Read Navajo JEREMIAH 32 Bible Online

JEREMIAH 32 - Navajo bible

JEREMIAH 32

¹Nébukadnézzar éí Bábilan dine'é aláahgo yinant'áago tseebííts'áadah náhááh góne' áádóó Zedekáíyah éí Júdah dine'é aláahgo yinant'áago neeznáá náhááh góne' Jeremáíyah éí Bóhólníihii bich'į' hanáánáádzíí'.

²Áko íídą́ą́' Bábilan dine'é aláahgo yinanit'a'í nilíinii bisiláo Jerúsalem kin haal'á yináshzhiizhgo t'áá ákǫ́ǫ́ nidahaazná, áádóó Júdah dine'é aláahgo yinanit'a'í nilíinii bighangi awáalyaa bich'éédą́ą́' góne' Jeremáíyah bidá'deelkaal.

³Háálá Júdah dine'é aláahgo yinanit'a'í Zedekáíyah hadádi'níłkaalgo kóní, Ha'át'íishą' biniyé kódíníigo díí hólne'? Bóhólníihii kóní, Shoo, Bábilan dine'é aláahgo yinanit'a'í díí kin haal'áhígíí baa dideesh'áałgo yidoołnééł,

⁴áko Zedekáíyah éí Kaldíya dine'é ts'ídá doo bílák'ee hazhdoogáał da, nidi Bábilan dine'é aláahgo yinanit'a'í ts'ídá t'áá aaníí baa hodi'doot'ááł, áádóó éí ahizhníl'į́įgo saad ałch'į' ahizhdoo'nił,

⁵áádóó Zedekáíyah éí Bábilan kéyahgóó iidoolóós, áádóó haa nanítą́ą'jį' áadi dzizdáa doo. Azhą́ Kaldíya dine'é bił da'ahohgą́ą nidi, doo bik'eh dadidoohdleeł da, ní Bóhólníihii.

⁶Ákohgo Jeremáíyah ánáádoo'niid, Bóhólníihii shich'į' hanáánáádzíi'go kóní,

⁷Jó, nidá'í Shálam éí biye' Hanámiyel, Ánathath kin haal'áadi shikéyahígíí shaa nahíłniih, háálá ni nahidííłnihgo áłtsé bee ná haz'ą́, níigo naa doogááł.

⁸Nít'éé' shidá'í biye' Hanámiyel éí Bóhólníihii bizaad k'ehgo awáalyaa bich'éédą́ą'gi shaa níyá, áádóó áshidííniid, Bénjamin bikéyahdi Ánathath hoolyéedi shikéyahígíí shaa nahíłniih, háálá nahidííłnihgo níí' dooleełígíí bee ná haz'ą́, áko ádá nahíłniih. Áadi índa díí Bóhólníihii ádííniidii shił bééhoozin.

⁹Áko Ánathathdi kéyahígíí shidá'í biye' Hanámiyel baa naháłnii'. Áko béésh łigaii shékel wolyéii tsosts'idts'áadah bíighahgo bá dah dahidiilo'go baa nínil.

¹⁰Áádóó kéyah nahaaznii'go bee bééhózinii bee dah dzoołtsos dooleełígíí éí shízhi' bikáá' áshłaa, áádóó bídiiłjéé' índa oo'íinii hágo dabidííniidgo bee dah nídiidlohí bee béeso há dah dahidiilo'.

¹¹Índa na'iiznii'go bee bééhózinii bee haz'áanii bi'é'él'į' bik'ehgo dá'deeljé'ígíí áádóó ła' doo dá'deeljé'ígíí dah diijaa'go

¹²shidá'í biye' Hanámiyel áádóó oo'íinii éí na'iiznii'go bízhi' yikáá' ádayiilaii índa Jew dine'é t'áá ałtso éí awáalyaa bich'éédą́ą́' góne' naháaztą́ągo dabinááł Méíyasíyah biye' Niiráíyah biye' Bérak éí kéyah nahaaznii'go naaltsoos bee dahiltsos dooleełii baa nínil.

¹³Áádóó dabinááł Bérak bich'į' haasdzíi'go kódíshní,

¹⁴Ízrel dine'é biDiyin God t'áá ałtsoní bee Bóhólníihii kóní, Kéyah nahaaznii'ígíí bee ééhózinii dá'deeljé'ígíí áádóó ła' doo dá'deeljé'ígíí t'áá áłah nídiinííł, áko nízaadgóó didoonaał biniyé hashtł'ish ásaa' biih dííniłgo ákóne' sinil doo.

¹⁵Háálá Ízrel dine'é biDiyin God t'áá ałtsoní bee Bóhólníihii kóní, Kin áádóó kédaayah índa ch'il na'atł'o'ii k'éédadilyééhgóó éí díí kéyah bii' ninádahaniih doo.

