Read Navajo JEREMIAH 31 Bible Online

JEREMIAH 31 - Navajo bible

JEREMIAH 31

¹Éí hoolzhishdi Ízrel dine'é ba'áłchíní dah deí'éeshii t'áá ałtso biDiyin God nishłį́į doo, áádóó shidine'é danilį́į doo, ní Bóhólníihii.

²Bóhólníihii kóní, Ízrel dine'é háádadoolyįhgo bee hooł'a' yę́ędą́ą́' éí diltłish yits'ąą daadzíi'go honoojíidi baa hojoosba'.

³Bóhólníihii doo deeghánídę́ę́' shich'į' yit'íní í'diilyaago kóní, T'áá aaníí, hool'áágóó bee ayóó'ó'ó'níinii bee ayóó'áníínísh'ní, éí bąą aa a'ááh hasinii bee ádích'į' nidédzį́į́z.

⁴Ízrel ch'ikę́ę́h nílíinii, hadaałt'é ánándeeshdlíiłgo hadaníłt'ée doo. Ásaa' yilghaałígíí nídidíí'áałgo diné bił dahózhǫ́ǫgo ádeile'ii bitahjį' ch'íhínáahgo ílzhish doo.

⁵Samériya kéyahdi dził daní'áhígíí bighą́ą́'góó ch'il na'atł'o'ii k'ináádadidoohdlééł. K'ééda'didléehii éí k'ida'didooléełgo nídeineest'áanii łikango deiyą́ą doo.

⁶Háálá ła'a jį́ léi' Íífreiyim kéyahdi dayílk'id bighą́ą́'dóó háda'ídées'į́'í kódaaníigo dadilwosh doo, Sołtį', nihiDiyin God Bóhólníihii éí Dził Záíyan bich'į' hadiikah.

⁷Jó, Bóhólníihii kóní, Nihił dahózhǫ́ǫgo Jéíkab bá dahohtaał, áádóó ał'ąą dine'é aláahgo ádaat'éii bitahdóó dadołwosh. Baa dahołne', baa dahohniihgo ádadohní, Bóhólníihii nílíinii, nidine'é ch'éékaígíí yisdánínííł.

⁸Jó, náhookǫs kéyahdę́ę́' áádóó kéyah nidahonees'ą́ą́dę́ę́' áłah ánáhodeeshdlííł. Doo da'oo'íinii áádóó nida'niłhodii áádóó asdzání daaltsáanii índa awéé' bídadii'na'ii t'áá hoł ayóó ázhnéelą́ą'go nináhizhdoo'nééł.

⁹Atíndadindleehgo nináhidookah, áádóó nída'ookąąhgo yish'ish doo. Tooh danílíinii bibąąhgóó k'éhézdon atiingóó anídahodiyeeshkah. Ákwe'é doo dazhdidoogoh da, háálá Ízrel dine'é bizhé'é nishłį́, áádóó Íífreiyim éí alą́ąjį' shá yizhchį́.

¹⁰Ał'ąą dine'é danohłíinii, Bóhólníihii áníinii dadoohts'į́į́h; nízaadi tábąąhgóó kédaayahgóó nidahołne'go kódadohní, Ízrel dine'é tainooskaadii éí t'áá bí áłah ánéidoodlííł, áádóó dibé yaa áhályáanii bidibé yaa áhályánígi át'éego haa áhályą́ą doo,

¹¹háálá Bóhólníihii éí Jéíkab yik'é na'níláago hááyííłtį́, áko yik'é na'níláago Jéíkab yilááh ábóodziilii yílák'eedóó hááyííłtį́.

¹²Áádóó nídoo'néełgo Dził Záíyan bighą́ą́'dóó yéego dahataał doo. Álástsii' áádóó wáin ániidíii áádóó áliv bik'ah áádóó dibé yázhí índa béégashii yáázh éí Bóhólníihii yee joozba'ii yich'į' diné ílį́į doo. Dá'ák'eh hayázhí tó bił adaazlínígi át'éego dahináa doo, áádóó ts'ídá doo yínííł náádanidlį́į da doo.

¹³Áko índa ch'ikéí áádóó tsíłkéí índa hastóí danilíinii da'alzhishgo bił nidahoozhǫǫh doo. Yínííł danilíinii bił dahózhǫ́ǫgo áńdadeeshdlííł, áádóó hada'ólníigo áńdadeeshdlííł índa yínííł danilíinii yaa dáádiikaigo bił nidahoozhǫǫhgo ádeeshłííł.

