Read Navajo JEREMIAH 30 Bible Online

JEREMIAH 30 - Navajo bible

JEREMIAH 30

¹Bóhólníihii éí Jeremáíyah yich'į' haadzíi'go kóní,

²Ízrel dine'é biDiyin God Bóhólníihii kóní, Saad bee nich'į' hahásdzíi'ii t'áá ałtso naaltsoos bikáá' ánílééh.

³Bóhólníihii ání, Shoo, beiníłką́ągo shidine'é daasnáanii Ízrel dine'é áádóó Júdah dine'é nídeesh'ish, áádóó dabizhé'é yę́ę kéyah baa diní'áanii nahwé'éshniihgo biih nídahizhdoo'nééł, áádóó éí kéyah náádaahó doo, ní Bóhólníihii.

⁴Áko Bóhólníihii díí saad yee Ízrel dine'é áádóó Júdah dine'é yaa halne'go haadzíí'.

⁵Jó, Bóhólníihii kóní, Diné nitsinákahgo áádóó nídaaldzidgo dasidiits'ą́ą́', áko doo hodéezyéel da.

⁶K'ad na'ídíłkid, áádóó nił bééhoozį́į́', Dinéésh t'áá adoołchííł? Ákoshą' ha'át'íí biniyé asdzání éí awéé' bídii'na' nahalingo diné t'ááłá'í nítínígo biníí' gónaa yik'i dadéesnii'? Áádóó ha'át'éegoshą' t'áá ádzíłtso hanii' deitsxoii?

⁷K'ad índa lą́ą t'áá íiyisí bik'e'íyée'go hoolzhish doo. Hádą́ą'da t'ah doo ákót'éego hodilzhíish da nít'éé'. Jéíkab bich'į' nahwii'náago hoolzhish doo, nidi bits'ą́ą́dóó yisdábidi'dooltééł.

⁸T'áá ałtsoní bee Bóhólníihii ání, Éí baa hoolzhiizhdi hazéédadéetání há dahideeshtihgo bee dah dadziistł'óonii há dahideeshnish, áádóó dé'éyóní doo bá nináádajil'a' da doo,

⁹nidi Bóhólníihii haDiyin God áádóó aláahgo honanit'a'í David há nábiideesįįłgo bá nidajil'a' doo.

¹⁰Bóhólníihii ání, Éí bąą shá naal'a'í nílíinii Jéíkab, t'áadoo náníldzidí, índa Ízrel dine'é nohłíinii, t'áadoo nitsidaohkaí, háálá doo deeghánídę́ę́' yisdánánihideesh'nił, áádóó niha'áłchíní éí kéyah yii' yisnááh danilį́į́dę́ę́' yisdádeeshnił, áádóó Jéíkab nídoodáałgo bił hodéezyéelgo hanályį́įh doo, índa ła'da doo bił yéé' ánáhodoodlíił da, jó'akon.

¹¹Bóhólníihii ání, Jó, yisdánídeeshtééł biniyé nił honishłǫ́. Ał'ąą dine'é bitahgóó adanihinííłkaadii éí ałtso ádeeshdįįł, nidi doo ałtso ánihideeshdįįł da: doo haada yit'éii bee hasht'éénihideeshdlííł, áádóó t'áá ánóht'é atínánihiish'įįh doo.

¹²Bóhólníihii kóní, Shíníltłishígi doo náodziihígi át'ée da; t'áadoo asohodoobézhígóó tídéínínáá lá.

¹³Bee nąąh dahaz'ánígíí biniyé t'áadoo ná ná'ookąąhí da. Tídinidzaaígíí azee' bá ádin, áko bee nídíídzihii ádin.

¹⁴Diné bił ałch'į' ádant'íinii t'áá ałtso naa dayooznah; doo há dandéez'į́į' da. Ádił ni'iyílzíhígíí t' óó ahayóí silį́į́' biniinaa áádóó t'áá íiyisí doo ákwii ánít'ínígíí biniinaa ana'í doo yits'íidii nánineestsasgo tídinidzaago ániilaaígi át'éego tídéínínáago ániishłaa.

¹⁵Ha'át'íísh biniyé nínígaígíí biniinaa nicha? Nił honeezgaígíí doo náodziihígi át'ée da. Doo ákwii ánít'ínígíí índa ádił ni'iyínílzí'ígíí t'óó ahayóí silį́į́' biniinaa kóniishłaa.

¹⁶Éí bąą danihoolghalii éí t'áá ałtso dabidi'doolghał. Ni'ana'í t'áá ałtso t'ááłá'í nítínígo yisnááh dadooleeł; nihighada'iisdláii éí bigháádahidoo'nił. Dandoolghał biniyé nidaniniłchéii éí dadíílghał biniyé naa dideesh'ááł.

¹⁷Bóhólníihii kóní, Záíyan ła'da doo biniizį́į'ii át'į́, daaníigo t'óó ch'éheelghanii yee daníizhi'ígíí biniinaa doo nąąh tééhgóó ánándeeshdlííł áádóó tídadinilyaa yę́ęgóó nánídadeesdzih.

¹⁸Bóhólníihii kóní, Jó, Jéíkab yisnááh nilíinii nahjį' kódeeshłíiłgo biníbaal yii' kééhat'į́į́ nít'éé' yę́ęgóó bił nídeesht'ashgo baa a'ááh dínéesįįł áádóó t'áá bikints'iil yanáa'áá nít'éé' yę́ęgi kin haal'áago áńdoolnííł índa aláahgo naat'áanii bikin t'áá si'ą́ą́ nít'éé' yę́ęgi si'ą́ą doo.

¹⁹Éí bii'dę́ę́' ahééh hasinjí sin áádóó bił dahózhǫ́ǫgo dahataałii biinéé' dadiits'a' doo. Ízrel dine'é k'ee'ąą noot'į́įłgo ádeeshłííł áádóó doo t'áá díkwíí da doo índa diné bił dajílį́įgo áhodeeshłíiłgo doo a'ohgo ádajít'ée da doo.

²⁰Ba'áłchíní éí ałk'idą́ą́' bada'áłchíní yę́ęgi ádaat'ée doo. Ahínéikahígíí éí shinááł bidziilgo ádoolnííł. Bide ádahósinii t'áá ałtso atídaash'į́į doo.

²¹Bitahdóó éí ła' naat'áanii nilį́į doo. Bitahdóó éí bá nant'áago binanit'a'í nilį́į dooleełii nídidoodááł. Shą́ą́h níhánígóó ninájídáahgo áhásh'į́į doo áádóó shaa jiigháah doo. Háishą' éí niná'ídidoot'áałgo shaa doogááł? ní Bóhólníihii.

²²Áádóó nihiDiyin God nishłį́įgo shidine'é nohłį́į doo.

²³Shoo, níyoltsoh t'áá íiyisí t'óó bik'e'íyé'ígi át'éego éí Bóhólníihii t'óó báhádzidgo báhóóchįįdígíí niheeldoh. Éí nááts'ó'oołdísiitsoh t'áá íiyisí t'óó bik'e'íyé'ígi át'éego diné doo yá'ájíshóonii hak'i ch'ídoogááł.

²⁴Bóhólníihii bijéí bii'di yaa nitsíkeesii ałtso yi'iilaago áádóó yinaashnishjį', índa t'áá íiyisí bik'e'íyée'go Bóhólníihii báhóóchįįdę́ę baa náhodoodleeł. Akée'di yoołkáałdi índa díí bik'idadi'doohtį́į́ł.