Read Navajo JEREMIAH 35 Bible Online

JEREMIAH 35 - Navajo bible

JEREMIAH 35

¹Josáíyah biye' Jiihóíyakim éí Júdah dine'é aláahgo yinant'áago bíyoołkááłdą́ą́' Bóhólníihii éí Jeremáíyah yich'į' hanáánáádzíi'go kóní,

²Nílááh, Rííkab dine'é bich'į' dínáahgo bich'į' handziih, áádóó nídíí'ishgo Bóhólníihii bikin bii' sohodizin góne' éí łahgo dahooghanígíí biyi' góne' yah adíí'ish, áádóó wáin bitaadííkaałgo deidoodlį́į́ł.

³Áko Habazináíyah biye' Jeremáíyah biye' Jeiyazanáíyah áádóó Habazináíyah bik'isóó danilíinii áádóó éí biye'ké danilíinii índa Rííkab dine'é danilíinii t'áá át'é dah dii'eezh,

⁴áádóó Bóhólníihii bikin bii' sohodizin góne' yah íí'eezhgo Diyin God yá naal'a'í Igdaláíyah biye' Héínan biye'ké danilíinii bighan góne' yah íí'eezh. Éí dáádéesdáhí Shálam biye' Méíyasíyah bighanígíí bikáa'di naat' áanii danilíinii bighanígíí bíighahgóó hooghango ákóne' yah íí'eezh,

⁵áko Rííkab dine'é bidááhgóó wáin tóshjeeh yázhí bii' hadadeezbingo áádóó bee adlání ninínilgo, Wáin daohdlą́, bidííniid.

⁶Nidi hadaasdzíi'go ádadííniid, Wáin éí ts'ídá doo dadiidlį́įł da, háálá Rííkab biye' Jónadab nihizhé'é yę́ę éí, Hool'áágóó wáin ts'ídá doo dadoohdlį́įł da; nihí áádóó nihada'áłchíní hool'áágóó doo deidoodlį́įł da, nihiłníigo yee nihich'į' haadzíí',

⁷índa kin doo ła' ádadoohłíił da, áádóó álástsii' doo ła' adadoohjih da, índa ch'il na'atł'o'ii doo k'idadidoohłéeł da, doo nidi ła' nihee hólǫ́ǫ da doo, nidi kéyah bii' t'óó átsééd kéédahoht'ínígíí éí bii' nízaadgóó dahinohnáa dooleeł biniyé níbaal bii' danihighan doo.

⁸Nihí áádóó nihe'asdzą́ą́ áádóó nihiye'ké índa nihitsi'ké éí Rííkab biye' Jánadab nihizhé'é yę́ę, Anihídayiiską́ąjį' wáin ts'ídá doo ła' doohdlį́įł da, níigo yee nihich'į' haadzíi'ii bik'eh dahosiil'įįd.

⁹Nihikin bii' kéédahwiit'į́į dooleełígíí nidi ádin. Nihich'il na'atł'o'ii doo deíl'áa da. Nihikéyah áádóó álástsii' adoojihígíí nidi nihee ádin.

¹⁰Jánadab nihizhé'é yę́ę, Díí bida'doohłííł, nihiłníigo yee nihich'į' haadzíi'ii t'áá át'é bik'eh dahosiil'įįdgo t'áá ákǫ́ǫ́ ádeiidzaa; níbaal t'éí bii' kéédahwiit'į́.

¹¹Nidi Bábilan dine'é aláahgo binanit'a'í Nébukadnézzar kéyah yaatįįh yínáago ádadii'ní, Sołtį', Kaldíya dine'é bisiláo yinééł, áádóó Síriya dine'é bisiláo yinééł, yíiyá łą́ą. Jerúsalemgóó kįįh dah hidii'nééł, dadii'niidgo díí bąą Jerúsalemgi kéédahwiit'į́.

¹²Ákohgo Bóhólníihii éí Jeremáíyah yich'į' hanáánáádzíi'go kóní,

¹³Ízrel dine'é biDiyin God t'áá ałtsoní bee Bóhólníihii kóní, Nílááh, Júdah dine'é áádóó Jerúsalemgi kéédahat'íinii ábidiní, Shizaad deísółts'ą́ą'go nanihi'dintinígíísh doo danohsin da? ní Bóhólníihii.

¹⁴Rííkab biye' Jánadab éí ba'áłchíní ahoolchíiłii wáin ts'ídá doo dadoohdlį́įł da, yidííniidii yida'iilaa, áko éí díí jį́įjį' t'ah doo ła' deiidlą́ą da, háálá bizhé'é yę́ę hach'į' yee haadzíi'ii yida'iilaa. Ákondi nihí éí t'áá ahą́ą́h nihich'į' yáshti', nidi t'áadoo dashíísóołts'ą́ą' da.

¹⁵Shá dahalne'é t'áá ałtso shá nidaal'a'go t'áá ahą́ą́h nihich'į' ałnáádaash'aahgo ałtso nihich'į' yíł'aadgo kódíshní, T'ááłá'í nohtínígo doo yá'át'éehii baa nidaahkaígíí bits'ą́ąjį' dah nídahidoohkáahgo nánóhkááh, áádóó doo yá'áshónígi ádaoht'ínígíí ni' kódaohłééh, áádóó diyin dabidi'níinii bá nidaoł'a' dooleełgo t'áadoo bikéé' naanánohjahí. Díí bida'oohłaago kéyah nihí dooleełgo índa danihizhé'é yę́ę daabíí' dooleełgo nihaa diní'áanii bii' kééhoht'į́į doo. Nidi dashididoohts'į́į́ł biniyé nihijaa' t'áadoo shich'į'go dadootsi da.

¹⁶Rííkab biye' Jánadab éí ba'áłchíní ahoolchíiłii bizhé'é yę́ę bee bich'į' hadzoodzíi'ii yida'iilaa, nidi díí dine'é t'áadoo dashíists'ą́ą' da.

¹⁷Éí bąą Ízrel dine'é biDiyin God, t'áá ałtsoní bee Bóhólníihii Diyin God éí kóní, Jó, Júdah dine'é índa Jerúsalemgi kéédahat'íinii doo yá'áshǫ' bee bik'ijį' haasdzíi'ii t'áá át'é baa hodideesh'ááł, háálá bich'į' haasdzíi' nidi, t'áadoo dashíists'ą́ą' da; bich'į' ádííniid nidi, t'áadoo shich'į' éédahoosįįd da.

¹⁸Ákohgo Jeremáíyah éí Rííkab dine'é kóyidííniid, Ízrel dine'é biDiyin God t'áá ałtsoní bee Bóhólníihii kóní, Nihizhé'é yę́ę Jánadab yee nihich'į' haadzíi'ii áádóó bik'ehgo iináanii nihá ałkéé' nideiznilii índa yee nihich'į' hahaasdzíi'ii t'áá ałtso bida'oohłaa,

¹⁹éí bąą Ízrel dine'é biDiyin God t'áá ałtsoní bee Bóhólníihii kóní, Rííkab biye' Jánadab éí bits'ą́ą́dóó náás oochíiłii shidááhdóó nídeidzįįh dooleełii ts'ídá doo bídin hóyée' da doo.