Read Navajo JEREMIAH 34 Bible Online

JEREMIAH 34 - Navajo bible

JEREMIAH 34

¹Bábilan dine'é aláahgo binanit'a'í Nébukadnézzar áádóó bisiláo dah yinéełii t'áá ałtso áádóó ał'ąą dine'é dah deínéehgo bee bóhólníihgo bił nahaz'áanii t'áá ałtso, áádóó dadine'é danilíinii t'áá ałtso éí Jerúsalem áádóó binaagóó kin hadaas'áhígíí t'áá át'é yił da'ahigą́ yę́ędą́ą́' Bóhólníihii kót'éego Jeremáíyah yich'į' haadzíí',

²Ízrel dine'é biDiyin God Bóhólníihii kóní, Nílááh, Júdah dine'é aláahgo binanit'a'í Zedekáíyah bich'į' handziihgo kóbidiní, Bóhólníihii kóní, Díí kin haal'áhígíí Bábilan dine'é aláahgo binanit'a'í baa dideesh'áałgo yihodidooniłgo iididoołk'ą́ą́ł,

³áádóó éí doo bílák'ee hadíínáał da, nidi t'áá aaníí nił nidadoodiłgo yaa dandidoo'ááł. Bábilan dine'é aláahgo binanit'a'í bił ahiníníl'į́įgo bił ahił hodíílnih áádóó Bábilangóó díínááł.

⁴Júdah dine'é aláahgo binanit'a'í nílíinii, Zedekáíyah nidi'níinii, Bóhólníihii bizaad t'ah yíníłts'ą́ą́', Diltłish bee doo dadíítsaał da, níigo Bóhólníihii naa haadzíí';

⁵hasht'edíínít'éego dadíítsaał, áádóó danizhé'é t'áá nítséedi aláahgo naat'áanii daazlį́į́' yę́ę éí łikání dahalchinii bá dadoodlidígi át'éego ni ałdó' łikání dahalchinii ná deididoołił, áádóó naa yínííł danilį́įgo atínídadindleehgo kódaaníi doo, K'ad índa lą́ą bóhólníihii, díí lá saad bee haasdzíi' ni, ní Bóhólníihii.

⁶Áádóó Jerúsalemgi Jeremáíyah éí Júdah dine'é aláahgo yinanit'a'í Zedekáíyah díí saad t'áá át'é yee yich'į' haadzíi'go,

⁷Bábilan dine'é aláahgo binanit'a'í bisiláo dah yinéłígíí éí Jerúsalem áádóó Júdah kéyahgi kin hadaas'á, t'áá éí Léíkish áádóó Azííkah kin hadaas'á ditą́ągo binaa ahééda'astł'inii daadziihígíí yił da'ahoogą́ą́'.

⁸Áko aláahgo naat'áanii Zedekáíyah éí diné Jerúsalemgi kéédahat'ínígíí nihéédadidoochił, yididooniił biniyé yił aha'deet'ą́ą́dóó bik'ijį' Bóhólníihii éí Jeremáíyah yich'į' haadzíí'.

⁹Íídą́ą́' t'ááłá'í jinítínígo Hííbrew diné hanaalte' índa Hííbrew asdzání hanaalte' danilíinii béédazhdidoochił, ákót'éego hak'is Jew dine'é nilíinii doo hanaalte' ázhdoolíił da.

¹⁰Áko t'ááłá'í jinítínígo diné hanaalte' índa asdzání hanaalte' béédazhdidoochiłgo bee aha'deet'áanii hoł t'áá da'ákohígíí naat'áanii dajílíinii áádóó diné t'áá ałtso ak'eh dahojííł'įįd.

¹¹Áádóó bik'ijį' łahgo át'éego tsíńdadeezkéezgo diné naalte' índa asdzání naalte' danilį́įgo béédazhdeezhchidii naalte' ánáádajiidlaa, áádóó hanaalte' danilį́įgo hak'eh dahół'į́įgo ánáádajiidlaa.

