Read Navajo JEREMIAH 2 Bible Online

JEREMIAH 2 - Navajo bible

JEREMIAH 2

¹Náá'áłdó' Bóhólníihii shich'į' haadzíi'go ání,

²Nílááh, Jerúsalem kin haal'áagi kéédahat'íinii bijaayi'jį' dah díníit'aahgo kódíníigo bich'į' handziih, Bóhólníihii kóní, Ániid nanináádą́ą́' na'ahódlíí nít' éé' yę́ę áádóó bá'doogehiigi át'éego ayóó'áshííní'nínígíí índa honoojíidi t'áadoo k'idoolyáagi shikéé' tádííníyáhígíí éí bénáshniih.

³Ízrel dine'é Bóhólníihii bidiyį́į́' nilį́į́ nít'éé'; Bóhólníihii áłtsé yineest'áanii nilį́į́ nít'éé'; anadandzinii bit'ááh nájahgo t'áá ałtso ádidahodiilt'i'go doo yá'át'éehii bik'i hwiidooleeł, ní Bóhólníihii.

⁴Jéíkab dine'é ahoolchíiłii, éí Ízrel dine'é dah deínóhnéehii danohłíinii t'áá ánółtso Bóhólníihii ánínígíí dadoohts'į́į́h.

⁵Bóhólníihii kóní, Ha'át'íí doo ákwii é'ét'éii shį́įshą' danihizhé'é shąąh dayiiłtsą́ągo doo deeghánígóó shits'áhaaskaigo t'áadoo danilíníii yikéé' tádadookai índa t'áadoo nilíníii daazlį́į́'?

⁶Índa Bóhólníihii éí Ííjip kéyahdę́ę́' ch'ínihiní'eezhgo honoojíígóó nihoo'ishgo kéyah bikáa'gi t'áadoo siláhígóó índa kéyah binídahasdzą́ągo áádóó doo nahałtingóó índa kéyah bii' aniné bichaha'ohgóó índa diné t'ah doo ła' ákǫ́ǫ́ ch'éghááhgóó áádóó diné doo kéédahat'į́į́góó nihiní'eezhii éí háájí lá silį́į́'? T'áadoo nidi dashidííniid da.

⁷Áko aneest'ą' índa yá'ádaat'éehii daohsą́ą dooleeł biniyé kéyah bikáá' áda'azįįdii biih nihíí'eezh, nidi yah oonáago shikéyah daołchxǫ', áádóó shíí' nilíinii doo yildinii ádaohłaa.

⁸Nááda'iiłniihii, Háájísh Bóhólníihii? t'áadoo dadííniid da, áádóó bee haz'áanii yínída'niłtinii doo shéédahósin da, áádóó naat'áanii danilíinii éí shich'į' doo ákǫ́ǫ́ ádáát'įįd da. Áádóó náás áhodooníiłii yaa dahalne'ii éí e'elyaii Béíyal yinahjį' dahoolne' áádóó doo yá'át'ééh nánídlíinii yikéé' tádadookai.

⁹Éí bąą t'ahdii t'áá nihił ałgha'disht'áah doo, índa niha'áłchíní áádóó binááda'áłchíní bił ałgha'disht'áah doo, ní Bóhólníihii.

¹⁰Jó, nihílááh Kítim kéyah táyi'dę́ę́' háá'áajį' tsé'naa ninohkáahgo áadi diné kéédahat'ínígíí hazhó'ó danół'į́ índa Kíídar kéyahgóó náádóhkááh, áadi diné kéédahat'ínígíí hazhó'ó baa nitsídaohkeesgo hadaohsííd; ákǫ́ǫ́ daats'í diné t'áá ákódaat'į́įgo bił nahaz'ą́.

¹¹Łahgo dine'é kééhat'į́įgo bidiyin dabidi'níinii, azhą́ doo diyin da nidi, náánáła'ásh bidiyin ánéídoodlííł? Nidi shidine'é bee baa ha'niihii nahjį' kódayiilaago náánáła' doo yá'át'ééh nánídlíinii éída ádá nídeidiilá.

