Read Navajo JEREMIAH 24 Bible Online

JEREMIAH 24 - Navajo bible

JEREMIAH 24

¹Ákohgo Bábilan dine'é aláahgo yinanit'a'í Nébukadnézzar éí Jiihóíyakim biye' Jekonáíyah, éí Júdah dine'é aláahgo yinanit'a'í nilį́įgo áádóó Júdah dine'é yinaat'áanii danilíinii índa kin ádeił'íinii áádóó béésh nitł'izii deitsidii Jerúsalem kin haal'áádóó yisnáago Bábilan kéyahdi yiní'eezhdóó bik'ijį' kót'éego Bóhólníihii bits'ą́ą́dę́ę́' shił áhoodzaa: shoo, Bóhólníihii bikin bii' sohodizin bich'éédą́ą'gi fig sikaadii bineest'ą' tsits'aa' naakigo bee niiką́.

²Fig áłtsé neest'ánígíí yá'ádaat'éehii tsits'aa' t'ááłá'í bee siką́. Ła' éí fig doo yá'ádaat'éhígíí, t'áá íiyisí t'óó badaa'ihígíí, doo jóoyą́'ígi ádaat'éhígíí tsits'aa' bee siką́.

³Ákohgo Bóhólníihii áshidííniid, Jeremáíyah, ha'át'íísh yíní'į́? Áko ádíshní, Fig bineest'ą'. Ła' fig yá'ádaat'ééh, t'áá íiyisí yá'ádaat'ééh, áádóó ła'ígíí éí fig doo yá'ádaat'éeh da, t'áá íiyisí doo yá'ádaat'éeh da, doo jóoyą́'ígi ádaat'ée da.

⁴Áádóó Bóhólníihii shich'į' hanáánáádzíi'go kóní,

⁵Ízrel dine'é biDiyin God Bóhólníihii kóní, Júdah kéyahdóó dabi'disnáago dah bi'diijaa' ígíí díí fig yá'ádaat'éhígíí nahalingo baa ákodínéesįįł. Éí bá yá'ádaat'éeh dooleeł biniyé kodóó Kaldíyadę́ę́' dine'é bikéyahgóó dahóół'aad.

⁶Há yá'ádaat'éeh dooleeł biniyé hak'i dísh'į́į' doo, áádóó t'áá díí kéyahjį' nináhodeeshjih. Áádóó k'ee'ąą náázhnoot' į́įłgo ánáhodeeshdlííł. Doo t'ą́ą́' kónáhodeeshdlíił da, áádóó k'idahodideeshłééł. Doo hadahodiyeests'ǫł da.

⁷Áádóó Bóhólníihii nishłį́įgo shéédahodzísin dooleełígíí biniyé hajéí ákót'éego bee nitsídadzikees dooleełígíí haa dadideesh'ááł, áádóó shidine'é dajílį́į doo, índa haDiyin God nishłį́į doo, háálá hajéí t'áá át'é bee shaa nízhdookah.

⁸Nidi Bóhólníihii kóní, Fig t'óó baa'ihgo doo jóyą́ą́' át'ée daígi át'éego Júdah dine'é aláahgo binanit'a'í Zedekáíyah áádóó binaat'áanii danilíinii áádóó díí kéyah si'ą́ągi Jerúsalemgi dadzidziihígíí índa Ííjip kéyahdi kéédahat'ínígíí yóó'ahodideesh'ááł.

⁹Áádóó t'áá tahwiidínéeshkałgóó nahasdzáán t'áá si'ą́ą́ nít'éé' bikáá'góó diné kéédahat'į́į́góó hak'ee t'óó bił adahayóigo, áádóó doo yá'áshóonii dajílį́įgo, áádóó há nidahałt'i'go, áádóó hwee ałdlodadilchíigo, áádóó hwee niyá'ádahodilti'go, índa dahódziihgo áhodeeshłííł.

¹⁰Hó áádóó dahazhé'é yę́ę kéyah baa diní'áanii bikáá'dóó áhosíłdįįdjį' hatahgóó diltłish bee nidahodi'dootsiłii áádóó dichin nidahodoołtsiłii índa naa łniih bik'ee ázhdoodįįłii baa hodideesh'ááł.