¹⁶Kéyah nahaaznii'go bee bééhózinii Niiráíyah biye' Bérak baa níłtsoozgo Bóhólníihii bich'į' sodeeszingo kódíshní,

¹⁷Bóhólníihii Diyin God nílíinii! Ha'át'íí lá ahayóí lá! Ayóó ánóodziilgo índa k'ídíínílnii'go yádił hił índa nahasdzáán íinilaa. Ts'ídá t'áadoo nániłdzilí da.

¹⁸Éí daashíínéelą́ą'di mííl bíighahgo baa a'ááh nínízin, áádóó da'azhé'é doo ákwii ádáát'įįdii bik'é bikéédę́ę́' bada'áłchíní hanínáánoot'áanii k'éédadídlééh. Ayóó'át'éii, Diyin God Ayóó'ábóodziilii éí t'áá ałtsoní bee Bóhólníihii wolyé.

¹⁹Éí t'áadoo beełt'éhígóó kót'éego níinii ayóó át'é áádóó ayóó át'éego naalnish. Jó, nihokáá' dine'é bee ádajít'éii yoo'į́, áádóó t'ááłá'í jinítínígo bee ájít'éii índa baa nijigháii bits'ą́ą́dóó bineest'ą' bik'ehgo hach'į' nidi'yoolééł.

²⁰Éí Ííjip kéyahdi áádóó díí jį́įjį' Ízrel dine'é bitahgóó índa náánáła' dadine'é bitahgóó bee éédahózinii áádóó t'óó bik'e'ayóigo ádahooníiłii yaa naayá. Áko díí jį́ át'éhígi át'éego nízhi' bee ch'índit'áahgo í'diinilyaa,

²¹índa bee éédahózinii bee áádóó t'óó bik'e'ayóigo ádahooníiłii bee áádóó ayóó ánóodziilígíí bee áádóó k'ídíínílnii'ígíí bee índa ayóó át'éego ayahodíníłhizígíí bee nidine'é Ízrel éí Ííjip kéyahdę́ę́' ch'ííní'eezh,

²²áko díí kéyah éí kéyahgi abe' áádóó tsés'ná bitł'izh bee áda'azįįdgo baa dííní'ą́, éí t'áá bítséedi dabizhé'é yę́ę daabíí' dooleełgo bich'į' ádee hadíínídzíí',

²³áádóó kéyah yiih yínáago daabíí' daazlį́į́', nidi ádíníinii índa nibee haz'áanii t'áadoo yik'eh dahóół'įįd da. Kót'éego dahinohná, bidiníigo bee bich'į' hahíínídzí'ígíí éí t'áadoo yida'iilaa da; éí bąą díí doo yá'áshóonii t'áá át'é bik'i yéinitsih.

²⁴Shoo, kin haal'áhígíí deidoołnééł biniyé áajį' hídeilk'idgo ádayiilaa, áko diltłish áádóó hodííchįįdígíí índa naałniih biniinaa Kaldíya dine'é éí kin haal'áhígíí anadeił'į́įgo yik'eh didoodleełgo baa deet'ą́. Bee hahínídzíi'ii bohoolyaa. Éí yíní'į́, jó'akon.

²⁵Áádóó Diyin God Bóhólníihii nílíinii, áshidííníniid, Azhą́ kin haal'áhígíí Kaldíya dine'é baa deet'ą́ą nidi, oo'íinii ła' nídiiníiłgo kéyahígíí béeso bik'é aniníiłgo nahíłniih.

²⁶Bóhólníihii éí Jeremáíyah yich'į' hanáánáádzíi'go kóní,

²⁷Jó, ats'íís nináneel'ą́ąjį' biDiyin God Bóhólníihii nishłį́. T'áadoo le'éésh shá niłdzil?

²⁸Éí bąą Bóhólníihii kóní, Díí kin haal'áhígíí éí Kaldíya dine'é índa Bábilan aláahgo binanit'a'í Nébukadnézzar baa dideesh'áałgo yidoołnééł, jó'akon.

²⁹Kaldíya dine'é díí kin haal'áhígíí yik'ijį' anadeił'į́įgo áajį' dah didoojahgo yidahodidooniłgo deididoołił. Yee shá dahodoołchįįłgo kin bighą́ą́'góó diyin dabidi'níinii bich'į' yanáadzi'go nááhániihii yadayiinilii áádóó didlidgo nááhániihii Béíyal yich'į' náádayiiłniihii éí t'áá bił ałtso deididoołił.

³⁰Jó, Ízrel dine'é áádóó Júdah dine'é t'áá áłchíní danilį́į́dę́ę́' shich'į' doo yá'áshónígi t'éí ádáát'įįd, áko Ízrel dine'é yaa nidaaskaígíí t'éiyá yee shánídahałchįįh nít'éé', ní Bóhólníihii.