¹⁴Nááda'iiłniihii bii' naazíinii éí yá'ádaat'éehii t'áá ałtso bee bik'idajishdlíi doo, áádóó shidine'é éí bee jiinishba'ígíí bił daahwiih doo, ní Bóhólníihii.

¹⁵Bóhólníihii kóní, Réímah kin haal'áagi iinéé' diists'ą́ą́'. Yínííł yee chanahałe'go áádóó ayóó át'éego atínídindleeh. Réíchel ba'áłchíní náás ahoolchíiłii yaa yicha, ba'áłchíní biniinaa habidi'yoolníhígíí doo yinízin da, háálá éí ábi'disdįįd.

¹⁶Bóhólníihii kóní, K'ad t'áadoo nichaaí; ninák'eeto' niłdééh baa nisíníyáhígíí bik'é na'doolyééł, áádóó na'áłchíní éí ana'í tahdę́ę́' nináhidookah, ní Bóhólníihii.

¹⁷Náásgóó chohoo'į́ ná hólǫ́, áádóó na'áłchíní t'áá bí bikéyah yiih náhidookah, ní Bóhólníihii.

¹⁸Íífreiyim di'níigo diséts'ą́ą́', Béégashii yáázh doo yízhǫǫdii nahonishłingo nashinínítą́ą́', áko nashidi'neestą́ą́'. Naanáshíleeh, áko naanáshi'disdlóoz doo, háálá Bóhólníihii shiDiyin God nílį́.

¹⁹T'áá aaníí, naanáshi'deedlóózdóó bik'ijį' łahgo át'éego tsíńdíkééz. Nashinínítą́ą́'dóó bik'ijį' shitsosk'id nídííkaad. Ániid naasháádą́ą́' t'óó baa yáhásinígi áát'įįdii biniinaa shił hóóląąd áádóó yániizį́į́'.

²⁰T'áá aaníí Íífreiyim éí shiye' ayóó'ósh'níinii nilį́. She'awéé' hánígo óósh'níinii nilį́. T'áá bik'ijį' yáshti' nít'éé', nidi t'ahdii bénáshniih, éí bąą shijéí t'áá íiyisí bee hádin nishłį́, áádóó t'áá aaníí haa a'ááh dínéesįįł, ní Bóhólníihii.

²¹T'áá nihí ádá dah na'aztą́ągo ádaohłe'. Bik'ehgo nináhidoohkahígíí adaaz'áago ádaohłe'. Atiin bits'ánohkai yę́ę éí hazhó'ó hadadoosił. Ízrel dine'é ch'ikę́ę́h nílíinii, nánídááh; díí kin hadaas'áhíjį' nánídááh.

²²Shitsi' t'ą́ą́' anáhítłíishii nílíinii, haash nízahgóó tádínáah doo? Bóhólníihii nihokáa'gi t'ah doo ííléehii ániidíii ánááyiidlaa: éí asdzání ła' diné bidádínóolniił biniyé yikéé' nahaadá.

²³Ízrel dine'é biDiyin God t'áá ałtsoní bee Bóhólníihii kóní, Yisnááhdę́ę́' náhoní'eezhgo, Júdah kéyahgi áádóó ákwe'é kin hadaas'áágóó, t'áá ákogi át'éego bił haz'áanii, dził nił hodiyingo haz'áanii nílíinii, Bóhólníihii nik'ijidlíi doo, nááhá'níi doo.

²⁴Áádóó Júdah kéyahgi índa kin hadaas'áágóó t'áá át'é k'ééda'didléehii índa dibé yaa ádahalyáanii t'áá ła' kéédahat'į́į doo.

²⁵Háálá nídadínéeskaii t'áá ałtso hwiih danilį́įgo ádadeeshłííł, áádóó bąąh nidahwiizkaadii t'áá ałtso chánah áńdadeeshdliił.

²⁶Áádóó bik'ijį' ch'éénísdzidgo déé'į́į́' nít'éé' nizhónígo iiłhaazh lá.

²⁷Bóhólníihii kóní, Ízrel dine'é índa Júdah dine'é ahii' háá'ahoolchíiłgo ádeeshłíłígíí bich'į' yoołkááł; diné áádóó naaldlooshii k'ee'ąą noot'į́įłgo ádeeshłííł, jó'akon.

