Read Navajo JEREMIAH 41 Bible Online

JEREMIAH 41 - Navajo bible

JEREMIAH 41

¹Ákohgo tsosts'id nídízííd binih Iilíshama biye' Nethanáíyah biye' Íshmeiyel éí aláahgo naat'áanii bidine'é ahoolchíiłii áádóó biyaa sinilii agháago naat'áanii ła' nilį́įgo éí diné neeznált'éego yił Mízpah kin haal'áadi Aháíkam biye' Gedaláíyah yaa yíkai; áadi t'ááłáhíjį' da'jííyą́ą́'.

²Ákohgo Nethanáíyah biye' Íshmeiyel áádóó diné neeznált'éego yił yíkaígíí nídiijée'go Bábilan dine'é aláahgo binanit'a'í éí Shéífan biye' Aháíkam biye' Gedaláíyah éí Júdah kéyahgi nant'áago áyiilaa yę́ę diltłish yee dayiisxį́.

³Áádóó Íshmeiyel ałdó' Mízpahdi Gedaláíyah éí Jew dine'é t'áá ałtso yił dah yikahii índa Kaldíya dine'é ákwii nidaakaii éí diné nidaabaahii danilíinii t'áá yił dayííghą́ą́'.

⁴Áádóó Gedaláíyah yiyiisxį́į́dóó biiskání diné ła' t'ah doo yiniihgóó

⁵Shííkem áádóó Sháíloh índa Samériya kin hadaas'áádę́ę́' diné tseebídiin yilt'éego bidághaa' daalzhée'go áádóó bi'éé' nidahaasdǫ́ǫzgo índa bikáá'góó ahidayiizhgizhgo Bóhólníihii yich'į' tł'oh naadą́ą́' náádeidiyoołnihii índa tsin bijeeh dilidgo łikání halchinii éí Bóhólníihii bikin bii' sohodizinjį' deideezhjaa'go yíkai.

⁶Ákohgo Nethanáíyah biye' Íshmeiyel éí diné tseebídiin yilt'éhígíí bidááshdoogááł biniyé Mízpahdóó dashdiiyáago jichago jiníyá, áádóó bidááshníyáago ábizhdííniid, Hágo, Aháíkam biye' Gedaláíyah bich'į' dohkááh.

⁷Áádóó ákódzaago kintah góne' ajookaigo Nethanáíyah biye' Íshmeiyel áádóó diné yił tádíkáhígíí nidahastseedgo tó bá az'ą́ą́ góyaa adahwiistł'ííd.

⁸Nidi hatahdóó diné neeznált'éego Íshmeiyel ádeidííniid, Nihí éí t'áadoo nanihíłtseedí; nihił dah nahaz'ą́ą́góó tł'oh naadą́ą́' áádóó tł'oh naadą́ą́' bidee'í áádóó ak'ah doo nilk'ihígíí índa tsés'ná bitł'izh danihinoo'. Áko hak'isóó danilíinii t'áadoo yił nahastseed da.

⁹Ákohgo Íshmeiyel éí Gedaláíyah yił diné neistseedígíí t'áá ałtso dabits'íís tó bá az'ą́ą́ góyaa ayiiz'nilii éí a'ánígíí Júdah dine'é aláahgo binanit'a'í Éísa éí Ízrel dine'é aláahgo binanit'a'í Béíyasha yinásdzíidgo yiniyé áyiilaa nít'éé'. Áko Nethanáíyah biye' Íshmeiyel éí diné neistseedii t' áá ałtso ákóyaa haidééłbįįd.

¹⁰Áko aláahgo naat'áanii bitsi'ké índa diné t'áá ałtso Mízpahgi daadziihgo siláo binanit'a'í Nébuzar'éídan éí Aháíkam biye' Gedaláíyah bee bóhólníihgo áyiilaii Nethanáíyah biye' Íshmeiyel éí yisnáago Áman dine'é bitahgóó iiníí łkaad.

¹¹Nidi Karíyah biye' Johéínan áádóó siláo binanit'a'í danilį́įgo dah yoo'ishígíí éí Nethanáíyah biye' Íshmeiyel doo yá'áshǫ' yaa naayáhígíí dayíínii'go

¹²diné t'áá ałtso yił dah diikaigo Nethanáíyah biye' Íshmeiyel yił da'ahidoogą́ą́ł biniyé ákǫ́ǫ́ eekai, áko Gíbiyan kin haal'á binaashiidi tó sikánígi yik'ékai.

¹³Ákohgo Íshmeiyel éí diné t'áá ałtso iinííłkaadii éí Karíyah biye' Johéínan índa siláo binanit'a'í danilíinii yił naakaii dayiiłtsą́ągo bił dahóózhǫǫd.

¹⁴Áko Íshmeiyel éí Mízpahdóó diné yisnáago dah yidíníiłkaadii t'áá ałtso éí Karíyah biye' Johéínan yich'į' dah nídiikai.

¹⁵Nidi Nethanáíyah biye' Íshmeiyel éí diné tseebílt'éego yił Johéínan yits'ąą dadínéezhchą́ą'go Áman dine'é yich'į' ííjéé'.

¹⁶Nethanáíyah biye' Íshmeiyel éí Aháíkam biye' Gedaláíyah yiyiisxį́į́dóó bik'ijį' diné nidaabaahii áádóó asdzánída áádóó áłchíní índa yúnak danilíinii yisnáago dah yidíníiłkaadii éí Karíyah biye' Johéínan índa siláo binanit'a'í danilíinii yił tádíkáahii Gíbiyandóó shónídayoost'e'.

¹⁷Áko Ííjip kéyah biishdoonééł biniyé Béthlehem bíighahgóó Gérath-kímham hoolyéegi nidadziizná.

¹⁸Háálá Nethanáíyah biye' Íshmeiyel éí Aháíkam biye' Gedaláíyah yiyiisxínígíí biniinaa Kaldíya dine'é béédadzildzid. Bábilan dine'é aláahgo binanit'a'í éí kéyahgi Gedaláíyah bóhólníihgo áyiilaa nít'éé'.