Read Navajo JEREMIAH 17 Bible Online

JEREMIAH 17 - Navajo bible

JEREMIAH 17

¹Júdah dine'é ádił nida'iisdzíi'ii éí dabijéí bikáá' bee ak'eda'ashchį́ índa nihibikáá' nááda'iiniihí bikáá'dóó adee' dadeez'áhígíí éí bąąhgóó bee binída'ashk'aazh. Béésh nitł'izii bee ak'e'alchíhí índa tsé da'ílíinii dáíman wolyéii bee ak'e'alchíhí hááhaashchii'go éí bee binída'ashk'aazh.

²Dawók'ą́ą́góó tsin dootł'izh naazkaadii dabiyaagóó bikáá' nááda'iiniihí áádóó asdzání bee eda'alyaii naazį́ yę́ęgóó hada'áłchíní t'ahdii yéédaalniih.

³Kéyahdi shidził nílíinii, nit'íinii áádóó ninaalye'é t'áá ałtso índa ninaagóó kéyah nidahwiisdzojį' ninádahałaah doo biniyé wódah nahaz'ą́ą́góó ádaalyaii ádił nida'iidzííh biniyé bąąh da'oogą́ą'ii át'éego nideeshnih.

⁴Sháháchį'go t'óó tsé'édinda shił halchíi'go ádashoołaaígíí éí hool'áágóó dook'ą́ą́ł dooleełígíí biniinaa nihí nihaa diní'ánígíí bidadidoohchiłgo doo danihíi' da dooleeł. Áko kéyah doo dahooh'į́įdi nihi'ana'í danilíinii bá nidaał'a'go ádanihideeshłííł.

⁵Bóhólníihii kóní, Diné ła' diné yaa dzólíii áádóó diné bibee adziilii yaa dzólíii índa Bóhólníihii doo yiniizį́į́'góó yóó'iidíí'áanii éí hóyée'go bá ha'oodzíí'.

⁶Háálá diné éí séí t'éí dadeesk'idgi k'ai' łichíí' t'áá sáhí íí'áhígíí nahojílin, áádóó yá'át'éehii ach'į' náhodidleeh nidi, doo dziiłtséeh da, nidi honoojíidi doo nahałtindi tááníí' t'éiyá haalgaidi diné ła' doo kééhat'į́įdi kééhojit'į́į doo.

⁷Nidi diné éí Bóhólníihii yaa dzólíii áádóó Bóhólníihii bee bił chohoo'íinii éí bik'ihojidlí.

⁸Áko hó tábąąhgi t'iis k'idoolyáago éí behétł'óól tábąąhjigo tanooshzhee'ígíigi ájít'ée doo. Nídadiłdoh nidi, doo béédzíldzid da doo áádóó hat'ąą' éí t'áá áłahjį' dootł'izh doo. Doo nahałtingóó yihahgo éí doo ho'diił'áa da doo, áádóó honeest'ą' t'áá náhádleeh doo.

⁹Ajéí wolyéii éí na'adlo' nináneel'ą́ąjį' ts'ídá t'áá ałtso biláahgo bina'adlo', áádóó doo náodziihígi át'éégóó t'áá íiyisí yíchxǫ'. Éí háí bił bééhodoozįįłgo yíneel'ą́?

¹⁰Bóhólníihii nishłíinii diné t'ááłá'í nítínígo yee át'éii bik'ehgo, índa ádajooníłígíí bee bineest'ą' bik'ehgo hach'į' ninádi'yeeshdlééł biniyé hajéí haasííd áádóó háni' há nidaashkaah.

¹¹Déłdánii éí ayęęzhii yik'i sidáago t'áadoo hayiyííłjé'ígi át'éego diné na'adlo' bee yit'íinii nishóiyoołt'eehii ákót'é; éí hastóí dooleełígíí bich'į' bíídíiską́ągo yit'íinii bits'ą́ą́' háájí shį́į́ silį́į'go doo áhojilyą́ą́góó dazdootsaał.

¹²Hodeeyáádą́ą́' ayóó át'éii bikáá' dah asdáhí bikáá'dóó nahat'áago bits'ádi'nílíidii ákwii hodiyingo haz'ánígíí éí nihí.

¹³Bóhólníihii éí Ízrel dine'é bee bił chohoo'íinii nílíinii, t'áá ałtso yóó'adanizhdii'aahii t'óó haa yáhásinígi ádahodi'doolnííł; nits'ą́ąjigo dah dahizhdiikáahii t'áá ałtso házhi' łeezh bikáá' ádadoolnííł, háálá iiná tó háálíinii éí Bóhólníihii nilíinii yóó'adazdeez'ą́.

¹⁴Bóhólníihii nílíinii, ná shíłdziih, áko náshi'dooldzíi' doo. Yisdáshíłteeh, áko yisdáshi'dooltį́į doo, háálá ni naa hashniih.

