Read Navajo JEREMIAH 27 Bible Online

JEREMIAH 27 - Navajo bible

JEREMIAH 27

¹Josáíyah biye' Jiihóíyakim éí Júdah dine'é aláahgo yinant'áago t'óó hodeeshzhiizh yę́ędą́ą́' Bóhólníihii kót'éego Jeremáíyah yich'į' haadzíí',

²Bóhólníihii kóshíłní, Azéédéetání índa bee bééda'atł'óhígíí ádanile'go azéédée'nííł,

³áádóó ádaa didíí'niłgo Júdah dine'é aláahgo binanit'a' í Zedekáíyah éí hane' nidei'áii Jerúsalem kin haal'áadi baa yíkaígíí bitaadíínih, áádóó éí dah deididoojihgo Íídam dine'é aláahgo binanit'a'í áádóó Mó'ab dine'é aláahgo binanit'a'í áádóó Áman dine'é aláahgo binanit'a'í áádóó Táir dine'é aláahgo binanit'a'í índa Sáídan dine'é aláahgo binanit'a'í yitaadeidoonih,

⁴áádóó kódíníigo díí bee haasdzí'ígíí yídahółníihii yee yił dahodoolnih, Ízrel dine'é biDiyin God, t'áá ałtsoní bee Bóhólníihii kóní, Díí bídahwíínółníihii kódabididohniił,

⁵Shibee adziil ayóó át'éii bee áádóó k'ídíshnii'go nahasdzáán áádóó bíla' ashdla'ii índa naaldlooshii nihokáá'góó naaldeehii áshłaa, áko t'áá shí nisinígíí baa hidish'aah.

⁶Áko k'ad díí kédaayah éí Bábilan dine'é aláahgo binanit'a'í Nébukadnézzar shá naal'a'í nilíinii baa diní'ą́, áádóó naaldlooshii nihokáá' naaldeehii ałdó' bá nidaalnish dooleeł biniyé baa diní'ą́.

⁷Áádóó bikéyah biyaa haat'ą́ąjį' ał'ąą dine'é t'áá ałtso bá nidaal'a' doo, áádóó haye' índa hanálí ałdó' yá nidaal'a' doo, áádóó índa ał'ąą dine'é t'óó ahayóí áádóó aláahgo naat'áanii ayóó ádaat'éii binaalte' ádahodoolííł.

⁸Áko baa hoolzhiizhgo díí áhodoonííł: ła' dine'é, doodaii' bee óhólníihgo bił haz'ą́ą́dóó éí Bábilan dine'é aláahgo binanit'a'í nilíinii Nébukadnézzar t'áá éí doo bá nidajil'a'ii áádóó Bábilan dine'é aláahgo binanit'a'í bee azéédéetání doo ázéédazhdéetįįhgóó bee bidziilii bee áhosíłdįįdjį' éí dine'é diltłish bee áádóó dichin bee índa naałniih bee atíhodeeshłííł, ní Bóhólníihii.

⁹Nidi nihí éí nihá áhodoonííł yaa dahalne'ii áádóó nida'ídíłkidii áádóó t'áá nihí nideisooyeelii áádóó iiníziin nihá yee dahaniihii índa nihá da'diłgąshii éí Bábilan dine'é aláahgo binanit'a'í doo bá nidaał'a' da doo, danihiłníigo t'áadoo deísółts'ą́'í,

¹⁰háálá nihikéyahdóó doo shónízáágóó anihi'didoo'niłígíí biniyé wooch'ííd yee nihił dahalne', áko ch'ínihidínéeshkałgo ádoohdįįł.

¹¹Nidi ał'ąą dine'é danilíinii Bábilan dine'é aláahgo binanit'a'í bee azéédéetání ázéédazhdéetą́ągo bá nidajil'a'ii éí t'áá dahakéyah bii' kéédahojit'į́į dooleełgo haa dideesh'ááł, áko t'áá ákǫ́ǫ́ kéédahojit'į́įgo ninádahojiiłdla'go k'éédazhdidléeh dooleeł, ní Bóhólníihii.

