Read Navajo JEREMIAH 37 Bible Online

JEREMIAH 37 - Navajo bible

JEREMIAH 37

¹Bábilan dine'é aláahgo binanit'a'í Nébukadnézzar éí Jiihóíyakim biye' Konáíyah éí Júdah dine'é aláahgo binanit'a'í áyiilaii bitsásk'ehgi Josáíyah biye' Zedekáíyah nant'áá nít'éé'.

²Nidi bí áádóó bá nidaal'a'í índa bikéyah bikáá'góó diné kéédahat'íinii Diyin God yá halne'ii Jeremáíyah éí Bóhólníihii bizaad yee yá yáłti'go t'áadoo deidiizts'ą́ą' da.

³Ákondi aláahgo naat'áanii Zedekáíyah éí Shelemáíyah biye' Jiihókal áádóó Méíyasíyah biye', náá'iiłniihii nilíinii Zefanáíyah éí Diyin God yá halne'ii Jeremáíyah yich'į' ayííł'a'go kóní, NihiDiyin God Bóhólníihii bich'į' nihá sodílzin.

⁴Áko Jeremáíyah éí t'ah doo yah abi'dilt'e'góó diné yitaaghá.

⁵Íídą́ą́' Kaldíya dine'é bisiláo Jerúsalem kin haal'á yináshzhiizh yę́ędą́ą́' Féro bisiláo Ííjip kéyahdę́ę́' ch'ínínánígíí yaa dahodiizts'ą́ą'go Jerúsalem yits'áníná.

⁶Ákohgo Bóhólníihii éí Diyin God yá halne'ii Jeremáíyah yich'į' hanáánáádzíi'go kóní,

⁷Ízrel dine'é biDiyin God Bóhólníihii kóní, Júdah dine'é aláahgo binanit'a'í nashídíłkidgo shich'į' nííł'aadígíí kóbididííniił, Féro bisiláo nihíká adoojah biniyé nihaa nínáhígíí Ííjip kéyahgóó dah nídidoo'nééł, jó'akon.

⁸Áádóó Kaldíya dine'é nídoo'néełgo díí kin haal'áhígíí deidoołnéełgo yidahodidoonił áádóó ałtso adeididoołk'ą́ą́ł.

⁹Bóhólníihii kóní, Kaldíya dine'é doo kojį' náádadoo'néeł da, dadohníigo t'áadoo ádinda'ohdlo'í. Áádę́ę́' yee' náádoo'nééł.

¹⁰Azhą́ Kaldíya dine'é bisiláo t'áá yíl'áá nít'éé' nihił da'ahigą́ągo bik'eh dadoohdlį́į' nidi, índa diné t'ááłá'í nítínígo tídaalyaaígíí níbaal yii' naazhjée' nidi, nídidoojahgo kin haal'áhígíí yidahodidooniłgo adeididoołk'ą́ą́ł, jó'akon.

¹¹Ákohgo aadę́ę́' Féro bisiláo yinéełgo Kaldíya dine'é bisiláo nídaasdzíidgo Jerúsalem yits'ánínáago

¹²Jeremáíyah éí Bénjamin bikéyahdi diné bitahdóó baa deet'ánígíí shóidoołt'eeł yiniyé ákǫ́ǫ́ dah diiyá.

¹³Áádóó Bénjamin bidáń'dítį́hídi jiníyáago Hananáíyah biye' Shelemáíyah biye' Airáíjah éí siláo binanit'a'í nilį́įgo ákwii dáádéesdáá lá, áko éí Diyin God yá halne'ii Jeremáíyah yisiłgo ííłní, Kaldíya dine'é bich'į' yóó'anilyeedgo ánít'į́į́ lá!

¹⁴Áádóó Jeremáíyah ádííniid, Eii doo ákót'ée da. Kaldíya dine'é doo bich'į' yóó'iishyeed da. Nidi Airáíjah doo t'áá k'ad hodiizts'ą́ą' da, nidi hasiłgo naat'áanii danilíinii yidááhdóó nihonílóóz.

¹⁵Áko naat'áanii danilíinii éí Jeremáíyah yich'į' bádahazhchįįd, áádóó nídahoneesxaalgo naaltsoos ííł'íní Jánathan bighan góne' awáalyaa áhoolyaa góne' yah adahast'e'.

¹⁶Jeremáíyah éí ná'ayaaí góyaa yah aho'doolt'e'go ákwii lą'í hwiiską́ągo

¹⁷aláahgo naat'áanii Zedekáíyah háká i'ííł'a' áádóó baazhníyáago bił yah ajííyá. Aláahgo naat'áanii t'áá nahont'inee bighan góne' nahódééłkidgo áhodííniid, Bóhólníihiiísh bits'ą́ą́dę́ę́' ła' hane' nááhódlǫ́? Jeremáíyah ání, Ła' hólǫ́, áko ání, Ni Bábilan dine'é aláahgo binanit'a'í baa nidi'doot'ááł.

¹⁸Áádóó ałdó' Jeremáíyah éí aláahgo naat'áanii Zedekáíyah áyidííniid, Haash niishłaago índa ná nidaal'a'í áádóó díí dine'é haash yishłaago biniinaa yah ashííníłt'e'?

¹⁹Bábilan dine'é aláahgo binanit'a'í doo naatįįh doobah da, índa díí kéyah doo yaatįįh doobah da, daniłníigo nił dahalne'ii éíshą' háájí adahaaskai?

²⁰Aláahgo shinanit'a'í nílíinii, baa nánooshkąąh, shidiits'į́į́h. T'óó shaa hojoobá'ígo nánooshkąąhígíí t'áadoo bits'ąą nanít'áhí; naaltsoos ííł'íní Jánathan bighandi doo dadeestsaałígíí biniyé ákǫ́ǫ́ doo anáshidííł'aał da.

²¹Áko aláahgo naat'áanii Zedekáíyah haadzíi'go Jeremáíyah éí awáalyaa bich'éédą́ą'gi hadá'deelkaal áádóó ákwii kin haal'áagi bááh ásdįįdjį' bááh ál'į́įgo atiindóó t'áá ákwíí jį́ bááh t'ááłá'í haa nát'ááh nít'éé'. Áko Jeremáíyah t'áá ákwii awáalyaa bich'éédą́ą'gi dzizdá.