'izgóó háká nidaalzheehgo áádę́ę́' ninádahodiyoo'ish.

¹⁷Háálá yee ádaat'éii t'áá át'é yish'į́, áko ts'ídá t'áadoo shits'ąą dínót'į́łí da, índa doo ákwii ádajit'ínígíí nidi doo shits'ąą nidanil'in da.

¹⁸Doo ákwii ádajíít'įįdígíí índa ádił nida'dziisíhígíí biniinaa naakidi ahą́ą́h nániiláago átsé k'ééhodideeshdlííł, háálá doo dahináanii bééda'alyaii doo daaldinii éí shikéyah bee dajííłchxǫ', áko shíi'ii doo daaldinii bii' hadazdeesbįįd.

¹⁹Bóhólníihii nílíinii, nee shidziilgo bine' na'adzi'ii shá nílį́; shich'į' náhodii'náahgo bine' ahinishchéehii nílíinii, nahasdzáán nidahonees'ą́ą́dę́ę́' ał'ąą dine'é naahakáahgo t'áá aaníí danihizhé'é yę́ę wooch'ííd áádóó t'áadoo nánídlíinii índa doo bee a'ídeełii bíí' daazlį́į́', daaníi doo.

²⁰Dinéésh ła' diyin dabidi'níinii ádá ádeidoolííł? Aoo', nidi éí doo dadiyin da.

²¹Éí bąą díí k'ad t'éiyá hoł béédahózingo áhodeeshłííł; éí shidziilgo áádóó ayóó áshóodziilgo hoł béédahózin doo, áko Bóhólníihii éí shízhi'go hoł béédahodoozįįł.