Read Navajo JEREMIAH 23 Bible Online

JEREMIAH 23 - Navajo bible

JEREMIAH 23

¹Dibé baa ádahojilyáanii shikéyah hootsogi dibé naakaígíí atídajííł'įįd áádóó tadazhnooskaadii éí doo hojooba' ájíníi da, ní Bóhólníihii.

²Éí bąą diné bá nidzizį́įgo nidazhnitinii éí Ízrel dine'é biDiyin God Bóhólníihii hak'ijį' nilį́įgo kwáháłní, Shidibé hazhó'ó naakai yę́ę nihaa tadaozhjéé', áádóó da'níłts'ą́ą'gi nihaa adahaaswod, áádóó doo bik'i dasídóo'į́į' da nít'éé'. Shoo, doo yá'át'éhígi ádaohdzaaígíí biniinaa atínihideeshłííł, ní Bóhólníihii.

³Áádóó da'níłts'ą́ą'gi kédaayahgóó shidibé adahinéłkaadii éí daadziihígíí áádę́ę́' nináhidínéeshkałgo t'ááłáhíjį' áłah áńdeeshdlííł, áádóó ba'áłchíní nínááhodoodleełgo k'ee'ąą náánoot'į́įł doo.

⁴Áko diné bik'i dadéez'į́į'ii baa ádahalyą́ą dooleeł biniyé nideeshnił. Éí hada'ałtso' doo, áádóó doo nínáádadzildzid da doo, áádóó doo hąąh náádahaka' da doo, índa t'áadoo bídin dajílíní da doo, ní Bóhólníihii.

⁵Bóhólníihii ání, Jó, bich'į' yoołkááł, David bidine'é ahoolchíiłii éí bits'ą́ą́dóó t'áá ákogi át'éego ats'áoz' a' ła' hadínóoséełgo yidootsoh; éí aláahgo naat'áanii nilį́įgo hóyą́ągo nant'áa doo. Kéyah t'áá náhwiist'ą́ą́ nít'éé' doo haada yit'éégóó áádóó t'áá ákogi át'éego ááníił doo.

⁶Éí bíyoołkáałdi Júdah dine'é áádóó Ízrel dine'é yisdádoo'nił, áádóó bi'ana'í danilíinii doo baa nídaat'į́į́góó kééhat'į́į doo. Bóhólníihii bee t'áá ákogi ádaniit'éii, díí yízhíhígíí bee bi'dójíi doo.

⁷Bóhólníihii ání, Éí bąą bich'į' yoołkááł, jó'akon, Bóhólníihii éí Ízrel dine'é Ííjip kéyahdę́ę́' ch'íiní'eezhii hiná, doo nááhá'níi da doo.

⁸Nidi, Náhookǫsdi kéyahdę́ę́' Ízrel dine'é ch'íiní'eezhii índa kédaayahgóó tainooskaadii t'áá át'é áádę́ę́' Ízrel dine'é nináyiizh'eezhii Bóhólníihii hiná, ha'níi doo. Áko t'áá bí bikéyahgi kééhat'į́į doo.

⁹Áhodoonííł yaa dahalne'ii biniinaa yínííł nishłį́įgo atínídinishdleeh, áádóó shitah nahwiiłná. Bóhólníihii áádóó bizaad diyinii biniinaa diné éí wáin bik'eh deesdlį́'ígi át'éego shił honeezdo nahonishłin.

¹⁰Háálá kéyah bikáá'góó adilyé t'éí nihinéést'e'. Hóyée'go ha'oodzí'ígíí biniinaa kéyah yínííł nilį́įgo atínídindleeh. Dahonoojíígóó dahootsoígíí nídááltseigo daazgan. Doo yá'át'ééhgóó dahiná, áádóó yee dabidziilii doo ákǫ́ǫ́ ádaat'ée da.

¹¹Háálá áhodoonííł yaa dahalne'ii éí nááda'iiłniihii bi łgo doo yá'ádajíshǫ́ǫ da. T'áá aaníí, shikin bii' sohodizin bii' doo yá'ádajíshǫ́ǫ́góó shił bééhoozin, ní Bóhólníihii.

¹²Éí bąą yildahgóó éí chahałheełgi atiin hwíídéeltǫ' nahalingo bee bá adahwiizt'i' doo. Áko éí hwíídéeltǫ'go da'nítiinjį' adahodí'nóolkałgo atídahodoolííł, háálá atíhodeeshłíiłgo yihah góne' doo yá'áshǫ' haa dideesh'ááł, ní Bóhólníihii.