¹⁵Shoo, háadiyee' Bóhólníihii bizaad? Háni'dii k'ad bohodoolnííł, dashiłní.

¹⁶Shí sízį́įgi t'éí dibé baa áháshyą́ągo nikéé' yisháłígíí bits'ą́ą́dóó doo tsį́į́ł nishłį́į da nít'éé', índa diné atídadíílíłígíí doo bídin nishłį́į da nít'éé'. Baa yéíłti'ígíí éí níínáałgo nił bééhózin.

¹⁷T'áadoo shiyanahółhizí; doo yá'át'ééhgóó hodidilzhishgo nine' nihesdzííh.

¹⁸Atídashił'íinii háni'dii yádanízin le'; shí éí t'áadoo yánísiní. Bíni'dii t'áadoo ájóne' hasingi ádaane'. Shí éí ákóoshne' lágo. Doo yá'át'éhígi bohodoolníłígíí bik'ijį' yiighad, áádóó naakidi ahą́ą́h nániiláago atínílééh.

¹⁹Bóhólníihii kóshíłní, Nílááh, diné bidáń'dítį́hígi éí Júdah dine'é aláahgo bindanit'a'í yah anídaakahgi índa ch'éédaakahgi ákǫ́ǫ́ dínáahgo ákwe'é sínízį́, áádóó Jerúsalem kin haal'áagi dáń'da'ditį́į́hgóó t'áá ałtso ákónínééh,

²⁰áádóó ábidiní, Júdah dine'é aláahgo bindanit'a'í danohłíinii t'áá ánółtso áádóó Júdah dine'é danohłíinii t'áá ánółtso índa Jerúsalemgi kéédahoht'íinii t'áá ánółtso, díí dáń'da'ditį́į́hgóó yah anídaohkahii Bóhólníihii áníinii dadoohts'į́į́h.

²¹Bóhólníihii kóní, Ádaa ádahołyą́. Háá'áyį́į́h jį́į́ góne' nihiyéél t'áadoo nidaahjaahí, índa Jerúsalemgi dáń'da'ditį́į́h góne' t'áadoo yah adahołjiidí.

²²Danihizhé'é yę́ę bee bich'į' haasdzí'ígi át'éego háá'áyį́į́h jį́į́ góne' nihighandóó nihiyéél t'áadoo ch'ídahoołjiidí áádóó t'áadoo nidaołnishí índa ákóne' hodiyingo ádeínóhsin.

²³Nidi t'áadoo da'íists'ą́ą' da áádóó doo dadi'doots'į́įł da índa doo nidabi'dínóotįįłígíí biniyé doo nibída'didzilgóó áda'diilyaa.

²⁴Nidi Bóhólníihii kóní, Haleebee hazhó'ó dashíísółts'ą́ą'go háá'áyį́į́h jį́į́ góne' díí kin haal'áagi dáń'da'ditį́į́h góne' hééł doo yah adahoołjiidgóogo, nidi háá'áyį́į́h jį́į́ góne' doo nidaołnishgóó dahodíínóhsingo,

²⁵áko lá índa aláahgo naat'áanii danilíinii índa naat'áanii danilíinii David bibikáá'dóó nahat'áii yee dabidziilgo díí kin haal'áagi dáń'da'ditį́į́h góne' yah anáhoohkah doo; tsindaabąąs bijáád naakiígíí ła' yii' naháaztą́ągo índa ła' łį́į́' bił deíldlóoshgo yah anáhookah doo. Júdah dine'é bí lá áádóó binaat'áanii danilíinii áádóó Jerúsalemgi kéédahat'íinii yah anáhookah doo. Áko hool'áágóó díí kin haal'áa doo.

²⁶Áádóó Júdah kéyahgi kin hadaas'áádóó áádóó Jerúsalem bik'i dinaago nidahós'a'dóó índa Bénjamin kéyahdę́ę́' áádóó halgaidę́ę́' índa dził naaznildę́ę́' áádóó shádi'ááhdę́ę́' didlidgo nááhániihii índa náádahidoonihii áádóó ak'áán náádahidoonihii índa tsin bijeeh dilidgo łikání halchinii nááhániihii áádóó Diyin God baa hojiniihgo nááhániihii Bóhólníihii bikin bii' sohodizin si'ą́ąjį' nidayiijáah doo.

²⁷Nidi doo dashíísółts'ą́ą́'góó háá'áyį́į́h jį́ doo hodiyingo ádeínóhsingóó índa Jerúsalemgi dáń'da'ditį́į́h góne' háá'áyį́į́h jį́įgo hééł t'áá yah adahoołjiidgo, áko dáń'da'ditį́į́hgóó bodahodideeshniłgo diné ayóó át'éii danilíinii éí dabighan adahididook'ą́ąłgo doo dadínóoltsis da.