Read Navajo JEREMIAH 36 Bible Online

JEREMIAH 36 - Navajo bible

JEREMIAH 36

¹Josáíyah biye' Jiihóíyakim éí Júdah dine'é aláahgo yinant'áago dį́į́' náhááh góne' Bóhólníihii kót'éego Jeremáíyah yich'į' hanáánáádzíi'go ání,

²Josáíyah bíyoołkááł yę́ędą́ą́', t'áá éí bijį́į́ góne' nihich'į' yéíłti' yę́ędą́ą́' áádóó díí jį́įjį' Ízrel dine'é áádóó Júdah dine'é índa ał' ąą dine'é t'áá ałtso bik'ijį' nishłį́įgo naaltsoos yisdisii nídiitįįhgo saad bee haasdzíi'ii t'áá át'é bikáá' ánílééh.

³Júdah dine'é doo yá'áshónígi áhodeeshłíłígíí t'áá át'é éí deidiizts'ą́ą'go doo yá'áshónígi át'éego deíkáhígíí yits'ánáhidookahgo da'át'é. Áko doo ákwii ádáát'įįdii áádóó ádił nida'iisíi'ii bá yóó'adideesh'ááł.

⁴Ákohgo Jeremáíyah éí Niiráíyah biye' Bérak hágo yidííniid, áádóó Bóhólníihii éí Jeremáíyah yee yich'į' hahaasdzíi'ii t'áá át'é Jeremáíyah yáłti'go Bérak éí naaltsoos yisdisii yikáá' áyiilaa.

⁵Áádóó Jeremáíyah éí Bérak yich'į' haadzíi'go kóní, Shidá'deelkaal, áko Bóhólníihii bikin bii' sohodizingi doo yah ajóya'ígi át'ée da,

⁶áko doo adą́ jíní góne' ákǫ́ǫ́ díínááł, áádóó Bóhólníihii bizaad bee nich'į' yáshti'go naaltsoos yisdisii bikáá' íinilaa yę́ę kin bii' sohodizin góne' diné áłah silį́'ígíí áádóó Júdah dine'é bikin hadaas'áádę́ę́' nidahaaskaígíí t'áá ałtso ałdó' daníists'ą́ą'go bich'į' yídííłtah.

⁷T'ááłá'í jinítínígo doo yá'áshónígi át'éego dajíkáahii bits'áhizhdookahgo nída'jookąąhgo Bóhólníihii há yididoots'į́įłgo da'át'é, háálá Bóhólníihii t'áá íiyisí báhóóchįįdgo t'óó báhádzidígi át'éego yee atí'éł'íinii díí dine'é yee yá haadzíi'go át'é.

⁸Áko Niiráíyah biye' Bérak éí Diyin God yá halne'ii Jeremáíyah hach'į' haadzíi'ii bik'ehgo ádziidzaa. Bóhólníihii bikin bii' sohodizin góne' naaltsoos yisdisii Bóhólníihii bizaad bikáá' bik'e'ashchíinii yíyííłta'.

⁹Josáíyah biye' Jiihóíyakim éí Júdah dine'é aláahgo yinant'áago ashdla' náhááh góne' áádóó náhást'éí nídízííd binih Jerúsalemgi kéédahat'íinii t'áá ałtso áádóó Judíya kéyahdóó Jerúsalemjį' diné nidahaaskaígíí t'áá ałtso, Bóhólníihii binááł doo da'iidą́ą́góó t'óó dahodíníilzingo ła'a jį́ adooleeł, dadííniid.

¹⁰Ákohgo Bóhólníihii bikin bii' sohodizin góne' éí adeídi haz'ánígi Bóhólníihii bikin bii' sohodizin bidáádílkał ániidíii bíighahgi Shéífan naaltsoos ííł'íní nilíinii biye' Gemaráíyah bighan góne' Bérak éí Jeremáíyah bizaad naaltsoos yisdisii biká'ígíí t'áá át'é diné t'áá ałtso bich'į' jííłta'.