¹³Samériya kéyahdóó áhodoonííł yaa dahalne'ii doo hóshkał yaa nidaakaigo yiiłtsą́. Béíyal diyin bidi'níinii yinahjį' dahoolne'go shidine'é da'asiihgo ádayiilaa.

¹⁴Nidi Jerúsalem kin haal'áagi áhodoonííł yaa dahalne'ii t'óó baa'ihii yaa naakaigo yiiłtsą́: dadilé áádóó dabiyooch'íidgo dahiná índa doo yá'át'ééh ádaaníiłii dabidziilgo ádeile', áko ła'da doo yá'áshóonii yaa naagháhígíí doo yits'ágháah da. Éí t'áá ałtso Sádamgi diné kéédahat'į́į́ nít'éé' yę́ę nahalingo áádóó ákwii kéédahat'ínígíí éí Gomárahgi diné kéédahat'į́į́ nít'éé' yę́ę nahalingo baa nitsídaaskees.

¹⁵Éí bąą t'áá ałtsoní bee Bóhólníihii éí áhodoonííł yaa dahalne'ii yaa haadzíi'go kóní, Jó, dích'íi'ii hodadiyeesį́į́ł áádóó tó ánít'į́įhii hodadiyeeshdlį́į́ł, háálá Jerúsalemdóó áhodoonííł yaa dahalne'ii bits'ą́ą́dóó Diyin God doo bá iináájí iinánígíí háát'i' silį́į'go kéyah t'áá náhwiist'ą́ą́ nít'éé' bikáá'góó nihinéést'e'.

¹⁶T'áá ałtsoní bee Bóhólníihii kóní, Áhodoonííł yaa dahalne'ii nihił dahalne'ígíí bizaad t'áadoo deínółts'ą́'í. Wooch'ííd baa dadzíínóhłíigo ádanihile'. Bóhólníihii yee hahaasdzíi'ii doo yaa dahalne'góó t'áá bí dabijéí biyi'di yee yaa nitsídaazkéezii yaa dahalne'.

¹⁷Dashi'íinii yich'į' t'áá áłahjį' kódeiłní, Bóhólníihii ádííniid, Yá'át'éehgo dahinohnáa dooleeł, nihiłní. Áádóó diné t'ááłá'í nítínígo dabijéí yee nidaalteehii yik'ehgo deíkáahii, Doo yá'át'éehii doo nik'i hwiidooleeł da, deiłní.

¹⁸Háíyee' Bóhólníihii baa ahí'iildee'go Bóhólníihii bizaad baa ákodínéesįįł áádóó dideests'į́į́ł nízingo ákwii yiizį'? Háí éí Bóhólníihii bizaad yidiizts'ą́ą'go át'é niizį́į́'?

¹⁹Jó, níyoltsoh éí Bóhólníihii t'óó báhádzidgo báhóóchįįdígíí niheeldoh. Éí nááts'ó'oołdísiitsoh t'áá íiyisí t'óó bik'e'íyé'ígi át'éego diné doo yá'ájíshóonii yik'i ch'ídoogááł.

²⁰Bóhólníihii bijéí bii'di yaa nitsíkeesii ałtso yi'iilaago áádóó ałtso yinaashnishjį' índa báhóóchįįdii baa náhodoodleeł. Akée'di yoołkáałdi nizhónígo bik'idadi'doohtį́į́ł.

²¹Díí dahalne'ii doo déíł'aad da, nidi dahalne'go tádadookai. T'áadoo bich'į' haasdzíi' da nidi dahoolne'.

²²Nidi shaa ahí'iildee'go ákwe'é dadziizį'go t'éiyá shizaad bee shidine'é bił dahojoolne' doo nít'éé', áádóó doo yá'áshǫ́ǫ́góó dahináanii índa doo yá'áshǫ́ǫ́góó ádaat'íinii bits'ą́ąjį' dah nídabizhdiiłkai doo nít'éé'.

²³Diyin God nízaadi hólóonii doo nishłį́į da, nidi kǫ́ǫ́ honishłǫ́, ní Bóhólníihii.

²⁴Doo yideestséeł da biniyé doo dahoot'į́įdi diné ła' nídidoot'į́įłgoósh yíneel'ą́? ní Bóhólníihii. Yá'ąąsh áádóó nahasdzáán t'áá ałtsogóó bii' honishłǫ́, ní Bóhólníihii.

²⁵Áhodoonííł yaa dahalne'ii shízhi' binahjį' wooch'ííd yaa dahalne'go, Neisííyeel, neisííyel, daaníigo diséts'ą́ą́'.

²⁶Haa nízáágóoshą'? Áhodoonííł yaa dahalne'ii wooch'ííd yaa dahalne'go bijéí yee binda'adlo'go yaa nitsídaakeesígíí bijéí bii' dahólǫ́ǫgoósh ádaat'į́?

