Read Navajo JEREMIAH 19 Bible Online

JEREMIAH 19 - Navajo bible

JEREMIAH 19

¹Bóhólníihii kóní, Nílááh, ásaa' ííł'íní hashtł'ish ásaa' bee tó naat'áhí áyiilaaígíí ła' nídii'aah, áádóó diné bitahdóó hastóí daazlį́į'ii nídiinííł, índa nááda'iiłniihii bitahdóó hastóí daazlį́į'ii nídiinííł,

²áádóó Dáń'dítį́į́h Ásaats'iil wolyéii éí bíighahgóó yíldzis Hínam biye' bíhígíí ákǫ́ǫ́ dínáahgo áadi saad bee nił hodeeshnihígíí bee yádííłtihgo

³ádidííniił, Júdah dine'é aláahgo bindanit'a'í danohłíinii índa Jerúsalem kin haal'áagi kéédahoht'íinii, Bóhólníihii bizaad dadoohts'į́į́h. Ízrel dine'é biDiyin God t'áá ałtsoní bee Bóhólníihii kóní, Shoo, díí kwe'é haz'ánígi doo yá'áshónígi áhodooníiłgo ádeeshłííł, áko éí t'áá ałtso deidiits'a'ii bijaa' daawozh doo.

⁴Jó, yóó'adashideez'ą́, áádóó díí haz'ánígi doo bééhózingóó ádayiilaa, índa bí lá áádóó dabizhé'é yę́ę áádóó Júdah dine'é aláahgo bindanit'a'í éí diyin dabidi'níinii doo bił béédahózinii yich'į' tsin bijeeh dilidgo łikání halchinii deidiłid nít' éé', áádóó diné t'áadoo ádidahodiilt'i'ii nideistseedgo dabidił díí haz'ą́ągi naashchii'go ádayiilaa

⁵índa dabiye'ké éí Béíyal yich'į' náádayiiłniihgo deidiłid dooleeł biniyé ałdó' Béíyal bá ninádahałaah doo biniyé wódah nahaz'ą́ągo yá ádahoolaa. Ákódaoht'į́į dooleeł, t'áadoo bidííniid da áádóó t'áadoo bee bich'į' yéíłti' da índa t'áadoo nidi bik'ítsídíłkéez da.

⁶Éí bąą díí kwe'é haz'ánígi doo Tófet nááhoolyée da dooleeł, índa yíldzis Hínam biye' bíhígíí doo nááhoolyée da dooleeł, nidi yíldzisgi diné naaztseed hoolyée dooleeł, jó'akon, ní Bóhólníihii.

⁷Áádóó díí haz'ą́ągi Júdahdóó índa Jerúsalemdóó kót'éego daanínígíí ádingo ádeeshłííł, áádóó diltłish bee nidaho'ditseedgo índa hazéé' nidei'áhígíí nidahałtseedgo ádahodeeshłííł, índa dahats'íís daneeznáanii éí tsídii wódahdi nidaat'a'ii índa nihokáá'góó naaldlooshii dabich'iyą' dooleeł biniyé baa dideesh'ááł.

⁸Díí kin haal'áagi dahodeeshzhago áhodeeshłíiłgo naałniih ał'ąą áát'eełii hááłnii'ígíí biniinaa diné díí haz'ánígíí nídayiiltséehgo bik'ee t'óó bił adahayóigo, Tłehee yéi', daaníigo yą́ą́h nídadikah doo.

⁹Áádóó hwe'ana'í honáshzhiizhgo bik'ee nitsijikaigo ádahoolaago índa hazéé' nidei'áhígíí hach'į' nidahwiiłnáago haye'ké áádóó hatsi'ké dabits'íís dahodiyeesį́į́ł índa kwá'ásiní dajó' níinii dabits'íís nídazhdoolghał.

¹⁰Áko índa tó bee naat'áhí éí diné nił yíkaígíí binááł dííłts'ił,

¹¹áádóó ábididííniił, T'áá ałtsoní bee Bóhólníihii kóní, Ásaa' ííł'íní éí tó bee naat'áhí hashtł'ish yee áyiilaii ła'da yists'ilgo doo hasht'enáólne'ígi át'éego t'áá ákót'éego díí dine'é áádóó díí kin haal'áhígíí dideeshtah índa Tófetgi yóó'áda'alne' doo, háálá łahgóó doo nááhást'ą́ą da.

¹²Díí haz'ánígi índa ákwii kééhojit'ínígíí t'áá bił ts'ídá díigi át'éego áhodeeshłííł, áko díí kin haal'áhígíí t'áá Tófetgi át'éego áhodeeshłííł.

¹³Áádóó Jerúsalemgi kin yíl'áhígíí índa Júdah dine'é aláahgo bindanit'a'í bikin naaznilígíí éí Tófet haz'ą́ągi hóóchǫ'ígi át'éego dadoochǫǫł, háálá dahakin t'áá át'é bighą́ą́'dóó wót'ááh hiníláii t'áá át'é bich'į' tsin bijeeh dilidgo łikání halchinii dazhdííłid áádóó diyin dabidi'níinii bich'į' yanáadzi'go náádahaaznii'ii yadaadziid.

¹⁴Áko índa Jeremáíyah éí Tófetdi Diyin God bizaad baa hozhdoolnih biniyé ákǫ́ǫ́ Bóhólníihii ahóół'a' yę́ę áádę́ę́' nídzídzá. Áádóó Bóhólníihii bikin bii' sohodizin binaa haz'ánígi ákwii yiizį'go diné t'áá ałtso áyidííniid,

¹⁵Ízrel dine'é biDiyin God t'áá ałtsoní bee Bóhólníihii kóní, Jó, díí kin haal'áagi áádóó bik'i dinaago kin t'áá áłch'į́į́dígo dah naazhjaa'ígíí éí t'áá ałtso bik'ijį' doo yá'áshónígi áhodoonííł, dishníigo bee haasdzíi'ii éí k'ad bik'ijį' kóshłééh, háálá doo nihóda'didzilgóó shizaad doo daznízingóó doo t'áá k'ad dazdiizts'ą́ą' da.