¹²Yót'ááh hinooláii, díí bik'ee t'óó nihił adahayói le', índa t'áá íiyisí bik'e'íyée'ii bik'ee tsídadołyéesgo nihitah nidahwiiłnáa le', ní Bóhólníihii.

¹³Shidine'é naakijį' doo yá'áshǫ́ǫ́góó ádáát'įįd: tó bee iináanii háálíinii nishłíinii yóó'adashideez'ą́, áádóó tó bá az'áanii éí tó bá az'áanii sits'ilii tó doo bii' hólǫ́ǫ le' át'éii ádá ádayiilaa.

¹⁴Ízrel dine'éésh naalte' nilį́? Naalte' nilį́įgoósh yizhchį́? Ákoshą' ha'át'íí biniyé bąąh oogą́ą'ii silį́į́'?

¹⁵Náshdóíyáázh bitsiijį' daditł'ooígíí hach'į' yéego ádadííniid, áádóó hach'į' biyi' nahodi'ni' áádóó hakéyah doo bikáá' siláhígóó ádayiilaa. Hakin hadaas'á yę́ęgóó doo nidaagháhí da áádóó adeideesk'ą́ą́'.

¹⁶Áádóó ałdó' Mémfis kin haal'áádóó dine'é índa Tahápaniiz kin haal'áádóó dine'é bee ayóó ánít'éii yę́ę dayííłchxǫ'.

¹⁷Nílááh, honoojíídę́ę́' Bóhólníihii nihiDiyin God nihoo'ishgo yóó'adasidoo'ánígíí bąą t'áá nihí ádił yaa nináda'sołt'e'.

¹⁸Ákoshą' k'ad Náil tooh nílínídóó tó daohdlą́ą dooleełísh biniyé Ííjip kéyahgóó disoohkai? Áádóó Yofréítiiz tooh nílínídóó tóhígíí daohdlą́ą dooleełísh biniyé Asíriya kéyahgóó disoohkai?

¹⁹Doo yá'áníshónígíí t'áá éí hasht'énidoodlííł, áádóó t'ą́ą́' anéínílwodígíí nididooteh. Éí bąą Bóhólníihii niDiyin God yóó'adííní'ánígíí bik'ee t'áá íiyisí ináháshch'íi'ii índa doo yá'át'éehii át'éé lágo baa nitsídííkosgo nił bééhodoozįįł, áádóó shidíínísin dooleełígíí nidi nii' ádin, ní t'áá ałtsoní bee Bóhólníihii Diyin God.

²⁰Áko t'áá ałk'idą́ą́' ni'azéédéetání k'íníti' índa bee ne'astł'ónígíí k'ínínizh, nidi Diyin God doo bá naash'a' da doo, diníigo hoolzhiizh. Jó, dawók'ą́ą́góó t'áá ałtso índa tsin dootł'izh naazkaadii t'áá át'é dabiyaagóó ałjiłnii nahonílingo nahílghal nít'éé'.

²¹Ákondi ch'il na'atł'o'ii yá'át'éehii bílástsii' hadaałt'éii nílį́įgo k'indííláa ni'. Ákoshą' haa yit'éego ch'il na'atł'o'ii doo yá'áshóonii t'áá áhoodzaagóó sikaadii sínílį́į́'?

²²Azhą́ bee iilgáhí índa táláwosh t'óó ahayóí choiníł'į́įgo bee tá'ádígis lá nidi, doo ákwii íínít'įįdii bee dah yinikiizh yę́ę t'ahdii shidááhgóó hólǫ́, ní Bóhólníihii Diyin God.

²³Ákoshą' haa yit'éego, Doo yíchǫ' da; Béíyal eda'alyaii bina'nitin t'áadoo bik'eh níyáa da, diní? Honíts'aa'góó díní'į́į'go baa nisíníyáhígíí nił bééhoozįįh. Ghą́ą́'ask'idii bi'áadii éí ghą́ą́'ask'idii biką'ii haintáii tsį́įłgo naanáálwołígi át'éego naanáálwoł;

²⁴télii ałchinii honoojíidi íneesdinii éí télii biką' dooleełii haintáago níłch'i yił ahidziihígíí nahonílin; ch'íná'náago háí doo ákót'į́į́góó íidoolííł? Hadabintáii éí doo ch'ééh hadabidínóotaał da; biką'ii bidiigháahgo índa hasht'edit'eeh.