²⁷Éí nideizyeelígíí yee ahił dahalne'go shidine'é éí shízhi' yaa deidiyoonah danízingo yiniyé ádaat'į́. T'áá ákót'éego dabizhé'é yę́ę ałdó' Béíyal yich'į' nidahałáá nít'éé' yę́ę biniinaa shízhi' yaa dayooznah.

²⁸Áhodoonííł yaa halne'ii neizyeelígíí háni'dii yaa halne'. T'áá háiida shizaad nei'áii éí háni'dii ba'ahódlíigo shizaad yaa halne'. Tł'oh naadą́ą́' yigizhgo bitsiin éí bineest'ą' doo bił aheełt'ée da ya'? ní Bóhólníihii.

²⁹Shizaad éí ts'ídá kǫ' nahalin áádóó bee atsidí tsé k'íyiiłne'ii nahalin, ní Bóhólníihii.

³⁰Éí bąą áhodoonííł yaa dahalne'ii t'ááłá'í nítínígo náánáła' halne'é nilíinii shizaad yee deini'įįhii hak'ijį' nish łį́, jó'akon, ní Bóhólníihii.

³¹Áhodoonííł yaa dahalne'ii dabitsoo' chodayooł'į́įgo, Bóhólníihii kóníí lá, daaníinii éí bik'ijį' nishłį́, jó'akon, ní Bóhólníihii.

³²Doo t'áá aaníí na'iisgeelii yaa dahalne'ii, éí dabiyooch'íidgo áádóó t'áadoo biniyéhígóó yee ádaa daha'niihgo yee shidine'é ádił nida'iilzíihgo ádeile'ii éí bik'ijį' nishłį́, jó'akon, ní Bóhólníihii. Nidi éí t'áadoo dahóół'aad da, áádóó kódadohníi dooleeł t'áadoo hodííniid da, índa díí dine'é t'áadoo bee bá chodajoo'įįhí da, ní Bóhólníihii.

³³Ákohgo díí dine'é ła', éí doodaii' áhodoonííł yaa dahalne'ii ła', doodaii' nááda'iiłniihii ła', Bóhólníihii haa yit'éego baa nááháne'? níigo nanihídééłkidgo kót'éego bich'į' háádíídzih, Haa yit'éego hane'ígíí ááhdiní? Nihí yóó'anihidideesh'ááł, nihiłní Bóhólníihii bididííniił.

³⁴Áádóó áhodoonííł yaa dahalne'ii ła' áádóó nááda'iiłniihii ła' índa dinéda ła', Bóhólníihii bits'ą́ą́dę́ę́' íiyisí baa hane'ii, níigo yáłti'ii éí diné ba'áłchíní t'áá bił atídeeshłííł.

³⁵Nidi diné t'ááłá'í nítínígo yił kééhat'íinii, índa hak'is nilíinii, Bóhólníihii haa yit'éego nihich'į' énáhoosįįd? doodaii', Bóhólníihii haa yit'éego hanáánáádzíí'? da'ahidoh'níi dooleeł.

³⁶Áko kodóó Bóhólníihii bits'ą́ą́dę́ę́' hane'ii doo ła' náádidoo'niił da, háálá diné t'ááłá'í jinítínígo t'áá hó hazaad chodajooł'į́į doo, áádóó Diyin God hináanii, éí t'áá ałtsoní bee Bóhólníihii nihiDiyin God bizaad łahgo át'éego ádaohłaa.

³⁷Kót'éego áhodoonííł yaa halne'ii bich'į' yádaołti' doo, Bóhólníihii haa yit'éego nich'į' énáhoosįįd? áádóó, Bóhólníihii haa yit'éego hanáánáádzíí'? dabidohníi doo.

³⁸Nidi, Díí Bóhólníihii bits'ą́ą́dę́ę́' hane', dadohníigo ts'ídá nihich'į' Bóhólníihii kóní, Díí Bóhólníihii bits'ą́ą́dę́ę́' hane' bee hadasoohdzí'ígíí bąą, Díí Bóhólníihii bits'ą́ą́dę́ę́' hane', t'áadoo dadohníní, nihidishníigo nihich'į' i'ííł'a'.

³⁹Éí bąą ts'ídá nánihidideeshjihgo nihí áádóó danihizhé'é yę́ę t'áá bił kin haal'áago nihaa diní'áanii ákwii honishłǫ́ǫ́dóó áts'á nihideesxas, jó'akon.

⁴⁰Áádóó doo baa hodiyoo'nahgóó hool'áágóó nihik'ijį' yáti'go índa nihaa yáhásingo ánihideeshłííł.