Read Navajo JEREMIAH 39 Bible Online

JEREMIAH 39 - Navajo bible

JEREMIAH 39

¹Zedekáíyah éí Júdah dine'é aláahgo yinant'áago náhást'éí náhááh góne' áádóó neeznáá nídízííd binih Bábilan dine'é aláahgo yinanit'a'í Nébukadnézzar áádóó bisiláo t'áá dah yinééł nít'éé' yił nínáago Jerúsalem yaatįįh yikaigo yináshzhiizh.

²Zedekáíyah nant'áago ła'ts'áadah náhááh góne' áádóó dį́į́' nídízííd binih índa náhást'éí jį́į́ góne' kin haal'áago tsé binaago ahénátł'inii łahgo yigháda'aznil.

³Bábilan dine'é aláahgo binanit'a'í éí naat'áanii biyaa sinilígíí yah aakaigo ata' gi dań'dítį́hígi dineezbin; éí kódaolyé: Néíyergal-sharíízer áádóó Sámgar-nííbo, Sársiikim, Rábsaris nilíinii, Néíyergal-sharíízer, éí Rábmag nilíinii áádóó ałdó' Bábilan dine'é aláahgo binanit'a'í naat'áanii biyaa sinilígíí náádaała' yił dineezbin.

⁴Ákohgo Júdah dine'é aláahgo binanit'a'í Zedekáíyah áádóó diné nidaabaahii t'áá ałtso díí dayiiłtsą́ągo tł'ée'go kin haal'áádóó dah díníidzood. Aláahgo naat'áanii bidá'ák'eh hayázhí bíighahgóó áádóó naaki t'áá áyídígóó ahąąh ítł'ingo bidáń'dítį́į́h góne' índa dzígai bich'į'go nídiijéé'.

⁵Nidi Kaldíya dine'é bisiláo dabidínéeshchą́ą'go Jériko binaagi dzígaidi Zedekáíyah yił dadeezdéél, áko dahoołtsoodgo Héímath kéyahdi Ríblah kin haal'áagi Bábilan dine'é aláahgo binanit'a'í Nébukadnézzar yaa dahazlóozgo ákwii há nihoní'ą́.

⁶Ákohgo Ríblahdi Bábilan dine'é aláahgo binanit'a'í éí Zedekáíyah hanááł haye'ké dayííghą́ą́', áádóó Bábilan dine'é aláahgo binanit'a'í ałdó' Júdah dine'é naat'áanii danilíinii t'áá ałtso neistseed.

⁷Áádóó ałdó' Zedekáíyah bináá' hayí'ííshiizhgo Bábilan kéyahgóó doodlóós biniyé béésh da'ahólzha'í yee ye'eztł'ǫ́.

⁸Kaldíya dine'é éí aláahgo naat'áanii bighan índa bidine'é t'áá ałtso dabighan adeideesk'ą́ą́' áádóó Jerúsalem binaa ahééda'astł'inii éí ts'ídá ałtso naa'adayiiskaad.

⁹Siláo binanit'a'í nilíinii Nébuzar'éídan éí kin haal'áagi diné t'áá ákǫ́ǫ́ daadziihii áádóó diné áádahoost'įįdgo baa dahaaskai yę́ę t'áá óóltą'go yisnááh danilį́įgo Bábilangóó iinííłkaad.

¹⁰Siláo binanit'a'í Nébuzar'éídan éí diné badahojoobá'íii t'áadoo le'é bee ádaadinígíí Júdah kéyahgi t'áá ákǫ́ǫ́ kéédahat'į́įgo áyiilaa áádóó ch'il na'atł'o'ii deíl'áii índa dáda'ak'eh yitaideez'ą́.

¹¹Bábilan dine'é aláahgo binanit'a'í Nébukadnézzar éí Jeremáíyah kódadoohłííł, níigo siláo binanit'a'í Nébuzar'éídan yich'į' haadzíí',

¹²Nídadidohłóosgo yá'át'éehgo baa ádahołyą́ą doo áádóó doo haada dadoohłíił da. Kót'éego shá ádaohłééh, nihiłníigo t'áá ákót'éego bá ádadoohłííł.

¹³Áko siláo binanit'a'í Nébuzar'éídan áádóó Nébushásban, Rábsaris nilíinii índa Néíyergal-sharíízar, Rábmag nilíinii áádóó Bábilan dine'é aláahgo binanit'a'í naat'áanii biyaa sinilígíí t'áá ałtso

¹⁴éí ákǫ́ǫ́ siláo dayííł'aadgo Jeremáíyah awáalyaadę́ę́' yił ch'éédaaskaigo Shéífan biye' Aháíkam biye' Gedaláíyah éí hooghangóó hoł nídoot'ashgo baa ho'diszįįd, áko diné bitahgi kééhojit'į́į́ nít'éé'.

¹⁵Jeremáíyah awáalyaa dzizdá yę́ędą́ą́' Bóhólníihii hach' į' haadzíi'go kóní,

¹⁶Nílááh, Iithiyópiya dine'é nilíinii Ííbed-míílek bich'į' dínáahgo kóbidiní, Ízrel dine'é biDiyin God t'áá ałtsoní bee Bóhólníihii kóní, Jó, díí kin haal'á bik'ijį' haasdzíi'ii éí doo yá'áshónígi ádoolníiłii éí jínígíí biyi' t'áá ninááł bohodoolnííł. Yá'át'éhígi ádoolníiłii éí doo bohodoolníił da.

¹⁷Bóhólníihii kóní, Nidi éí jínígíí biyi' nił yisdádeesh'ash áádóó diné béédanildzidii doo baa nidideesh'áał da.

¹⁸Ts'ídá t'áá aaníí nił yisdádeesh'ash áádóó diltłish doo bee nidi'yoolyéeł da, nidi, Shaa jiisíníli'ígíí bee ne'iina' doodzih, ní Bóhólníihii.