Read Navajo JEREMIAH 38 Bible Online

JEREMIAH 38 - Navajo bible

JEREMIAH 38

¹Ákohgo Mátan biye' Shefatáíyah áádóó Pásher biye' Gedaláíyah áádóó Shelemáíyah biye' Júkal índa Malkáíyah biye' Pásher éí Jeremáíyah diné t'áá ałtso saad bee bich'į' hadziisdzí'ígíí deidiizts'ą́ą́'.

²Bóhólníihii kóní, Díí kin haal'áagi t'áá ákǫ́ǫ́ nidajikaígíí éí diltłish áádóó dichin áádóó naałniih nidahodoołtsił, nidi Kaldíya dine'é bich'į' ch'íjiiskaii éí dajiináa doo, háálá bąąh oogą́ą'ii jílį́įgo dajiináa doo.

³Bóhólníihii kóní, Díí kin haal'áhígíí éí Bábilan dine'é aláahgo binanit'a'í bisiláo dah yinéłígíí éí ts'ídá t'áá aaníí baa didoot'áałgo yidoołnééł.

⁴Ákohgo naat'áanii danilíinii éí aláahgo naat'áanii ádeidííniid, Baa nídaniikąąh, bíni'dii díí hastiin diyoolyééł, háálá díí kin haal'áagi siláo daadziihígíí áádóó diné kéédahat'ínígíí t'áá ałtso saad bee bich'į' yájíłti'ígíí bee bitah doo dahojiiłna' da, háálá díí hastiin bidine'é bá yá'át'éeh dooleełii doo yá hát'į́į da; atídoolnííł t'éiyá yá hát'į́.

⁵Áko aláahgo naat'áanii Zedekáíyah ádííniid, Nihílák'ee sitį́, jó'akon. Shí doo nihik'ijį' nishłį́į da doo.

⁶Ákohgo Jeremáíyah dah deidiilóozgo aláahgo naat'áanii biye' Malkáíyah bitó bá az'ą́ą́ góyaa adayiisxan. Éí awáalyaa bich'éédą́ą'gi tó bá az'ą́ą́ góyaa tł'óół bee Jeremáíyah hadadeizlo'. Tó bá az'ą́ą́ góyaa éí tó ádin, t'áá hazhó'ó hashtł'ish dits'idí t'éiyá hólǫ́, áko Jeremáíyah nahodits'ǫ' íígo'.

⁷Nít'éé' aláahgo naat'áanii éí Bénjamin bidáń'dítį́įhgi sidáago Iithiyópiya dine'é nilíinii Ííbed-míílek, yúnak nilį́įgo éí tó bá az'ą́ą́ góyaa Jeremáíyah adeist'e'go yiyíínii'go

⁸Ííbed-míílek éí aláahgo naat'áanii bighandóó ch'íníyáago aláahgo naat'áanii yaa níyáago áyidííniid,

⁹Bóhonishníihii, aláahgo naat'áanii nílíinii, díí diné éí Diyin God yá halne'ii Jeremáíyah tó bá az'ą́ą́ góyaa adahwiisxanígíí éí ádahóół'įįdígíí t'áá át'é yee doo yá'áshǫ' t'éiyá yaa naaskai, áko díí kin haal'áagi bááh ásdįįdígíí biniinaa Jeremáíyah t'áá ákóyaa dadootsaał.

¹⁰Ákohgo aláahgo naat'áanii éí Iithiyópiya dine'é nilíinii Ííbed-míílek yich'į' haadzíi'go kóní, Kodóó diné tádiin yilt'éego nídiiníiłgo Jeremáíyah t'ah doo daatsaahdą́ą́' tó bá az'ą́ą́dę́ę́' háádaołteeh.

¹¹Áko Ííbed-míílek éí diné yił dah diikaigo aláahgo naat'áanii bikin si'ą́ą́góó yíkai; áadi yódí bá hooghan biyaadi haz'ą́ą́ góne' ąą ádayiilaago áádę́ę́' anilí áádóó éé' nidahaazhaazhígíí ła' hadeiznilgo tł'óół yee tó bá az'ą́ą́ góyaa Jeremáíyah yich'į' hadadeizlo'.

¹²Ákohgo Iithiyópiya dine'é Ííbed-míílek éí Jeremáíyah áyidííniid, Anilí áádóó éé' nidahaazhaazhígíí nich'áyah góne' t'áá ałch'ishjí abíhíyííł áádóó ła' niyid gónaa tł'óół t'áá bił ádinánílt'ih. Áko Jeremáíyah ákódzaa.

¹³Áádóó índa tł'óół bee tó bá az'ą́ą́dę́ę́' Jeremáíyah háádeizlo' áádóó Jeremáíyah éí awáalyaa bich'éédą́ą'gi dzizdáá nít'éé'.