²⁸Áádóó hahwíísidgo nahjį' hahóónilígíí áádóó ádajiilaii nehéti'ígíí áádóó hak'eh déshdlį́'ígíí áádóó nehéłchǫ'ígíí índa atídahooshłaaígíigi át'éego t'áá ákót'éego hahasíidgo dahadziilgo áádóó k'éédazhdidoodléełgo áhodeeshłííł, ní Bóhólníihii.

²⁹Éí yoołkáałdi éí, Azhé'é danilíinii ch'il na' atł'o'ii dadík'ǫ́ǫzhii dayííyą́ą́', áádóó áłchíní éí biwoo' deideestseed, doo nááhá'níi da doo.

³⁰Nidi t'ááłá'í jinítínígo t'áá hó ádił nida'dziisíi'ii bik'ee dazhdínóonééł. Diné t'ááłá'í jinítínígo ch'il na'atł'o'ii dadík'ǫ́ǫzhii jííyą́'ígíí éí t'áá hó hawoo' deideestseed doo.

³¹Ízrel dine'é áádóó Júdah dine'é bił ahadadi'deesht'áałii ániidígíí bich'į' yoołkááł, jó'akon, ní Bóhólníihii.

³²Dabizhé'é yę́ę dabíla' deíníshtą'go Ííjip kéyahdę́ę́' ch'íní'eezh yę́ędą́ą́' bił ahada'dinisht'áanii éí doo bik'ehgo da. Azhą́ hahastiin nishłį́į nidi, éí hoł ahada'dinisht'áanii k'ídadzizti', ní Bóhólníihii,

³³nidi éí yoołkáałdi kót'éego Ízrel dine'é hoł ahada'dideesht'ááł. Shibee haz'áanii hwiih dadeeshłééł, áádóó hajéí bikáa'gi bee bik'ida'deeshchííł, áádóó shidine'é dajílį́į doo, índa haDiyin God nishłį́į doo, ní Bóhólníihii.

³⁴Áko diné t'áá ałtso, Bóhólníihii bééhonísįįh, daaníigo yił kéédahat'íinii doo nináádeintin da doo, índa bik'is doo nináádeintin da doo, háálá a'ohgo ádaat'éédóó ayóó ádaat'éejį' t'áá ałtso shéédahósin doo, háálá doo ákǫ́ǫ́ ádajíít'įįdii há yóó'adahidideesh'ááł, áádóó ádił nidadziisíi'ii doo há béénáshniih da doo, ní Bóhólníihii.

³⁵Háálá Bóhólníihii kóní, Jį́įgo bee adinídíin dooleełii háá'át'áahgo áyósinii, áádóó tł'ée'go bee dahool'in dooleeł biniyé ooljéé' áádóó sǫ' nídadikahgo áyósinii, índa tónteel yił hááhoniłcha'go yilk'oołígíí dadiits'a'go áyósinii, éí t'áá ałtsoní bee Bóhólníihii wolyé.

³⁶Ákóhooníłígíí shidááhdóó shits'ą́ąjį' dah dahodiile'go Ízrel dine'é ałdó' shidáahgi dine'é doo náájídlį́į́góó ahool'áa doo.

³⁷Bóhólníihii kóní, Bóhonee'ą́ągo wódahdi yádiłhił bí'néél'ąądgo áádóó bóhonee'ą́ągo nahasdzáán bee niłdzilgo si'áanii naaskáá' ládą́ą́', áadi índa lą́ą Ízrel dine'é baa nidadziskaii biniinaa ha'áłchíní ałtso yóó'ahideeshkał ni, ní Bóhólníihii.

³⁸Bóhólníihii ání, Jó, beidoołkááł Hanániyel bikin yaa'áádóó naaná'ástł'inígíí bíighahgi dáń'dítį́híjį' Bóhólníihii bá kin haal'áago ádoolnííł.

³⁹Áádóó tł'óół bee í'neel'ąąhí éí t'áá náás dooldił índa Géíreb dah yisk'idjį' t'áá k'éhézdon nít'i'go ádoolnííł, éí áádóó índa naanázt'i'go Góyath dah yisk'idjį' íít'i' doo.

⁴⁰Yíldzisdi t'áá át'é ats'íís daneeznáago shijé'ígíí áádóó łeeshch'iih naazhjaa'ígíí áádóó Kídran tó níłts'ą'íjį' nahós'a'ígíí t'áá át'é índa ha'a'aahjigo łį́į́' bidáń'dítį́hí bíighahjį' Bóhólníihii bá hodiyingo haz'ą́ą doo. Hool'áágóó doo nahjį' kódoolníił da, áádóó doo nááhodoolchxǫǫł da.