Read Navajo JEREMIAH 22 Bible Online

JEREMIAH 22 - Navajo bible

JEREMIAH 22

¹Bóhólníihii kóní, Nílááh, Júdah dine'é aláahgo binanit'a'í bighan góyaa dínáahgo áadi díí saad bee bich'į' hadíídzih,

²Júdah dine'é aláahgo binanit'a'í nílíinii, David bibikáá'dóó nahat'áii bikáá'dóó dah sínídáago nánít'áii, ni lá áádóó ná nidaal'a'í índa nidine'é díí dáń'da'ditį́į́h góne' yah anáhoohkahii, Bóhólníihii bizaad deísółts'ą́ą́'.

³Bóhólníihii kóní, Doo haada yit'éii áádóó t'áá ákogi át'éii bee ánít'é áádóó éí diné bigha'ílyáii bide áhósinii bits'ąą yisdáhínííł, áádóó t'áadoo ni'iyísíhí; náánáłahdę́ę́' naagháii áádóó áłchíní bizhé'é ádaadinii índa asdzání bąąh ádahasdįįdii t'áadoo t'áá na'níle'dii áníł'íní, índa díí nahós'a'gi diné ła' t'áadoo ádihodiilt'i'ii diyoołhéełgo bidił bits'ánílį́įgo doo ádoolníił da.

⁴Áko díí bee haasdzí'ígíí bik'eh dahonoł'į́įgo áko lá índa díí aláahgo naat'áanii bighanígíí dáń'da'ditį́į́h góne' yah anáhookah doo, áádóó David bibikáá'dóó nahat'áii yikáá' dah náhidinoobįįł índa bí áádóó bá nidaal'a'í lá índa bidine'é éí tsindaabąąs bijáád naakiígíí yee áádóó łį́į́' yee yah anáhookah dooleeł.

⁵Nidi díí bee haasdzí'ígíí t'áadoo dasidoots'ą́ą́'góogo, t'áá shí ádee hadisdziihgo ádíshní, Díí aláahgo naat'áanii bighan bił haz'ą́ągi doo yidoolaałí da, ní Bóhólníihii.

⁶Háálá Bóhólníihii éí Júdah dine'é aláahgo binanit'a'í ba'áłchíní ahoolchíiłii yaa haadzíi'go kóní, Shich'į'go Gíliyad kéyah nahonílin áádóó Dził Lébanan bílátahjį' nahonílin, nidi t'áá aaníí, honoojí nahalingo ánihideeshłííł, índa kin hadaas'áágóó doo nidaagháhí da doo.

⁷Áádóó ída'oołdįįłii yee anadaat'íinii nihiniyé hasht'edadeeshłíiłgo danihigad agháago yá'ádaat'éehii deidootsxiłgo tsídza deidiyoołkał.

⁸Áko ał'ąą dine'é t'óó ahayóí díí kin haal'áhígíí yą́ą́h nídadikahgo diné t'ááłá'í nítínígo bíighahgóó deíkáahii ádeiłníi doo, Ha'át'íí lá biniinaa Bóhólníihii díí ayóó át'éego kin haal'áii kóyiilaa lá?

⁹Áadi t'ą́ą́' yaa nídahalne'go ádaaníi dooleeł, DabiDiyin God Bóhólníihii bibee aha'deet'áanii yóó'adeideez'ą́ągo diyin dabidi'níinii yich'į' nidahałáago áádóó deidósingo biniinaa kóbi'diilyaa.

¹⁰Daaztsáanii t'áadoo baa atínídadinohdleehí, índa t'áadoo baa yínííł nidaohkaaí, nidi yóó'abi'doodlóozii baa atínídadinohdleeh, háálá éí ts'ídá doo nízhdoodáał da, áádóó hakéyah ts'ídá doo néizdooltséeł da.

¹¹Júdah dine'é aláahgo binanit'a'í Josáíyah biye' Shálam, éí bizhé'é Josáíyah bitsásk'ehgi nant'áá nít'é'ígíí áádóó kodóó haadlóozii éí Bóhólníihii baa haadzíi'go kóní, Doo kojį' nízhdoodáał da,

¹²nidi yisnááh jílį́įgo t'áá aho'doodlózíjį' t'áá áadi dazhdootsaał, áádóó díí kéyah doo néízdooltséeł da.

¹³Diné doo t'áá ákogi át'éii yee bighan áyiilaago áádóó doo haada yit'éii t'áágééd ná'ádeídi haghan ádajiilaago ákót'éego hakin nizhní'áanii, éí hach'į' doo hojooba' ájíníi da. Éí diné yił kééhat'íinii doo yich'į' asłáágóó áádóó doo adeenáágóó bá nidaalnishgo áyósinii doo hojooba' ájíníi da.

¹⁴Éí diné ání, Kin ayóó áníłtsogo nideesh'ááł áádóó ná'ádeídi dahótsaago dahooghango ádeeshłííł, áádóó tsésǫ' dadooleełgóó bá bighádahaasdzą́ągo ádeeshłííł, índa dilk'is tsin neheeshjíí' ádaał t'ą́'ígíí bii'dę́ę́' ahéideeshkałgo łichíi'go deeshdlish.