¹⁴Áko aláahgo naat'áanii Zedekáíyah éí Diyin God yá halne'ii Jeremáíyah yíká i'ííł'a'go Bóhólníihii bikin bii' sohodizin si'ánígíí táá' góne' dáń'dítį́įhgi hoł yah ííyá. Áádóó aláahgo naat'áanii éí Jeremáíyah áyidííniid, Nanídídéeshkił, ha'át'íida doo shits'ąą dínííł'į́įł da.

¹⁵Ákohgo Jeremáíyah éí Zedekáíyah áyidííniid, Bee nił hweeshne'go ts'ídá shidiyííłhéełgo t'áá aaníí shił bééhózin. Kót'éego nidííniidgo doo shíídííłts'įįł da.

¹⁶Nidi aláahgo naat'áanii Zedekáíyah t'áá nahont'inee Jeremáíyah yich'į' ádee hadoodzíí', Bóhólníihii, hinii'náago ánihiilaii éí ts'ídá t'áá aaníí hiná; ákót'éego ts'ídá t'áá aaníí doo nidiyeeshxéeł da, índa díí diné dandiyoołhééł yiniyé naa niheekaígíí éí doo baa nidideesh'áał da.

¹⁷Ákohgo Jeremáíyah éí Zedekáíyah áyidííniid, Ízrel dine'é biDiyin God éí Diyin God t'áá ałtsoní bee Bóhólníihii kóní, Bábilan dine'é aláahgo binanit'a'í éí naat'áanii biyaa sinilígíí t'óó bich'į' dah diniyáago, áko lá índa hinínáa doo biniyé ááni'diszįįd doo áádóó díí kin haal'áhígíí doo adidoolk'ą́ął da índa ni áádóó na'áłchíní dahináa doo,

¹⁸nidi Bábilan dine'é aláahgo binanit'a'í éí naat'áanii biyaa sinilígíí doo baa ádíínít'ą́ą́góó éí díí kin haal'áhígíí Kaldíya dine'é baa didoot'áałgo adeididoołk'ą́ą́ł, áádóó ni éí ts'ídá doo biyaa hadíínáał da.

¹⁹Ákohgo Zedekáíyah éí Jeremáíyah áyidííniid, Jew dine'é éí Kaldíya dine'é yich'į' yóó'aheeswodígíí binásdzid, háálá Kaldíya dine'é éí áadi Jew dine'é yaa dashididoo'áałgo shá nidahałt'i' doo.

²⁰Áádóó Jeremáíyah ádííniid, Doo yaa dandidoo'áał da. K'ad lą́ą Bóhólníihii áníinii índa áńdishníinii bik'ehgo ánínéehgo ná yá'át'éeh dooleeł áádóó t'áá hinínáa doo.

²¹Nidi baa ádidíít'áłígíí doo ninizį́į́'góó éí kót'ée dooleełgo Bóhólníihii shich'į' ánááyiidlaa.

²²Shoo, Júdah dine'é aláahgo binanit'a'í bighangi asdzání daadziihígíí éí Bábilan dine'é aláahgo binanit'a'í naat'áanii biyaa sinilígíí baa dahidoot'ish, áko ádadidooniił, K'ad nahodits'ǫ' íínítłizhgo nik'isóó baa dzíínílíí nít'ée'ii ninda'azlo'go nik'eh dadeesdlį́į́' áádóó t'ą́ą́' dah nídahidiijéé'.

²³Na'ákéí danilíinii índa na'áłchíní danilíinii t'áá ałtso Kaldíya dine'é bich'į' ch'ídoot'ish índa t'áá ni ałdó' ts'ídá doo biyaa hadíínáał da, nidi Bábilan dine'é aláahgo binanit'a'í niidoołtsoł, áádóó niniinaa díí kin haal'áhígíí adidoolk'ą́ą́ł.

²⁴Ákohgo Zedekáíyah éí Jeremáíyah áyidííniid, Díí saad bee háínídzí'ígíí t'ááká ła' bił bééhoozį́į́' yíila', áko doo dadíítsaał da.

²⁵Nił ahił hweeshne'ígíí naat'áanii danilíinii yaa dahodiizts'ą́ą'go áádóó naa yíkaigo, Aláahgo naat'áanii bee bił hwíínílne'ígíí áádóó yee nił hoolne'ígíí bee nihił hólne'; t'áadoo nihits'ąą naníł'iní, áko doo dandiyiilyéeł da, dandííniidgo

²⁶ábididííniił, Jánathan bighandi doo dadeestsaał da, áko doo ákǫ́ǫ́ náshidííł'aał da, dishníigo aláahgo naat'áanii bich'į' ádaa ná'iisiskan.

²⁷Ákohgo naat'áanii danilíinii t'áá ałtso Jeremáíyah yaa yíkaigo nidayídééłkid, áádóó aláahgo naat'áanii nahoneeztą́ą́' yę́ęgi át'éego bich'į' hadzoodzíí'. Áko t'áadoo yił ahił náádahoolne' da, háálá ahił hoolne'ígíí t'áadoo yi'nii' da.

²⁸Áádóó Jerúsalem yisnáajį' Jeremáíyah éí awáalyaa bich'éédą́ą'gi dzizdáá nít'éé'.