¹¹Shéífan biye' Gemaráíyah biye' Maikáíyah éí Bóhólníihii bizaad naaltsoos yisdisii bikáa'gi bee bik'e'ashchínígíí t'áá át'é yidiizts'ą́ą'go

¹²aláahgo naat'áanii bighan góyaa ííyá. Áadi naaltsoos ííł'íní bighan góne' yah ííyáago naat'áanii danilíinii t'áá ałtso ákóne' naháaztą́. Naaltsoos íí ł'íní Iilíshama áádóó Shiiméíyah biye' Diiléíyah áádóó Ákbor biye' Elnéíthan áádóó Shéífan biye' Gemaráíyah índa Hananáíyah biye' Zedekáíyah áádóó naat'áanii danilíinii t'áá ałtso ákóne' naháaztą́.

¹³Ákohgo Bérak éí naaltsoos yisdisii bikáa'gi bik'e'ashchínígíí t'áá át'é diné dabíists'ą́ą'go yich'į' yiyííłta'go Maikéíyah éí saad yidiizts'ą́ą'ii diné t'áá ałtso yee yił hoolne'.

¹⁴Ákohgo naat'áanii danilíinii t'áá ałtso éí Kúshai biye' Shelemáíyah biye' Nethanáíyah biye' Jiihúdai éí Bérak yich'į' adeis'a'go ádeidííniid, Naaltsoos yisdisii bikáa'gi bee bik'e'ashchį́įgo diné daníists'ą́ą'go t'áá át'é bich'į' yíníłta'ígíí éí yítį́įłgo nihaa díínááł, bididííniił. Áko Niiráíyah biye' Bérak éí naaltsoos yisdisii yootį́įłgo haa níyá.

¹⁵Áko Bérak ádeidííniid, Nídaahgo yíníłta'. Áádóó Bérak naaltsoos hach'į' yiyííłta'.

¹⁶Ákódzaadóó bik'ijį' saadígíí t'áá ałtso deidiizts'ą́ą'go nídaasdzíidgo da'ahinéél'į́į́', áádóó Bérak ádeidííniid, Díí saadígíí t'áá át'é aláahgo naat'áanii nilíinii bee bił dahodiilnih.

¹⁷Áádóó Bérak nideídééłkidgo ádaaní, Díishą' haa yit'éego saad t'áá át'é bee ak'e'shíníłchį́? Yááłtihgoósh bik'e'shíníłchį́?

¹⁸Áádóó Bérak hach'į' haadzíi'go áháłní, Díí saad éí t'áá ałtso ałkéé' yee yááłtihgo tó bee ak'e'elchíhí bee naaltsoos yisdisii bikáa'gi ak'e'shéłchį́.

¹⁹Ákohgo naat'áanii danilíinii éí Bérak ádeidííniid, Ni áádóó Jeremáíyah nihílááh nídóht'įįh, áádóó diné ła' t'ááká nídooht'į́į'gi bił bééhoozį́į́' yíila'.

²⁰Áádóó naaltsoos ííł'íní nilíinii Iilíshama bighan góne' naaltsoos yisdisii nizhnítą́ągo aláahgo naat' áanii kót'éego dabiłníinii yił ahínéikah góne' yah ajíí'áázh, áádóó aláahgo naat'áanii éí saad t'áá át'é bee bił hojoolne'.

²¹Ákohgo Jiihúdai éí naaltsoos yisdisii néididootį́į́ł biniyé aláahgo naat'áanii bííł'aad, áádóó naaltsoos ííł'íní Iilíshama bighandę́ę́' naaltsoos yisdisii néidiitą́. Áko Jiihúdai éí aláahgo naat'áanii áádóó naat'áanii danilíinii bíighahgóó naazį́įgo naaltsoos yisdisii bich'į' jííłta'.

²²Íídą́ą́' náhást'éí nídízííd binih aláahgo naat'áanii keehai hooghan góne' honibąąhdóó sidáago

²³Jiihúdai éí naaltsoos yisdisii biká'ígíí yaago hadadiit'i'ígíí táa'da, dį́į'da náyóltahgo aláahgo naat'áanii éí biih náwo'í yee k'íyiigéeshgo tsídzayiiłkaad, áko t'áá ákót'į́įgo naaltsoos yisdisii ałtso iidííłk'ą́ą́'.