¹⁵Dilk'is nighan bii'dę́ę́' sikaadígíí bee aláahgo naat'áanii nishłį́į dooleełísh nínízin? Da' doósh nizhé'é yę́ę Josáíyah diné t'áá bita'ígi át'éego hináá nít'éé', ayą́ą́ nít'éé', doodlį́įłii yidlą́ą́ nít'éé', áko doo haada yit'éégóó índa t'áá ákogi át'éego ááníiłgo bá yá'át'ééh nít'éé'?

¹⁶Diné badahojoobá'íii áádóó hojooba' nahas'áanii yá atéét'įįd, áko díí kódzaaígíí t'áá ákóne' í'iilaa; éí ts'ídá shéého'dílzinii át'é, ní Bóhólníihii.

¹⁷Nidi ni adáninilníigo áádóó diné doo ádihodiilt'i'ii diyoolyéełgo bidił doolzasgo áádóó diné bide ahwíínísingo índa t'áá na'níle'dii diné bi'doodlohgo łídoocháásh t'éiyá baa nitsíníkeesgo baa nahídá.

¹⁸Éí bąą Júdah dine'é aláahgo binanit'a'í Josáíyah biye' Jiihóíyakim éí Bóhólníihii kót'éego baa haadzíí', Aháláane', shínaaí! Aháláane', shideezhí! Aháláane', bóhonishníihii! Aháláane', yee ayóó át'éii! doo daaníigo haa atínídadindleehgo daacha da doo!

¹⁹Télii jooshoł áádóó łeeh jííłtínígi át'éego Jerúsalem kin haal'áii bidáń'da'ditį́hídóó tł'óó'góó ch'ídahodooshołgo łeeh dahodoołtééł.

²⁰Dził Lébanan góde hasínáahgo dílwosh, áádóó Dził Béíshandi chánahgo handziihgo dílwosh. Bił ałch'į' dah danilwo'ii t'áá ałtso atélyaago daneeznánígíí biniinaa Dził Ábarim atiindóó ninínáahgo dílwosh.

²¹T'áá ałtsoní bee áda'azįįdgo kééhót'į́į́dą́ą́' nich'į' yéíłti', nidi, Doo t'áá k'ad nidisíts'ą́ą' da, díníniid. Ándishníinii doo bik'eh honíł'į́į da. T'áá ániid nanináádą́ą́' ts'ídá t'áá ákónít'į́.

²²Nihaa ádahalyáanii éí níyoltsoh yóó'abidooził áádóó bił ałch'į' dah danilwo'ii t'áá ałtso bi'disnáágóó iidínóołkał, áko doo yá'áshónígi ádaot'įįdii t'áá át'é biniinaa yádanohsin doo áádóó ts'ídá t'óó nihaa yádahodoosįįł.

²³Dził Lébanan ní'áhídi kéédahoht'íinii, gad tahgóó danihighan ádaohłaii, nihił hahoníígaigo dooládó' nihik'édí hódlǫ́ǫ da doo. Asdzání éí awéé' bídii'na'go bił hahoníígaiígíigi át'éego nił hahodínóogah!

²⁴Bóhólníihii ání, Ts'ídá t'áá aaníí hinishná; ákót'éego Júdah dine'é aláahgo binanit'a'í Jiihóíyakim biye' Konáíyah yinílyéii, azhą́ éí shiyoostsah bee na'nit'áhígíí nahonílin nidi, nahjį' handiyeeshxą́ą́ł,

²⁵áádóó dandiyoołhéełii béédanildzidii Bábilan dine'é aláahgo binanit'a' í Nébukadnézzar áádóó Kaldíya dine'é baa nidideesh'ááł.

²⁶Áádóó náánáła' kéyahdi doo ni'dizhchį́įdi ni áádóó nimá nishchíinii t'áá bił ákǫ́ǫ́ anihideeshnił, áko áadi dadíítsaał.

²⁷Áko kéyah bich'į' nízhdó'nééł laanaa daznízinii doo ákǫ́ǫ́ nídazhdoo'néeł da.

²⁸Da' díí hastiin Konáíyahásh éí ásaa' yisk'isii doo nidzinii nahalin? Éísh ásaa' doo baa hózhóonii jílį́? Ha'át'íí lá biniinaa bí áádóó ba'áłchíní náánáła' kéyah doo éédahósingóó adabidi'niiskaad?

²⁹Kéyah, kéyah, kéyah nílíinii, Bóhólníihii bizaad diits'į́į́h.

³⁰Bóhólníihii kóní, Díí hastiin ba'áłchíní ádin nahalingo baa ak'e'íłchí. Éí nizhníłdįįd bijį́įjį' doo ayóó ájít'é jidooleeł da; jó, ha'áłchíní náás ahoolchííłgóó David bibikáá'dóó nahat'áii doo ła' yikáá'dóó dah náádínóodaał da, áádóó doo ła' Júdah dine'é yá nant'áa da doo.