³¹Jó, díí kin haal'áhígíí t'óó nii'nil yę́ędóó díí jį́įjį' ákwii kéédahat'ínígíí shánídahałchįįhgo t'óó báhádzidígi át'éego bee atí'ésh'íinii hayiyííłtah, áko doo nísh'į́į da doo biniyé nahjį' kódeeshłííł.

³²Ízrel dine'é áádóó Júdah dine'é éí aláahgo bindanit'a'í áádóó binaat'áanii danilíinii áádóó binááda'iiłniihii áádóó áhodoonííł yaa dahalne'ii áádóó Júdah dine'é danilíinii índa Jerúsalemgi kéédahat'íinii doo yá'áshónígi ádajíít'įįdígíí t'áá át'é bee shádahojííłchįįdígíí biniinaa nahjį' kóhodeeshłííł.

³³Azhą́ abíínídą́ą́' náádiish'nahgo nináníshtįįh nidi, t'áadoo deidiizts'ą́ą́'góó bínabinishtinígíí t' áadoo nídeidiiláa da, áko shits'ą́ąjį' neezhjée'go doo náádashiníł'į́į da.

³⁴Nidi kin shízhi' bee wójíhígíí biyi' góne' doo daldinii daabíhígíí dayiisį'go yee dahóółchǫ'.

³⁵Áádóó biye'ké índa bitsi'ké éí Mólek be'elyaii yich'į' kǫ' biyi' góne' ch'ídayiinííł dooleeł biniyé Hínam biye' biyíldzisgi Béíyal bá ninádahałaah doo biniyé wódah nahaz'ą́ągo ádayiilaa. Júdah dine'é, Díí doo haldinii yee ádił da'asiihígíí ádadoohłííł, t'áadoo bidííniid da áádóó t'áadoo bik'ísídíkéez da.

³⁶Éí bąą díí kin haal'áhígíí baa yáníłti'go ádííníniid yę́ę k'ad Ízrel dine'é biDiyin God Bóhólníihii yaa yáłti'go kóní, Diltłish bee áádóó hodidoochįįłígíí bee índa naałniih bee éí Bábilan dine'é aláahgo binanit'a'í baa didoot'ááł.

³⁷Jó, sháhóóchįįdgo áádóó t'áá íiyisí doo shił náhodiizhǫǫdgóó índa t'óó báhádzidgo sháhóóchįįdgo kéyah biyi'góó tahonéłkaadígóó áádę́ę́' áłah ánáhodeeshdlííł, jó'akon. Kojį' áłah ánáhodeeshdlíiłgo hasih haz'ą́ągo kéénáhojit'į́į doo,

³⁸áko shidine'é danilį́į doo, áádóó biDiyin God nishłį́į doo.

³⁹Há yá'át'éeh dooleeł áádóó hakéédę́ę́' ha'áłchíní bá yá'át'éeh dooleeł índa dashizdósin dooleeł biniyé t'ááłá'í nitsáhákees índa t'ááłá'í honít'i'ii hool'áágóó haa dideesh'ááł,

⁴⁰áko éí há yá'át'ééh ádeeshłííł biniyé doo hats'ádeesháłígíí hool'áágóó bee hoł ahadideesht'ááł índa doo shits'ádahizhdookah da biniyé dashizdósin doogo hajéí biih dadeeshłééł.

⁴¹T'áá aaníí yá'át'éehii há baa naasháago hąąh shił nihoozhǫǫh doo, áádóó shijéí t'áá át'é bee índa shii' sizíinii t'áá át'é bee ts'ídá t'áá aaníí díí kéyahgi k'ééhodideeshdlééł.

⁴²Jó, Bóhólníihii kóní, Díí dine'é kwe'é kééhat'ínígíí díí ayóó át'éego doo yá'áshóonii t'áá át'é bik'i yanáatsiígi át'éego t'áá ákót'éego yá'ádaat'éehii haa diní'ánígíí éí hak'i yéideestsih.

⁴³Kédaayahgi diné índa naaldlooshii doo ła' bikáá' hólǫ́ǫ da, áádóó Kaldíya dine'é baa deet'ą́, dadohníinii ákwe'é kéyah nináádahaniih doo.

⁴⁴Kédaayah béeso bik'é ahee' níiłgo nináádahaniih doo. Da'oo'íinii binááł kéyah nidahaniihgo bee bééhózinii éí hanáádadilne'go dánááda'diljeeh doo. Bénjamin bikéyahgi, Jerúsalem kin haal'á bik'i dinaago nahós'a'gi ákwe'é ákót'ée doo. Júdah kéyahgi kin hadaas'áágóó áádóó dayílk'idgóó kin hadaas'áhígóó ákódaat'ée doo. Honíteelgi kin hadaas'áágóó áádóó shádi'áahjigo kin hadaas'áágóó ałdó', háálá yisnááh dajílíinii nahjį' kódeeshłíiłgo daahwíí' yę́ę hwíí' nídadoodleełgo ádeeshłííł, ní Bóhólníihii.