Read Navajo JEREMIAH 40 Bible Online

JEREMIAH 40 - Navajo bible

JEREMIAH 40

¹Siláo binanit'a'í Nébuzar'éídan éí Jerúsalem kin haal'áádóó áádóó Júdah kéyahdóó deisnáanii Bábilan kéyahgóó adeineeskaadgo Nébuzar'éídan éí Jeremáíyah béésh da'ahólzha'í bąąh sinilgo bił ooldah yę́ę éí Réímah kin haal'áádóó yéidííchidóó bik'ijį' Bóhólníihii kót'éego bich'į' haadzíí'.

²Siláo binanit'a'í éí Jeremáíyah yił nídiit'áazhgo ííłní, NiDiyin God Bóhólníihii kwe'é haz'ánígíí doo yá'át'ééhgóó yá haadzíí'.

³Bóhólníihii át'į́; yee haadzí'ígi át'éego yi'iilaa. Bóhólníihii bich'į' ádił da'soohsiih áádóó áníinii doo bik'eh dahosooł'įįdígíí biniinaa kónihi'diilyaa.

⁴Díí jį́ k'ad béésh da'ahólzha'í nílátsíín binázt'i'go bee ne'estł'óonii nąąh niná'diish'níiłgo néédíshchííd, jó'akon. Bábilan kéyahgóó shił díí'ashígíí nił yá'át'éehgo, tį', áádóó yá'át'éehgo nik'idíínísh'į́į' doo, nidi Bábilangóó shił díí'ashígíí doo nił aaníígóogo t'áá kǫ́ǫ́ naniná. Jó, nidááhgóó t'áá náhwiist'ą́ą́ nít'éé'. Haa'í shį́į́ kéyah t'áá nił yá'áhoot'éeh dooleełgi náhodii'aahgo ákǫ́ǫ́ dínááh.

⁵Ákohgo t'ah doo nát'ą́ą́' nihééjídááhgóó Nébuzar'éídan áháłní, Shéífan biye' Aháíkam biye' Gedaláíyah éí Júdah kéyahdi kin hadaas'áhígíí yinant'áa doo biniyé Bábilan dine'é aláahgo binanit'a'í nibiníłtíinii éí Gedaláíyah bich'į' nídídáahgo bił diné bitahgi kééhót'į́; éí doodaii', t'áá nił yá'áhoot'éhígóó dínáahgo ákwii kééhót'į́. Áko siláo binanit'a'í éí ch'iyáán áádóó béeso ła' hainínilgo ho'níłnii'.

⁶Áko índa Jeremáíyah dah diiyáago Mízpah kin haal'áagi Aháíkam biye' Gedaláíyah yaa níyáago kéyahgi diné daadziihígíí t'áá ákǫ́ǫ́ kéédahat'íinii bitahgi yił kééhat'į́į́ nít'éé'.

⁷Íídą́ą́' da'níłts'ą́ą́'góó diné dah naazhjaa'ígíí yindant'áhígíí t'áá ałtso t'áá bił Bábilan dine'é aláahgo binanit'a'í éí Aháíkam biye' Gedaláíyah kéyahgi nant'áago áyiilaago diné áádóó asdzání índa áłchíní kéyahgi t'áá íiyisí badahojoobá'íii Bábilan kéyahgóó t'áadoo anoolkaadii yinant'áa doo biniyé yeidiní'ą́ągo dayíínii'.

⁸Nethanáíyah biye' Íshmeiyel áádóó Karíyah biye'ké Johéínan áádóó Jánathan áádóó Tanhúmeth biye' Siiréíyah áádóó Niitófa kin shijaa'dę́ę́' Íífai biye'ké áádóó Méíyakahdę́ę́' diné léi' biye' Jezanáíyah bí áádóó bidine'é yił Mízpah kin haal'áadi Gedaláíyah yaa yíkai.

⁹Áádóó Shéífan biye' Aháíkam biye' Gedaláíyah hach'į' ádee haadzíi'go kóní, Kaldíya dine'é bá nidaał'a'go t'áadoo bik'ee nihił daayé'í; t'áá kǫ́ǫ́ kéédahoht'į́įgo Bábilan dine'é aláahgo binanit'a'í bá nidaał'a', áko nihá yá'át'éeh doo.

¹⁰Nidi shí éiyá Kaldíya dine'é nihaa nínánígíí bá choosh'į́į doo biniyé t'áá Mízpahdi kééhasht'į́į doo, jó'akon, nidi nihí éí wáin áádóó shį́įgo tsin bineest'ą'ígíí índa ak'ah ádá shónídaołt'eehgo bii' hééł áńda'ooł'įįhii bee ninádaoh'nił doo, áádóó kin hadaas'áago ádaa dadooht'ánígíí ákǫ́ǫ́ kéédahoht'į́.

¹¹T'áá ákót'éego Mó'ab kéyahdi áádóó Áman dine'é bitahgóó áádóó Íídam kéyahdi índa kédaayahgóó Jew dine'é kéédahat'ínígíí t'áá ałtso éí Bábilan dine'é aláahgo binanit'a'í éí Júdah dine'é daadziihígíí t'áá ákǫ́ǫ́ kéédahat'į́įgo áyiilaago áádóó Shéífan biye' Aháíkam biye' Gedaláíyah honant'áa doo biniyé niiníłtį́įgo dayíínii'.

¹²Ákohgo Jew dine'é t'áá ałtso adabidi'niiskaad yę́ęjį' áádę́ę́' ch'éheeskaigo Júdah kéyahdi Mízpahjį' Gedaláíyah yaa haaskai. Áádóó wáin índa shį́įgo tsin bineest'ą' dant'ánígíí t'óó ahayóí áłah ádayiilaa.

¹³Áádóó ałdó' Karíyah biye' Johéínan índa da'níłts'ą́ą́'góó diné dah naazhjaa'ígíí yinanit'a'í danilíinii t'áá ałtso Mízpahdi Gedaláíyah yaa yíkaigo

¹⁴ádeidííniid, Áman dine'é aláahgo binanit'a'í Béíyalis éí Nethanáíyah biye' Íshmeiyel nidiyoołhééł biniyé nich'į' ayííł'a'ígíí doósh nił bééhózin da? Nidi Aháíkam biye' Gedaláíyah t'áadoo hoosdląąd da.

¹⁵Áko Mízpahdi Karíyah biye' Johéínan éí Gedaláíyah t'áá nahont'inee yił ahíi'áazhgo yich'į' haadzíi'go kóní, Baa nánooshkąąh, sha'di'ní'aahgo Nethanáíyah biye' Íshmeiyel bich'į' deesháałgo diyeeshxééł áádóó ts'ídá doo ła' hoł bééhózin da doo. Ha'át'íísh biniyé nijiiłhée doo áádóó Jew dine'é t'áá ałtso naa áłah násdlį́į'ii tanoolkaad doo índa Júdah kéyahgi diné daadziihii ádįįh doo?

¹⁶Nidi Aháíkam biye' Gedaláíyah éí Karíyah biye' Johéínan áyidííniid, Díí ts'ídá doo kódííníił da, háálá Íshmeiyel t'áá ádzaagóó bá hahídziih.