²⁴Ákondi aláahgo naat'áanii índa bá nidaal'a'ii díí saad deidiizts'ą́ą'go t'áadoo ła' bik'ee bił dahóóyée' da, índa t'áadoo bi'éé' ádąąh nidayooldláad da.

²⁵Azhą́ Elnéíthan áádóó Diiléíyah índa Gemaráíyah éí aláahgo naat'áanii, Naaltsoos yisdisii ts'ídá doo adidííłk'ą́ął da, deiłníigo nídayooskan nidi, t' áadoo hodiizts'ą́ą' da.

²⁶Áádóó aláahgo naat'áanii éí t'áá bí biye' Jíírahmíyel áádóó Ázriyel biye' Seráíyah índa Ábdiyel biye' Shelemáíyah yich'į' haadzíi'go naaltsoos ííł'íní Bérak áádóó Diyin God yá halne'ii Jeremáíyah, Nídooh'éésh, yidííniid, nidi éí Bóhólníihii nábidees'į́į́'.

²⁷Ákohgo naaltsoos ííł'íní Bérak éí Jeremáíyah hach'į' yááłtihgo naaltsoos yisdisii saad bikáá' ádajiilaa yę́ę éí aláahgo naat'áanii iidííłk'ą́ą́'dóó bik'ijį' Bóhólníihii éí Jeremáíyah yich'į' hanáánáádzíi'go kóní,

²⁸Naaltsoos yisdisii ła' nínáádiitįįhgo átsédą́ą́' naaltsoos yisdisii saad bee bik'e'ashchíinii éí Júdah dine'é aláahgo binanit'a'í Jiihóíyakim iidííłk'ą́'ígíí t'áá éí saad naaltsoos bikáa'gi bee bik'e'náá'dííłchííł.

²⁹Júdah dine'é aláahgo binanit'a'í Jiihóíyakim éí kóbididííniił, Bóhólníihii kóní, Díí naaltsoos yisdisii dííníłidgo kódíní, Ha'át'íí lá biniyé díí naaltsoos yisdisii kót'éego bikáá' bik'e'shíníłchį́įgo kódííníniid, Bábilan dine'é aláahgo binanit'a'í doonéełgo díí kéyah t'áá náhwiist'ą́ą́ nít'éé' yidoołchxǫǫł, áádóó bikáa'gi diné kéédahat'íinii índa naaldlooshii nahjį' kwíidoolííł?

³⁰Éí bąą Bóhólníihii éí Júdah dine'é aláahgo binanit'a'í Jiihóíyakim kót'éego yaa haadzíi'go kóní, Bits'ą́ą́dóó oochíiłii ła' David bibikáá'dóó nahat'áii ts'ídá doo ła' yikáá'dóó dah dínóodaał da, áádóó Jiihóíyakim bits'íís daaztsáanii éí jį́įgo náhoniigahjį' áádóó tł'ée'go shonéigahjį' ch'íhidoolghą́ą́ł.

³¹Áko hó áádóó hats'ą́ą́dóó oochíiłii índa há nidaal'a'í éí t'áá bił doo ákwii ádajíít'įįdígíí biniinaa atíhodeeshłííł, índa hó áádóó Jerúsalemgi kéédahat'íinii índa Júdah dine'é doo yá'áshóonii bee bá haasdzíi'ii t'áá ałtso bik'ijį' yeideeshxééł, nidi t'áadoo dahodiizts'ą́ą' da.

³²Ákohgo Jeremáíyah éí naaltsoos yisdisii ła' nínéidiitą́ągo Niiráíyah biye', éí naaltsoos íí ł'íní nilíinii Bérak yaa néinítą́, áádóó Jiihóíyakim éí naaltsoos yisdisii saad t'áá át'é bikáa'go iidííłk'ą́'ígíí éí saadígíí Jeremáíyah yee yá náánááłtihgo naaltsoos hálák'ee náánástánígíí bikáá' ánáájiidlaa, áádóó saad t'áá ákódaat'éii lą'í bíidzoh.