Read Navajo JEREMIAH 3 Bible Online

JEREMIAH 3 - Navajo bible

JEREMIAH 3

¹Diné ła' be'asdzą́ą́ yóó'ayííłt'e'go áádóó asdzání bits'áníyáádóó náánáła' diné ye'asdzą́ą́ náánásdlį́į'go ákoósh yaa nídoodááł? Ákódahóót'įįdgo éí kéyah t'áá náhwiist'ą́ą́ nít'éé' dooládó' hóóchxǫ' da doo. Bił ałch'į' dah danilwo'ii t'óó ahayóí bił ahił da'díínílyá, áko shich'į' dah nánídááh, ní Bóhólníihii.

²Honoojítahgi wódahgo nahaz'ánígóó nanighalgo haa'í shį́į́ t'áadoo ił nínítéézh yę́ęgóó díní'į́į́'. Aréíbiyadę́ę́' dine'é ła' honoojíidi sidáhígi át'éego atiin bąąhgóó eda'alyaii biba' sínídáa łeh nít'éé'; íłjiłgo tsi'nanináhígíí índa doo yá'áshónígi ááníłígíí éí bee kéyah t'áá náhwiist'ą́ą́ nít'éé' t'óó baa'ihgo áhwiinilaa.

³Díí lá biniinaa níłtsą́ nihits'ą́ą́' dahaastł'ǫ́ ni índa dąągo nááháłtį́į́h yę́ę nihits'ą́ą́' t'ą́ą́' kóolzin ni; ałjiłnii yíníltáá', áko doo nidi t'áá k'ad ádaa yáninidzį́į' da.

⁴T'áá aaníí, k'ad kódíníigo shich'į' sodílzin, ShiTaa', t'ah ániid naasháhídą́ą́' shił yí'ash.

⁵Hool'áágóósh t'áá báháchį' doo? Nihoníyáajį'ísh t'áá ákót'ée doo? Jó, bee háínídzíí' t'áá baa nideeshaał nínízin shį́į́ t'áá ni nínízinjį' doo yá'áshóonii baa nisíníyá.

⁶Josáíyah aláahgo naat'áanii nilį́įgo bíyoołkááł yę́ędą́ą́' Bóhólníihii áshidííniid, Ízrel dine'é t'ą́ą́' anáhátłíishii áát'įįdígíísh yiniłtsą́? Dził aghánídahaz'áágóó t'áá át'é yąąh híiyáago tsin dootł'izh naazkaadii t'áá át'é dabiyaagóó ałjiłnii silį́į́'.

⁷Áko díí t'áá ałtso yaa naayáago, Shaa nídoodááł, dííniid. Nidi t'áadoo nádzáa da áádóó hádí Júdah dine'é doo bazh'dí'nóodlíí át'éii hoołtsą́.

⁸Áko Ízrel dine'é t'ą́ą́' anáhátłíishii yiniyé adiléii silį́'ígíí t'áá ałtso biniinaa nahjį' kóhooshłaago naaltsoos bik'ehgo ałts'á'doot'ashígíí hadilyaago haa níłtsooz, nidi hádí Júdah dine'é doo bazh'dí'nóodlíí át'éii t'áadoo yítiid da, nidi éí ałdó' ałjiłnii nilį́įgo tádííyáhígíí yiiłtsą́.

⁹Ałjiłnii nilínígíí doo sihgo yaa nitsíkeesígíí biniinaa tsin índa tsé yił da'ahidilyéhígíí bee kéyah t'áá náhwiist'ą́ą́ nít'éé' hóółchǫ'.

¹⁰Azhą́ díí t'áá ałtso kódahóót'įįd lá nidi, hádí Júdah dine'é doo bazh'dí'nóodlíí át'éii t'óó áho'dil'į́įgo doo bijéí t'áá át'é yee shich'į' naanásdzáa da, ní Bóhólníihii.

¹¹Bóhólníihii áshíłní, Ízrel dine'é t'ą́ą́' anáhátłíishii éí Júdah dine'é doo bazh'dí'nóodlíí át'éii yiláahgo t'áá ákogi át'éego í'diilyaa.

¹²Náhookǫsjigo díí saad baa hólne': Bóhólníihii áníłní, Ízrel dine'é t'ą́ą́' anáhítłíishii, nánídááh; doo sháháchį'go ninísh'į́į da, háálá naa a'ááh nisin; hool'áágóó doo sháháchį' da doo, ní Bóhólníihii.

