Read Navajo JEREMIAH 47 Bible Online

JEREMIAH 47 - Navajo bible

JEREMIAH 47

¹Féro t'ah doo Géíza kin haal'á yik'eh didleehgóó Filístiya dine'é bídéét'i'go Diyin God yá halne'ii Jeremáíyah kót'éego Bóhólníihii bich'į' hanáánáádzíí'.

²Bóhólníihii kóní, Jó, náhookǫsdę́ę́' tó dah didoonah áádóó tó dooląąłgo kéyah t'áá át'éé nít'éé' índa bii' dahólóonii t'áá ałtso, kin haal'áii índa ákwii kéédahat'íinii bik'i didoolkǫǫł, diné choo'į́į́ł yíká nidadilghaash doo, áádóó ákwii kéyahgi diné kéédahat'íinii chandeidisi' doo.

³Bilį́į́' dahayóigo bikétł'in dadiits'a'go bitsindaabąąs bijáád naakiígíí bijáád dadiits'a'go t'áá łahjį' deíjeehgo hodiits'a'ígíí bąą azhé'é danilíinii bitah nidahaztseedígíí biniinaa bada'áłchíní dah deididoo'ish biniyé t'áadoo t'ą́ą́' nináhaazhjée' da.

⁴Háálá Filístiya dine'é ałtso nidootsiłgo Táir índa Sáídan kin haal'áii yíká anájahii daadziihígíí t'áá ałtso ádooldįįłgo bich'į' hoolzhish, áko Bóhólníihii éí Káftor kéyahdóó Filístiya dine'é daadziihígíí yidooghą́ą́ł.

⁵Géízagi éí hodiilkǫ'; Áshkelan kin haal'á íísdįįd. Honíts'aa'dóó daohdziihii, haash nízáágóó nida'ádiyołgéesh doo?

⁶Bóhólníihii bidiltłish nílíinii, hahgoshą' índa hasht'édidíít'eeł? Nizis biih náníkęęs; hasht'e'dinít'éego háánílyį́į́h.

⁷Áshkelan kin haal'á bik'ijį' índa tónteel bibąąhgóóígíí bik'ijį' na'anish dooleełgo Bóhólníihii ákót'éego bá haadzíi'goshą' haa yit'éego hasht'edít'ée doo?