²⁵T'áá nikee' hólǫ́ǫgo íínísin áádóó t'áadoo dibáá' nílíní. Nidi ádíní, Chohoo'į́ ádin; dé'éyóní nilíinii ayóó'ádeínísh'ní; bikéé' naanááshwoł doo.

²⁶Ani'įįhii bénálkahgo ádaa yániidzįįhígi át'éego Ízrel dine'é éí aláahgo binanit'a'í, binanit'a'í danilíinii, bináá'iiłniihii danilíinii índa Diyin God yá dahalne'ii danilíinii yił ákót'éego ádaa yádadínóodzįįł.

²⁷Éí tsin, Nihizhé'é nílį́, índa tsé, Nihishíníłchį́, deiłní. Jó, shits'ą́ąjį' nídaazyiz, shich'į'go éí dooda, nidi bich'į' dahodiisnáa'go índa díldzíiłgo yisdánihínííł, daaníi doo.

²⁸Nihidiyin dabidi'níinii ádá ádaohłaaígíísh éí háájí? Nihich'į' hodiiznáa'go éí háni'dii dadildzííł; yídaneel'ą́ą́ ládą́ą́' yisdádanihidoonił. Júdah dine'é nohłíinii, nihikin hadaas'áhígíí bik'ehgo t'áá ákónéelt'e'go nihidiyin dabidi'níinii dahólǫ́.

²⁹Éí bąą ha'át'íí biniyé shił ałgha'dít'áah doo? T'áá ánółtso shich'į' doo ákǫ́ǫ́ ádaot'įįd da, ní Bóhólníihii.

³⁰Niha'áłchíní t'áadoo biniyéhígóó bitaa síłtsxas; t'áadoo hasht'éédabiidlaa da. Náshdóítsoh bitsiijį' ditł'ooígíí atí'oolííł nahalingo t'áá nihí nihidiltłish bee Diyin God yá dahalne'ii nidasoołtseed.

³¹Áko nihí oochíiłii nohłíinii, Bóhólníihii áníinii ts'ídá hazhó'ó deísółts'ą́ą́'. Ízrel dine'éésh honoojí índa kéyah chahałheełii bá nishłį́į́ nít'éé'? Ákoshą' ha'át'íí biniyé shidine'é, T'áá nihí nihídahólnííh; doo nich'į' náádadiikah da, dashiłní?

³²Ch'ikę́ę́hésh biyódí yee hadít'éii t'áá yeidiyoonah índa bá'iigehiísh bi'éé' t'áá yeidiyoonah? Nidi shidine'é éí yoołkáłígíí doo wólta' ánéelą́ą́' bíighahgóó shaa dayooznah.

³³Dooládó' ajił biniyé hasht'e'adílnéeh da. Azhą́ asdzání doo yá'ádaashóonii nidi, ááníłígíí bíndabiníníłtą́ą́'.

³⁴Áádóó ałdó' diné badahojoobá'íii doo ádidahodiilt'i' ii dabidił ni'éé' daabąąh. T'áadoo da'neez'į́į' da nidi nidasoołtseed.

³⁵Áko kódaot'įįd lá nidi doo ádidahodiilt'i' da, dadohní, T'áá aaníí, doo shich'į' báháchį' da silį́į́', diní. Shoo, doo ádił asésiih da, dinínígíí bąą naa nídéesht'įįł.

³⁶Dooládó' ła'ał yóígóó ałts'ą́ą́' ninánílwo'go ánít'éii łahgo ánáádlíił da! Asíriya dine'é baa yáninizį́'ígi át'éego Ííjip dine'é ałdó' baa yádíníizįįł.

³⁷Baa dzíínílíhígíí éí Bóhólníihii doo biniizį́'ígíí biniinaa bits'ą́ąjį' nitsii' bik'i díínílnii'go dah didíínááł, áko éí t'áá áłah doo níká ahi'dí'nóolchéeł da.