Read Navajo JEREMIAH 42 Bible Online

JEREMIAH 42 - Navajo bible

JEREMIAH 42

¹Ákohgo siláo binanit'a'í danilíinii t'áá ałtso áádóó Karíyah biye' Johéínan áádóó Hosháíyah biye' Jezanáíyah áádóó diné a'ohgo ádaat'éédóó ayóó ádaat'éejį' diné t'áá ałtso hánídóó niikaigo

²Jeremáíyah ádeidííniid, Haa'íyee' baa nídaniikąąhígíí nihá yísíníłts'ą́ą́'; díí diné deidziihígíí nihá Bóhólníihii niDiyin God bich'į' sodílzin, t'áá shǫǫdí, háálá t'óó ahonii'yóí nít'éé', nidi k'ad aadę́ę́' nihiníníł'į́įgo t'áá díkwíniilt'éhé yee'.

³Áko Bóhólníihii niDiyin God éí deíníikáah dooleełgóó índa baa nideiikai dooleełígíí nihił yit'íní íidoolííł.

⁴Áádóó Diyin God yá halne'ii Jeremáíyah áhodííniid, Nihidiséts'ą́ą́'. Jó, deínóokeedígi át'éego Bóhólníihii nihiDiyin God nihá bich'į' sodideeszįįł áádóó índa Bóhólníihii yee nihich'į' haadzí'ígíí éí bee nihił náhodeeshnih; ha'át'íhída doo nihits'ąą dínéesh'į́įł da.

⁵Áádóó Jeremáíyah ádeidííniid, Bóhólníihii niDiyin God hane' yił nihich'į' adees'a'ígíí t'áá át'é t'áadoo bida'iilyaagóó Bóhólníihii t'áá bí t'áá aaníí át'éego índa ba'ahódlíigo oo'íinii nilį́įgo nihaa hodoolnih.

⁶Nihił yá'át'ééh daats'í dooleeł, éí doodaii', doo daats'í nihił yá'át'éeh da dooleeł, nidi bich'į' dandeel'a'ígíí Bóhólníihii nihiDiyin God ánínígíí bik'eh dahoniil'į́į doo, áko Bóhólníihii nihiDiyin God ánínígíí bik'eh dahoniil'į́įgo nihá yá'át'éeh dooleeł.

⁷Áádóó bik'ijį' neeznáá yiską́ągo Bóhólníihii éí Jeremáíyah yich'į' haadzíí'.

⁸Ákohgo Karíyah biye' Johéínan áádóó siláo binanit'a'í danilíinii hoł naakaígíí t'áá ałtso índa diné a'ohgo ádaat'éédóó t'áá níléí ayóó ádaat'éejį' t'áá ałtso hágo yidííniidgo

⁹áyidííniid, Ízrel dine'é biDiyin God Bóhólníihii bídeínóhkeedii éí nihá bííkeedígíí kóní,

¹⁰Díí kéyah t'áá bii' kééhoht'į́įgo áko lá índa nihidziilgo ánihideeshłíił ni áádóó índa doo ánihideeshdįįł da; k'inihidideeshłééł áádóó doo hanihidiyeeshnish da, háálá doo yá'áshǫ' ánihiishłaaígíí łahgo át'éego bąąh tsíńdíkééz.

¹¹Bóhólníihii ání, Bábilan dine'é aláahgo binanit'a'í béédaołdzidígíí t'áadoo béédaołdzidí. T'áadoo béédaołdzidí, háálá biyaa hanihideeshniłgo yisdánihideeshnił biniyé nihił honishłǫ́.

¹²Nihaa a'ááh dínóozįįłígíí biniyé nihaa a'ááh dínéesįįł, áko t'áá nihí danihikéyahgóó nihéé'doołnih.

¹³Nidi, Díí kéyah doo bii' kéédahwiit'į́į da dooleeł, dadooniidgo, áko nihiDiyin God Bóhólníihii ánínígíí t'áadoo bik'eh dahosooł'įįdgóogo

¹⁴áádóó, Dooda, Ííjip kéyah góyaa dii'nééł; áadi doo anaa' hólǫ́ǫ da doo áádóó anaa'jí deenásts'aa' bidee' bee í'dílzoołí doo dadiits'a' da doo índa doo hodichin da doo; áadi kééhwiit'į́į doo, dadooniidgo,

¹⁵áko índa Júdah dine'é danohłíinii daohdziihígíí, Bóhólníihii ánínígíí deísínółts'ą́ą́': Ízrel dine'é biDiyin God t'áá ałtsoní bee Bóhólníihii kóní, Ííjip góyaa dii'néełgo áadi kéédahwiit'į́į dooleeł, danohsingo áádóó ákóyaa noonáago

¹⁶diltłish béédaołdzid yę́ę Ííjipdi bee nihik'eh hodidoodleeł, áko dichin nihaa níłnii'go béédaołdzid yę́ę Ííjip góyaa nihikéé' doołnihgo áadi dadínóohnééł.

¹⁷Áko diné t'áá ałtso Ííjipgóó dadii'néełgo áadi kéédahwiit'į́į dooleeł, danízingo yee hasht'e'nitsídaazkézígíí éí diltłish áádóó dichin índa naałniih yik'ee dínóonééł, áko doo yá'át'éehii hak'ijį' bidííchidígíí bits'ą́ą́dóó doo ła' jidoodzih da, índa doo ła' yisdázhdooltéeł da.

¹⁸Ízrel dine'é biDiyin God t'áá ałtsoní bee Bóhólníihii kóní, Jerúsalem kin haal'áagi kééhat'į́į́ nít'éé' yę́ę bich'į' sháhóóchįįdgo t'óó báhádzidgo atéshłaaígíigi át'éego, Ííjip kéyah biih woonáago t'áá ákót'éego t'óó báhádzidgo atínihideeshłíiłgo danihi'dódziih doo áádóó nihik'ee t'óó bił adahayói doo áádóó doo yá'áshǫ́ǫ́góó nihá yáti' doo índa t'óó nihá nahat'i' doo; kwe'é ts'ídá doo nídahwiidoołtséeł da.

¹⁹Bóhólníihii nihá haadzíi'go ání, Júdah dine'é daohdziihígíí Ííjip kéyahgóó dohnééh lágo. Díí jį́ t'áá bééhózínígo ts'ídá t'áá aaníí át'éegi bee nihił hweeshne'go nihił béédahoozį́į́'.

²⁰Ádinda'sohdlo'go Bóhólníihii nihiDiyin God bich'į' nidasisooł'a' yę́ędą́ą́' kódadohníigo, Bóhólníihii nihiDiyin God bich'į' nihá sodílzin, áko Bóhólníihii nihiDiyin God t'áá ádííniidígíí bee nihił hodíílnihgo bida'diilnííł, dadooniid ni'.

²¹Díí jį́ bee nihił hweeshne', nidi Bóhólníihii nihiDiyin God haadzí'ígíí éí yił nihaa shiníł'a'ígíí t'áadoo bik'eh dahosooł'įįd da.

²²Éí bąą k'ad t'áá aaníí nihił béédahodoozįįł: ákǫ́ǫ́ dii'néełgo áadi kéédahwiit'į́į dooleeł, danohsinídi diltłish áádóó dichin índa naałniih bik'ee dadínóohnééł.