¹²Díí saad t'áá ałtso Júdah dine'é aláahgo binanit'a'í Zedekáíyah bee bich'į' haasdzíi'go kódíshní, Bábilan dine'é aláahgo binanit'a'í bee azéédéetání ázéédadóohtįįhgo bí áádóó bidine'é bá nidaał'a', áko dahinohnáa doo.

¹³Bóhólníihii kóníigo haadzíí', T'áá háiida dine'é éí Bábilan dine'é aláahgo binanit'a'í doo yá nidaal'a'ii éí diltłish bee, dichin bee, naałniih bee dadínóonééł. Ha'át'íísh biniyé ni áádóó nidine'é ákót'éego dadínóohnééł?

¹⁴Éí bąą áhodoonííł yaa dahalne'ii, Bábilan dine'é aláahgo binanit'a'í doo bá nidadoołnish da, danihiłníigo éí bizaad t'áadoo bá deísółts'ą́'í, háálá dabiyooch'íidgo nihił dahalne'.

¹⁵Háálá éí doo dááł'aad da, nidi shízhi' dayózhíigo t'áá áhoodzaagóó nihił dahalne', áko nihí áádóó áhodoonííł yaa dahalne'ii t'áá bił ch'ínihidínéeshkał áádóó ádadoohdįįł.

¹⁶Nááda'iiłniihii índa díí diné t'áá ałtso ałdó' bich'į' haasdzíi'go kódíshní, Bóhólníihii kóní, Áhodoonííł yaa dahalne'ii nihił dahalne'go, Bóhólníihii bikin bii' sohodizindóó łeets'aa' t'óó hodíína'go Bábilan kéyahdę́ę́' nídoojih, jó'akon, danihiłníigo t'áadoo bá deísółts'ą́'í, háálá dabiyooch'íidgo nihił dahalne'.

¹⁷T'áadoo bá deísół ts'ą́'í; Bábilan dine'é aláahgo binanit'a'í bá nidaoł'a', áko dahinohnáa doo. Ha'át'íísh biniyé díí kin haal'áhígíí kints'iil t'éiyá naazhjaa'go álnéeh doo?

¹⁸Nidi t'áá aaníí, Diyin God yá halne'ii dajílį́įgo áádóó Bóhólníihii bizaad hoł dahólǫ́ǫ́ ládą́ą́' Bóhólníihii bikin bii' sohodizin góne' łeets'aa' sinilígíí áádóó Júdah dine'é aláahgo binanit'a'í bikin góne' łeets'aa' sinilígíí índa Jerúsalem kin haal'áagi łeets'aa' sinilígíí doo Bábilangóó doojih da, dajiníigo t'áá ałtsoní bee Bóhólníihii nídeizhdookąął.

¹⁹Háálá áyah nii'áii, áádóó bii' tá'ádígisí nitsaaígíí, áádóó bii' tá'ádadigisí bá naaznilígíí, índa kin haal'áagi łeets'aa' t'áá ákǫ́ǫ́ nidahaas'nilii t'áá ałtsoní bee Bóhólníihii éí kót'éego yaa haadzíí'.

²⁰Éí Bábilan dine'é aláahgo binanit'a'í Nébukadnézzar éí Júdah dine'é aláahgo binanit'a'í Jiihóíyakim biye' Jekonáíyah yisnáago áádóó Júdah kéyahdóó bídahólníihii índa Jerúsalemgi bídahólníihii t'áá ałtso Jerúsalemdóó Bábilangóó iinííłkaad yę́ędą́ą́' łeets'aa' daadzí'ígíí t'áadoo dahidiijaa' da.

²¹T'áá aaníí, Ízrel dine'é biDiyin God t'áá ałtsoní bee Bóhólníihii éí Bóhólníihii bikin bii' sohodizin góne' áádóó Júdah dine'é aláahgo binanit'a'í bighan góne' índa Jerúsalem kin haal'áagi łeets'aa' t'áá ákǫ́ǫ́ nidahaas'nilii kót'éego yaa haadzíi'go kóní,

²²Éí łeets'aa' Bábilangóó doojih baa nanítą́ą'jį' áadi sinil doo, áádóó índa áádę́ę́' ch'éédeeshjihgo kwe'é ninádeesh'nił.