¹³Díí t'éiyá Bóhólníihii niDiyin God bich'į' doo ákwii íínít'įįdii índa tsin dootł'izh naazkaadii t'áá át'é dabiyaagóó dé'éyóní danilíinii bee ánít'éii baa dííní'áanii áádóó ádíshnínígíí t'áadoo bik'ehgo íinidzaaígíí t'áá ałtso bee ádéédi'nítįįhgo baa hólne', ní Bóhólníihii.

¹⁴T'ą́ą́' anáhátłíishii dine'é, nihahastiin nishłínígíí bąą naanákáahgo łah dinołt'éego kin haal'áádóó bits'ánihideeshtééł, áádóó nidinołt'éego éí łahgo hooghandóó bits'ánihideeshniłgo Záíyandi nihideesh'ish, ní Bóhólníihii.

¹⁵Áko aa ádahalyáanii nihaa dadideesh'áałgo ił ééhózin índa ak'idi'yiitįįh yíndanihiniłtin doo.

¹⁶Éí yoołkáałdi kéyah t'áá náhwiist'ą́ą́ nít'éé' bii' k'ee'ąą dínóoht'ą́ągo t'óó ahayóí soolį́į'go, Bóhólníihii bitsits'aa' bee aha'deet'áanii, doo daaníi da doo. Éí doo bąą tsínáhodookos da, doo bééhodoonih da, doo baa nináhodínóotaał da, doo ánáádoolníił da, ní Bóhólníihii.

¹⁷Éí hoolzhishdi, Jerúsalem kin haal'áádóó Bóhólníihii nant'á, daaníi doo, áádóó ał'ąą dine'é t'áá ałtso Jerúsalemgi Bóhólníihii bízhi' yich'į' áłah náádleeł doo, índa dabijéí biyi'dę́ę́' doo yá'át'ééhgóó nitsídaakeesígíí doo yik'ehgo deíkáah da doo.

¹⁸Éí yoołkáałdi Júdah dine'é éí Ízrel dine'é yił ahiih doonéełgo yił yildah doo, áádóó náhookǫsdi kéyah si'ą́ą́dę́ę́' ch'ídoonéełgo danihizhé'é yę́ę kéyah bíí' dooleeł biniyé baa diní'áanii yiih doonééł.

¹⁹Nidi ádíshní, Haaléit'éego sha'áłchíní danilíinii bitahgi áádóó kéyah hózhónígi ał'ąą dine'é ayóó ánoolningo daabíhígíí nihíí' dooleeł biniyé haaléit'éego ákwii ni nihideeshnił lá? dííniid. ShiTaa', dashidohníi doo, áádóó doo shits'áhidoohkah da, dííniid.

²⁰T'áá aaníí, e'asdzą́ą́ nilíinii doo bazh'dí'nóodlí'ígi át'éii bahastiin yóó'iidíí'ánígi át'éego Ízrel dine'é nohłíinii t'áá ákót'éego doo nihaa di'nóshdlí'ígi át'éégóó yóó'adashidoo'ą́, ní Bóhólníihii.

²¹Honoojítahgi wódahgo nahaz'ánígóó Ízrel dine'é atíndadindleehgo índa nída'ookąąhgo iinéé' diists' ą́ą́', háálá Ízrel dine'é doo ákǫ́ǫ́ dahideeznaad índa biDiyin God Bóhólníihii yaa dayooznah.

²²T'ą́ą́' anáhátłíishii dine'é, nánóhkááh; nánoohkaigo t'ą́ą́' nináhóhtłíshígíí hasht'éédanihideeshdlííł. Bóhólníihii nílį́įgo nihiDiyin God nílínígíí bąą akǫ́ǫ́ naa nániikááh, jó'akon.

²³T'áá aaníí, dah daask'idgóó índa daadziłgóó hahóó'áago nidahwiidláii t'áadoo nídandlíní da, nidi, t'áá aaníí, Ízrel dine'é yisdádookahii Bóhólníihii nihiDiyin God bee hólǫ́.

²⁴T'áá ániid nideiikaidą́ą́' danihizhé'é yę́ę yiniyé nidaashnishgo nishódayoost'e'go dibé índa béégashii baa ádahayą́ą́ nít'éé' yę́ę áádóó biye'ké índa bitsi'ké danilį́į́ nít'é'ígíí éí yáhásinii ałtso baa nahodeeskai.

²⁵T'óó nihaa yádahóósįįdgo doo da'niidlį́į́góó ída'diilyaaígíí nihich'ą́ąhgi hazlį́į́'. Danihizhé'é yę́ę áádóó nihí t'áá ániid nideikaidą́ą́' díí jį́įjį' Bóhólníihii nihiDiyin God bich'į' ádił nida'ayeelzíí'; Bóhólníihii nihiDiyin God ts'ídá t'áadoo bik'ehgóó ádeiidzaa da.