¹²Ákohgo índa Bóhólníihii éí Jeremáíyah yich'į hanáánáádzíi'go kóní,

¹³Ízrel dine'é biDiyin God Bóhólníihii kóní, Danihizhé'é yę́ę Ííjip kéyahdę́ę́' ch'éénísh'nilgo naalte' danilį́įgo kééhat'į́į́ nít'éé' yę́ędę́ę́' ch'éénísh'nilgo bił ahada'dinisht'ą́ągo kódíshní,

¹⁴Ííshją́ą́ tsosts'id nááhaigo t'ááłá'í nootínígo Hííbrew diné nihinaalte' nilį́į dooleeł biniyé nihich'į' nidahaaznii'ii éí nihá nidaalnishgo hastą́ą́h nááhaigo béédadidoohchił. Danihizhé'é yę́ę t'áadoo shá deidiizts'ą́ą' da, índa t'áadoo nidi yíká da'íists'ą́ą' da.

¹⁵Áko łahgo át'éego tsíńdadookéezgo t'ááłá'í nootínígo nihił kééhat'íinii doo nihinaalte' nilį́į da dooleeł, dadohníigo shinááł t'áá ákogi ádaot'įįd áádóó ałdó' kin shízhi' bee wójíigo si'ánígíí bii' góne' shił ahada'dinooht'ą́,

¹⁶nidi t'ááłá'í nootínígo diné nihinaalte' índa asdzání nihinaalte' danilį́į́ nít'éé' yę́ę shónídeisołt'e'go nihinaalte' áńdaohdlaago shits'ą́ąjį' noojée'go shízhi' doo ílį́į́góó ádaohłaa. Éí ádeinízinígíí bik'ehgo béédadoochid nít'éé', nidi k'ad éí nihik'eh náádahół'į́į dooleeł biniyé nihinaalte' ánáádaohdlaa.

¹⁷Éí bąą Bóhólníihii kóní, Diné t'ááłá'í nootínígo nihik'is índa nihił kééhat'íinii k'ad doo naalte' danohłį́į da, dadohníigo t'áadoo dashíísóołts'ą́ą' da. Jó, k'ad diltłish áádóó naałniih índa dichin nihich'į' badahonídlee'go ánihideeshłíiłgo bee nihił hashne'. Nihookáá'góó ał'ąą dine'é kéédahat'į́į́góó aláahgo binanit'a'í dahólǫ́ǫ́góó nihik'ee t'óó bił adahayóigo ánihideeshłííł.

¹⁸Bee aha'deet'áanii shinááł baa nidziskai yę́ę t'áadoo bida'jiilaagóó béégashii yáázh ahádajishgizhgo bita' gónaa ch'ídadziiskai yę́ędą́ą́' shibee aha'deetáanii k'ídadzizti'ígíí kóhodeeshłííł:

¹⁹éí Júdah dine'é bindanit'a'í danilíinii áádóó Jerúsalem kin haal'áádóó naat'áanii danilíinii áádóó yúnak danilíinii áádóó náá'iiłniihii danilíinii índa kéyah t'áá náhwiist'ą́ą́ nít'éé' diné kéédahat'íinii éí béégashii yáázh aháálgizhgo bita' góne' ch'ídadziiskaígíí

²⁰éí hwe'ana'í danilíinii áádóó hazéé'deidoot'įįłgo hádaat'íinii bílák'ee hodideesh'ááł, áko hats'íís daneeznáanii éí tsídii índa nihokáá'góó naaldlooshii dabich'iyą' doo.

²¹Áádóó Júdah dine'é aláahgo binanit'a'í Zedekáíyah índa naat'áanii danilíinii éí ana'í danilíinii áádóó hazéé'deidoot'įįłgo hádaat'íinii índa Bábilan dine'é aláahgo binanit'a'í bisiláo bikéyahgóó anídahaas'náanii baa hodideesh'ááł.

²²Bóhólníihii kóní, Díí kin haal'áajį' nídoo' néełgo bee bich'į' hadeesdzih. Ná'náago kin haal'áagi hoł da'ahidoogą́ą́ł áádóó deidoołnééł índa yidahodidooniłgo adeididoołk'ą́ą́ł, áko Júdah kéyahgi kints'iil t'éí dah naazhjaa'go doo naagháhígóó áhodeeshłííł, jó'akon.